Isaiah 21:1-17
21 Tu meh pemutus pechara pasal menua puang ke baka tasik:*
Bisi utai deka datai baka ribut ke mangka ba selatan,Ari menua puang, ari menua ke diketakutka orang.
2 Petara mandangka utai ti ngenakutka dalam runding aku:
Orang ke licik deka ngereja utai ti enda setia,Lalu orang ke nganchurka utai deka nganchurka utai.
O Elam, mansang meh! O Media, kepung meh kuta!
Aku deka ngujungka semua pemerinsa ke dikenataika iya.
3 Nya meh kebuah aku balat amat merinsa.
Aku nyau besintak isi,Baka indu ke benung beranak.
Aku kelalu tusah ati deka ninga;Aku kelalu kesal deka meda.
4 Ati aku nyau lemi, lalu aku getar-getar takut.
Malam ke dianti aku ngasuh aku rawan.
5 Sediaka mija lalu tusun kerusi!
Makai meh lalu ngirup!
Angkat meh kita, bala tuai; unsutka minyak ba terabai!*
6 Tu meh utai ke dipadahka Jehovah ngagai aku:
“Asuh siku orang bejaga, lalu asuh iya madahka utai ke dipeda iya.”
7 Iya meda siti kerita perang ke ditarit seraban kuda,Siti kerita perang ke ditarit seraban keledai,Siti kerita perang ke ditarit seraban unta.
Iya meda enggau manah sereta beratika nya enggau silik.
8 Udah nya, baka singa, iya bejaku enggau inggar:
“O Jehovah, aku bediri ba menara jaga maya siang hari,Lalu tiap malam, aku bisi ba endur aku bejaga.
9 Peda! Sida datai kitu!
Sida nepan kerita perang ke ditarit seraban kuda.”
Udah nya, iya madah:
“Iya udah labuh! Babilon udah labuh!
Semua patung ke disembah orang ba dia nyau abis redak ba tanah!”
10 O bansa aku ke udah diindik,Asil ari endur alai ngindik utai ke diketau,Aku udah madahka kita utai ke didinga aku ari Jehovah, ketuai soldadu serega, Petara orang Israel.
11 Tu pemutus pechara pasal Dumah:*
Bisi orang ngangauka aku ari Seir:
“Jejaga, agi panjai malam?
Jejaga, ni maya hari tu deka tawas?”
12 Ku jejaga nya nyaut:
“Hari deka tawas, lalu malam mega deka datai.
Enti nuan deka nanya, tanya meh.
Datai baru!”
13 Tu pemutus pechara pasal padang pasir:
O orang Dedan ke suah mindah kin kia,Kita deka bemalam ba kawasan utan ba padang pasir.
14 O orang ke diau ba Tema,Bai ai ngagai sida ke aus,Lalu bai pemakai ngagai sida ke ngiga endur belindung,
15 Laban sida udah ngerarika diri ari pedang, ari pedang ke disintak,Ari panah ke ditarit sereta ari perang ti balat.
16 Tu utai ke dipadahka Jehovah ngagai aku: “Dalam timpuh setaun, baka timpuh pekereja ke digaji,* semua mulia Kedar deka nadai agi.
17 Bala pahlawan Kedar ke nimbak panah deka tinggal mimit aja, laban Aku, Jehovah, Petara orang Israel, udah bejaku.”
