Mukonda Dyahi Twa Bhindamena o Utuminu wa Nzambi?
Tunde ku dimatekenu, kyoso kya bhange o athu, o Mubhangi wetu, wavu o dijina dya Jihova, mwene ngó wexile mu Tumina. Mwene wexile mu tumina ni henda. Mwene wa bhange dibhata dya fwama—jaludim ya Edene—phala o athu kutunga-mu. Mwene we wa a bhana kudya kwavulu. Ki kyene ngó, mwene wa a bhana kikalakalu kyambote phala kukibhanga. (Dimatekenu 1:28, 29; 2:8, 15) O athu eji kala ni kutululuka kwa kidi, se a xikinine kusuluka ni ku a tumina kwa Nzambi.
Adá ni Eva a ditunu ku a Tumina kwa Nzambi
O Bibidya i zwela kwila, sayi anju ya bhukumuka, ku pholo dya kwenda a mwixana Satanaji, o Dyabhu, wambele kwila, Nzambi ka tokalele ku tumina o athu. Mwene wambele kwila, o athu eji sanguluka se a di tumina mudyâ, mu veji dya ku a tumina kwa Nzambi. O jitata jetu ja dyanga, Adá ni Eva, a xikina o makutu a Satanaji, a bhukumukina we Nzambi.—Dimatekenu 3:1-6; Dijingunwinu 12:9.
Mu kudituna ku a Tumina kwa Nzambi Adá ni Eva, a dibotesa o inzu yâ, o Palayízu, o kidyelelu kyâ kya mwenyu wa kalelaku ni kukala ni sawidi yambote. (Dimatekenu 3:17-19) O kima kya solo kubhanga, kya te o myenyu ya twana twa vwala mu kilwezu. O Bibidya yamba kwila, mukonda dya Adá kuta kituxi, “o kituxi kya bokona mu ngongo, o kituxi anga kya bheka o kufwa.” (Loma 5:12) O kituxi kya bhekela we kilwezu kyengi: “Muthu u kala mu kutumina mukwá phala ngó ku mu sengulula.” (Ndongixi 8:9) Mu izwelu yengi, kyoso athu kya di tumina mudya, o hadi i di bandekesa.
O ATHU A MATEKA O KUTUMINA
Nimilode wa bhukumukina Jihova
O muthu a mu tumbula mu Bibidya wa dyanga kutumina, Nimilode. Mwene wa bhukumukine we, wa londekesa kwila, ka mesenene kwila Jihova u tumina o athu. Tunde mu izuwa ya Nimilode, o athu ala ni kutena ene mu tumina mu ukexilu u bhonzesa o myenyu ya akwa. Midi jitatu ja mivu ku dima Sobha Solomá, wa soneka: “Ngi mona o masoxi ma yó oso a a tatesa, ni masoxi ma yá oso a kambe woso u a konda malamba; o kuswína kwala ku mbandu ya atatexi maji o ene-phe a a tatesa.”—Ndongixi 4:1.
O maka ene a moxi u twala na-u lelu. Ku muvu wa 2009, sayi divulu dya Nações Unidas dyambele kwila, o kutumina kya ibha kwa mu di bandekesa. O ukexilu yu wa kutumina, a mu u mona kala “fixi i bhangesa o ima ya ibha kubhita ku mundu lelu.”
O IMA YA-NDA LUNGULUKA!
O athu a bhindamena atumini ambote ni nguvulu yambote. Kiki kyene kya tu kanena o Mubhangi wetu!
Katé mwene ni jinguvulu ja mbote kene mu tena kuzubha o kubatula o maka a athu
Nzambi wa-nda bheka o Utuminu mba unguvulu, wa-nda bhingana o mawutuminu oso a athu, “wene wa kà xalela ni kutumina mu thembu joso katé ku hádya ni hádya.” (Daniyele 2:44) Yu wene o Utuminu wene mu bhinga mazunda a athu mu musambu. (Matesu 6:9, 10) Maji Nzambi ki mwene wa-nda kala o sobha wa unguvulu yu. Mu veji dya kiki, mwene wa solo muthu wexile kya mu ixi mumu, phala kukala Sobha. Nzambi wa solo nayi?
Eye Nange Wandawabhela we o Maka Yá
IBHWIDISU YA BIBIDYA YO TAMBWIJILE
O Kwila o Utuminu wa Nzambi Kima Kyala ku Muxima Wetu?
Ihi ilombolola o izwelu “o Utuminu wa Nzambi wala moxi dyenu”?
