Kisumwa Kyalondekesa Kwa Nzwá 12:1-17
12 Ku dyulu kwamoneka kijimbwete kyadikota: Kwa tukuluka muhatu wazwata o dikumbi, o mbeji yakexile bhoxi dya inama yê. Ku mútwe wê kwakexile kitundu, ku kitundu kwakexile kwinyi ni kiyadi kya jithéthembwa.
2 Mwene wemitine, yu wakexile mudikola mukonda dya jindolo ni misusu ya kuvwala.
3 Ngamono dingi kijimbwete kya mukwá ku dyulu. Ngamono kidikixi kyadikota kyakusuka, kyene kyexile ni sambwadi dya mítwe ni kwinyi dya jingela. Ku mítwe kwexile sambwadi dya itundu.
4 O mukila wê wakoko o mbandu ya katatu ya jithéthembwa ku dyulu, yu wa jitakula bhoxi mu ngongo. O kidikixi kyemana bhu pholo ya muhatu weji bhanduluka, n’a tene kujibha o mona kyoso kyanda mu vwala.
5 Mwene wa vwala mon’a diyala wanda tumina o ifuxi yoso ni mbasá ya felu. O mona a mukatula-nê ni lusolo anga a mwambata kwala Nzambi, bhu kyandu kyê.
6 O muhatu walengela mu kikangalakata mwa mu yudikila o kididi kwa Nzambi, phala ku mudikila mu midi ni hama jiyadi ni makwinyi a samanu a izuwa.
7 Ku dyulu anga kukala ita: Mingedi* ni jianju jê a lwa ita ni kidikixi. O kidikixi ni jianju jê ji lwa we ita.
8 Maji o kidikixi ni jianju jê a atolola.* Ku dyulu ki kwakexile dingi kididi phala ene.
9 Kyenyiki, o kidikixi, o nyoka yokulu amwixana Dyabhu ni Satanaji, yó wa mu nganala athu oso a tungu mu ngongo, a mu takula bhoxi. Mwene ni jianju jê a a takula bhoxi mu ngongo.
10 Ngevu dízwi dya swina dyatundu ku dyulu, dixi:
“Talesa! O Nzambi yetu wabhulula o mundu wê, o kutena kwê kwa dilondekesa, o Utuminu wê wamateka kyá, o ungana wa Kidistu yê, wamateka we kyá, mukonda o mutatedi wa jiphange jetu, yó wene mwatatela usuku ni mwanya bhu pholo ya Nzambi yetu, a mutakula mu ixi.
11 Ene a mutolola mukonda dya manyinga a Kambudi ni mukonda dya njimbu yabokele. Ene akexile polondo phala kubhakula o myenyu yâ ni kwajibha.
12 Mu kyenyiki, o dyulu disanguluke ni oso atungu-mu! Lamba dyenu mu ngongo ni mu musanza wa kalunga, mukonda o Dyabhu wa mi tulukila ni njinda yavulu, kuma mwene wejiya kwila o kithangana kyê kyatolo kyá.”
13 Kyoso o kidikixi kyamono kwila, a mutakula mu ngongo, wamateka kuzukutisa o muhatu wa vwala o mona.
14 Maji o muhatu a mubhana mabhabha ayadi a holokoko yadikota, n’a tene kutuka katé mu kikangalakata, o kididi kyê. Mu kikangalakata o muhatu wanda kala dikanga dya nyoka, kwenyóko mwene anda mudikila mu thembu, ni jithembu ni kaxaxi ka thembu.*
15 O nyoka anga ilusa menya avulu kala ngiji kudima dya muhatu phala mwene abobe mu ngiji.
16 Maji o ixi ya kwatekesa o muhatu, yajikula o dikanu dyê anga iminya o ngiji yalusile o kidikixi.
17 O kidikixi anga kikala ni njinda ya muhatu, kyayi mulwa ita ni yó asubhuka ku an’â* muhatu, o athu ene mu tumaka o itumu ya Nzambi, yó ala ni kikalakalu kya kubhana umbangi walungu ni Jezú.
