Luk 8:1-56

  • Eyae nọ i je lele Jesu (1-3)

  • Ọtadhesẹ ọkibi na (4-8)

  • Oware nọ Jesu ọ rọ rehọ etadhesẹ ta ẹme (9, 10)

  • Otofa ọtadhesẹ ọkibi na (11-15)

  • A rẹ rọ ukpẹ tu a vẹ rọ oware ruru ei hi (16-18)

  • Oni gbe inievo Jesu (19-21)

  • Jesu o ru ofou ọgaga serihọ (22-25)

  • Jesu o le idhivẹri ruọ owa isi (26-39)

  • Ọmọtẹ Jairọs; aye jọ ọ rọ obọ te iwu ehru Jesu (40-56)

8  Nọ omoke jọ o vrẹ no, o te je no ẹwho ruọ ẹwho gbe iwhre ruọ iwhre, be ta je whowho usi uwoma Uvie Ọghẹnẹ. Yọ Ikpegbivẹ na a jọ kugbei, 2  eyae jọ e jọ kugbei re, enọ o le izi imuomu no oma je siwi eyao rai: Meri nọ a je se Magdalini, ọnọ idhivẹri ihrẹ i no oma ze; 3  Joana aye Kuza, ọnọ ọ jẹ rẹrote eyero Herọd; Suzana; gbe eyae efa buobu enọ e jẹ rehọ eware obọrai gbodibo kẹ ae. 4  Whaọ, nọ ogbotu obuobu a kuomagbe enọ i lele i rie no ẹwho avọ ẹwho ze na, ọ tẹ rehọ ọtadhesẹ ta ẹme kẹ ae inọ: 5  “Ọkibi jọ ọ nyae kọ ibi riẹ. Epanọ ọ jẹ rọ kọ na, ejọ i te kie fihọ akotọ edhere, a te thihi ai nyaotọ, evra obehru e tẹ soro ae lọ. 6  Ejọ i kie fihọ ehru utho, nọ e dhẹze, i te whu no fikinọ i wo ame he. 7  Efa i kie fihọ udevie idhigbo, nọ idhigbo na avọ ekakọ na e rro ze kugbe, idhigbo na e tẹ lẹliẹ ekakọ na ko no. 8  Rekọ ibi efa i kie fihọ emamọ otọ, nọ e dhẹze, e tẹ mọ ẹko udhusoi.” Nọ ọ ta eme nana no, ọ tẹ kpare urru ta nọ: “Jọ ọnọ o wo ezọ nọ o re ro yo, o yo.” 9  Rekọ ilele riẹ a tẹ nọe otofa ọtadhesẹ nana. 10  Ọ tẹ ta nọ: “Whai họ enọ Ọghẹnẹ ọ kuvẹ re wha wo otoriẹ eware ididi ọrẹri Uvie Ọghẹnẹ na, rekọ rọkẹ edekọ na, etadhesẹ na ọvo a re yo ba, re dede nọ a bi rri, a rẹ ruẹ hẹ, dede nọ a bi yo, a re wo otoriẹ hẹ. 11  Otofa ọtadhesẹ na ona: Ibi na họ ẹme Ọghẹnẹ. 12  Ibi nọ i kie fihọ akotọ edhere na họ enọ i yo ẹme na, kẹsena Ẹdhọ ọ tẹ nyaze, ọ tẹ tọlọ ẹme na no udu rai no re a seba ẹrọwo, a gbe siwi ai hi. 13  Ibi nọ i kie fihọ ehru utho na họ enọ i yo ẹme na, a tẹ rọ oghọghọ jẹe rehọ, rekọ a wo awọ họ. A rọwo ẹme na evaọ omoke jọ, rekọ nọ odawọ u te ai, a te kie. 14  Kpahe enọ i kie fihọ udevie idhigbo na, enana họ enọ i yo ẹme na, rekọ awaọruọ akpọ, efe, gbe omaweromẹ akpọ nana i te reghe ai, e tẹ lẹliẹ ẹme na ko riẹriẹriẹ evaọ oma rai, ibi nọ a mọ e gbẹ sae who ho. 15  Kpahe enọ i kie fihọ emamọ otọ na, enana họ enọ e rehọ emamọ udu gaviezọ kẹ ẹme na, a te kru rie fihọ udu rai jẹ rehọ ithihakọ mọ ibi. 16  “Ohwo ọvo ọ rẹ rọ ukpẹ tu ọ vẹ rọ oware ruru ei hayo fi ei họ otọ ehwa ha, rekọ o re fi ei họ ehru adada-ukpẹ re enọ e be ruọ uwou na a sae ruẹ elo na. 17  Keme oware ovo nọ a sino nọ o te fere via ha o rrọ họ hayo oware ovo nọ a nabe kodhere nọ a te riẹ hẹ hayo nọ o te bẹre via ha o rrọ họ. 18  Fikiere, wha muẹrohọ epanọ wha be gaviezọ, keme ohwo kpobi nọ o wo a rẹ te kẹe efa kugbe, rekọ ohwo nọ o wo ho, a ti mi ei makọ onọ o roro nọ o wo na.” 19  Oni riẹ avọ inievo riẹ a tẹ nya bru rie ze, rekọ a jẹ sai tei oma ha fiki ogbotu na. 20  Fikiere ahwo a tẹ ta kẹe nọ: “Oni ra avọ inievo ra a dikihẹ obọ otafe be gwọlọ ruẹ owhẹ.” 21  Ọ tẹ kpahe kẹ ae nọ: “Oni mẹ gbe inievo mẹ họ enana nọ i bi yo ẹme Ọghẹnẹ je bi koko iei na.” 22  Evaọ ẹdẹjọ, tei te ilele riẹ a tẹ ruọ okọ, ọ tẹ ta kẹ ae nọ: “Joma bi kpohọ abọdekọ awa na.” A te muhọ ebi vrẹ. 23  Rekọ epanọ a je ro bi vrẹ na, ọ tẹ wezẹ no. Ofou ọgaga o te muhọ efou evaọ awa na, ame o te bi kpo ruọ okọ na, te epanọ o rọ kẹle ezue. 24  Fikiere a tẹ nya bru rie, a tẹ rọwo iẹe no owezẹ ze inọ: “Owuhrẹ, Owuhrẹ, ewhu ma rrọ na!” Ọ tẹ kpama ọ tẹ whọku ofou gbe ẹkporo na, i te serihọ, oria kpobi o tẹ fọ rirẹ. 25  Kẹsena ọ tẹ nọ ae nọ: “Kọ ẹrọwọ rai ọ rrọ?” Rekọ ozọ u te mu ai gaga, akpọ o te gbe ai unu, a tẹ be ta kẹ ohwohwo nọ: “Oghẹrẹ ohwo vẹ ọna? Ọ rẹ ta ẹme kẹ ofou gbe abade dede, i ve yoẹme kẹe.” 26  A te bi kpahe ubrotọ ahwo Gẹrasa, onọ o rrọ abọdekọ Galili. 27  Nọ Jesu ọ ruọ okpa, ọzae jọ nọ idhivẹri e rrọ oma nọ o no ẹwho na ze ọ tẹ nya bru rie. U kri no nọ o ri ku ewu họ họ, yọ ọ jẹ rria uwou ho rekọ oria nọ a re ki ahwo fihọ. 28  Nọ ọ ruẹ Jesu, o te bo je kie fihọ aro riẹ, o te bo gaga nọ: “Eme me wo kugbe owhẹ, Jesu Ọmọ Ọghẹnẹ nọ Ọ Mai Kpehru na? Mẹ lẹ owhẹ, whọ kẹ omẹ uye he.” 29  (Keme Jesu ọ jẹ ta kẹ ẹzi ogbegbe na nọ o no ọzae na oma no. O kru rie unuẹse buobu no,* yọ ẹsibuobu a rọ egbregba kare abọ gbe awọ riẹ, a ve bi rou* rie, rekọ ọ vẹ sawo egbregba na no, idhivẹri na o ve ru ei dhẹ kpohọ eria nọ ahwo a rrọ họ.) 30  Jesu ọ tẹ nọe nọ: “Didi odẹ ra?” Ọ tẹ ta nọ: “Ogbaẹmo,”* keme idhivẹri nọ e jariẹ oma e jọ buobu. 31  A tẹ be lẹe nọ o le ai kpohọ ọgọdọ odidi na ha. 32  Whaọ, owa isi nọ o jọ buobu o jẹ re emu evaọ ugbehru na, fikiere izi na e tẹ lẹe nọ ọ kẹ ae uvẹ ruọ isi na, ọ tẹ kẹ ae uvẹ inọ a ru ere. 33  Idhivẹri na i te no ọzae na oma e tẹ ruọ isi na, owa isi na o tẹ họrọ ruọ oria nọ o galivi, kie fihọ awa na jẹ da ame whu. 34  Rekọ nọ enọ e jẹ rẹrote ai a ruẹ oware nọ o via na, a tẹ dhẹ a tẹ niyẹrẹ na evaọ ẹwho na gbe okegbe yena soso. 35  Ahwo a tẹ nya lahwe re a ruẹ oware nọ o via na. A tẹ nya bru Jesu ze a tẹ ruẹ ọzae nọ idhivẹri i no oma na, nọ o ku ewu họ avọ iroro riẹ nọ e rrọ gbagba, nọ ọ keria gba Jesu, ozọ u te mu ai. 36  Enọ e ruẹ oware nọ o via na a te gbe kẹ ae epanọ a ro siwi ọzae nọ idhivẹri e jọ oma na. 37  Kẹsena ogbotu ahwo nọ a zurie no ubrotọ ahwo Gẹrasa ze a tẹ ta kẹ Jesu nọ o no ẹwho rai no keme ozọ u je mu ai gaga. Ọ tẹ ruọ okọ re o no etẹe. 38  Ọzae nọ idhivẹri i no oma na ọ tẹ be lẹe inọ o re lele iei, rekọ ọ ta kẹe nọ ọ nya kpo, inọ: 39  “Nya kpo re whọ hai whowho oware nọ Ọghẹnẹ o ru kẹ owhẹ na.” Fikiere, ọ tẹ nyavrẹ be jọ ẹwho na soso whowho oware nọ Jesu o ru kẹe. 40  Nọ Jesu o zihe te abọ obei, ogbotu na a te dede iei rehọ ziezi keme a je rẹro riẹ. 41  Rekọ rri! ọzae jọ nọ a re se Jairọs ọ tẹ nyaze; ọzae nana ọ jọ omọvo enọ i wuzou evaọ uwou-egagọ na. O te kigwẹ fihọ aro Jesu o te mu ei họ ẹlẹ nọ ọ nyaze obọ uwou riẹ, 42  keme ọmọtẹ ọvo* riẹ, nọ ọ jọ oware wọhọ ikpe ikpegbivẹ, ọ mọ te uwhu no. Epanọ Jesu ọ jẹ rọ nyavrẹ na, ogbotu na a te bi tunyẹe. 43  Whaọ aye jọ ọ jariẹ nọ o je hwẹ azẹ ikpe ikpegbivẹ soso, yọ ohwo ọvo ọ re sai siwi ei hi. 44  Ọ tẹ nya ruọ emu Jesu ọ tẹ rọ obọ te efọlefọ ewu ehru riẹ, ẹsiẹvo na azẹ nọ o je hwẹ na o te serihọ. 45  Fikiere Jesu ọ tẹ nọ inọ: “Ono ọ rọ obọ te omẹ?” Nọ uvumọ ohwo ọ ta nọ ọye he, Pita ọ tẹ ta nọ: “Owuhrẹ, ogbotu na a wariẹ owhẹ họ je bi tunyẹ owhẹ.” 46  Rekọ Jesu ọ tẹ ta nọ: “Ohwo jọ ọ rọ obọ te omẹ, keme mẹ riẹ nọ ogaga u no omẹ oma.” 47  Nọ aye na ọ ruẹ nọ Jesu ọ riẹ oware nọ o ru na, ọ tẹ roma lahwe kigwẹ fihọ aro riẹ bi nuhu, ọ tẹ jọ iraro ahwo na kpobi gbiku oware nọ o lẹliẹ e riẹ rọ obọ tei gbe epanọ ẹyao riẹ o ro kpo ẹsiẹvo. 48  Rekọ Jesu ọ tẹ ta kẹe nọ: “Ọmọtẹ, ẹrọwọ ra o siwi owhẹ no. Nya kpo tou.” 49  Nọ ọ gbẹ jẹ ta ẹme na, ọzae jọ o te no obọ uwou Jairọs ze, ọ tẹ ta nọ: “Ọmọtẹ ra o whu no; who gbe du kpokpo Owuhrẹ na ha.” 50  Nọ Jesu o yo onana, ọ tẹ ta kẹe nọ: “Jọ ozọ u mu owhẹ hẹ, thakpi wo ẹrọwọ, ọ te zọ.” 51  Nọ o te uwou na, ọ kẹ ohwo ọvo uvẹ re o lele iei ruọ eva ha ajokpaọ Pita, Jọn, Jemis gbe ọsẹgboni ọmọtẹ na. 52  Rekọ ahwo na kpobi a be viẹ je bi bo weri ọmọ na. Jesu ọ tẹ ta nọ: “Wha gbẹ viẹ hẹ, keme o whu hu rekọ ọ be wezẹ.” 53  Fikiere a te mu ei họ ẹhwẹ avọ ẹkoko, keme a riẹ nọ o whu no. 54  Rekọ o te kru ọmọtẹ na obọ, ọ tẹ kpare urru ta nọ: “Ọmọ, kpama!” 55  Ọ tẹ wariẹ ziọ uzuazọ,* ọ tẹ nwane kpama keria, Jesu ọ tẹ ta nọ a kẹ ọmọ na emu re ọ re. 56  Eva e tẹ were ọsẹgboni na gaga, rekọ ọ tẹ ta kẹ ae nọ a vuẹ ohwo ọvo oware nọ o via na ha.

Eme-Obotọ

^ Hayo o sae jọ nọ, “U kri no nọ o rrọ ọzae na oma.”
^ Hayo “rroro.”
^ Hayo “Lijiọn.” Evaọ egbaẹmo Rom anwae, Lijiọn yọ ẹko ogbaẹmo ọvo nọ u re wo isoja bu te umuo idu ene rite idu ezeza.
^ Evaọ Griki, “ọmọ ọvo nọ o yẹ.”
^ Hayo “ọ tẹ wariẹ muhọ ẹwẹ.”