1, 2. Kiebhi Jezú kia suínisa o maxibulu mê mu kizuua kia mu fukunuine?

KIIADI kia maxibulu a Jezú akexile mu kuenda njila, phala kuia mu sanzala iala 11 dia ji kilómetulu, dikanga dia mbanza ia Jeluzaleme. Ene a luualele kiavulu mukonda, Jezú ua fuile, ene kejidile kuila Jezú a mu fukunuine. Mu kithangana kieniókio, Jezú ua tukuluka bhu kaxi kâ, iu ua kexile mu kuenda nau. Anga “ua andekela ku madivulu a Mozé, hé u bhita mu madivulu a jipolofeta joso, ni ku a jimbuila ima ioso iòsoneke mu Mikanda Ikôla ia Nzambi, ia mu tokalele muène.” (Luka 24:13-15, 27) Ene a divu kiambote, mixima iâ anga ia kexile mu lema moxi, mukonda muéne ua a ‘lomboluele kiambote’ o Mikanda Ikôla.—Luka 24:32.

² Mu usuku uenhó, o kiiadi kia maxibulu, a vutuka ku mbanza ia Jeluzaleme. Kioso ene kia sange o jipoxolo, a zuela ioso ia bhitile. Kia kexile hanji mu di zuelesa, Jezú ua tukuluka bhu kaxi kâ. O jipoxolo akexile ni uôma uavulu, ene akexile ué ni phata se uexile muene Jezú, mba kana. O Bibidia i jimbulula se kiebhi Jezú kia a suínisa: ‘Ua a jikula  o ilunji, phala ku tendela kiambote o Mikanda Ikôla.’—Luka 24:45.

3. Mukonda diahi tu tena o ku luuala mu sidivisu ietu kua Jihova, ni kiebhi ki tu tena o ku sanguluka?

³ Saí ithangana tu luuala kiavulu kala o maxibulu aiadi iá. Né muene tuala ni kikalakalu kiavulu mu sidivisu ia Jihova, maji né kiki, nange tu luuala kioso o athu kia dituna kuívua o njimbu iambote mu sidivisu ia ku boka. (1 Kolindo 15:58) Nange tu mona kuila, o athu u tua mu a longa o Bibidia ka mu kula mu nzumbi. A mukuá nange a dituna ku bheza Jihova. Kiebhi ki tu tena ku sanguluka mu ukunji uetu? O kima ki tena o ku tu kuatekesa o ku tendela kiambote, o ilomboluelu ia ifika ia Jezú. Tua-nda di longa ifika itatu, ni ku mona se mbote iebhi i tu tena o ku katula.

4. Ihi i lombolola o kifika kia Jezú kia lungu ni mukuni u zeka?

⁴ Tanga Marku 4:26-29. Ihi i lombolola o kifika kia Jezú kia lungu ni mukuni u zeka? O mukuni u lombolola o aboki a Utuminu, o mbutu ilombolola o njimbu ia boka ku athu ala ni muxima uambote. O mukuni u bhanga o ima kala ki bhanga o athu a mukuá, muéne “u zeka, u balumuka, ngoloxi ni kimene.” Tundé o kithangana kia kuna o mbutu, katé o kithangana kia ku bhongolola, ku bhita thembu. Mu ku bhita o thembu íii, ‘o mbutu-phe i sabhuka, anga i kula.’ Mu kiki, “o mavu a di imina ene” bhofele-bhofele. Kala ki bhita ni mbutu, o muthu u kula ué mu nzumbi, mba u zukama kua Jihova bhofele-bhofele. Muéne kioso kia kula katé kia sola ku sidivila Nzambi, ‘u bhana kibundu’ mu ku bhakula o muenhu uê kua Jihova, ni ku mu batizala.

5. Mukonda diahi Jezú ua bhange o kifika kia mukuni u zeka?

⁵ Mukonda diahi Jezú ua bhange o kifika kiki? Jezú ua mesena kuila, etu tuijiia kuma Jihova muéne u bhangesa o kidi ku kula ku mixima ia athu a “fuamena o muenhu.” (Ikalakalu 13:48; 1 Kolindu 3:7) Etu tu kuna ni ku tekela, maji ki tu tena ku bhangesa o mbutu ku kula ni lusolo. Kála o diiala dia kifika, etu ki tuejiia kiebhi ki kula o mbutu. Kioso ki tuia ni ku bhanga o ima ietu, nange ki tu mono o ku kula kua mbutu ia Utuminu ku muthu. Maji mu ku bhita  thembu, nange ki bhana kibundu, mu kiki, o dixibulu dia ubhe u kalakala kumoxi n’etu mu sidivisu ia ku bhongolola.—Nzuá 4:36-38.

6. Ihi i tua tokala kuijiia ia lungu ni ku kula kua dixibulu dia Bibidia?

⁶ Ihi i tu tena ku di longa mu kifika kiki? Kia dianga, tua tokala kuijiia kuila, etu ki tu tena ku bhangesa o maxibulu metu a Bibidia, ku kula mu nzumbi ni lusolo. Né muene tu bhanga ioso phala ku kuatekesa o dixibulu, maji ki tu tokala ku mu jijidika phala ku mu batizala. Mu veji dia kiki, tua tokala ku xikina kuila, o dixibulu, muene ua tokala o ku sola se ua-nda bhakula o muenhu uê kua Nzambi mba kana. Jihova ua-nda xikina ngó o ku di bhakula kuetu, se tu mu zola ni muxima uoso.—Jisálamu 51:12; 54:6; 110:3.

7, 8. (a) Madisá ebhi a mukuá a tu longa o kifika kia Jezú kia lungu ni mukuni u zeka? Bhana phangu. (b) Ihi i tu longa o kifika kiki, kia lungu ni Jihova ni Jezú?

⁷ Kia kaiadi, o ku tendela kiambote o dilomboluelu dia kifika kiki, kua-nda tu kuatekesa ku kamba o ku luuala, se tu mona kuila, o maxibulu metu ka mu kula mu nzumbi. Tua tokala ku kala ni muanhu. (Tiiaku 5:7, 8) Se tu bhanga ioso phala ku kuatekesa o dixibulu, maji o kidi ki ki tula ku muxima uê, ki kilombolola kuila tu alongexi a iibha. Jihova uehela ngó o mbutu ia kidi ku kula ku muxima ua muthu ua lenduka uala polondo phala ku lungulula o ukexilu uê. (Matesu 13:23) Mu kiki, ki tu tokala ué ku banza kuila tua mu di tunda kiambote mu ukunji, mukonda dia ku kuatekesa athu avulu ku a batizala. O kia mukuá, Jihova ka mono se tua mu di tunda kiambote mu ukunji mba kana, mukonda dia athu a xikina o njimbu i tu boka. Mu veji dia kiki, muéne u bhana valolo iavulu mu nguzu i tu bhanga phala ku boka o njimbu ku athu.—Tanga Luka 10:17-20; 1 Kolindu 3:8.

⁸ Kia katatu, etu ki tu tena kuijiia kioso o muthu kia lungulula o ima ku muxima uê. Mu kifika, saí dikaza kia kexile mu di longa o Bibidia ni mukunji ua jixi jengi, diambe kuila a mesenene ku kala aboki ka a batizala luua. O mukunji ua a tangela kuila, ene a tokalele kueha o ku buakula. O mukunji ua di uana kioso o dikaza kiambe kuila, a kexile kiá thembu sé ku xibha makanha. Ene a mono kuila, né muéne se a buakule makanha mu kasuekele, Jihova ueji ku a mona, ni kuila muéne ua zembe o mangonha. Mu kiki, ene ambe dingi kuila, se a mesenene eji buakula bhu pholo ia mukunji, mba eji kueha. Né muene o mukunji kejidile ihi ia bhangele o dikaza, o henda iâ kua Jihova ia a kuatekesa ku sola o kima kiambote.

9. Ihi ilombolola o kifika kia Jezú kia lungu ni uanda?

⁹ Tanga Matesu 13:47-50. Ihi ilombolola  o kifika kia Jezú kia lungu ni uanda? Jezú uambe kuila, o ku boka o njimbu ia Utuminu kua difu ni ku takula uanda ua dikota mu menha. Kála o uanda u kuata “jimbiji ngó joso-joso,” o sidivisu ietu ia ku boka, i sunga mazunda ni mazunda a athu a maukexilu oso. (Izaia 60:5) O mazunda ni mazunda a athu ene mu kuíza mu iônge ietu ia makota ni mu Lembalasa ia Kufua Kua Jezú, a londekesa kuila kiki kidi. O athu ala kala jimbiji “ja uabha,” a bhanga mbandu ku kilunga kia Jikidistá. A mukuá ala kala jimbiji “jaiibha,” Jihova ka a xikina.

10. Mukonda diahi Jezú ua bhange o kifika kia lungu ni uanda?

¹⁰ Mukonda diahi Jezú ua bhange o kifika kiki? O ku tungula o jimbiji ja uabha ku jiji ja iibha, ki ku lungu ni ku fundisa kua-nda bhita mu kithangana kia hadi ia dikota. Mu veji dia kiki, kua lungu ni kima ki bhita mu izuua ia sukidila-ku ia mundu iú. Jezú ua londekesa kuila, ko athu oso a uabhela o njimbu ia Utuminu, a-nda xikina ku kala ji selevende ja Jihova. Athu avulu aia mu iônge, mba u tua longo o Bibidia, ka mesena ku bhakula o mienhu iâ kua Jihova. (1 Jisobha 18:21) A mukuá kene múia dingi mu iônge. Saí minzangala a a sase ku jitata Jikidistá, ka di suínisa phala ku zola Jihova. Jezú uambe kuila, kala muthu mudietu, ua tokala ku sola o kima kia mesena o ku bhanga. Se tu sola kiambote mu maka iâ, Jihova ua-nda tu mona kala tu athu tuala ni ‘valolo.’—Ajeu 2:7.

11, 12. (a) Kiebhi ki tu tena ku katula mbote mu kifika kia lungu ni uanda? (b) Ihi i tu longa o kifika kiki, kia lungu ni Jihova ni Jezú?

¹¹ Ihi i tu tena o ku di longa mu kifika kia lungu ni uanda? O ku tendela o dilomboluelu dia kifika kiki, kua-nda tu kuatekesa o ku kamba ku luuala kiavulu se dixibulu dia Bibidia, mba mon’etu u dituna ku sidivila Jihova. Nange tua bhange ioso phala ku mu longa kiambote. O ku xikina ku di longa o Bibidia mba ku kudila ku muiji Kidistá, ki kiene ki bhangesa o muthu ku kala kamba dia Jihova. Se o muthu ka mesena ku xikina o ungana ua Jihova, muéne ka tena ku kala selevende ia Nzambi.

¹² O kuila kiki kilombolola kuila, o athu a xisa o kilunga, ka tena dingi ku vutuka? Mba kilombolola kuila, o muthu  ka bhakula luua o muenhu uê kua Jihova kala ni kidielelu? Kana, saí hanji kidielelu phala o muthu iú ku kituka kamba dia Jihova ande dia ku mateka o hadi ia dikota. Jihova u a tangela: “Ngi vutukidienu eme, phala eme ue ngi mi vutukile enu.” (Malakiia 3:7) Kiki kiene kia londekesa ué Jezú mu kifika kia lungu ni mona ua zange.—Tanga Luka 15:11-32.

13. Ihi ilombolola o kifika kia lungu ni mona ua zange?

¹³ Ihi ilombolola o kifika kia Jezú kia lungu ni mona ua zange? O tata ia henda mu kifika kiki, ilombolola o Tata ietu ia henda, Jihova. O mon’a ua zange o jimbote joso, ulombolola o athu a xisa o kilunga kia Nzambi. Ene ai mu bhanga mbandu ia mundu ua Satanaji ia difu kala “ixi ia dikanga,” iala dikanga dia Jihova. (Efezo 4:18; Kolose 1:21) Mu ku bhita thembu o athu enhá, a mona kuila a solo kia iibha, anga a sola ku vutuka kua Jihova. Phala ku bhanga kiki, ku bhinga nguzu, maji mukonda ene athu a lenduka ni kuila a diela ni muxima uoso o ima ia bhange, Jihova u a loloka, ni ku a xikina ni kisangusangu kioso.—Izaia 44:22; 1 Phetele 2:25.

14. Mukonda diahi Jezú ua bhange o kifika kia mona ua zange?

¹⁴ Mukonda diahi Jezú ua bhange o kifika kiki? Jezú ua londekesa kuila, Jihova ua mesena kuma, o athu oso a xisa o kilunga a vutuke kua Muéne. O tata mu kifika, ua dielele kuila o mon’ê ueji vutuka. Kioso muéne kia mono mon’ê, “hanji uala dikanga,” muéne uai ni ku lenga phala ku mu tambulula. O tata ua mesenene kuila o mon’ê u divua kiambote, mu ku vutuka ku bhata. O kifika kiki, kia tokala ku suínisa o athu a xisa o kilunga kia Jihova ku vutuka ni lusolo. O ukamba uâ ni Jihova nange ua  zoza, nange a kala ni jisonhi, mu kiki, a mona kuila ki bhonza o ku vutuka, maji o kima kiambote, o ku bhanga nguzu phala ku vutuka. Kioso o athu iá kia vutuka, Jihova, ni Jezú ni ji anju a sanguluka kiavulu.—Luka 15:7.

15, 16. (a) Ihi i tu di longa mu kifika kia Jezú kia lungu ni mona ua zange? Bhana ifika. (b) Ihi i tu longa o kifika kiki, kia lungu ni Jihova ni Jezú?

¹⁵ Ihi i tu tena o ku di longa mu kifika kia lungu ni mona ua zange? Tua tokala ku kaiela o phangu ia henda ia Jihova. Kioso muthu kia vutuka mu kilunga, ki tu tokala ku kala ‘muthu ua iuka kinéne,’ ni ku kamba ku mu sangesa. O ku bhanga kiki, ku tena ku zanga o ukamba uetu ni Jihova. (Ndongixi 7:16) O kima kia mukuá ki tu tena o ku di longa, o ku mona o muthu kala ‘mbudi ia jimbila,’ u tena o ku vutuka. (Jisálamu 119:176) Se tu sanga muthu ua xisa o kilunga, o kuila tua-nda bhanga ioso phala ku mu kuatekesa ku vutuka? O kuila tua-nda tangela o tufunga phala ku kuatekesa o muthu iú? Se tua tendela kiambote o dilomboluelu dia kifika kia Jezú, sé phata tua-nda bhanga kiki.

¹⁶ O athu a vutuka mu kilunga a sakidila o henda ia Jihova, ni kikuatekesu kia tambula mu kilunga. Saí phange ua xisa o kilunga mu 25 a mivu, uambe: “O ku sanguluka kuami tundé ki nga vutuka mu kilunga kuene mu di bandekesa, mukonda ngi tambula o kikuatekesu kia Jihova. (Ikalakalu 3:19) Athu oso a tu kuatekesa ni ku tu londekesa o henda! Lelu, ngala ni muiji uambote mu nzumbi.” Saí phange ia muhatu ua vutuka mu kilunga mu ku bhita mivu itanu, uambe: “Ki ngi tena ku zuela kiebhi ki nga divu mu ku mona o jiphange ku ngi londekesa o henda ia kidi ia zuela Jezú. O ku bhanga mbandu ku kilunga kia Jihova, kima kiala ni valolo ia dikota!”

17, 18. (a) Ihi i tu di longa ia lungu ni ifika itatu íii? (b) Ihi i tua tokala o ku bhanga?

¹⁷ Ihi i tu tena o ku di longa mu ifika itatu íii? Kia dianga, tua tokala kuijiia kuila, etu ki tu tena ku bhangesa o maxibulu metu a Bibidia ku kula mu nzumbi ni lusolo. Tuehela Jihova ku bhanga o kikalakalu kiki. Kia kaiiadi, ki tu tokala ku kingila kuila o athu oso a xikina ku di longa o Bibidia, a kituka jiselevende ja Jihova. Katatu, né muene athu avulu a xisa o kilunga kia Jihova, ki tu tokala ku kamba kidielelu kia kuila, ku hádia o athu enhá a tena ku vutuka. Se a vutuka, tua tokala ku a tambulula kiambote, mu ku londekesa o henda ia Jihova.

¹⁸ Etu enoso tua tokala ku suluka mu ku sota o kuijiia o ku tendela ni unjimu. Mu ku tanga o ifika ia Jezú dibhudise: ‘Ihi ilombolola o kifika kiki? Mukonda diahi a ki soneka mu Bibidia? Kiebhi ki ngi tena ku kumbidila o milongi ia kifika ku muenhu uami? Ihi i ngi longa ia lungu ni Jihova ni Jezú?’ Kioso ki tu bhanga kiki, tu londekesa kuila, tua mu tendela o dilomboluelu dia kifika kia Jezú.