Kpohọ eme nọ e riẹ eva

Kpohọ oria izoẹme

Luk 7:1-50

  • Ẹrọwọ oletu ogbaẹmo (1-10)

  • Jesu ọ kpare ọmọzae aye-uku no uwhu ze evaọ Nein (11-17)

  • O jiri Jọn Ọhọahwo-Ame na (18-30)

  • O brukpe oge nọ o wo ekurẹriẹ hẹ (31-35)

  • Ọ rọ izieraha rọvrẹ aye jọ nọ a riẹ wọhọ ọrahauzi (36-50)

    • Ọtadhesẹ eriosa (41-43)

7  Nọ ọ ta eme kpobi nọ ọ gwọlọ ta kẹ ahwo na no, ọ tẹ ruọ evaọ Kapaniọm.  Whaọ, odibo oletu ogbaẹmo* jọ nọ ọ jọ ghaghae kẹe, ọ jẹ mọ gaga yọ ọ kẹle uwhu no.  Nọ o yo kpahe Jesu, o te vi ekpako ahwo Ju na jọ bru rie re a lẹe inọ ọ nyaze ti siwi odibo riẹ na.  A tẹ nya bru Jesu ze a te mu ei họ ẹlẹ gaga nọ: “O te ohwo nọ who re ru onana kẹ,  keme o you orẹwho mai yọ ọye ọ bọ uwou-egagọ mai na.”  Fikiere Jesu o te lele ai. Rekọ nọ ọ be kẹle uwou na no, yọ oletu ogbaẹmo na o vi ahwo no re a nyae ta kẹe nọ: “Ọga, who du nyaze he, keme me te ohwo nọ whọ rẹ nyaze uwou riẹ hẹ.  Oyejabọ nọ me ro rri omamẹ inọ me te ohwo nọ ọ rẹ nya bru owhẹ ze he na. Rekọ thakpe ta ẹme na ọvo, ẹyao odibo mẹ o ti kpo.  Keme mẹ yọ ohwo nọ ọ rrọ otọ ahwo, me te je wo isoja nọ e rrọ otọ mẹ, yọ mẹ rẹ sae ta kẹ ọjọ nọ, ‘Nya!’ ọ vẹ nyavrẹ, jẹ ta kẹ ọfa nọ, ‘Nyaze!’ ọ vẹ nyaze, jẹ ta kẹ odibo mẹ nọ, ‘Ru onana!’ o ve ru ei.”  Nọ Jesu o yo eme nana, u te gbei unu, o te kuomarẹriẹ rri ogbotu nọ a je lele iei na, ọ tẹ ta kẹ ae nọ: “Mẹ be ta kẹ owhai nọ, mẹ re jọ evaọ Izrẹl dede ruẹ ẹrọwọ ologbo otiọna ha.” 10  Nọ ahwo nọ o vi na a zihe te obọ uwou na, a tẹ ruẹ nọ ẹyao odibo na o kpo no. 11  U kri hi o te kpohọ ẹwho nọ a re se Nein, yọ ilele riẹ gbe ogbotu obuobu a je lele iei. 12  Nọ ọ kẹle unuẹthẹ ẹwho na no, ọ tẹ ruẹ ahwo nọ a jẹ wọ ọmọzae jọ nọ o whu no vrẹ, ọmọzae ọvo oni riẹ.* Yọ aye na ọ jọ aye-uku. Ogbotu ahwo buobu nọ a no ẹwho na ze a jọ kugbei re. 13  Nọ Olori na ọ ruẹ e riẹ, ohrọ riẹ o tẹ riẹe, ọ tẹ ta kẹe nọ: “Whọ gbẹ viẹ hẹ.” 14  Jesu ọ tẹ nya kẹle ehwa nọ a wọ ọmọzae na fihọ, ọ tẹ rọ obọ te ehwa na, enọ e wọ riẹ a te dikihẹ. Ọ tẹ ta nọ: “Ẹghele, mẹ be ta kẹ owhẹ nọ, kpama!” 15  Ọmọzae nọ o whu no na ọ tẹ kpama keria je mu ẹme họ ẹta, Jesu ọ tẹ rehọ iẹe kẹ oni riẹ. 16  Ozọ u te mu ai kpobi, a te mu Ọghẹnẹ họ ejiri, be ta nọ: “Ọruẹaro ologbo ọ romavia no evaọ udevie mai,” gbe nọ, “Ọghẹnẹ ọ kareghẹhọ ahwo riẹ no.” 17  Usi oware nọ o ru na o tẹ vaha ruọ Judia soso gbe ewho kpobi nọ e wariẹ e riẹ họ. 18  Whaọ, ilele Jọn a te gbiku eware nana kpobi kẹ Jọn. 19  Jọn o te se ilele ivẹ riẹ o te vi ai re a nyae nọ Olori na nọ: “Whẹ họ Ọnọ Ọ be Nyaze na, manikọ ma rẹro ọfa?” 20  Nọ a nya bru Jesu ze, a tẹ ta nọ: “Jọn Ọhọahwo-Ame na o vi omai bru owhẹ ze te nọ owhẹ nọ, ‘Whẹ họ Ọnọ Ọ be Nyaze na, manikọ ma rẹro ọfa?’” 21  Evaọ auwa yena, o siwi eyao ahwo buobu, makọ eyao egaga, o le izi imuomu no, yọ o ru ibuobu nọ i tuaro ruẹ ude. 22  Jesu ọ tẹ kẹ ae uyo nọ: “Wha nyae vuẹ Jọn eware nọ wha ruẹ je yo na: Enọ i tuaro i mu ude họ ẹruẹ no, enọ e ko e be nya, a bi siwi emoti, enọ i diezọ i bi yo ẹme, a be kpare enọ i whu no ze, yọ a be ta usi uwoma na kẹ iyogbere. 23  Eva e were ọnọ ọ jọ oma mẹ ruẹ oware ovo nọ o rẹ wha ezoruẹ ze he.” 24  Nọ ahwo nọ Jọn o vi uwou na a nyavrẹ no, Jesu ọ tẹ be ta kẹ ogbotu na kpahe Jọn nọ: “Eme wha kpobọ udhude nyai rri? Ukpoko* nọ ofou o bi fou? 25  Kọ eme wha nyai rri? Ọzae nọ o ku iwu elọlọhọ* họ? Whaọ, enọ i ku iwu eghaghae họ jẹ be reakpọ kuoma a rrọ iwou ivie. 26  Kọ eme wha ginẹ nyai rri? Ọruẹaro? Ẹhẹ, mẹ be ta kẹ owhai nọ, o vi ọruẹaro gheghe. 27  Ọna a kere kpahe nọ: ‘Rri! Me bi vi ọnyukọ mẹ karo kẹ owhẹ, ọnọ ọ te ruẹrẹ edhere ra họ kẹ owhẹ.’ 28  Mẹ be vuẹ owhai nọ, evaọ usu ahwo nọ eyae i yẹ, ọnọ ọ rro vi Jọn ọ riẹ hẹ, rekọ ọnọ ọ mae kawo evaọ Uvie Ọghẹnẹ ọ rro vi ei.” 29  (Nọ ahwo na kpobi gbe enọ i re mi osa-uzou a yo onana, a tẹ ta nọ Ọghẹnẹ o kiẹrẹe, keme Jọn họ ọnọ ọ họ rai ame. 30  Rekọ otu Farisi na gbe enọ e riẹ Uzi na lafi a rri ohrẹ Ọghẹnẹ nọ a kẹ rai vo, a gbẹ nya re Jọn ọ họ ae ame he.) 31  “Kọ amono mẹ rẹ rehọ ahwo oge nana dhesẹ, kọ amono a wọhọ? 32  A wọhọ emaha nọ e keria oria eki nọ e be ta kẹ ohwohwo nọ: ‘Ma kporo urete kẹ owhai, rekọ wha gbile he; ma viẹ gaga, rekọ wha viẹ hẹ.’ 33  Epọvo na re, Jọn Ọhọahwo-Ame na ọ nyaze, ọ be re ebrẹdi hayo da udi wọhọ ahwo edekọ họ, rekọ wha be ta nọ, ‘Idhivẹri ọ riẹe oma.’ 34  Ọmọ ohwo ọ nyaze be re jẹ da, rekọ wha be ta nọ: ‘Rri! Ọgba-ore gbe ọgba-udi ọ rrọ, ogbẹnyusu enọ i re mi osa-uzou gbe erahaizi!’ 35  Oghẹrẹ kpobi kẹhẹ, emọ nọ areghẹ o yẹ* a rẹ rọ riẹ nọ o kiẹrẹe.” 36  Whaọ, omọvo otu Farisi na ọ tẹ be lẹe inọ ọ ziọ uwou riẹ te re emu. Fikiere ọ tẹ ruọ uwou ohwo Farisi na ọ tẹ keria be re emu. 37  Rri! Aye jọ nọ a riẹ wọhọ ọrahauzi evaọ ẹwho na o te yo nọ ọ be re emu evaọ uwou ohwo Farisi na, ọ tẹ rehọ ololo alabasta nọ udẹ nọ u re gbo ore awere o rrọ. 38  Nọ o kigwẹ họ emu Jesu, o te muhọ ẹviẹ, o te bi su irui-oviẹ riẹ fihọ awọ Jesu, ọ tẹ rehọ eto uzou riẹ ririe ai no. Ofariẹ, ọ tẹ nabe viọlọ awọ riẹ je ku udẹ nọ u re gbo ore awere na họ awọ riẹ. 39  Nọ ohwo Farisi nọ o zizie Jesu na ọ ruẹ onana ọ tẹ be jọ eva riẹ ta nọ: “Orọnọ ọzae nana ginọ ọruẹaro, ọ hae riẹ oghẹrẹ ohwo nọ aye nana nọ ọ be rọ obọ tei na ọ rrọ, inọ ọrahauzi.” 40  Rekọ Jesu ọ tẹ ta kẹe nọ: “Saemọn, me wo ẹme jọ nọ mẹ gwọlọ ta kẹ owhẹ.” Saemọn ọ tẹ ta nọ: “Owuhrẹ, tae ze!” 41  “Ezae ivẹ jọ e reosa ohwo jọ nọ o re momo igho kẹ ahwo; ọjọ ọ reosa dinariọs* egba isoi (500), ọdekọ kọ udhuvẹ-gbikpe. 42  Nọ a wo oware ovo nọ a sae rọ hwa osa na zihe he, ọ tẹ rọvrẹ aimava na riẹriẹriẹ. Kọ evaọ usu aimava na, ọvẹ ọ rẹ mai you rie?” 43  Saemọn ọ tẹ kẹ uyo nọ: “Me roro nọ ọnọ ọ mae rọvrẹ bu na.” Ọ tẹ ta kẹe nọ: “Who roro gba.” 44  Ọ tẹ rẹriẹ ovao rri aye na, ọ tẹ ta kẹ Saemọn nọ: “Kọ whọ be ruẹ aye nana? Nọ mẹ ruọ uwou ra, whọ kẹ omẹ ame wozẹ awọ mẹ hẹ. Rekọ aye nana o su irui-oviẹ riẹ ku awọ mẹ ọ tẹ rehọ eto riẹ ririe ae. 45  Whọ viọlọ omẹ hẹ, rekọ aye nana, anwẹnọ mẹ rọ ruọ eva na ọ be rọ viọlọ awọ mẹ. 46  Who ku udẹ họ uzou mẹ hẹ, rekọ aye nana o ku udẹ nọ u re gbo ore awere họ awọ mẹ. 47  Fiki onana, mẹ be ta kẹ owhẹ nọ, dede nọ izieraha riẹ e rrọ buobu,* a rehọ e rai rọvrẹ riẹ no keme o dhesẹ uyoyou ulogbo. Rekọ ọnọ a rọvrẹ kakao o re dhesẹ uyoyou kakao.” 48  Kẹsena ọ tẹ ta kẹ aye na nọ: “A rọ izieraha ra rọvrẹ owhẹ no.” 49  Enọ a gbẹ jẹ re emu na a te mu omoma rai họ ẹta kẹ nọ: “Nọ ono na nọ ọ be tubẹ rọ izieraha rọvrẹ ohwo?” 50  Ọ tẹ ta kẹ aye na nọ: “Ẹrọwọ ra o siwi owhẹ no; nya kpo tou.”

Eme-Obotọ

Koyehọ, “ọnọ o wuzou isoja udhusoi.”
Evaọ Griki, “ọmọ ọvo nọ o yẹ.”
Hayo “okiara.”
Hayo “iwu iwoma.”
Hayo “eware nọ areghẹ o ru.”
Rri oria Otofa Eme.
Hayo “e rrọ logbo.”