Luk 3:1-38
3 Evaọ ukpe avọ ikpegbisoi ọrọ esuo Taibiriọs Siza, okenọ Pọntiọs Pailet ọ jọ ọba Judia, Herọd* ọ jọ osu ubrotọ Galili, Filip oniọvo riẹ ọ jọ osu ubrotọ Ituria gbe Trakonaitis, yọ Lisanias ọ jọ osu ubrotọ Abilini,
2 evaọ oke Anas olori izerẹ na gbe orọ Kayafas, ẹme Ọghẹnẹ o te bru Jọn ọmọ Zekaraya ze evaọ obọ udhude.
3 Fikiere ọ tẹ nya iwhre kpobi nọ e wariẹ Jọdan họ, bi whowho inọ jọ ahwo a họ-ame ro dhesẹ nọ a kurẹriẹ no jẹ gwọlọ erọvrẹ izieraha,
4 wọhọ epanọ a kere evaọ obe Aizaya ọruẹaro na inọ: “Uvou ohwo jọ nọ o bi se evaọ obọ udhude: ‘Wha ruẹrẹ edhere Jihova* kpahe! Ru idhere riẹ liọ.
5 A rẹ te lẹ ukiekpotọ kpobi di, je kporo igbehru gbe ikpehru kpobi fihọ otọ praprarapra; a ti ru idhere egẹgẹle liọ, je ru idhere nọ e rrọ kothi kothi fihọ riẹriẹriẹ;
6 ahwo kpobi a te ruẹ esiwo Ọghẹnẹ.’”*
7 Fikiere, o te mu ogbotu ahwo nọ a be nya bru rie ze te họ-ame na họ ẹta kẹ nọ: “Whai emọ eriwhẹ, ono ọ vẹvẹ owhai unu nọ wha dhẹ no ofu nọ ọ be tha na?
8 Fikiere, wha mọ ibi nọ i re dhesẹ ekurẹriẹ. Wha du jọ udu rai ta ha inọ, ‘Abraham họ ọsẹ mai.’ Keme mẹ be ta kẹ owhai nọ Ọghẹnẹ ọ rẹ sai zihe itho nana ruọ emọ kẹ Abraham.
9 Evaọ uzẹme, ewhe na ọ rrọ otọ ire na no. Fikiere, ure kpobi nọ o be mọ emamọ ubi hi, a re ti koi fihọ otọ a ve gbolo iei fihọ erae.”
10 Ogbotu na a jẹ nọe nọ: “Kọ eme ma re ru?”
11 Ọ vẹ kpahe kẹ ae nọ: “Jọ ohwo nọ o wo iwu ivẹ ọ rehọ ọjọ kẹ ohwo nọ o wo ho, jọ ọnọ o wo emuore o ru epọvo na re.”
12 Makọ enọ i re mi osa-uzou a nyaze re a họ-ame, yọ a jẹ nọe nọ: “Owuhrẹ, kọ eme ma re ru?”
13 Ọ tẹ ta kẹ ae nọ: “Wha re mi vrẹ unuigho osa-uzou nọ a fihọ họ.”
14 Epọvo na re, elakpa-ẹmo a jẹ nọe nọ: “Kọ eme ma re ru?” Ọ tẹ ta kẹ ae nọ: “Wha mu kpokpo* ohwo ọvo ho hayo bọwo ohwo ọvo ota ha, rekọ jọ osa rai o da owhai ẹro.”
15 Whaọ ahwo na a je rẹro yọ aikpobi a jẹ jọ udu rai roro kpahe Jọn inọ, “Kọ o sae jọnọ ọye họ Kristi na?”
16 Jọn ọ tẹ kuyo na, be ta kẹ ae kpobi nọ: “Mẹ be rọ ame họ owhai ame, rekọ ọnọ ọ ga vi omẹ ọ be nyaze, me te epanọ mẹ sae rọ ra ifi eviẹ riẹ hẹ. Ọ te rehọ ẹzi ọfuafo gbe erae rọ họ owhai ame.
17 O kru eshọvẹle nọ ọ rẹ rọ frẹ erara no eka họ obọ riẹ re o ti ru oria nọ ọ rẹ jọ kpare eka riẹ fuafo tẹtẹtẹ, re o koko eka na họ oria nọ ọ rẹ jọ rawo eware, rekọ ọ vẹ te rehọ erae nọ a rẹ sai furie he rọ mahe ehọrọ na.”
18 Jọn ọ kẹ ehrẹ efa buobu jẹ ruabọhọ whowho usi uwoma kẹ ahwo na.
19 Rekọ fikinọ Jọn ọ jẹ whọku Herọd osu ubrotọ na fiki Herodias, aye oniọvo riẹ, gbe eware imuomu kpobi nọ Herọd o ru,
20 Herọd o te ru onana bae: Ọ kare Jọn fihọ uwou-odi.
21 Whaọ, okenọ ọ jẹ rọ họ ahwo na kpobi ame na, ọ họ Jesu ame re. Nọ Jesu ọ jẹ lẹ, odhiwu o te rovie,
22 ẹzi ọfuafo na nọ ọ wọhọ epaọ erueruẹ o te no ehru ze kie mu ei, urru jọ u te do no obọ odhiwu ze inọ: “Whẹ yọ Ọmọ mẹ, oyoyou mẹ na, mẹ jẹ owhẹ rehọ.”
23 Nọ Jesu o mu iruo riẹ họ ọ jọ oware wọhọ ikpe ọgba, yọ a rehọ e riẹ wọhọọmọ Josẹf,ọmọ Hilai,
24 ọmọ Mathat,ọmọ Livai,ọmọ Mẹlki,ọmọ Janai,ọmọ Josẹf,
25 ọmọ Matathayas,ọmọ Emọs,ọmọ Nahum,ọmọ Esli,ọmọ Nagai,
26 ọmọ Mayat,ọmọ Matathayas,ọmọ Semein,ọmọ Josẹk,ọmọ Joda,
27 ọmọ Joanan,ọmọ Risa,ọmọ Zerubabẹl,ọmọ Shẹltiẹl,ọmọ Neri,
28 ọmọ Mẹlki,ọmọ Adi,ọmọ Kosam,ọmọ Elmadam,ọmọ Er,
29 ọmọ Jesu,ọmọ Ẹlieza,ọmọ Jorim,ọmọ Mathat,ọmọ Livai,
30 ọmọ Simiọn,ọmọ Judas,ọmọ Josẹf,ọmọ Jonam,ọmọ Ẹliakim,
31 ọmọ Melea,ọmọ Mena,ọmọ Matatha,ọmọ Netan,ọmọ Devidi,
32 ọmọ Jẹsi,ọmọ Obẹd,ọmọ Boaz,ọmọ Salmọn,ọmọ Nashọn,
33 ọmọ Aminadab,ọmọ Ani,ọmọ Hezrọn,ọmọ Pẹrẹz,ọmọ Juda,
34 ọmọ Jekọp,ọmọ Aiziki,ọmọ Abraham,ọmọ Tera,ọmọ Nehọ,
35 ọmọ Serug,ọmọ Reu,ọmọ Pẹlẹg,ọmọ Eba,ọmọ Shila,
36 ọmọ Kẹnan,ọmọ Apakeshad,ọmọ Shẹm,ọmọ Noa,ọmọ Lemẹk,
37 ọmọ Methusẹla,ọmọ Enọk,ọmọ Jarẹd,ọmọ Mahalaleẹl,ọmọ Kẹnan,
38 ọmọ Enọsh,ọmọ Sẹt,ọmọ Adam,ọmọ Ọghẹnẹ.
Eme-Obotọ
^ Koyehọ, Herọd Antipas.
^ Rri oria Otofa Eme.
^ Hayo “ọnọ Ọghẹnẹ o ti ro siwi ahwo.”
^ Hayo “gboro oware mi.”
