Iebhi o Njimbu Iambote ia Lungu ni Jingeleja?
Di Longe o Mak’â Nzambi
Iebhi o Njimbu Iambote ia Lungu ni Jingeleja?
O mbandu íii, ia-nda tambuijila o ibhuidisu i ua mesena o kuijiia, ia-nda kulondekesa se kuebhi ku u tena ku sanga o itambuijilu mu Bibidia iê. O Jimbangi ja Jihova, a mesena kiavulu ku di longa o itambuijilu íii n’eie.
1. O kuila o jingeleja joso jambote?
Mu jingeleja muala athu avulu a mesena ku bheza Nzambi ni kidi. Nzambi uejiia o athu enhá, ua mesena o mbote iâ. Maji o jingeleja jene mu bhanga ima iavulu ia iibha. (2 Kolindo 4:3, 4; 11:13-15) Kála kia londekesa, mu izuua íii, saí atuameni a jingeleja ene mu di ta mu ujibhangânga uene mu bhita ku mundu, ni mu ita, ni kuzangata o tuana.—Tanga Matesu 24:3-5, 11, 12.
Kuene ngó maubhezelu a iiadi—o ubhezelu ua kidi ni ubhezelu ua makutu. Kiene ué ki longa o Bibidia. Maji Jihova Nzambi, ua mesena kuila o athu ejiia o kidi kia lungu ni muéne.—Tanga 1 Timote 2:3-5.
2. Iebhi o njimbu iambote ia lungu ni jingeleja?
Nzambi ka mesena kuila o athu a a nganala ku jingeleja kioso kiamba kuila a zolo Nzambi, maji ka longa o kidi kia lungu ni muéne. O athu ala ku pholo mu jingeleja, a uabhela ku kala makamba a mundu ua tokala kua Satanaji o Diabhu. (Tiiaku 4:4; 1 Nzuá 5:19) O Mak’â Nzambi exana o kisangela kia jingeleja joso ja makutu mu dijina dia “Babilonha ia Dikota,” o dijina dia mbanza mua mateka o ubhezelu ua makutu, kioso kia bhiti o Dilúvio mu izuua ia Noué. Kua kambe ngó, Nzambi ua-nda buika o jingeleja jene mu nganala o mundu.—Tanga Dijingunuinu 17:1, 2, 5, 16, 17; 18:8, 23, 24.
3. Kiebhi kia-nda bheka Nzambi o ku sanguluka mu ixi?
O dizubhilu dia jingeleja ja makutu, njimbu iambote. Dia-nda bheka o ufolo ku mundu uoso. Nuka dingi a-nda nganala, mba ku uana o athu. Oso a-nda kala ku muenhu, a-nda bheza ngó o Nzambi ia kidi.—Tanga Izaia 11:9; Dijingunuinu 18:20, 21; 21:3, 4.
4. Ihi ia tokala ku bhanga o athu a mesena ku bheza mu kidi?
Jihova ka jimbi o athu ala mu jingeleja ja makutu ku mundu uoso. Muéne ua mu bhongolola o athu enhá mu ku a longa o kidi.—Tanga Mikeia 4:2, 5.
Jihova u tambulula ku muiji uê, o athu a xisa o jingeleja ja makutu. Né muene se o makamba metu, o muiji uetu, a tu zukutisa, kioso ki tu mateka o ku sidivila Jihova, tu nganhala kiavulu. Tu kala ni ukamba ni Nzambi, tu tokala ku “muiji” ua henda ua abhezi’ê, ku hádia tu tambula o muenhu ua kalelaku.—Tanga Marku 10:29, 30; 2 Kolindo 6:17, 18.
Phala kuijiia dingi, tanga o kibatulu 15, 16 kia divulu didi, a di bhange ku Jimbangi ja Jihova. Mu Kidi Ihi i Longa o Bibidia?
[Foto Muxinda ua tokala 26]
The Complete Encyclopedia of Illustration/ J. G. Heck