James 2:1-26
2 Bala menyadi aku, kati kita bepilih mata lebuh kita arapka Tuan kitai Jesus Kristus ti bemulia?
2 Enti sema orang ke ngena tinchin emas sereta ke begari gap datai ngagai gempuru kita, lalu udah nya, orang miskin ke ngena gari kamah mega datai,
3 kati kita bebasa agi ke orang ti begari gap nya, lalu madah ngagai iya: “Duduk meh ba endur ti manah tu.” Tang ngagai orang ke miskin nya, kita madahka: “Nuan bediri aja meh,” tauka “Duduk ngimbai pelasar kaki aku.”
4 Enti pia, endaka nya nunjukka kita meda orang nitihka penuduk sida, lalu nyadi hakim ke ngaga pemutus ti jai?
5 Bala menyadi ke dikerinduka aku, dinga kita: Endaka Petara milih orang ke dikumbai dunya miskin ngambika kaya ba pengarap, lalu nyadi waris Perintah ke disemayaka Iya ngagai orang ke rinduka Iya?
6 Tang kita enda bebasaka orang ke miskin. Endaka orang ke kaya ke ngasuh kita tusah, lalu ngirit kita ngagai kot mahkamah?
7 Kita ngarika nama ti manah. Tang endaka sida ke bejaku ngelaban nama nya?
8 Bup Kudus madahka: “Kita patut rinduka orang bukai baka kita ke rinduka diri empu.” Enti kita nitihka adat diraja tu, manah meh nya.
9 Tang, enti kita majak bepilih mata, kita bedosa, lalu nitihka adat nya, kita terang amat udah besalah.
10 Enti sesiku orang ngasika semua utai ke dipadah ba Adat, tang iya ngelanggar siti ari pesan ke bisi ba Adat nya, iya udah ngelanggar semua utai ke dipadah ba Adat nya.
11 Petara ke madahka: “Anang butang,”* mega madahka: “Anang munuh orang.” Nya alai, taja pan kita enda butang, tang enti kita munuh orang, kita ngelanggar adat.
12 Terus meh bejaku sereta ngembuan ulah baka orang ke deka diakim nitihka adat orang ke bibas.*
13 Orang ke enda ngayanka pengasih, enda bulih pengasih lebuh iya diakim. Pengasih jauh manah agi ari diakim.
14 Bala menyadi aku, nama guna enti orang madahka diri arap tang iya enda nunjukka nya nengah pengawa iya? Ulih pengarap ke baka nya nyelamatka iya?
15 Enti bisi menyadi lelaki tauka menyadi indu nadai chukup gari* sereta nadai chukup pemakai,
16 nama guna kita nyebut, “Ngarapka kita lantang lalu ngarapka kita bisi gari sereta chukup pemakai,” tang kita enda meri utai ke diguna tubuh sida?
17 Pia mega, enti nadai pengawa, pengarap mati.
18 Tang orang engka madahka: “Nuan bisi pengarap, tang aku bisi pengawa. Ayanka meh pengarap nuan ke nadai pengawa, lalu aku deka ngayanka pengarap aku nengah pengawa aku.”
19 Kita pechaya Petara semina siku aja, enda pia? Manah nya. Tang, endaka bala melikat ti jai mega pechaya lalu sida gegetar takutka Petara?
20 O kita ke enda nemu utai! Kati kita amat deka nemu, pengarap nadai guna enti nadai pengawa?
21 Endaka Abraham apai kitai dikumbai lurus ketegal pengawa iya, pengudah iya nyerahka anak iya, Isak, ba alta?*
22 Ari nya, kita ulih beratika pengarap iya sejalai enggau pengawa iya lalu pengarap iya nyadi sempurna ketegal pengawa iya.
23 Enggau nya, ayat tu dikeamatka: “Abraham arapka Jehovah, lalu iya dikumbai lurus.” Iya mega dikumbai pangan Jehovah.
24 Ari tu, kita ulih beratika, orang deka dikumbai lurus ukai semina ketegal iya arap, tang mega ketegal pengawa iya.
25 Pia mega enggau indu sundal ke benama Rahap. Endaka iya dikumbai lurus ketegal pengawa iya? Iya nerima orang ke mai pesan enggau manah ati lalu nulung seduai iya ngelepaska diri ngena jalai bukai.
26 Nya alai, baka tubuh ke mati enti nadai seput,* pengarap mega mati enti nadai pengawa.
Nota Kaki
^ Orang ti udah kawin ngereja ulah seks enggau orang ke ukai kaling pengidup iya.
^ Jaku Asal, “adat pengelepas.”
^ Jaku Asal, “telanjai.”
^ Peda Penerang Leka Jaku.
^ Jaku Gerika, “pneu′ma.” Peda Penerang Leka Jaku, “Pneu′ma.”
