Eviavia 22:1-21
22 O te dhesẹ ethẹ ame uzuazọ kẹ omẹ, onọ o rrọ gogogo nọ a rẹ ruẹ lafi, nọ o bi kporo no agbara-uvie Ọghẹnẹ gbe ọrọ Omogodẹ na ze.
2 Yọ o bi kporo ruọ udevie oko-ore okpẹwho na. Ire uzuazọ nọ e be mọ ibi isia ikpegbivẹ kukpe kukpe e jọ tabọ tabọ ethẹ na, e rẹ mọ kamara kamara. Ebe ire na e jọ kẹ usiwo erẹwho na.
3 Ọghẹnẹ ọ te la okpẹwho na eka vievie he. Rekọ agbara-uvie Ọghẹnẹ gbe ọrọ Omogodẹ na e te jọ okpẹwho na, yọ idibo riẹ a te gọe;
4 a te ruẹ ovao riẹ, odẹ riẹ o te jọ aruezo rai.
5 Ofariẹ, aso ọ gbẹ te jọ etẹe he, yọ a du gwọlọ elo ukpẹ hayo elo ọre he keme Jihova* Ọghẹnẹ o ti lo mu ai, yọ a te jọ ivie nọ i ti su bẹdẹ bẹdẹ.
6 Ọ tẹ ta kẹ omẹ nọ: “Eme nana yọ eme nọ a re fievahọ, e tẹ jẹ rrọ uzẹme; Jihova,* Ọghẹnẹ nọ ọ rehọ eruẹaro na ta ẹme, o vi ukọ-odhiwu riẹ re o dhesẹ kẹ idibo riẹ eware nọ e te via hrọ kẹle na.
7 Rri! mẹ be nyaze vẹrẹ vẹrẹ. Eva e te were ohwo kpobi nọ o bi ru lele eme eruẹaruẹ nọ e rrọ uko-obe nana.”
8 Mẹ Jọn họ ọnọ o je yo jẹ ruẹ eware nana. Nọ me yo jẹ ruẹ e rai, me te kigwẹ fihọ aro ukọ-odhiwu nọ o je dhesẹ eware nana kẹ omẹ na re mẹ gọe.
9 Rekọ ọ tẹ ta kẹ omẹ nọ: “Yọroma! Who ru ere he! Ibe ọrigbo ra gheghe mẹ rrọ gbe ọrọ inievo ra eruẹaro na gbe ahwo nọ a bi ru lele eme nọ e rrọ uko-obe nana. Gọ Ọghẹnẹ.”
10 Ọ tẹ jẹ ta kẹ omẹ nọ: “Who du ko eme eruẹaruẹ nọ e rrọ uko-obe nana dhere he, keme oke nọ a fihọ na o kẹle no.
11 Jọ ohwo nọ o bi ru umuomu ọ ruabọhọ umuomu, jọ ohwo nọ o bi ru eware etọtọ ọ ruabọhọ eware etọtọ na; jọ ohwo nọ o kiẹrẹe ọ ruabọhọ ẹrẹreokie riẹ, jọ ohwo nọ ọ rrọ ọrẹri ọ gbẹ jọ ọrẹri.
12 “‘Rri! mẹ be nyaze vẹrẹ vẹrẹ, osohwa nọ mẹ te kẹ o rrọ omẹ obọ, yọ mẹ te hwosa kẹ omomọvo wọhọ epanọ iruo riẹ e rrọ.
13 Mẹ họ Alfa gbe Omẹga,* ọrọ ọsosuọ gbe ọrọ urere na, emuhọ gbe ekuhọ na.
14 Eva e te were ahwo nọ a fọrọ iwu rai, re a sai wo udu nọ a rẹ rọ nyae re ibi ire uzuazọ na, gbe re a sae rehọ inuẹthẹ na ruọ okpẹwho na.
15 Rọkẹ erakọ* na, gbe enọ i re ru iruẹru-imizi gbe enọ i bi gbe-ọfariẹ* gbe enọ i re kpe ahwo gbe egedhọ gbe ohwo kpobi nọ ọrueta ọ rẹ were, nọ o re gu ọrue, obọ otafe a te jọ.’
16 “‘Mẹ Jesu, me vi ukọ-odhiwu mẹ re ọ vuẹ owhai kpahe eware nana nọ e rrọ kẹ ikoko na. Mẹ họ owọ-ure gbe ọmọ Devidi gbe esi ohiohiẹ ọnwranwra na.’”
17 Ẹzi na avọ ọmọtibobo na a tẹ be ta nọ, “Nyaze!” jọ ohwo kpobi nọ o bi yo ọ ta nọ, “Nyaze!” jọ ohwo kpobi nọ uruame u bi kpe ọ nyaze; jọ ohwo kpobi nọ ọ gwọlọ, ọ da ame uzuazọ ọvọvẹ.
18 “Mẹ be vuẹ ohwo kpobi nọ o bi yo eme eruẹaruẹ nọ e rrọ uko-obe nana nọ: Otẹrọnọ ohwo jọ o fiba eware nana, Ọghẹnẹ o ti fi iye nọ a kere fihọ uko-obe nana ba kẹe;
19 yọ otẹrọnọ ohwo jọ o si no eme eruẹaruẹ nọ e rrọ uko-obe nana, Ọghẹnẹ o ti si ẹkẹ riẹ no ire uzuazọ na, yọ a te kẹe uvẹ ruọ okpẹwho ọrẹri na ha, koyehọ emamọ eware nọ a kere kpahe evaọ uko-obe nana i ti tei obọ họ.
20 “Ọnọ o se isẹri kpahe eware nana ọ tẹ ta nọ, ‘Mẹ be nyaze vẹrẹ vẹrẹ.’”
“Ami! Nyaze, Jesu Olori.”
21 Jọ Olori na Jesu o gbe dhesẹ uwowou ulogbo riẹ kẹ erezi na.
Eme-Obotọ
^ Rri oria Otofa Eme.
^ Rri oria Otofa Eme.
^ Hayo “ọnọ ọ rrọ A gbe Z.” Alfa gbe Omẹga họ ubiẹme ọsosuọ gbe ọrọ urere evaọ ibieme Griki.
^ Koyehọ, ahwo nọ a re ru eware nọ e rẹ tọtọ Ọghẹnẹ oma.
^ Rri oria Otofa Eme, “Ọfariẹ-ogbe.”.
