1, 2. Nama kebuah nuan ngumbai sampi nya pemeri ti spesial, lalu nama kebuah kitai patut nemu utai ti diajar Bup Kudus pasal sampi?

JEHOVAH “ti udah ngaga langit enggau dunya!” Semua bansa baka setitik ai ti dalam beledi. (Masmur 115:15; Isaiah 40:15) Taja pan kitai mit amat enti dibanding enggau dunya raya, tang Masmur 145:18, 19 madahka: “[Jehovah] diau semak sida ke ngangauka Iya, ke ngangauka Iya enggau ati ti bendar. Iya meri utai ti dipeguna orang ke ngemesaika Iya. Iya ninga sabak sida, lalu nyelamatka sida.” Kitai endang bisi peluang ti manah! Jehovah, Penempa ti pemadu bekuasa, deka semak enggau kitai, lalu Iya deka mendingka sampi kitai. Amat, sampi nya peluang, pemeri ti spesial ke udah diberi Jehovah ngagai kitai seiku-seiku.

² Tang Jehovah semina deka mendingka kitai enti kitai bejaku enggau Iya ngena chara ti diterima Iya. Baka ni kitai ulih ngereja nya? Aram kitai meda utai ti dipadah Bup Kudus pasal sampi.

3. Nama kebuah nuan patut besampi ngagai Jehovah?

³ Jehovah deka nuan besampi tauka bejaku enggau Iya. Baka ni kitai nemu? Aram macha Pilipi 4:6, 7. Pikirka pasal kangau nya. Pemerintah dunya raya amat ibuhka nuan sereta deka nuan madahka asai ati sereta penanggul diri ngagai Iya.

4. Baka ni bejarit besampi ngagai Jehovah ngeringka kaul nuan enggau Iya?

 ⁴ Sampi nulung kitai bisi kaul ti rapat enggau Jehovah. Lebuh dua iku pangan selalu bejaku enggau pangan diri pasal runding, pengirau, sereta asai ati, kaul seduai iya majak teguh agi. Pia mega enggau sampi ngagai Jehovah. Nengah Bup Kudus, Jehovah madahka runding enggau asai ati Iya ngagai nuan, sereta utai ti deka dikereja Iya jemah ila. Nuan mega ulih selalu madahka utai ti amat diasaika nuan ngagai Iya. Seraya nuan ngereja tu, kaul nuan enggau Jehovah deka majak teguh agi.—James 4:8.

5. Baka ni kitai nemu Jehovah enda mendingka semua sampi?

⁵ Kati Jehovah mendingka semua sampi? Enda. Maya jeman nabi Isaiah, Jehovah madah ngagai orang Israel:  “Taja pen kita bebendar besampi, tang enggai meh Aku mending, laban jari kita dibalut darah.” (Isaiah 1:15) Nya alai enti enda bejimat, kitai engka ngereja utai ti dipegedika Jehovah, lalu tu ngasuh Iya enda bedulika sampi kitai.

6. Nama kebuah arapka Jehovah beguna bendar? Baka ni nuan nunjukka diri arap?

⁶ Enti kitai deka Jehovah mendingka sampi kitai, kitai patut arapka Iya. (Mark 11:24) Rasul Paul madahka: ‘Nadai orang ulih ngerinduka ati Petara enti iya enda arapka Petara, laban barang sapa datai ngagai Petara enda tau enda arapka Petara endang amat bisi, lalu arapka Iya deka ngupah orang ke ngiga Iya.’ (Hebrew 11:6) Tang semina madahka diri arap, enda chukup. Kitai patut nunjukka diri arap enggau ngasika Jehovah ninting hari.—Bacha James 2:26.

7. (a) Nama kebuah kitai patut baruh ati sereta bebasa lebuh besampi ngagai Jehovah? (b) Baka ni kitai ulih nunjukka diri besampi ari ati?

⁷ Kitai patut baruh ati sereta bebasa lebuh besampi ngagai Jehovah. Nama kebuah? Lebuh kitai bejaku enggau raja tauka kepala menteri, kitai deka bejaku enggau chara ti bebasa. Jehovah nya Petara ti Pemadu Bekuasa, nya alai endaka kitai patut agi bebasa sereta baruh ati lebuh bejaku enggau Iya? (Pemungkal 17:1; Masmur 138:6) Kitai mega patut besampi ngagai Jehovah ari ati, ukai semina nandu leka jaku ti sama.—Matthew 6:7, 8.

8. Lebuh kitai besampi pasal siti-siti utai, nama agi patut digaga kitai?

⁸ Ke penudi, lebuh besampi pasal siti-siti utai, kitai patut enggau naka ulih ngereja utai ti disampi. Ngambika chunto, enti kitai besampi ngagai Jehovah minta utai ti diguna besehari-hari, kitai enda tau ngelusu sereta ngarapka Jehovah meri kitai semua utai taja pan kitai ulih  gawa ngulihka utai nya. Kitai patut bagas sereta nerima sebarang kereja ke ulih kitai. (Matthew 6:11; 2 Tesalonika 3:10) Tauka enti kitai besampi minta tulung ngagai Jehovah ngambika badu ngereja utai ti salah, kitai enda tau enda nyeliahka sebarang pekara ke ulih manjuk kitai. (Kolosi 3:5) Diatu aram kitai meresa sekeda tanya kesuah bekaul enggau sampi.

9. Ngagai sapa kitai patut besampi? Nama diajar John 14:6 pasal sampi?

⁹ Ngagai sapa kitai patut besampi? Jesus ngajar bala murid iya besampi ngagai “Apai kami ti di serega.” (Matthew 6:9) Iya mega madahka: ‘Aku tu meh jalai, pemendar, enggau pengidup. Nadai orang ulih datai ngagai Apai enti enda nengah aku.’ (John 14:6) Nya alai kitai patut besampi semina ngagai Jehovah dalam nama Jesus. Nama reti besampi dalam nama Jesus? Reti nya, kitai patut ngayanka basa ngagai penuduk Jesus ti spesial ari Jehovah. Baka ke udah dipelajarka, Jesus datai ke dunya nyelamatka kitai ari dosa enggau pemati. (John 3:16; Rome 5:12) Jehovah mega udah nyiri Jesus nyadi Imam Besai sereta Hakim.—John 5:22; Hebrew 6:20.

10. Baka ni gaya tubuh tauka penuduk kitai lebuh besampi? Terangka.

¹⁰ Baka ni gaya tubuh tauka penuduk kitai lebuh besampi? Jehovah nadai ngasuh kitai besugang, duduk, tauka bediri lebuh kitai besampi. Bup Kudus madahka, kitai ulih bejaku ngagai Jehovah enggau gaya tubuh ti bebasa. (1 Bansa Israel 17:16; Nehemiah 8:6; Daniel 6:10; Mark 11:25) Utai ti beguna ba Jehovah, ukai gaya penuduk kitai lebuh besampi, tang ulah ti patut lebuh bejaku enggau Iya. Kitai ulih besampi inggar tauka dalam ati,  enda ngira alai sereta maya. Lebuh kitai besampi ngagai Jehovah, kitai pechaya Iya deka ningaka kitai taja pan orang bukai enda ulih.—Nehemiah 2:1-6.

11. Nama sekeda utai ke ulih disampika kitai ngagai Jehovah?

¹¹ Nama ulih disampika kitai? Kitai ulih besampika sebarang utai ti sejalai enggau peneka Jehovah. Bup Kudus madahka: “Enti kitai minta sebarang utai nitihka peneka Iya, Iya ninga kitai.” (1 John 5:14) Ulih kitai besampika utai ti diguna diri? Ulih. Besampi ngagai Jehovah patut baka ke bejaku enggau pangan rapat. Kitai ulih madahka sebarang utai ke bisi ba runding sereta dalam ati kitai ngagai Jehovah. (Masmur 62:8) Kitai ulih besampi minta Iya meri kitai roh kudus Iya kena nulung kitai ngereja utai ti ngena. (Luke 11:13) Kitai mega ulih minta penemu-dalam ari Jehovah kena ngaga pemutus ti manah, sereta besampi minta pengering kena napi penanggul. (James 1:5) Kitai patut minta Jehovah ngampun dosa kitai. (Epesus 1:3, 7) Kitai mega patut besampika orang bukai, nyengkaum diri sebilik sereta bala menyadi Kristian kitai ba eklisia.—Kereja Rasul 12:5; Kolosi 4:12.

12. Nama utai ti beguna agi dalam sampi kitai?

¹² Nama utai ti beguna agi dalam sampi kitai? Jehovah enggau peneka Iya. Kitai patut beterima kasih ngagai Iya ari ati ke semua utai ti udah digaga Iya ke kitai. (1 Bansa Israel 29:10-13) Kitai nemu tu laban lebuh Jesus ba dunya, iya ngajar bala murid iya chara besampi. (Bacha Matthew 6:9-13.) Iya madahka sida patut dulu besampika nama Petara dikuduska. Udah nya Jesus nunjukka kitai patut besampi ngambika Perintah Petara datai, lalu peneka Jehovah nyadi di serata dunya. Pengudah besampika semua utai nya, nya baru Jesus madahka  kitai patut besampika utai ti diguna diri. Lebuh kitai ngenuluka Jehovah enggau peneka Iya dalam sampi kitai, kitai nunjukka utai ti beguna agi ba kitai.

13. Ni pengelama kitai patut besampi?

¹³ Ni pengelama kitai patut besampi? Bup Kudus nadai madah. Sampi kitai tau pandak tauka panjai, bepanggai ba utai ti disebut kitai. Ngambika chunto, kitai  nyebut sampi ti pandak sebedau makai, tang nyebut sampi ti panjai lebuh kitai meri terima kasih tauka madah ngagai Iya utai ti ngirauka ati kitai. (1 Samuel 1:12, 15) Kitai enggai nyebut sampi ti panjai ketegal deka narit ati orang bukai, baka ke digaga sekeda orang maya jeman Jesus. (Luke 20:46, 47) Jehovah enda rinduka sampi ke baka nya. Utai ti beguna ba Jehovah nya sampi ke datai ari ati kitai.

14. Ni penyuah kitai patut besampi, lalu nama dipelajarka kitai pasal Jehovah?

¹⁴ Ni penyuah kitai patut besampi? Jehovah ngasuh kitai bejarit besampi ngagai Iya. Bup Kudus madahka, kitai patut “majak besampi” tauka “seruran besampi.”  (Rome 12:12; 1 Tesalonika 5:17) Jehovah seruran sedia mendingka kitai. Kitai ulih beterima kasih ngagai Iya ninting hari ke pengerindu enggau pengerah jari Iya. Kitai mega ulih minta iring, pengering, sereta pengelantang ba ati ari Iya. Enti kitai amat beterima kasih ke peluang ulih besampi ngagai Jehovah, kitai deka ngena semua peluang ke bisi bejaku enggau Iya.

15. Nama kebuah kitai patut nyebut “Amin” ba pengujung sampi?

¹⁵ Nama kebuah kitai patut nyebut “Amin” ba pengujung sampi? Reti “amin” nya “amat,” tauka “nyadi meh baka nya.” Tu chara kena nunjukka utai ti disebut kitai dalam sampi nya ari ati. (Masmur 41:13) Bup Kudus madahka, kitai mega patut nyebut “Amin” dalam ati tauka didinga, ba pengujung sampi maya begulai enggau bala mayuh kena nunjukka diri setuju enggau utai ti disampika.—1 Bansa Israel 16:36; 1 Korint 14:16.

16. Kati Petara amat bisi nyaut sampi kitai? Terangka.

¹⁶ Kati Petara amat bisi nyaut sampi kitai? Bisi. Bup Kudus madahka, Iya “nyaut sampi.” (Masmur 65:2) Jehovah ninga sereta nyaut sampi bejuta iku mensia ke disebut ari ati, lalu Iya nyaut sampi ngena mayuh chara.

17. Baka ni Jehovah ngena bala melikat sereta nembiak Iya ba dunya nyaut sampi kitai?

¹⁷ Jehovah ngena bala melikat sereta nembiak Iya ba dunya nyaut sampi kitai. (Hebrew 1:13, 14) Bisi mayuh chunto orang ke besampi minta tulung ngambika ulih meretika Bup Kudus tauka ngelala Petara, lalu enda lama udah nya seiku Saksi Jehovah datai ngelawa. Peneleba tu nunjukka, pengawa nusui “Berita Manah” di serata dunya tu benung digaga nengah iring ari bala melikat. (Bacha Pemandang 14:6.) Pia mega, mayuh  ari kitai udah besampi ngagai Jehovah pasal penanggul tauka utai ti diguna enggau nyemetak, lalu udah nya bulih bantu ari bala menyadi Kristian.—Jaku Dalam 12:25; James 2:16.

18. Baka ni Jehovah ngena roh kudus enggau Bup Kudus nyaut sampi kitai?

¹⁸ Jehovah ngena roh kudus Iya nyaut sampi kitai. Lebuh kitai besampi minta tulung kena napi siti-siti penanggul, Iya ngena roh kudus Iya meri kitai iring enggau pengering. (2 Korint 4:7) Jehovah mega ngena Bup Kudus nyaut sampi kitai sereta nulung kitai ngaga pemutus ti manah. Lebuh macha Bup Kudus, kitai engka tetemuka ayat ke ulih nulung kitai. Jehovah mega ulih meransang orang ke meri komen ba gempuru nyebut utai ti diguna kitai tauka seiku tuai gempuru bekunsika batang pekara ari Bup Kudus enggau kitai.—Galatia 6:1.

19. Nama kebuah Jehovah bedau nyaut sampi kitai?

¹⁹ Taja pia, kekadang kitai engka berunding, ‘Nama kebuah Jehovah bedau agi nyaut sampi aku?’ Kingatka, Iya nemu maya sereta chara nyaut sampi kitai. Iya nemu utai ti diguna kitai. Nya alai, bisi maya iya kitai patut majak besampi kena nunjukka utai ti disebut kitai nya amat, lalu kena nunjukka kitai arap bendar ke Iya. (Luke 11:5-10) Kekadang Jehovah nyaut sampi kitai ngena chara ti enda disadang kitai. Ngambika chunto, kitai engka besampi pasal siti-siti penanggul, tang ari ke muai penanggul nya, Iya meri kitai pengering ngambika ulih tan natka penanggul nya.—Bacha Pilipi 4:13.

20. Nama kebuah kitai patut suah besampi ngagai Jehovah?

²⁰ Ulih besampi ngagai Jehovah endang peluang ti badas! Kitai pechaya Iya deka mendingka sampi kitai. (Masmur 145:18) Lalu suah agi kitai besampi ngagai Jehovah ari ati, kaul kitai enggau Iya deka teguh agi.