ƐLĀ Ō NWU ƆMƐ 2
Ɔnyɛ nɛ Ɔwɔico wɛ a?
1. Ɔdiya nɛ alɔ cika ō gba Ɔwɔico ɛ̄gbā a?
Ɔwɔico ya ɛjɛɛji odee a. Ó lɛ o gbɔɔ ŋma ajɛ ŋ, ó kē lɛ oŋmɛyi ŋ. (Aíjē kú Ɛ̄gbā 90:2) Ɔwɔico yihɔtu alɔ, ɔɔma ya ɛɛ nɛ ó je ɔkoolɔhi nōo yɔ ipu Ubáyíbu a lɛ alɔ á. (1 Utímōti 1:11) Ɔwɔico foofunu nɛ alɔ cika ō gba ɔ ɛ̄gbā a, ohigbu ku anu je oyeeyi lɛ alɔ á.—Jé Ɔdā Nēé Mafú Lɛ Ujɔ́ni 4:11.
2. Ɔdi nɛ Ubáyíbu da alɔ lɛyikwu Ɔwɔico a?
Ɔwɔico wɛ alelekwu ihɔ. Ohigbu ɛnyā, ɔcɛ duuma i má ɔ jejee ɛ ŋ. Ɛdɔ oyeeyi nɛ ó lɛ a fiyɛ aku alɛɛcɛ, ó klla fiyɛ aku ɛjɛɛji ɔdā ɔhá nōo yeeyi ipu ɛcɛ nyā a. (Ujɔ́ni 1:18; 4:24) Amáŋ, ɔdaŋ ku alɔ gē leyi yɛ aɔdā nɛ Ɔwɔico ya a, ó géē ta alɔ abɔ ku alɔ jé uce ō ya ku nu. Bɛɛka aikpo ku ɔcí mla aododo ɛyɛɛyɛyi nɛ ó ya a gē mafu ka ó yihɔtu alɔ klla jijeeyi nɛhi. Ɛgɛ nɛ ɔkpanco mla ɛcɛ nwune lɛ a mafu ka ó wɛ Ɔwɔico nōo lɔfu nɛɛnɛhi.—Jé Ācɛ Uróm 1:20.
Ɔdaŋ ku alɔ gē jé Ubáyíbu, alɔ géē nwu ɔdā alɛwa lɛyikwu uce ō ya ku Ɔwɔico. Ubáyíbu gē da alɔ ɔdā nɛ Ɔwɔico dɔka mla ɔdā nɛ ó dɔka ŋ, ō ya ku nu mla alɛɛcɛ, mla ɛgɛ nɛ ɔtu gē ya ɔ lɛ, ɔdaŋ ku ācɛ lɛ ɔdā olɔhi amāŋ ɔdobɔbi ya.—Jé Aíjē kú Ɛ̄gbā 103:7-10.
3. Ɔdi wɛ iye ku Ɔwɔico a?
Ujisɔsi gbɔɔkɔ kahinii: “Ádā alɔ, nōo yɔ̄ ɔkpáncō, alɔ gbɔ̄ɔkɔ ká ā yá ká ācɛ kéē lɛ ojīlīmā ce iyē otīihɔ kú uwɔ.” (Umátiyu 6:9) Ó wɛ ɔkwɛyi ku Ɔwɔico lɛ icagba alɛwa, amáŋ, iye ekponu foofunu nɛ ó lɛ a. Uce ɛyɛɛyɛyi lɛ ɔwɛ ɛgɛ néē i hi iye ku nu nyā. Ipu uce ku idɔma, é gē hi ɔ ka “Ujehófa.” Amáŋ, ó lɛ ācɛ ōhī nōo gē hi ɔ ka “Uyawe.”—Jé Oōyɛbɛ̄ɛcɛ 3:2, 14, ɛlā néē ta ahaajɛ a.
Ipu Ubáyíbu alɛwa, é kwu iye ku Ɔwɔico i fu ŋma anu, klla kwu aicagba u kwɛyi nu, bɛɛka Ondu amāŋ Ɔwɔico. Amáŋ eko néē tá Ubáyíbu a, iye ku Ɔwɔico bɛɛcɛ anu gaajɛ ula igwo ahaapa ce ofu igwo (7,000). Ujisɔsi nwu ācɛ ɛlā ɔkwɛyi lɛyikwu Ɔwɔico mla iye ku Ɔwɔico.—Jé Ujɔ́ni 17:26.
Má uvidio nyā nōo kahinii Does God Have a Name?
4. Ujehofa lɛ ɛlá wu alɔ?
Ɛgɛ nɛ ōcē ku ɔyi nyā yɔ i kwu adā nu iyē lɛ a, ɛgɔɔma nɛ owe nɛ alɔ gē má a gē kwu Ɔwɔico iyē lɛ duu a
Owe nɛ alɔ gē má babanya gē mafu ku Ɔwɔico i lɛ ɛlá wu alɔ ŋ nɛɛ? Ācɛ ōhī gē ka ka Ɔwɔico gē cɛ lɛ alɔ má owe, o ya ɛɛ kóō ja alɔ ma. Amáŋ, ɛlā néē i ka nyā i wɛ ɔkwɛyi ŋ.—Jé Ujɛ́mīsi 1:13.
Ɔwɔico jɛga lɛ alɔ ku alɔ lɛ ɔtu ku alɔ ya ekponu ō gba ɔ ɛ̄gbā. Ɛga nɛ ó kē je lɛ alɔ nyā mafu ka ó lɛ ɛlá wu ɔnyɔɔnyɛ ku alɔ. Ó kē jɛ alɔ eyī nɛhi. (Ujóssuwa 24:15) Amáŋ, ɛyinɛhi ku ācɛ gē lɛ ɔtu ku uwa ya ekponu ō ya ācɛ ɔhá ɔdobɔbi, ɛnyā kē ya nɛ ācɛ alɛwa gē má owe icɛ a. Ɔdā néē i ya nyā gē kwu Ujehofa iyē nɛɛnɛhi.—Jé Ohútu 6:5, 6.
Ujehofa wɛ Ɔwɔico nōo lɛ ɛlá wu alɔ lɔɔlɔhi. Ó klla dɔka ku alɔ jɔɔnyɛ oyeeyi ku alɔ. Ó gáā gboji gɛ ŋ, ó géē ya, alɔ i gáā má owe gɛ ŋ, ó klla géē je ācɛ nōo gē ya ku alɔ má owe a fu ŋma ipu ɛcɛ nyā. Amáŋ, ó lɛ ɔdā okpɔcii nōo ya nɛ ó cɛ lɛ alɔ yɔ i má owe a. Ipu Ɛlā ō nwu ɔmɛ 8, alɔ géē jé ɔdā nōo ya a.—Jé 2 Upíta 2:9; 3:7, 13.
5. Ɛgɛnyá nɛ alɔ géē tubla Ɔwɔico ajaajɛ a?
Ujehofa dɔka ku alɔ kóō tubla ɔ ajaajɛ. Ɔwɛ éyi nɛ alɔ géē ya ɛnyā wɛ ō kɛla lɛ ɔ ipu ɔkɔ ō gba. Ó lɛ ɛlá wu ɔnyɔɔnyɛ ku alɔ. (Aíjē kú Ɛ̄gbā 65:2; 145:18) Ó le tutu ō je oyabiya ku alɔ ya alɔ ɛhi. Ó wɛ ɔkwɛyi ku alɔ gē ya ɔdā nōo gē kwu ɔ iyē ekoohi, amáŋ, ó jé ɛgɛ nɛ alɔ gē ceyitikwu ku alɔ ya ɔdā nōo he ɔ ɔtu a. Ohigbu ɛnyā, alɔ lɔfu lɛ ɛma olɔhi mla Ɔwɔico, naana nɛ alɔ i jila iyē ŋ ma.—Jé Aíjē kú Ɛ̄gbā 103:12-14; Ujɛ́mīsi 4:8.
Ihɔtu nɛ alɔ lɛ lɛ Ujehofa a cika ō fiyɛ ɛ̄nɛ̄ alɔ lɛ lɛ ɔcɛ ɔhá duuma a, ohigbu ku Ujehofa je oyeeyi lɛ alɔ á. (Umáki 12:30) Ɔdaŋ ku a gē jé Ubáyíbu klla gē ya ɔdā nɛ Ɔwɔico dɔka ku a ya a, ó géē mafu ku a yihɔtu nu. Ó klla géē ya ku a tubla ɔ ajaajɛ.—Jé 1 Utímōti 2:4; 1 Ujɔ́ni 5:3.
