Kpohọ eme nọ e riẹ eva

Kpohọ oria izoẹme

Luk 9:1-62

  • Ọ kẹ Ikpegbivẹ na ehrẹ kpahe usi uwoma ota (1-6)

  • Usi kpahe Jesu o kẹ Herọd idhọvẹ (7-9)

  • Jesu ọ kuọ 5,000 (10-17)

  • Pita ọ ta nọ Jesu họ Kristi na (18-20)

  • Jesu ọ ta kpahe uwhu riẹ (21, 22)

  • Epanọ a rẹ rọ jọ uvi olele (23-27)

  • Jesu ọ rẹriẹ (28-36)

  • O siwi ọmọzae nọ ẹzi ogbegbe ọ jọ oma (37-43a)

  • O siwi ọmọzae nọ ẹzi ogbegbe ọ jọ oma (43b-45)

  • Ilele na a vravro kpahe ohwo nọ ọ mae rro (46-48)

  • Ohwo kpobi nọ ọ be wọso omai hi ọ rrọ abọ mai (49, 50)

  • Iwhre ahwo Sameria jọ a dede Jesu rehọ họ (51-56)

  • Oware nọ a gwọlọ mi ọnọ o bi lele Jesu (57-62)

9  Kẹsena o te se Ikpegbivẹ na kokohọ, ọ tẹ kẹ ae ogaga gbe udu nọ a re ro le idhivẹri kpobi no je siwi eyao.  O te vi ai re a nyai whowho Uvie Ọghẹnẹ, re a je siwi ahwo,  yọ ọ ta kẹ ae nọ: “Wha du wha oware ovuovo lele oma kpohọ erẹ na ha, makọ ubiọkpọ hayo ẹkpa emuore hayo ebrẹdi hayo ugho;* hayo wha iwu ivẹ* lele oma ha.  Rekọ evaọ oria kpobi nọ wha jọ ruọ uwou, wha jọ etẹe bẹsenọ wha re no oria yena.  Yọ evaọ oria kpobi nọ ahwo a jọ dede owhai rehọ họ, nọ wha te bi no ẹwho yena, wha nuhu ovu nọ ọ rrọ awọ rai no re o jọ isẹri kẹ ae.”  Kẹsena a tẹ nyavrẹ, a tẹ nya ẹkwotọ na duwu no iwhre ruọ iwhre, bi whowho usi uwoma na je bi siwi ahwo evaọ oria kpobi.  Whaọ, Herọd* osu ubrotọ na o yo kpahe eware kpobi nọ e jẹ via na, eware e tẹ jariẹ aro gedegede gaga keme ahwo jọ a jẹ ta nọ Jọn ọ kparoma no uwhu ze na,  rekọ efa e jẹ ta nọ Elaeja o zihe ze no, yọ efa e be ta nọ omọvo eruẹaro anwae na ọ kparoma ze na.  Herọd ọ tẹ ta nọ: “Me bru Jọn uzou. Kinọ ono na me bi yo eware nana kpahe na?” Fikiere ọ tẹ jẹ daoma re ọ ruẹ e riẹ. 10  Nọ ikọ na a zihe ze, a tẹ niyẹrẹ eware kpobi nọ a ru kẹ Jesu. Ọ tẹ ta kẹ ae inọ a lele iei, ae ọvo a te kpohọ ẹwho nọ a re se Bẹtsaida. 11  Rekọ nọ ogbotu na a riẹ obonọ ọ nya, a tẹ nya bru rie. O te dede ai rehọ sasasa, o te mu ai họ ẹta kẹ kpahe Uvie Ọghẹnẹ, o te je siwi enọ e jẹ mọ. 12  Whaọ oke u te muhọ ekpo. Ikpegbivẹ na a tẹ nya bru rie ze a tẹ ta kẹe nọ: “Siobọno ogbotu na re a kpohọ ewho gbe iwhre nọ e kẹle onana nyae gwọlọ eria nọ a rẹ wezẹ gbe oware nọ a rẹ re, keme ahwo a be rria oria nana ha.” 13  Rekọ ọ tẹ ta kẹ ae nọ: “Wha kẹ ae oware nọ a rẹ re.” A tẹ ta nọ: “Ikulu ebrẹdi isoi, gbe imiyei ivẹ ọvo ma wo, ajokpanọ ma rẹ nyae dẹ emu kẹ ahwo nana kpobi.” 14  Ezae nọ e jọ etẹe a bu te oware wọhọ idu isoi (5,000). Rekọ ọ tẹ ta kẹ ilele riẹ nọ: “Wha ru re a keria ẹkuẹko, ẹko ọvuọvo oware wọhọ udhuvẹ-gbikpe.” 15  A te ru ere, aikpobi a tẹ keria. 16  Nọ ọ rehọ ebrẹdi isoi gbe imiyei ivẹ na, o te rri ehru, ọ tẹ lẹ fihọ ae. Kẹsena o te bru ebrẹdi na ibribro ọ tẹ be rehọ ae kẹ ilele na re a rehọ ae kẹ ogbotu na. 17  Ahwo na kpobi a tẹ re eva vọ, a tẹ kwa ewẹ nọ i kiọkọ koko, e vọ ikete ikpegbivẹ. 18  Oke ofa nọ ọye ọvo ọ jọ oria jẹ lẹ, ilele na a tẹ nya bru rie ze, ọ tẹ nọ ae nọ: “Ono ogbotu na a be ta nọ mẹ rrọ?” 19  A tẹ kẹe uyo nọ: “Jọn Ọhọahwo-Ame na, rekọ efa e be ta nọ Elaeja, yọ efa e be ta nọ omọvo eruẹaro anwae na ọ kparoma ze na.” 20  Ọ tẹ ta kẹ ae nọ: “Kọ owhai, ono wha roro nọ mẹ rrọ?” Pita ọ tẹ kuyo nọ: “Whẹ họ Kristi na, ọnọ Ọghẹnẹ o vi ze.” 21  Ọ tẹ vẹvẹ ae unu gaga inọ a ta kẹ ohwo ọvo kpahe onana ha, 22  rekọ ọ tẹ ta nọ: “O gba Ọmọ ohwo họ nọ ọ rẹ ruẹ uye eware buobu, yọ ekpako na, ilori izerẹ na, gbe otu ikere-obe na a te se iẹe, a ve ti kpei, ọ vẹ te kparoma ze evaọ ẹdẹ avọ esa.” 23  Kẹsena ọ tẹ be ta kẹ ai kpobi nọ: “Otẹrọnọ ohwo jọ ọ gwọlọ lele omẹ, jọ ọ vro omobọ riẹ jẹ wọ ure-oja* riẹ kẹdẹ kẹdẹ je lele omẹ ẹsikpobi. 24  Keme ohwo kpobi nọ ọ be gwọlọ siwi uzuazọ riẹ, uzuazọ riẹ u ti vru, rekọ ohwo kpobi nọ uzuazọ riẹ u vru fiki mẹ ọ te wariẹ woi. 25  Evaọ uzẹme, didi ewoma o rẹ jọ kẹ ohwo otẹrọnọ o wo akpọ na soso rekọ ọ wha uye se omariẹ hayo uzuazọ riẹ u te vru? 26  Keme ohwo kpobi nọ oma o be vo fiki mẹ gbe fiki eme mẹ, oma ohwo yena o te vo Ọmọ ohwo okenọ ọ te nyaze evaọ oruaro riẹ gbe orọ Ọsẹ na avọ ikọ-odhiwu erẹri na nọ e rrọ kugbei. 27  Rekọ uzẹme mẹ be ta kẹ owhai inọ, ejọ e rrọ etenẹ na nọ i ti whu vievie he ajokpanọ a ruẹ Uvie Ọghẹnẹ no tao.” 28  Evaọ uzẹme, nọ oware wọhọ edẹ eree e vrẹ no nọ ọ rọ ta eme nana, ọ tẹ rehọ Pita, Jọn, gbe Jemis kugbe oma, a tẹ gadiẹ kpohọ ehru ugbehru na nyae lẹ. 29  Epanọ ọ jẹ rọ lẹ na, ovao riẹ u te nwene, iwu riẹ e tẹ jọ fuafo je lo nwranwranwra. 30  Ezae ivẹ i te je lele iei ta ẹme; Mosis avọ Elaeja. 31  Ezae nana a romavia avọ oruaro, a tẹ be ta kpahe ezihe vrẹ riẹ, onọ o ti rugba kẹle evaọ obọ Jerusalẹm. 32  Whaọ, owezẹ o vọ Pita avọ ilele ivẹ edekọ na aro, rekọ nọ aro rai ọ sasa ziezi no, a tẹ ruẹ Jesu evaọ oruaro riẹ gbe ezae ivẹ na nọ i dikihẹ kugbei. 33  Epanọ ezae ivẹ na a jẹ rọ nyase iẹe ba na, Pita ọ tẹ ta kẹ Jesu nọ: “Owuhrẹ, u woma nọ ma rọ rrọ etenẹ. Fikiere joma bọ iwou-udhu esa fihọ etenẹ, ọjọ rọkẹ owhẹ, ọjọ rọkẹ Mosis, ọjọ rọkẹ Elaeja.” Ọ riẹ ẹme nọ ọ jẹ ta na ha. 34  Rekọ nọ ọ jẹ ta eme nana, ẹgho ọ tẹ romavia, o te mu ai họ eruru. Nọ ẹgho na o ruru ai no, ozọ u te mu ai. 35  Urru jọ u te do no ẹgho na ze, be ta nọ: “Ọnana họ Ọmọ mẹ, ọnọ mẹ salọ. Wha gaviezọ kẹe.” 36  Epanọ urru na o jẹ rọ ta ẹme na, a tẹ ruẹ Jesu ọvo nọ o kiọkọ. Rekọ evaọ edẹ yena a vuẹ ohwo ọvo eware nọ a ruẹ na ha. 37  Okiokiọ riẹ nọ a nwrotọ no ugbehru na ze no, ogbotu obuobu a tẹ nya bru rie ze. 38  Ọzae jọ ọ tẹ jọ udevie ogbotu na bo gaga inọ: “Owuhrẹ, mẹ be lẹ owhẹ nọ rri ọmọzae mẹ keme ọye ọvo me yẹ. 39  Rri! ẹzi ogbegbe jọ o re kru rie, ẹsiẹvo na o ve bo, o ve ru ei kie ewawa avọ ivuhu nọ i re no unu riẹ ze, yọ udugaga o re ro noi oma nọ ọ tẹ nwae oma no. 40  Mẹ lẹ ilele ra inọ a le ẹzi ogbegbe na no, rekọ a sai ru ei hi.” 41  Jesu ọ tẹ ta nọ: “O oge nọ ọ kare ẹrọwọ jẹ vọ avọ uzioraha, ẹvẹ mẹ rẹ jọ kugbe owhai kri te je thihakọ kẹ owhai kri te? Rehọ ọmọ ra na ziọ etenẹ.” 42  Rekọ, epanọ ọ jẹ rọ nya bru Jesu ze dede na, idhivẹri na ọ tẹ rehọ iẹe fotọ, ru ei kie ewawa bi nuhu iei zighi zighi. Rekọ Jesu ọ tẹ whọku ẹzi ogbegbe na, o te siwi ọmọzae na jẹ rehọ iẹe kẹ ọsẹ riẹ. 43  Akpọ o te gbe ai kpobi unu kpahe ogaga ulogbo Ọghẹnẹ. Epanọ eware kpobi nọ o je ru i je ro gbe ai kpobi unu na, ọ tẹ ta kẹ ilele riẹ nọ: 44  “Wha gaviezọ ziezi jẹ kareghẹhọ eme nana, keme a ti vivie Ọmọ ohwo họ obọ ahwo.” 45  Rekọ a wo otoriẹ ẹme nọ ọ jẹ ta na ha. Evaọ uzẹme, a ko riẹ dhere no ae re a siọ otoriẹ ẹme na ba ewo, yọ ozọ u je mu ai re a nọe kpahe ẹme nana. 46  Kẹsena avro ọ tẹ romavia evaọ udevie rai kpahe ohwo nọ ọ mae jọ udevie rai rro. 47  Nọ Jesu ọ riẹ oware nọ a be jọ udu rai roro, ọ tẹ rehọ ọmaha jọ dikihẹ abotọ riẹ, 48  ọ tẹ ta kẹ ae nọ: “Ohwo kpobi nọ o dede ọmaha nana rehọ fiki odẹ mẹ o dede omẹ rehọ re; yọ ohwo kpobi nọ o dede omẹ rehọ, o dede Ọnọ o vi omẹ ze rehọ re. Keme ohwo nọ o ru omariẹ wọhọ ọnọ ọ mae kawo evaọ udevie rai kpobi họ ọnọ ọ rrọ ruaro.” 49  Jọn ọ tẹ ta kẹe nọ: “Owuhrẹ, ma ruẹ ohwo jọ nọ ọ jẹ rọ odẹ ra le idhivẹri no, yọ ma daoma re ma whaha iẹe keme ọ rrọ usu mai nọ i bi lele owhẹ na ha.” 50  Rekọ Jesu ọ tẹ ta kẹe nọ: “Wha whaha iẹe he, keme ohwo kpobi nọ ọ be wọso owhai hi ọ rrọ abọ rai.” 51  Nọ oke nọ a te rọ rehọ iẹe vrẹ kpohọ ehru o be kẹle no, ọ tẹ gbaemu nọ o re kpobọ Jerusalẹm. 52  Fikiere, o te vi ilele riẹ jọ karo. A tẹ nyavrẹ, a tẹ ruọ evaọ iwhre ahwo Sameria jọ re a ruẹrẹ eware họ kẹe. 53  Rekọ ahwo iwhre na a dede Jesu rehọ họ keme ọ gba riẹ mu nọ o re kpobọ Jerusalẹm. 54  Nọ Jemis avọ Jọn a ruẹ onana, a tẹ ta nọ: “Olori, kọ whọ gwọlọ nọ ma se erae no obọ odhiwu ze te mahe ae no?” 55  Rekọ o te kuomarẹriẹ ọ tẹ whọku ae. 56  Fikiere a tẹ nya kpohọ iwhre ọfa. 57  Whaọ, epanọ a rọ jọ edhere jẹ nyavrẹ na, ohwo jọ ọ tẹ ta kẹe nọ: “Me ti lele owhẹ kpohọ oria kpobi nọ whọ be nya.” 58  Rekọ Jesu ọ tẹ ta kẹe nọ: “Iruakọ i wo ighogho, evra obọ ehru i wo iwou, rekọ Ọmọ ohwo o wo oria nọ ọ rẹ rehọ uzou riẹ kpahe he.” 59  Kẹsena ọ tẹ ta kẹ ọfa nọ: “Jọ olele mẹ.” Ọzae na ọ tẹ ta nọ: “Olori, kẹ omẹ uvẹ tao re mẹ nyai ki ọsẹ mẹ.” 60  Rekọ ọ tẹ ta kẹe nọ: “Jọ enọ i whu no i ki enọ i whu no, rekọ nya re whọ jọ oria kpobi whowho Uvie Ọghẹnẹ.” 61  Ọfa ọ tẹ jẹ ta nọ: “Me ti lele owhẹ, Olori, rekọ kẹ omẹ uvẹ tao re mẹ nyai yere ahwo uviuwou mẹ inọ a jọ tou.” 62  Jesu ọ tẹ ta kẹe nọ: “Ohwo kpobi nọ o kru ẹwhẹ no nọ o re rri eware obemu o te kẹ Uvie Ọghẹnẹ hẹ.”

Eme-Obotọ

Evaọ Griki, “isiliva.”
Hayo “ewu ọfa.”
Koyehọ, Herọd Antipas.
Rri oria Otofa Eme.