Eviavia 4:1-11
4 Nọ onana o vrẹ no, mẹ tẹ ruẹ ẹthẹ nọ o rovie fihọ evaọ obọ odhiwu, yọ edo urru ọsosuọ nọ me yo nọ o jẹ ta ẹme kẹ omẹ na o jọ wọhọ edo ọgba, o ta nọ: “Nyaze obọ ehru obonẹ, me ti dhesẹ eware nọ e te via hrọ kẹ owhẹ.”
2 Kẹsena ẹzi ọfuafo na ọ tẹ nwane ruọ omẹ oma, mẹ tẹ ruẹ agbara-uvie evaọ obọ odhiwu, yọ ohwo jọ ọ keria agbara-uvie na.
3 Ọnọ ọ keria agbara-uvie na o bi lo wọhọ utho jaspa gbe utho sadiọs,* yọ usi-ame nọ o wọhọ utho ẹmerald o wariẹ agbara-uvie na họ.
4 Egbara-uvie udhegbene e wariẹ agbara-uvie na họ, mẹ tẹ ruẹ ekpako udhegbene nọ i ku iwu efuafo họ nọ e keria egbara-uvie nana, yọ a ku itu-uvie igoru họ uzou.
5 Elo egbrara gbe edo irru gbe edo egbrara i je no agbara-uvie na ze; yọ ikpẹ ihrẹ nọ i bi lo e jọ aro agbara-uvie na, ikpẹ ihrẹ na i dikihẹ kẹ izi ihrẹ Ọghẹnẹ.
6 Oware jọ nọ o wọhọ abade nọ a rẹ ruẹ lafi wọhọ ughẹgbe, onọ u bi lo nwranwranwra o jọ aro agbara-uvie na.
Yọ ikọ-odhiwu ene nọ i wo ibiaro vọ oma te obaro te obemu e jọ udevie na wariẹ agbara-uvie na họ.
7 Ukọ-odhiwu ọsosuọ ọ jọ wọhọ okpohrokpo, ukọ-odhiwu avọ ivẹ ọ jọ wọhọ eruẹ, ukọ-odhiwu avọ esa o wo ovao wọhọ ohwo, yọ ukọ-odhiwu avọ ene ọ jọ wọhọ ugo nọ o be rra.
8 Ikọ-odhiwu ene na ọvuọvo o wo ibekpe ezeza; ibiaro e vọ ibekpe na soso. Yọ taso tuvo a bi serihọ họ be ta nọ: “Jihova* Ọghẹnẹ, Erumeru na, ọnọ ọ jọ, nọ ọ rrọ, nọ ọ be tha na yọ ọrẹri, ọrẹri, ọrẹri.”
9 Oke kpobi nọ ikọ-odhiwu na a tẹ be rehọ oruaro gbe ọghọ gbe uyere kẹ Ọnọ ọ keria agbara-uvie na, Ọnọ ọ rrọ uzuazọ bẹdẹ bẹdẹ na,
10 ekpako udhegbene na a ve kigwẹ fihọ aro Ọnọ ọ keria agbara-uvie na a vẹ gọ Ọnọ ọ rrọ uzuazọ bẹdẹ bẹdẹ na, jẹ ba itu-uvie rai no evaọ aro agbara-uvie na be ta nọ:
11 “Who te, Jihova* Ọghẹnẹ mai, re a jiri owhẹ fiki oruaro gbe ọghọ gbe ogaga ra, keme whẹ ọ ma eware kpobi, yọ fiki oreva ra a rọ ziọ uzuazọ, oye whọ rọ ma ae.”
