Luk 22:1-71

  • Ene ohẹn da mhanmhan ebi ele ha rẹ gbe Jesu a yẹ (1-6)

  • Ele da muegbe ọbhi otọ nin ele rẹ lu Anagbera nọn kike (7-13)

  • Ebale Emuan ọsi Ebeanlẹn Mhan (14-20)

  • “Imẹn bi ọria nọn ha mun imẹn khiẹn ko ha le ebale bhi itebu ọkpa” (21-23)

  • Edibo nesi Jesu da wo ha gbugan ba ẹmhọn ọnọn lu okpọria nẹ bhi ẹwẹ ele (24-27)

  • Jesu da deba edibo nesọle ve akovẹn ghe ele dẹ gbẹloghe bhi agbejele (28-30)

  • Jesu da tale ghe Pita dẹ sin ghe ọle bha lẹn ọlẹn (31-34)

  • Jesu da yọle nin edibo nesọle muegbe ọbhi otọ; ene agbada eva (35-38)

  • Jesu da nan erọnmhọn bhi Oke ọsi Oliv (39-46)

  • A da mun Jesu (47-53)

  • Pita yọle ghe ọle bha lẹn Jesu (54-62)

  • Ene mun Jesu da ha zuọzuọ ọle (63-65)

  • A nọọn Jesu ọta bhi ikotu ọsi Sanhẹdrin (66-71)

22  Iluemhin Ọsi Ibrẹd Nọn Ihuẹ, nan yẹ tiọle Iluemhin Ọsi Anagbera ki ha sire,  ene ohẹn ne khua bi ene man uhi da ha guanọ uwedẹ nin ele ha rẹ gbe Jesu a. Ọkpakinọn, ranmhude ofẹn ene ẹbho nọn ha mun ele, ele da ha guanọ uwedẹ nọn mhẹn nẹ nin ele ha rẹ lu ọle.  Esu da munhẹn ha noo Judas Iskarọt, nin ọkpa bhi ene etuegbe igbeva.  Bhiriọ, ọle da bu ene ohẹn ne khua bi ene gbẹloghe uwa oga dọ taman ele ghe ọle dẹ sabọ khiẹn Jesu nin ele.  Ọnan da wo ti ele bhọ. Ele da yọle ele dẹ ne igho isiliva nanlẹn.  Ọle da ka nin ele, yẹ munhẹn ha guanọ isẹhoa nin ọle ha rẹ khiẹn ọlẹn nin ele bhi eji ẹbho iye.  Ukpẹdẹ Iluemhin Ọsi Ibrẹd Nọn Ihuẹ da sẹ; ọnin hi, ukpẹdẹ nan rẹ lu izọese ọsi Anagbera.  Bhiriọ, Jesu da je Jọni bi Pita dagbare. Ọle da taman ele yọle: “Ibha dọ hẹnhẹn emhin ọbhi otọ nin mhan rẹ le ebale Anagbera.”  Ele da nọọn ọlẹn yọle: “Ejela uwẹ guanọ nin mhan da dọ hẹnhẹn emhin ọbhi otọ?” 10  Ọle da taman ele yọle: “Bha ha nabhi ẹkẹ ọne agbaẹbho, bha dẹ miẹn okpea ọkpa nọn mun uko amẹn mhọnlẹn. Bha rẹkhan ọlẹn nabhi uwa nin ọle na i, 11  bha ha taman ọnọn nyan uwa yọle: ‘Ọman-emhin yọle nin mhan nọọn uwẹ: “Ejela ọne ugha ọsi erumhunyẹn ye, nin imẹn ha da deba edibo nesẹmhẹn lu iluemhin Ọsi Anagbera?”’ 12  Ọne okpea dẹ re udede ugha man bha bhi okhun uwa. Ebi a rẹ nyẹnlẹn ribhi ẹkẹ ọle. Bha mhanmhan emhin ọbhi otọ bhi enin.” 13  Bhiriọ, ele da kpanọ ha khian. Emhin rebhe da sunu beji ọle wo rẹ taman ele. Ele da muegbe ọne Iluemhin Ọsi Anagbera ọbhi otọ. 14  Ọne ẹghe ki sẹ, Jesu bi etuegbe nesọle da dotua nẹga itebu. 15  Ọle da taman ele yọle: “Imẹn wo manman ha guanọ nin imẹn deba bha le ọne ebale ọsi Anagbera nan ọkuẹsẹ ẹghe nin imẹn ha rẹ le oya. 16  Imẹn taman bha ghe, imẹn ida kie le ọne ebale nan, ọkuẹsẹ ọ munsẹ bhi Agbejele nọnsi Osẹnobulua.” 17  Jesu ki mun ukpu anyọn, ọle da nan erọnmhọn ọbhọ yẹ yọle: “Bha miẹn. Bha rebhe wọn bhọ. 18  Imẹn taman bha ghe, rẹ na bhi ọne ẹghe nan rẹ sẹbhi ẹghe nin Agbejele nọnsi Osẹnobulua ha rẹ vae, imẹn iyẹ da kie wọn anyọn.” 19  Ọle da yẹ re ibrẹd, nan erọnmhọn ọbhọ yẹ khuẹnẹn ọlẹn an. Ọle da ne nin ele, yẹ taman ele yọle: “Ọnan mundia nin egbe nọnsẹmhẹn nan ha rẹ zọese nin bha. Bha ha lu ọnan, nin bha rẹ ha ye mẹn re.” 20  Iriọ ọle yẹ lu rẹji ọne ukpu anyọn beji ele le ọne ebale emuan fo. Ọle da yọle: “Ọne ukpu anyọn nan mundia nin akovẹn ọsọgbọn. Aranlẹn nọnsẹmhẹn nin mẹn ha gbekua nin bha, ọle mẹn ha rẹ deba bha ve ọne akovẹn. 21  “Ghọle! Imẹn bi ọria nọn ha mun imẹn khiẹn ko ha le ebale bhi itebu ọkpa. 22  Ẹmhọanta nọn ghe Ọmọn nọnsi okpea dẹ fi ibha ya, beji a ka rẹ tale ọbhi otọ. Ọrẹyiriọ, ọkhọbhegbe hi ọsi ọne ọria nọn ha mun ọlẹn khiẹn!” 23  Bhiriọ, ele da munhẹn ha nọọn egbe ele họla bhi ẹwẹ ele ha lu ebe sẹ iriọ? 24  Rẹ deba ọnin, ele da manman ha gbugan ba ẹmhọn ọnọn lu okpọria nẹ bhi ẹwẹ ele. 25  Ọkpakinọn, Jesu da taman ele yọle: “Enijie ọsi ọne agbọn nan le ọba nyan ẹbho nin ele gbẹloghe. Sẹyẹ, ene ribhi ihe mhọn elin kpataki* nan tie ele. 26  Bhi ọsẹbha, ọ bha khẹke nin bha re iriọ ha lu emhin. Ọkhẹke nin ọnọn lu okpọria nẹ bhi ẹwẹ ibha kiẹn ọnọn khere nẹ bhi ẹwẹ ibha. Sẹyẹ, ọnọn mun ọkalo bhi ẹwẹ ibha ki ha yi ọnọn ga ibha. 27  Họla lu okpọria nẹ, ọnọn dotua ha le ebale la ọnọn muno ebale nin ẹbho? Ọnọn dotua ha le ebale nọn. Sokpan, imẹn bhọ hi ọnọn ga ibha. 28  “Ọkpakinọn, ibha hi ene sun rẹkhan imẹn ẹghe nin imẹn rẹ ha ribhi ọnọghọ. 29  Bhiriọ, mẹn deba bha ve akovẹn ghe bha dẹ gbẹloghe bhi Agbejele nọn vade, beji Aba imẹn yẹ rẹ deba imẹn ve akovẹn. 30  Ibha ki da, yẹ le bhi uke itebu nọnsẹmhẹn bhi Agbejele nọnsẹmhẹn, yẹ dotua bhi ojukhuo ha bhuohiẹn ulin-uwa igbeva ọsi ibhokhan Izrẹl. 31  “Saimọn, Saimọn, ghọle! Esu yọle ghe ọle ho nin ọle khankhan ibha bọsi wit. 32  Ọkpakinọn, imẹn manman nan erọnmhọn ji Osẹnobulua nọn rẹkpa ẹ nin urẹọbhọ nọnsẹ hẹi wẹghẹ a; bhi ọsi uwẹ, uwẹ ha fikiere, re izebhudu nin ibhio ẹ.” 33  Pita da ki taman Jesu yọle: “Ebeanlẹn imẹn, imẹn wo muegbe nin imẹn rẹ rẹkhan ẹn yo ighan bi nin imẹn rẹ yu rẹkhan ẹn.” 34  Jesu da yọle: “Pita, mẹn taman uwẹ ghe ọkuẹsẹ ọkpa viẹ ẹlẹnan, igba ea uwẹ ha yọle ghe uwẹ bha lẹn imẹn.” 35  Ọle da yẹ taman ene etuegbe yọle: “Ẹghe nin imẹn rẹ je ibha dagbare, nin imẹn da yọle nin ibha hẹi re ẹkpa igho, la ẹkpa ebale, la ibata mhọnlẹn, ibha be miẹn ẹghe nin ibha bha rẹ miẹn rẹ lu?” Ele da yọle: “Heye!” 36  Ọle da ki taman ele yọle: “Ejayenan nian, ọnọn mhọn ẹkpa igho mun mhọnlẹn, ọnọn mhọn ẹkpa ebale, ọ ha yẹ mun rẹkhan egbe. Sẹyẹ, ọnọn imhọn agbada dọ khiẹn ukpọn nin ọle yọ ke okhun rẹ dẹ agbada. 37  Imẹn taman ibha ghe, ebi a gbẹn ọbhi Ebenọnkhiale nọn yọle, ‘A dẹ ka ọle ba eria olukhọ,’ dẹ munsẹ bhi egbe nọnsẹmhẹn. Ọnan hi ebe wo ha munsẹ bhi egbe imẹn nian.” 38  Ele da yọle: “Ebeanlẹn imhan, ghọle! Mhan mhọn agbada eva.” Ọle da taman ele yọle: “Ene eva nin sẹle.” 39  Ọle ki sibhi enin re, ọle da ha khian Oke ọsi Oliv, beji ọle ka lu khẹ. Edibo nesọle da yẹ rẹkhan ọlẹn. 40  Ele ki sẹbhi enin, ọle da taman ele yọle: “Ibha wo ha nan erọnmhọn nin bha hẹi de ọbhi edọnmhẹn.” 41  Ọle da sibhi eji ele ye re, yẹ khian diọbhi odalo khere. Ọle da diguẹ, yẹ munhẹn ha nan erọnmhọn. 42  Ọle da yọle: “Aba, miẹn mẹn ọne ukpu* nan, sade ọ yẹẹ uwẹ. Ọrẹyiriọ, ji iho nọnsẹ munsẹ, ọ iyi ọsẹmhẹn.” 43  Bhi ọne ẹghe nin, ẹhi ọkpa da na bhi okhun vae dọ re izebhudu nanlẹn. 44  Ọkpakinọn, ọle da wo manman ha ribhi ọbalọ. Ranmhude ọnan, ọle da manman ha nan erọnmhọn. Ẹbhobho nọn ha rọ kua bhi egbe nọnsọle da diabe aranlẹn nọn lọnlọn kua. 45  Ọle ki nan erọnmhọn fo, ọle da bu edibo nesọle. Ọle da kere ghe, ele wẹ. Ahu fo ele bhọ nin ele rẹ ha lu akhiẹ. 46  Ọle da taman ele yọle: “Bezẹle nin ibha da ha wẹ? Ibha kpanọ ha nan erọnmhọn, beji a ha da miẹn ibha bha de ọbhi edọnmhẹn.” 47  Beji ọle sẹyẹ ha talọ, ghọle! usun ẹbho da vae. Judas nin ọkpa bhi ene etuegbe igbeva, ọle ne ele re. Ọle da khian bu Jesu dọ re unun fiofio ọle. 48  Jesu da taman ọlẹn yọle: “Judas, uwẹ vae dọ re unun fiofio Ọmọn nọnsi okpea nin uwẹ rẹ mun ọlẹn khiẹn?” 49  Ene rẹkhan Jesu ki daghe ebe khian la sunu, ele da nọọn ọlẹn yọle: “Ebeanlẹn imhan, nin imhan be re agbada ne ele khọnlẹn?” 50  Ọ bhọ da kẹ ọkpa bhi ẹwẹ ele rẹ hian ehọ* ọsi ọguọmhandia ọsi ojohẹn fia. 51  Jesu da ki taman ele yọle: “Ọnin mhẹn riọ.” Ọle da re obọ so ọne ehọ, yẹ re egbe daan ọne okpea. 52  Jesu da ki taman ene ohẹn ne khua, ene gbẹloghe uwa oga, bi ene ewanlẹn ne vae dọ mun ọlẹn yọle: “Oyi mẹn be khin, nin ibha da muno agbada bi ukpokpo rẹkhan egbe vae dọ mun imẹn? 53  Ẹdẹdẹ imẹn rẹ deba bha ha ribhi uwa oga, ibha bha mun imẹn ẹghenin. Ọkpakinọn, ẹghe nọnsẹbha khọnan nian, bi ẹghe nin ene ribhi ebiuki ha rẹ re ahu man.” 54  Ele da ki mun ọlẹn, yẹ re ọle kpanọ. Ele da mun ọlẹn ha khian uwa ọsi ojohẹn; Pita da fẹkẹ gban egbe fia rẹkhan ele bhi ikeke. 55  Ẹbho eso da fi eranlẹn bhi adesẹ azagba ọsi ọne ojohẹn, yẹ dotua ha gha ọne eranlẹn. Pita da deba ele dotua. 56  Obhokhan okhuo ọkpa nin ọguọmhandia ọsi ọne ojohẹn ki daghe Pita bhi eji ọle da ha gha eranlẹn, ọle da ghe Pita nọnsẹn yẹ yọle: “Ọkpa bhi ene rẹkhan Jesu khọnan.” 57  Ọkpakinọn, Pita da ha sin. Ọle da yọle: “Okhuo, imẹn bha lẹn ọlẹn.” 58  Obhi ẹghe khere ki gbera, ọria ọbhebhe da gbo daghe ọle, yẹ ha yọle: “Ọkpa bhi edibo nesọle uwẹ khin.” Pita da yọle: “Okpea, imẹn iyi ọkpa bhi ẹwẹ ele.” 59  Ebe si uriagogo ọkpa ki gbera, okpea ọbhebhe da munhẹn ha nyẹnyẹn unun ọbhọ yọle: “Ọne okpea nan deba ene rẹkhan ọlẹn. Obhi Galili ọle bhọ khin!” 60  Pita da yọle: “Okpea, imẹn bha zẹwẹ lẹn ebi uwẹ tẹmhọnlẹn.” Bhi ọne ẹghe nin tee, beji ọle sẹyẹ ha talọ, ọkpa da viẹ. 61  Jesu da ki fiorọ ghe Pita. Bhi ọne ẹghenin, Pita da yere ebi Jesu taman ọlẹn ẹghe nọn rẹ yọle: “Ọkuẹsẹ ọkpa viẹ ẹlẹnan, igba ea uwẹ ha yọle ghe uwẹ bha lẹn imẹn.” 62  Bhiriọ, ọle da dagbare dọ ha viẹ. 63  Ene ikpea ne mun Jesu da munhẹn ha zuọzuọ ọle. Ele da ha fi ọle emhin. 64  Ele ha gue ọle ẹlo, ele ki fi ọle emhin yẹ taman ọlẹn yọle: “Taman mhan! Họla fi uwẹ emhin?” 65  Iriọ ele yẹ rẹ ha ta ọta ne imhẹn ne bunbun ọle bhi egbe. 66  Ẹdẹ ki we, ene ewanlẹn rebhe, ọnin hi; ene ohẹn ne khua bi ene man uhi, da sikoko. Ele da re Jesu nabhi ikotu nọnsele natiọle Sanhẹdrin. Ele da taman ọlẹn yọle: 67  “Ahamiẹn uwẹ hi Kristi, taman mhan.” Ọkpakinọn, ọle da taman ele yọle: “Imẹn ha rẹ taman ibha, ibha ida rẹọbhọ. 68  Imẹn ha yẹ nọọn ibha ọta, ibha ida wanniẹn imẹn. 69  Rẹ na bhi ọne ẹghe nan rẹ ha khian, Ọmọn nọnsi okpea dẹ dotua bhi obera nọnsi Osẹnobulua nọn mhọn ahu.” 70  Ele ki họn ọnan, ele da yọle: “Uwẹ be re ọnan tare ghe ọmọn nọnsi Osẹnobulua uwẹ khin?” Ọle da taman ele yọle: “Ehe, ọle imẹn khin.”* 71  Ele da yọle: “Be imhan ki gbo ha guanọ ọsali ba? Ọle tobọle re unun nọnsọle tale.”

Eba gbẹn bho otọle

Elin ekpẹn nọn ha rẹman ghe, ene lu ẹsele nin ẹbho ele khin.
Ọne ukpu nan mundia nin iho nọnsi Osẹnobulua nin ọle rẹ re otọ nin ẹbho rẹ re orẹsin sin Jesu, yẹ gbe ọle a.
Bhi Grik, “ehọ nọn ribhi obera.”
Bhi Grik, “Ibha re unun nọnsẹbha tale fo.” Itan khọnan nan rẹ yọle “Ehe.”