Isaiah 39:1-8
-
Seruan ari Babilon (1-8)
39 Maya nya, raja Babilon ke benama Merodak-baladan anak Baladan, ngirumka surat enggau pemeri ngagai Hesekiah, laban iya bisi ninga rita pasal Hesekiah ke sakit udah gerai.
2 Hesekiah gaga ati nerima penatai bala sida ke dianjung raja nya, lalu iya nunjukka ngagai sida endur alai iya nyimpan reta. Ba dia bisi pirak, emas, minyak balsam, minyak ti berega, semua senyata iya, sereta semua utai bukai ke bisi ba dia. Semua utai ke ba istana iya enggau ba serata perintah iya dipandangka iya magang ngagai sida.
3 Udah nya, Nabi Isaiah datai ngagai Raja Hesekiah lalu nanya: “Nama utai dipadah sida? Ari ni penatai sida?” Ku Hesekiah nyaut iya: “Sida datai ari endur ti jauh, ari Babilon.”
4 Udah nya, Isaiah nanya: “Nama utai dipeda sida ba istana nuan?” Ku Hesekiah nyaut: “Semua utai ke ba istana aku, nyengkaum utai ke bisi ba endur alai aku nyimpan reta, dipeda sida magang. Nadai utai ke enda dipandangka aku ngagai sida.”
5 Ku Isaiah madah ngagai Hesekiah: “Dingaka jaku Jehovah, ketuai soldadu serega.
6 Ku Jehovah madah: ‘Maya deka datai alai semua utai ke bisi ba istana nuan, nyengkaum semua utai ke udah disimpan aki ini nuan nyentukka seharitu, deka dibai ngagai Babilon. Nadai siti pan ke deka tinggal.
7 Sekeda ari bala peturun nuan deka ditangkap lalu nyadi pegawai ba istana raja Babilon.’”
8 Ku Hesekiah madah ngagai Isaiah: “Manah utai ke dipadah Jehovah ngagai nuan nya.” Udah nya, iya nampung baru: “Laban ba sepemanjai pengidup aku bisi pengelantang enggau pengelikun.”*
Nota Kaki
^ Tauka “pemendar.”
