Kpohọ eme nọ e riẹ eva

Kpohọ oria izoẹme

Luk 19:1-48

  • Jesu o kpohọ uwou Zakiọs (1-10)

  • Ọtadhesẹ emaina ikpe na (11-27)

  • Jesu ọ ruọ Jerusalẹm avọ ẹkoyẹ obokparọ (28-40)

  • Jesu ọ viẹ kẹ Jerusalẹm (41-44)

  • Jesu o ru etẹmpol na fo (45-48)

19  Kẹsena ọ tẹ ruọ Jẹriko jẹ be nyavrẹ.  Whaọ, ọzae jọ nọ a re se Zakiọs ọ jọ etẹe; ọ jọ ọnowuzou enọ i re mi osa-uzou, yọ o fe.  Ọ jẹ daoma re ọ ruẹ ohwo nọ a bi se Jesu na, rekọ ọ jẹ sae ruẹ e riẹ fiki ogbotu na ha, keme ọ jọ kpẹkpẹe.  Fikiere ọ tẹ dhẹ kpobọ aro, ọ tẹ gadiẹ ure sikamọ re ọ sae ruẹ Jesu keme edhere yena ọ be te nyavrẹ.  Whaọ nọ Jesu o te etẹe, o te rri ehru jẹ ta kẹe nọ: “Zakiọs, nwrotọ vẹrẹ vẹrẹ, keme uwou ra mẹ be jọ nẹnẹ.”  Fikiere o te nwrotọ vẹrẹ vẹrẹ, ọ tẹ rọ oghọghọ dede iei rehọ evaọ uwou riẹ.  Nọ ahwo na a ruẹ onana, aikpobi a tẹ be go nọ: “Ọ kpahe uwou ọzae nọ ọ rrọ ọrahauzi.”  Rekọ Zakiọs ọ tẹ kpama ọ tẹ ta kẹ Olori na nọ: “Rri! Olori, mẹ te rehọ abọvo eyero mẹ kẹ iyogbere, yọ oware kpobi nọ mẹ rehọ iwhayo mi ohwo jọ, me ti zihe iei akuane.”  Fikiere Jesu ọ tẹ ta kẹe nọ: “Nẹnẹ esiwo ọ ziọ uwou nana no keme ọmọ Abraham ọ rrọ re. 10  Keme Ọmọ ohwo ọ nyaze te gwọlọ je siwi enọ i vru.” 11  Nọ a jẹ gaviezọ kẹ eme nana, ọ tẹ rehọ ọtadhesẹ ọfa ta ẹme kẹ ae, keme ọ kẹle Jerusalẹm no yọ a je roro nọ Uvie Ọghẹnẹ o te romavia okioke yena. 12  Fikiere ọ tẹ ta nọ: “Ọzae jọ nọ o no orua ovie ze o kpohọ ẹkwotọ ugbothabọ jọ nyai wo ogaga uvie tobọ re o zihe ze. 13  Nọ o se erigbo ikpe riẹ jọ, ọ tẹ kẹ ae emaina* ikpe jẹ ta kẹ ae nọ, ‘Wha rehọ ai thueki bẹsenọ mẹ rẹ nyaze.’ 14  Rekọ ahwo ẹwho riẹ a mukpahe iẹe, a te vi ahwo lele iei nọ, ‘Ma gwọlọ nọ ọzae nana ọ jọ ovie mai hi.’ 15  “Nọ o wo ogaga uvie* tobọ zihe ze no, o te se erigbo riẹ nọ ọ kẹ igho* na re ọ riẹ erere nọ a wo evaọ eki nọ a tho. 16  Fikiere ọrọ ọsosuọ na ọ tẹ nyaze ọ tẹ ta nọ, ‘Olori, me wo erere emaina ikpe no emaina ra na ze.’ 17  Ọ tẹ ta kẹe nọ, ‘Whẹ kobiruo, emamọ ọrigbo! Fikinọ whọ jọ oware osese dhesẹ nọ a re fievahọ owhẹ, mẹ rehọ owhẹ mu ọnowuzou ikpewho ikpe.’ 18  Ọrọ avọ ivẹ ọ tẹ nyaze, inọ, ‘Olori, me wo erere emaina isoi no emaina ra na ze.’ 19  Ọ tẹ ta kẹ ọnana re nọ, ‘Whẹ omara, mẹ rehọ owhẹ mu ọnowuzou ikpewho isoi.’ 20  Rekọ ọfa ọ tẹ nyaze, inọ, ‘Olori, emaina ra nọ mẹ rehọ ohọ variẹ sino ọna. 21  Ozọ ra u je mu omẹ keme who re dhuaro; whọ rẹ rehọ onọ who fihọ oria ha, yọ who re vu onọ whọ kọ họ.’ 22  Ọ tẹ ta kẹe nọ, ‘Ọrigbo omuomu, eme obọra me bi ro brukpe owhẹ. Whọ riẹ nọ me re dhuaro, inọ mẹ rẹ rehọ onọ me fihọ oria ha, je vu onọ mẹ kọ họ, o gbẹ rrọ ere? 23  Kọ fikieme who gbe fi ugho* mẹ họ obọ uwou-igho ho? Nọ mẹ nyaze na mẹ hae rehọ iẹe avọ isuo.’ 24  “Kẹsena ọ tẹ ta kẹ enọ i dikihẹ etẹe nọ, ‘Wha mi ei emaina na re wha rehọ iẹe kẹ ọnọ o wo emaina ikpe na.’ 25  Rekọ a tẹ ta kẹe nọ, ‘Olori, o wo emaina ikpe!’— 26  ‘Mẹ be ta kẹ owhai nọ, ohwo kpobi nọ o wo a rẹ te kẹe efa kugbe, rekọ ọnọ o wo ho, a ti mi ei makọ onọ o wo na dede. 27  Ofariẹ, wha rehọ ewegrẹ mẹ nana nọ e gwọlọ nọ mẹ rẹ jọ ovie kẹ ae ha na ziọ etenẹ, re wha jọ aro mẹ kpe ai no.’” 28  Nọ ọ ta eme nana no, ọ tẹ ruabọhọ erẹ riẹ bi kpohọ Jerusalẹm. 29  Nọ ọ kẹle Bẹtfaji avọ Bẹtani no evaọ ugbehru nọ a re se Ugbehru Olivi, o te vi ilele ivẹ riẹ uwou, 30  inọ: “Wha kpohọ iwhre nọ wha be kparo ruẹ na, wha tẹ ruọ eva riẹ no, wha te ruẹ ọmọ eketekete nọ a thuru fihọ oria; ọnọ ohwo ọvo ọ re keria ha. Wha ra ufi noi re wha rehọ iẹe ziọ etenẹ. 31  Rekọ ohwo jọ ọ tẹ nọ owhai nọ, ‘Fikieme wha be rọ rae?’ Wha rẹ ta nọ, ‘Olori na ọ gwọlọ e riẹ.’” 32  Fikiere enọ o vi na a tẹ nya a tẹ ruẹ e riẹ wọhọ epanọ ọ ta kẹ ae na. 33  Rekọ epanọ a jẹ rọ ra ọmọ eketekete na, ahwo nọ a wo rie a tẹ nọ ae nọ: “Fikieme wha be rọ ra ọmọ eketekete na?” 34  A tẹ ta nọ: “Olori na ọ gwọlọ e riẹ.” 35  A tẹ rehọ ọmọ eketekete na se Jesu, a te fi iwu ehru rai họ ehru riẹ, a tẹ rehọ Jesu keria ehru riẹ. 36  Nọ ọ be nyavrẹ na, a tẹ jẹ rehọ iwu ehru rai hwa edhere. 37  Nọ ọ nwane kẹle edhere nọ a re ro no Ugbehru Olivi no, ogbotu ilele na soso a te muhọ ẹghọghọ je bi jiri Ọghẹnẹ avọ urru oruarua fiki iruo igbunu kpobi nọ a ruẹ no, 38  inọ: “Oghale u te ọnọ ọ rrọ Ovie nọ ọ be rọ odẹ Jihova* nyaze! Jọ udhedhẹ o jọ obọ odhiwu, yọ oruaro u te Ọnọ ọ rrọ obọ odhiwu na!” 39  Rekọ otu Farisi jọ nọ e jọ udevie ogbotu na a tẹ ta kẹe nọ: “Owuhrẹ, whọku ilele ra.” 40  Rekọ ọ tẹ kpahe kẹ ae nọ: “Mẹ be ta kẹ owhai nọ, otẹrọnọ ahwo nana a te fibo, itho na i ti bo via.” 41  Nọ ọ kẹle okpẹwho na no, o te rri okpẹwho na ọ tẹ viẹ fiki riẹ, 42  inọ: “Dodokọ nẹnẹ na, whọ riẹ eware nọ e rẹ wha udhedhẹ ze; rekọ a ko rai dhere no aro ra. 43  Keme edẹ e be tha nọ ewegrẹ ra a te rọ rehọ ire esiọsiọle di ogba wariẹ owhẹ a ve ti ko owhẹ họ je gboja kẹ owhẹ no ofẹ kpobi ze. 44  A te raha owhẹ totọ je kpe emọ ra no, yọ a te jọ eva ra nyasiọ utho ba ehru utho ho keme who muẹrohọ oke nọ a rọ kiẹ owhẹ riwi hi.” 45  Kẹsena ọ tẹ ruọ evaọ etẹmpol na, o te mu enọ e jẹ zẹ eware họ ele ruọ otafe, 46  be ta kẹ ae nọ: “A kere nọ, ‘Uwou mẹ o te jọ uwou olẹ,’ rekọ wha ru rie fihọ eghogho-utho iwhewheriwhe no.” 47  Ọ tẹ ruabọhọ je wuhrẹ ahwo kẹdẹ kẹdẹ evaọ etẹmpol na. Rekọ ilori izerẹ na gbe otu ikere-obe na gbe isu ahwo na a tẹ jẹ gwọlọ epanọ a re ro kpei no; 48  rekọ a ruẹ edhere ọvo nọ a re ro ru onana ha, keme ahwo na kpobi a je bigbae ẹsikpobi re a yo eme riẹ.

Eme-Obotọ

Rri oria Otofa Eme.
Hayo “uvie na.”
Evaọ Griki, “isiliva.”
Evaọ Griki, “isiliva.”
Rri oria Otofa Eme.