Ikalakalu ya Jipoxolo 3:1-26
3 Mu ola ya kusamba mu divwa dya ola,* Phetele ni Nzwá akala mubanda mu tembulu.
2 Sayi diyala a mu vwalele kinema, akexile ku mwambata bhu mwelu wa tembulu. Izuwa yoso akexile mu mutula bhwa zukamene o mwelu, awixana Mwelu Wawabha, phala kubhinga jimola ku athu akexile mubokona mu tembulu.
3 Kyoso mwene kyamono Phetele ni Nzwá kubokona mu tembulu, wamateka kwabhinga jimola.
4 Maji Phetele ni Nzwá a mutale swí, Phetele wa mwambela: “Tutale.”
5 Mwene wa atonginina, mu kukingila kwila ene a mubhana kima.
6 Maji Phetele wa mwambela: “Eme ki ngala ni phalata né ulu, maji o kima kingala nakyu kyene ki ngi kubhana. Mu dijina dya Jezú Kidistu dya Nazalé, nga kutumu, balumuka ni wende!”
7 Kyenyiki, Phetele wa mukwata bhu lukwaku lwê lwa kadilu, yu wa mu balumuna. Mu kithangana kyenyókyo o inama yê ni tu pholephole twê twa disanze.
8 Mwene watuka, wemana, yu wamateka kwenda, anga ubokona kumoxi ni ene mu tembulu. Mwene wakexile mu kwenda, ni kutuka-tuka ni kuximana Nzambi.
9 Athu oso a mumono yu wenda, ni kuximana Nzambi.
10 O athu amono kwila, mwéne o diyala wakexile muxikama bhu Mwelu Wawabha wa tembulu, mu kubhinga jimola. Ene adiwana kyavulu ni kima kyabhitile ni mwene.
11 O diyala a musake, wakexile hanji mu dikwatenena kwa Phetele ni Nzwá. Kyenyiki athu oso adiwanene kyavulu, anga alenge phala kudisanga nawu mu mbandu a ixana Mbalanda ya Solomá.
12 Phetele kyamono o ima yiyi, wambela o mundu: “Enu akwetu mu akwa Izalayele, mukonda dyahi mwadiwana kyavulu ni kima kiki? Mukonda dyahi mwa mu tutonginina? O kwila o diyala didi twa mubhangesa kwenda mukutena kwetu, mba mukonda dya ubhezelu wetu kwa Nzambi?
13 O Nzambi ya Mbalahamu, ya Izake, ya Jakobo, ni Nzambi ya jikuku jetu, wa fumanesa o Selevende yê Jezú, yó mwa mubhakula, mwa mu ditunu bhu pholo ya Pilatu, sumbala mwene wamesenene ku mu jituna.
14 Enu-phe, mwaditunu o muthu wayuka, ukôla. Enu mwabhingi phala ku mibhana o diyala wexile kifumbe,
15 mu kiki, mwajibha o Mutwameni a musolo phala kubhana o mwenyu. Maji Nzambi wa mufukununa mw’alunga, o maka yá etu enyoso twa ejiya kyambote.
16 Bhukaxi ka dijina dyê, ni kixikanu kyetu mu dijina dyê, o diyala didi mwa mu mumona, mwa mwijiya we kyambote, wadisanze. O kixikanu kijila bhukaxi ka Jezú, kyabhangesa o diyala didi kudisanza bhu pholo yenu.
17 Kyenyiki phange jami, ngejiya kwila enu mwabhange o ima yiyi mukonda ki mwejidile o kima ki mwakexile mubhanga, kala kyabhangele o atwameni enu.
18 Mu kiki, Nzambi wakumbidila o ima yatangele mwene bhukaxi ka jipolofeta joso kwila, o Kidistu, watokalele kutala hadi.
19 “Kyenyiki dyelenu o ituxi, ni mu lungulule o ukexilu wenu,* phala o ituxi yenu a mi jimune-yu, Jihova n’a mi bhane o kubhanduluka,
20 mwene wanda ku mi tumikisa Kidistu, wa musolo phala enu, Jezú.
21 Mwene watokala kukala hanji ku dyulu, katé o kithangana kya Nzambi kuyukisa o ima yoso, kala kyazwelele bhukaxi ka jipolofeta jê ja fiyele mu ukulu.
22 Mu kidi, Mozé wambe: ‘Jihova Nzambi yenu, wanda mi bhana mwaxaxi ka jiphange jenu polofeta wasokela n’eme. Enu mwatokala kwívwa yoso yanda mitangela mwene.
23 Woso k’evu o ima yanda zwela o Polofeta yiyi, anda mu bwikisa mwaxaxi ka mundu.’
24 Tundé kwa Samuwele, katé kwa yó a mukayela, o jipolofeta joso ja zwelele we yalungu ni izuwa yenyiyi.
25 Enu mwala mu an’a jipolofeta, ni a kikutu kyabhangele Nzambi ni jikuku jenu, kyoso kyambele Mbalahamu kwila: ‘Miji yoso mu ixi anda ku ibesowala bhukaxi ka mon’é.’*
26 Nzambi kyazubha ku mi tukulwila o Selevende yê, wa dyangele ku mu tumikisa kokwenu phala ku mi besowala, mu kukwatekesa kala muthu mudyenu kuxisa o ukexilu wê wayibha.”
