Eviavia 14:1-20
14 Kẹsena mẹ tẹ ruẹ Omogodẹ na nọ o dikihẹ Ugbehru Zayọn, avọ ahwo idu udhuhrẹ gbe ene (144,000) nọ e rrọ kugbei, enọ a kere odẹ riẹ avọ odẹ Ọsẹ riẹ họ aruezo rai.
2 Me te yo edo jọ nọ o bi do no obọ odhiwu ze wọhọ edo ame nọ o bi kporo ẹkẹre jẹ wọhọ edo agbrara nọ o do gaga; edo nọ me yo na o wọhọ uvou ahwo nọ a be so ile je bi kporo ekpata rai.
3 A be so ole nọ o wọhọ ole ọkpokpọ evaọ aro agbara-uvie na gbe aro ikọ-odhiwu ene na gbe ekpako na, yọ ohwo ọvo ọ sae riẹ ole na ha ajokpaọ ahwo idu udhuhrẹ gbe ene na (144,000), nọ a dẹ no otọakpọ na ze.
4 Enana họ enọ i zue omarai hi, nọ i lele eyae wezẹ hẹ; a wọhọ ọmọtẹ-kọkọ. Enana họ enọ i bi lele Omogodẹ na kpohọ oria kpobi nọ ọ be nya. A dẹ enana no udevie ahwo-akpọ ze wọhọ ibi ọsosuọ rọkẹ Ọghẹnẹ gbe Omogodẹ na,
5 yọ a ruẹ eviẹhọ evaọ unu rai hi; a kare epe.
6 Mẹ tẹ ruẹ ukọ-odhiwu ọfa nọ ọ be rra evaọ idadeghe, yọ o bi whowho usi uwoma ebẹdẹ bẹdẹ kẹ enọ e be rria otọakpọ na, kẹ orẹwho, orua, ẹrọunu* gbe oghoghẹrẹ ahwo kpobi.
7 Ọ jẹ rọ urru oruarua ta nọ: “Wha dhozọ Ọghẹnẹ jẹ kẹe oruaro, keme auwa nọ o ti ro bruoziẹ o te no, fikiere wha gọ Ọnọ ọ ma odhiwu na gbe otọakpọ na gbe abade na gbe iyeri-ame na.”
8 Ukọ-odhiwu ọfa, ọrọ avọ ivẹ o te lele iei, be ta nọ: “O kie no! Babilọn Ologbo na o kie no, ọnọ o ru erẹwho na kpobi da udi isiuru egaga* erọ ọfariẹ-ogbe* riẹ!”
9 Ukọ-odhiwu ọfa, ọrọ avọ esa o te lele ai, be rọ urru oruarua ta nọ: “Ohwo kpobi nọ ọ gọ arao ojihẹ na avọ ẹmema riẹ, jẹ rọwo nọ a kpokahọ aruezo hayo obọ riẹ,
10 ọ te da udi ofu Ọghẹnẹ re, onọ a gua ha nọ a ku fihọ egho ofu Riẹ, a vẹ te rehọ erae gbe isọ-ọre lahiẹ iẹe evaọ aro ikọ-odhiwu erẹri na gbe aro Omogodẹ na.
11 Iwiri olahiẹ enọ e be gọ arao ojihẹ na avọ ẹmema riẹ, gbe ohwo kpobi nọ o wo oka odẹ riẹ i ti kuye bẹdẹ bẹdẹ, yọ taso tuvo a wo eriosehọ họ.
12 Onana o gwọlọ ithihakọ mi erezi na, enọ i bi koko ijaje Ọghẹnẹ je kru ẹrọwọ nọ a fihọ Jesu gaga.”
13 Me te yo urru jọ nọ u do no obọ odhiwu ze, nọ o ta nọ, “Kere: Eva e were ahwo nọ a rrọ usu kugbe Olori na nọ i ti whu no umuo oke nana vrẹ. Ẹhẹ, ẹzi na ọ be ta nọ, jọ a serihọ no iruo egaga rai, keme eware nọ a ru i bi lele ai ovavo.”
14 Kẹsena mẹ tẹ ruẹ ẹgho ọfuafo, yọ ọnọ ọ keria ehru ẹgho na ọ jọ wọhọ ọmọ ohwo, avọ etu-uvie igoru nọ o rrọ uzou riẹ yọ o kru ojale odada họ obọ.
15 Ukọ-odhiwu ọfa o te no uwou aruẹri etẹmpol na ze, be rọ urru oruarua ta kẹ ọnọ ọ keria ehru ẹgho na nọ: “Rehọ ojale ra muhọ ẹkọrọ, keme oke ẹkọrọ u te no, ekakọ akpọ na e ware ziezi no.”
16 Ọnọ ọ keria ehru ẹgho na o te dhe ojale riẹ họ otọakpọ na, ọ tẹ kọrọ ekakọ otọakpọ na.
17 Ukọ-odhiwu ọfa o te je no uwou aruẹri etẹmpol nọ o rrọ obọ odhiwu na ze, yọ o kru ojale odada re.
18 Ukọ-odhiwu ọfa o te je no oria agbada-idhe na ze, yọ o wo udu nọ o re ro vi erae na kpohọ oria kpobi nọ u je rie. Ọ tẹ rọ urru oruarua ta kẹ ukọ-odhiwu nọ o kru ojale odada na nọ: “Rehọ ojale odada ra muhọ ẹkọrọ re who koko ewhala evaene otọakpọ na họ, keme ibi riẹ e ware no.”
19 Ukọ-odhiwu na ọ tẹ rehọ ojale riẹ muhọ ẹkọrọ evaọ otọakpọ na je koko evaene otọakpọ na họ, o te gbolo iei fihọ umi-udi ulogbo ofu Ọghẹnẹ.
20 Enyenya na a te bi thihi ibi evaene na evaọ otafe okpẹwho na, azẹ o te no umi-udi na ze nọ o kpehru te unu enyenya na, yọ o rehọ oria nọ u thabọ te estadia 1,600.*
Eme-Obotọ
^ Hayo “ẹvẹrẹ.”
^ Hayo “ofu.”
^ Evaọ Griki, por·neiʹa. Rri oria Otofa Eme.
^ Oware wọhọ ikilomita 296 (emaele 184).
