Eviavia 7:1-17
7 Nọ onana o vrẹ no, mẹ tẹ ruẹ ikọ-odhiwu ene nọ i dikihẹ ibienẹ ene akpọ na, nọ i kru ifou ene akpọ na daji kokoroko, re ofou o gbe fou otọakpọ na hayo abade hayo ure ọvo ho.
2 Mẹ tẹ ruẹ ukọ-odhiwu ọfa nọ o bi no obọ ovatha-ọre ze, yọ o kru oware nọ a re ro kpokahọ eware, onọ Ọghẹnẹ nọ ọ rrọ uzuazọ na ọ kẹ riẹ; ọ tẹ rọ urru oruarua ta kẹ ikọ-odhiwu ene nọ a kẹ udu re a raha eware otọakpọ na gbe abade na,
3 inọ: “Wha du raha eware otọakpọ na hayo abade na hayo ire na ha, bẹsenọ ma re kpokahọ aruezo erigbo Ọghẹnẹ mai no.”
4 Me te yo unu ahwo nọ a kpokahọ na, idu udhuhrẹ gbe ene (144,000), nọ a kpokahọ evaọ erua emọ Izrẹl kpobi:
5 Evaọ orua Juda idu ikpegbivẹ (12,000) a kpokahọ;evaọ orua Rubẹn idu ikpegbivẹ (12,000);evaọ orua Gad idu ikpegbivẹ (12,000);
6 evaọ orua Asha idu ikpegbivẹ (12,000);evaọ orua Naftalae idu ikpegbivẹ (12,000);evaọ orua Manasẹ idu ikpegbivẹ (12,000);
7 evaọ orua Simiọn idu ikpegbivẹ (12,000);evaọ orua Livai idu ikpegbivẹ (12,000);evaọ orua Isaka idu ikpegbivẹ (12,000);
8 evaọ orua Zebulọn idu ikpegbivẹ (12,000);evaọ orua Josẹf idu ikpegbivẹ (12,000);evaọ orua Bẹnjamin idu ikpegbivẹ (12,000) a kpokahọ.
9 Nọ onana o vrẹ no, mẹ tẹ ruẹ ogbotu obuobu, nọ ohwo ọvo ọ sai kele he, nọ i no erẹwho, erua, oghoghẹrẹ ahwo gbe erọunu* kpobi ze, nọ i dikihẹ aro agbara-uvie na gbe Omogodẹ na, a ku iwu efuafo họ; yọ a kru eya iriẹ họ abọ.
10 Yọ a be rọ urru oruarua ta nọ: “Obọ Ọghẹnẹ mai nọ ọ keria agbara-uvie na gbe Omogodẹ na esiwo mai o no ze.”
11 Ikọ-odhiwu na kpobi a dikihẹ wariẹ agbara-uvie na gbe ekpako na gbe ikọ-odhiwu ene na họ, a te kie vovao tuotọ evaọ aro agbara-uvie na, a tẹ gọ Ọghẹnẹ,
12 yọ a be ta nọ: “Ami! Jọ ujiro, oruaro, ọghọ gbe uyere u te Ọghẹnẹ mai nọ o wo areghẹ, ogaga, gbe ẹgba kpobi na bẹdẹ bẹdẹ. Ami.”
13 Kẹsena, omọvo ekpako na ọ tẹ nọ omẹ nọ: “Ahwo nana nọ a ku iwu efuafo họ na, yọ amono, kọ bovẹ a no ze?”
14 Mẹ tẹ nwane ta kẹe nọ: “Olori mẹ, whẹ họ ọnọ ọ riẹ.” Ọ tẹ ta kẹ omẹ nọ: “Enana họ ahwo nọ a zọ evaọ uye ulogbo na, yọ a fọrọ iwu rai je ru ae fo no evaọ azẹ Omogodẹ na.
15 Oyejabọ nọ a rọ rrọ aro agbara-uvie Ọghẹnẹ na, yọ a be gọe taso tuvo evaọ etẹmpol riẹ; yọ Ọnọ ọ keria agbara-uvie na ọ te rehọ uwou-udhu riẹ ruru ai.
16 Ohọo hayo uruame u gbe ti kpe ai ofa ha, yọ erri ọre na hayo ẹrrorro ọgaga o gbe ti mu ai hi,
17 keme Omogodẹ na nọ ọ rrọ aro agbara-uvie na ọ te sẹro rai wọhọ othuru-igodẹ, o ti su ai kpohọ eyeri-ame ọrọ ame uzuazọ. Yọ Ọghẹnẹ o ti ririe irui-oviẹ kpobi no aro rai.”
Eme-Obotọ
^ Hayo “evẹrẹ.”
