Isaiah 2:1-22
2 Tu utai ke dipandangka Petara dalam runding Isaiah anak Amoz pasal Judah enggau Jerusalem:
2 Ba timpuh ti penudi,*Gunung alai Rumah JehovahDeka nyadi tegap lalu tinggi agi ari gunung ke bukai,Sereta nyadi tinggi agi ari semua bukit.
Orang ari semua bansa deka beterudus datai kia.
3 Mayuh orang deka mansang lalu madah:
“Aram kitai niki ngagai gunung Jehovah,Ngagai Rumah Petara ke disembah Jakop.
Iya deka ngajar kitai jalai Iya,Lalu kitai deka bejalai nengah jalai nya.”
Adat* deka pansut ari Sion,Lalu jaku Jehovah deka pansut ari Jerusalem.
4 Petara deka ngakim mayuh bengkah bansaLalu mutarka pekara ke bekaul enggau mayuh orang.
Sida deka ngaga pedang nyadi pengeradu tanah,Lalu sangkuh deka digaga sida nyadi duku penyarau.
Nadai bansa deka ngangkatka pedang ngelaban bansa bukai,Lalu sida enda agi belajar beperang.
5 O ruang bilik Jakop, datai meh.
Aram kitai bejalai dalam penampak Jehovah ti terang.
6 Petara, Nuan udah ninggalka nembiak Nuan, iya nya ruang bilik Jakop,Laban menua sida penuh enggau pekara ari Timur.
Sida ngereja pengawa ilmu sihir* baka orang Pilistin,Lalu mayuh peturun orang asing diau enggau sida.
7 Menua sida penuh laban pirak enggau emas;Enda alah kira pemayuh reta sida.
Menua sida penuh laban kuda;Enda alah kira penyampau kerita kuda sida.
8 Menua sida penuh laban petara ke nadai guna.
Sida besugang ngagai utai ke digaga jari sida,Ke digaga tunjuk jari sida empu.
9 Lebuh orang besugang, iya deka dikemaruhka.
Nuan tentu enda ngampunka sida.
10 Sida deka tama ngagai selepak batu sereta numbak lubang ba tanah lalu belalai ba dia,Ketegal pengeringat Jehovah ti amat ngenakutkaSereta ketegal mulia enggau kuasa Iya.
11 Orang ke ngeninggika diri deka dikemaruhka,Lalu orang ke sumbung deka ngenduk.
Ba hari nya, semina Jehovah aja ke deka dimuliaka.
12 Laban nya hari Jehovah, ketuai soldadu serega.
Iya deka ngukum orang ke ngeninggika diri sereta sumbung.
Iya deka ngakim semua orang, enda ngira orang nya penting tauka enda.
13 Iya deka ngukum semua pun sidar ba Lebanon ke tinggi sereta besaiEnggau semua pun oak ba Basan,
14 Semua gunung ti tinggiEnggau semua bukit ti tinggi,
15 Semua menara ti tinggi enggau semua dinding ti teguh,
16 Sereta semua kapal ba TarsisEnggau semua perau ti manah.
17 Orang ke ngeninggika diri deka dikemaruhka,Lalu orang ke sumbung deka ngenduk.
Ba hari nya, semina Jehovah aja ke deka dimuliaka.
18 Petara ke nadai guna deka nadai agi.
19 Lebuh Jehovah angkat ngasuh dunya begegar takut,Orang deka tama ngagai gua batuSereta tama ngagai lubang ba tanah,Ketegal pengeringat Iya ti amat ngenakutkaSereta ketegal mulia enggau kuasa Iya.
20 Ba hari nya, orang deka ngambi petara sida ti nadai guna, ke digaga ari pirak enggau emas,Ke digaga sida ke sida empu sereta ke disembah sida,Lalu nikauka semua nya ngagai tikus* enggau kelawar.
21 Lebuh Jehovah angkat ngasuh dunya begegar takut,Sida deka tama ngagai selepak batuLalu belalai ba entara batu ti besai,Ketegal pengeringat Iya ti amat ngenakutkaSereta ketegal mulia enggau kuasa Iya.
22 Ke penguntung kita empu, badu agi pechayaka mensia;Sida pan enseput ngambika ulih terus idup.
Nama guna bepanggai ba sida?
Nota Kaki
^ Tauka “Ba hari ti penudi.”
^ Tauka “Iring.”
^ Peda Penerang Leka Jaku, “Ilmu sihir.”
^ Tauka “tikus kesturi.” Sebengkah mamalia ti mit ke kuat makai.
