A B D E F G H I K L M N O P R S T U V W

A

• Aba.

  Iuda tomadiho ena kalenda dekenai ia be hua namba 5, bona uma gaukara ena kalenda dekenai ia be hua namba 11, Israela besena be Babulonia ena igui idia rakatania murinai unai ia matamaia. Ia be July huanai ia lao August huanai. Baibel lalonai hua ena ladana idia gwauraia lasi, to idia gwau sibona “hua namba 5.” (Nu 33:38; Esr 7:9)—Ap. B15 itaia.

• Abadono.

  Heberu ai unai hereva ena anina be “bodaga,” bona danu “bodaga gabuna.” To ia be gabu korikorina ta ia herevalaia lasi. Ia be mase neganai ta ena tauanina ia bodaga bona kahu ai ia lao karana ia herevalaia. (Sal 88:11; Iob 26:6; 28:22; Ao 15:11) To Apokalupo 9:11 ai inai hereva “Abadono” be “guri dobu masemase ena aneru” ena ladana totona idia gaukaralaia.

• Abiba.

  Israela taudia edia tomadiho ena kalenda ai ia be hua ginigunana, bona uma gaukara ena kalenda dekenai ia be hua namba 7. Ena anina be “(Witi Ena) Uhe Matamata” bona ia be March huanai ia lao April huanai. Israela taudia be Babulonia amo idia giroa murinai, unai hua idia gwauraia Nisan. (De 16:1)—Ap. B15 itaia.

• Adara.

  Israela besena be Babulonia ena igui idia rakatania murinai, Iuda tomadiho ena kalenda dekenai ia be hua namba 12, bona uma gaukara ena kalenda dekenai ia be hua namba 6. Ia be February huanai ia lao March huanai. (Est 3:7)—Ap. B15 itaia.

• Akaia.

  Keristani Grik Toretoredia ai, ia be Grik ena saut kahanai ia noho Roma provinsi ta, bona ena siti badana be Korinto. Akaia be Peloponnese ena kahana ibounai bona Grik ena siti badana ia herevalaia. (Ka 18:12)—Ap. B13 itaia.

• Alamota.

  Miusiki ai idia gaukaralaia herevana ta, ena anina be “Haneulato; Hahine Matamata,” reana unai be hahine matamata edia soprano gadona ia herevalaia. Toana be inai hereva idia gaukaralaia hahine matamata edia gadona be ataiai momokani ai ane idia abia totona.—1Si 15:20; Sal 46:Sup.

• Alepa bona Omega.

  Idia be Grik alfabet ena leta ginigunana bona ginigabena edia ladana; Apokalupo bukana ai, nega toi idia gaukaralaia Dirava ena dagi bamona. Unuseniai, inai hereva ena anina be tamona, “ginigunana bona ginigabena” bona “matamana bona dokona.”—Apo 1:8; 21:6; 22:13.

• Amen.

  “Unai bamona do ia vara,” eiava “oibe.” Unai hereva be Heberu herevana ʼa·manʹ amo idia abia, ena anina be “do oi badinaia, do oi hamomokania.” Gwauhamata, guriguri, eiava hereva ta dekenai idia lalotamona neganai, “amen” idia gwauraia. Apokalupo bukana ai, ia be Iesu ena dagi ladana bamona idia gaukaralaia.—De 27:26; 1Si 16:36; Apo 3:14.

• Aneru.

  Heberu herevana mal·ʼakhʹ bona Grik herevana agʹge·los amo idia abia. Unai hereva rua edia anina be “gwaukau tauna,” to guba ai Dirava ena gwaukau taudia idia herevalaia neganai, “aneru” idia gaukaralaia. (Ge 16:7; 32:3; Ia 2:25; Apo 22:8) Aneru be lauma taudia goadadia, Dirava ese taunimanima ia do havaraia lasi neganai, idia ia karaia. Baibel ese idia ia gwauraia “aneru helagadia,” “Dirava ena natudia,” bona “daba ena hisiu momo.” (De 33:2; Iob 1:6; 38:7) Idia be aneru ma haida idia havaraia diba lasi, to Dirava ese idia ta ta ia karaia. Edia namba be handred milioni momo ia hanaia. (Da 7:10) Baibel ia gwau idia ta ta be mai edia ladana bona mai edia kara namodia, to idia manau bona idia ura lasi taunimanima ese idia tomadiho henidia, bona idia momo be edia ladana idia gwauraia hedinarai lasi. (Ge 32:29; Lu 1:26; Apo 22:​8, 9) Edia dagi be idauidau bona edia gaukara danu be idauidau, Iehova ena terona vairanai idia gaukara, iena hereva idia abia loaloa, Iehova ena hesiai taudia tanobada ai idia durua, Dirava ena hahemaoro idia karaia, bona sivarai namona harorolaia gaukarana idia durua. (2Ki 19:35; Sal 34:7; Lu 1:​30, 31; Apo 5:11; 14:6) Vaira nega ai, Aramagedono tuarina ai idia ese Iesu do idia durua.—Apo 19:​14, 15.

• Anina ginigunadia.

  Uma aniani gogoa negana ena anina ginigunana, eiava gau ta ena anina ginigunana. Iehova ena oda be Israela besena ese ia dekenai anina ginigunana do idia henia, ena be ia be taunimanima, animal, eiava uma ena aniani. Isti Lasi Paraoa Ena Aria bona Pentekoste dekenai Israela bese  ibounai be Dirava dekenai anina ginigunadia idia bouboulaia. Inai hereva “huahua ginigunana” idia gaukaralaia laulau dalanai Keriso bona iena murinai idia raka horoa taudia idia herevalaia totona.—1Ko 15:23; Nu 15:21; Ao 3:9; Apo 14:4.

• Aniani lasi taravatu.

  Aniani lasi karana ia herevalaia. Israela taudia be Kara Dika Davana Karaia Dinana ai, lalohisihisi negana ai, bona Dirava ena heduru idia noia negana ai idia aniani lasi. Lagani ta ta ai, Iuda taudia be nega 4 ai idia aniani lasi, unai negadia ai idia ese guna idia dekenai idia vara dika badadia idia laloa. Hari Keristani taudia be aniani lasi taravatu idia badinaia lasi.—Esr 8:21; Isa 58:6; Lu 18:12.

• Aposetolo.

  Inai hereva ena anina be “idia siaia lao tauna,” bona idia gaukaralaia Iesu bona ma haida hesiai henia totona idia siaia taudia idia herevalaia totona. Nega momo idia gaukaralaia hahediba taudia 12 idia herevalaia totona, Iesu ese idia ia abia hidi iena gwaukau taudia.—Mr 3:14; Ka 14:14.

• Aposteit.

  Grik gado ai inai hereva a·po·sta·siʹa ena anina be “ia amo gini siri.” Unai hereva ese “heau boio, rakatania, eiava gwau-edeede” karana ia hahedinaraia. Keristani Grik Toretoredia lalonai, aposteit idia gaukaralaia ta be hereva momokani ia dadaraia karana hahedinaraia totona.—Ao 11:9; Ka 21:21; 2Te 2:3.

• Arama; Arama taudia.

  Sema ena natuna Arama ena bese taudia. Idia be Lebanona Ororodia amo ela bona Mesopotamia bona not kahana ai Taurus Ororodia amo ia diho lao Damaseko bona saut kahana dekenai idia noho. Heberu gado ai unai gabu idia gwauraia Arama, bena gabeai idia gwauraia Suria bona unai tano taudia be Suria taudia.—Ge 25:20; De 26:5; Ho 12:12.

• Aramagedono.

  Heberu gado hereva Har Meghid·dohnʹ, amo idia abia, anina be “Megido Ororo.” Inai hereva be “Siahu Ibounai Diravana ena dina badana ena tuari” ida idia herevalaia, unai nega ai “tanobada ibounai edia king taudia” do idia haboua Iehova idia tuari henia totona. (Apo 16:​14, 16; 19:​11-21)—HISIHISI BADANA itaia.

• Aramia Gado.

  Ia be Heberu gado hegeregerena bona edia alfabet be tamona. Guna Arama taudia sibona ese idia gaukaralaia, to gabeai Asuria bona Babulonia ai tano idauidau taudia ese inai gado idia gaukaralaia bisinesi karaia totona. Parasa Basileiana ese unai gado ia gaukaralaia danu. (Esr 4:7) Esera, Ieremia, bona Daniela bukadia edia kahana haida be Aramia gado ai idia torea.—Esr 4:8–6:18; 7:​12-26; Ier 10:11; Da 2:4b–7:28.

• Areopagu.

  Atena ai ia noho ororo maragina, ia be Acropolis ena not-west kahana ai. Unuseniai kota idia karaia kaunsolo taudia ena ladana. Stoa bona Epikuro taudia ese Paulo be Areopagu dekenai idia abia lao ia abidadama henia gaudia ia gwauraia hedinarai totona.—Ka 17:19.

• Ariara.

  Palai Dubu be mai ena ariara, ia be dabua magu ese ia hagegea. Gabeai, dubu helaga ena ruma badana be ariara ese ia hagegea. Gabua ore boubouna ena pata be Palai Dubu ena ariara dekenai ia gini, gabeai dubu helaga ena ariara maragina dekenai ia gini. (Ap. B5, B8, B11 itaia.) Baibel ese ruma idauidau bona king edia ruma edia ariara ia herevalaia danu.—Eso 8:13; 27:9; 1Ki 7:12; Est 4:11; Mt 26:3.

• Ariara tau o hahine.

  Ta be moni totona headava murimurina ai ma ta ida ia mahuta hebou. (Greek herevana porʹne, idia hahanaia “ariara tau o hahine” ena anina be “hoihoilaia.”) Nega momo inai hereva be hahine ia herevalaia, to Baibel ai ariara tatau ia herevalaia danu. Mose Ena Taravatu ese ariara karana ia taravatua, bona ariara tau o hahine ese ia abia davana be kontribusen bamona Iehova ena dubu helaga dekenai do ia atoa lasi. To tomadiho koikoi be idau, idia ese dubu ai ariara tau o hahine idia gaukaralaia moni abia totona. (De 23:​17, 18; 1Ki 14:24) Danu, Baibel ese inai hereva be laulau dalanai ia gaukaralaia, kaivakuku idia tomadiho henia taudia, besedia, eiava orea ia herevalaia totona, ena be idia gwau Dirava idia tomadiho henia. Hegeregere, tomadiho oreana “Babulonia Badana” be Apokalupo ese ia gwauraia ariara hahine, badina ia be siahu bona kohu momo abia totona tanobada ena lohia taudia ida ia gaukara hebou.—Apo 17:​1-5; 18:3; 1Si 5:25.

• Arona ena natudia.

  Levi ena tubuna mero Arona ena bese taudia, Arona be Mose ena Taravatu hegeregerena idia abia hidi hahelaga tauna badana ginigunana. Arona ena natudia memero be palai dubu bona dubu helaga ai hahelaga gaukara idia karaia.—1Si 23:28.

• Asasele.

  Heberu herevana, reana ena anina be “Ia Boio Nanigosi.” Kara Dika Davana Karaia Dinana ai, Asasele totona idia abia hidi nanigosi be taunimanima lasi gabuna dekenai idia siaia lao, laulau dalanai ia be bese ena lagani gunana ena kara dika ia huaia lao.—Le 16:​8, 10.

•  Asatorete.

  Kanana taudia edia dirava hahine, ia be tuari bona natuna havaraia siahuna ia henia, Bala ena adavana.—1Sa 7:3.

• Asia.

  Keristani Grik Toretoredia ai, inai be Roma provinsi ena ladana, bona hari ia be Turkey ena west kahana bona kone hanuadia haida danu, hegeregere Samo bona Patamo. Ena siti badana be Efeso. (Ka 20:16; Apo 1:4)—Ap. B13 itaia.

• Ataiai gabuna.

  Inai gabu be tomadiho gabuna ta, vaia ia be ororo maragina eiava badana ataiai eiava taunimanima ese idia karaia patapata latanai. Ena be nega haida ataiai gabudia idia gaukaralaia Dirava idia tomadiho henia totona, to nega momo idia be dirava koikoidia tomadiho henia totona idia gaukaralaia.—Nu 33:52; 1Ki 3:2; Ier 19:5.

• Au helagana.

  Inai Heberu herevana ʼashe·rahʹ be gau rua ia herevalaia: (1) Au helagana ta, Asera, Kanana taudia edia dirava, natudia havaraia siahuna ia laulaulaia eiava, (2) dirava hahinena Asera ena laulau ta. Unai du be idia gini maoromaoro bona au amo idia karaia. Reana idia be au sibona bona idia koroa lasi.—De 16:21; Hah 6:26; 1Ki 15:13.

• Au; Hisihisi auna.—

  Ia be au latana ta, unai au ai kerere tauna idia tauadae. Tano haida ai unai au ai taunimanima idia hamasea eiava mase tauanina idia tauadae, taunimanima ibounai ese idia itaia eiava kirikirilaia totona. Asuria taudia be dagedage taudia momokani, tuari amo idia abia mauri taudia be au mai matadia dekenai idia tauadae. Unai au be unai taudia edia bogana amo ia vareai bona edia kemena dekenai ia raka-lasi. To Israela taudia edia taravatu dekenai, unai bamona idia karaia taudia, eiava taunimanima edia ladana idia hadikaia eiava kaivakuku idia tomadiho henia taudia be nadi amo idia hodoa bena edia mase tauanina be au dekenai idia tauadae, taunimanima hadibaia totona. (De 21:​22, 23; 2Sa 21:​6, 9) Nega haida Roma taudia ese tau ta be au dekenai idia kwatua bona dina haida murinai unai tauna be hisihisi, ranu mase, hitolo, bona dina ena siahu dainai ia mase. Nega haida ai, Iesu idia hamasea hegeregerena, kerere tauna ena imana bona aena be au dekenai idia kokoa. (Lu 24:20; Ioa 19:​14-16; 20:25; Ka 2:​23, 36) Grik herevana stau·rosʹ idia hahanaia hisihisi auna ena anina be au latana ta, Iesu idia tauadae auna hegeregerena. Gau ta ese ia hamomokania lasi unai Grik herevana ena anina be korosi, Keriso ia do mai lasi neganai, tomadiho koikoi taudia ese idia tomadiho henia gauna hegeregerena. Inai hereva “hisihisi auna” ese unai Grik herevana ena anina korikorina ia hahedinaraia, badina Iesu danu ese inai hereva stau·rosʹ ia gaukaralaia iena murinai idia raka taudia ese do idia davaria hisihisi bona hemarai ia hahedinaraia totona.—Mt 16:24; He 12:2.

• Au mai matana.

  Au latana ta mai ena auri matana, biru tauna ese ia gaukaralaia animal ia gwadaia ia raka totona. Au mai matana be aonega tauna ena sisiba herevadia ida idia hahegeregerea, unai ese kamonai tauna ia durua sisiba ia badinaia totona. Inai laulau herevana “au mai matana oi kikia” be boromakau ena kamonai lasi karana amo idia abia. Boromakau be au mai matana amo idia gwadaia to ia kamonai lasi bona au ia kikia dainai sibona ia hahisia.—Ka 26:14; Hah 3:31.

• Au metaudia.

  Taunimanima idia koua bona idia panisia totona idia gaukaralaia. Au metaudia haida be aena sibona idia koua, ma haida be aena, imana, bona aiona idia koua.—Ier 20:2; Ka 16:24.

• Au Raurau Rumadia Ena Aria.

  IEna ladana ma haida be Ruma Maragidia Ariana, eiava Aniani Gogoa Aria. Unai aria be Etanimi ena dina 15-21 ai idia karaia. Unai nega ai Israela taudia ese edia uma aniani idia gogoa negana idia moalelaia, bona Iehova ese edia uma aniani ia hanamoa dainai, idia tanikiu henia. Unai aria negadia ai, idia be au raurau rumadia, eiava ruma maragidia dekenai idia noho, Aigupito idia rakatania negana idia laloatao totona. Inai aria bona aria ma rua karaia totona, tatau be Ierusalema dekenai idia lao.—Le 23:34; Esr 3:4.

B

• Bala.

  Kanana taudia edia dirava, idia gwau ia be guba ena biaguna bona medu bona natuna havaraia siahuna ia henia diravana. Inai ladana be dirava maragidia ma haida dekenai idia gwauraia danu. Heberu hereva ena anina be “Biaguna.”—1Ki 18:21; Ro 11:4.

• Balsam.

  Iena bonana be namo, bona ia be au amo ia raka-lasi oela bamona gauna ta [eiava “bonana namo dehoro”], bona tubutubu gaudia bona au amo idia karaia. Unai be muramura bona pefium totona idia gaukaralaia, bona ia be dava bada gauna bamona idia laloa.

• Bapatiso.

  Inai hereva ena anina be “ranu lalonai hadihoa.” Iesu ia gwau ia murinai idia raka taudia be do idia bapatiso. Danu, Baibel  ese Ioane ia karaia bapatiso, lauma helaga ena bapatiso, lahi ena bapatiso, bona bapatiso ma haida ia herevalaia.—Mt 3:​11, 16; 28:19; Ioa 3:23; 1Pe 3:21.

• Bat.

  Inai be ranu ena mesament ta. Akioleji ese idia davaria uro maragimaragi dekenai inai ladana ia noho bona idia laloa bat tamona be 22 L bamona. Baibel lalonai, kaukau gaudia bona ranu gaudia edia mesament abia totona bat ena mesament idia gaukaralaia. (1Ki 7:38; Ese 45:14)—Ap. B14 itaia.

• Belesebulo.

  Inai ladana be Satani, demoni edia lohia tauna ia herevalaia. Ia be reana Bala-sebuba ena ladana ma ta, Ekarona ai Filistia taudia ese idia tomadiho henia Bala diravana unai.—2Ki 1:3; Mt 12:24.

• Bonana namo muramura.

  Bonana namo au ena glu bamona ranu be balsam ida idia mikisia bena idia araia metairametaira, unai ese bonana namona ia havaraia. Pefium 4 amo idia karaia bonana namo muramura be Palai Dubu bona dubu helaga lalonai idia gaukaralaia. Dabai bona hanuaboi ai, Helaga Gabuna ena bonana namo muramura ena pata latanai idia gabua, bona Kara Dika Davana Karaia Dinana ai, Helaga Herea Gabuna lalonai idia gabua. Laulau dalanai unai bonana namo muramura ese ia hahedinaraia Dirava be ena abidadama hesiai taudia edia guriguri ia abia dae. Keristani taudia be hari bonana namo muramura idia gabua lasi.—Eso 30:​34, 35; Le 16:13; Apo 5:8.

• Boubou gauna.

  Unai be Dirava dekenai idia henia harihari gauna, Dirava tanikiu henia totona, kerere gwauraia hedinarai totona, bona Dirava tura henia lou totona. Abela ena nega amo, taunimanima be edia ura hegeregerena boubou gaudia, hegeregere animal idia henia ela bona Mose Ena Taravatu ia gini neganai, unai taravatu hegeregerena idia karaia. Iesu ena mauri goevadaena be boubou gauna bamona ia henia neganai, animal bouboulaia karana ia doko, to Keristani taudia be edia hesiai gaukara amo Dirava dekenai boubou gaudia idia henia noho.—Ge 4:4; He 13:​15, 16; 1Io 4:10.

• Boubou Patana.

  Inai pata be au amo idia karaia bona auri amo idia koua, tano, nadi momo, eiava nadi badana tamona amo idia karaia. Tomadiho totona, ia latanai boubou gaudia eiava bonana namo muramura idia gabua. Palai dubu bona dubu helaga edia daiutu ginigunana ai, “golo boubou patana” ia noho, bonana namo muramura bouboulaia totona. Ia be au amo idia karaia bona golo amo idia koua. “Kopa boubou patana” badana be ariara murimuri ai ia noho, gabua bouboudia totona. (Eso 27:1; 39:​38, 39; Ge 8:20; 1Ki 6:20; 2Si 4:1; Lu 1:11)—Ap. B5 bona B8 itaia.

• Boubou patana ena doana.

  Boubou patadia haida edia kona 4 ai idia noho. (Le 8:15; 1Ki 2:28)—Ap. B5 bona B8 itaia.

• Bul.

  Iuda tomadiho ena kalenda dekenai ia be hua namba 8, bona uma gaukara ena kalenda dekenai be hua namba 2. Ia be hereva ta amo idia abia, ena anina be “hatubua; havaraia,” bona ia be October huanai ia lao November huanai. (1Ki 6:38)—Ap. B15 itaia.

D

• Daba hisiu.

  Ist kahana amo ia daekau hisiu ginigabena, bena dina ia daekau, unai amo ia ese dina matamatana ia hahedinaraia.—Apo 22:16; 2Pe 1:19.

• Daekau Lao Anena.

  Inai be Salamo 120-134 ena supaskripsen. Ena be inai hereva ena anina dekenai lalohadai be idauidau, to momo idia gwau Israela taudia be mai moale ida Ierusalema dekenai idia ‘daekau lao’ neganai, inai salamo anedia 15 idia abia. Ierusalema be Iuda ena ororo ataiai ia noho. Lagani ta ta ai unuseniai aria badadia toi idia karaia.

• Dagona.

  Filistia taudia edia dirava. Inai hereva idia abia gabuna be ta ia diba lasi, to diba bada taudia haida ese inai hereva be Heberu herevana dagh (gwarume) ida idia gwauraia hebou.—Hah 16:23; 1Sa 5:4.

• Dairekta.

  Salamo bukana lalonai idia gaukaralaia. Inai Heberu herevana ese ane hegaegaelaia bona anelaia daladia ia hakaua tauna ia herevalaia. Ia ese Levi ane abia taudia ia treinia, danu hebou badadia ai ane ia gunalaia. Baibel ma haida ai ia idia gwauraia “miusiki tauna badana” eiava “miusiki dairekta.”—Sal 4:Sup; 5:Sup.

• Dariki.

  Ia be Parasa taudia edia golo koini ta, ena metau be 8.4 kg. (1Si 29:7)—Ap. B14 itaia.

• Davea boubou.

  Hahelaga tauna be inai boubou gauna ia henia neganai, ena imana be boubou gauna ia dogoatao tauna ena imana henunai ia atoa bona boubou gauna idia davea lao mai. Eiava hahelaga tauna sibona ese boubou gauna ia davea lao mai. Unai bamona idia karaia amo idia hahedinaraia Iehova dekenai boubou gaudia idia henia noho.—Le 7:30.

•  Davida Ena Natuna.

  Nega momo inai hereva be Iesu ia herevalaia. Unai ese ia hahedinaraia ia be Basileia gwauhamatana ena lohia dagina do ia abia tauna. Bona Davida ena bese amo do ia mai.—Mt 12:23; 21:9.

• Davida Ena Siti.

  Davida ese tuari amo Iebusu siti ia abia bona iena noho gabuna ia haginia neganai unai ladana ia atoa. Idia gwauraia danu Siona. Ia be Ierusalema ena sautist kahana ai bona ena kahana gunana.—2Sa 5:7; 1Si 11:​4, 5.

• Dekapoli.

  Grik ena siti 10, (Grik gado ai deʹka, anina be “10” bona poʹlis, anina be “siti”). Ia be Galilea Gohuna bona Ioridane Sinavai edia ist kahana tano ena ladana danu, unai siti momo be unuseni ai idia noho. Unai siti momo ai Grik ena kastom bona bisinesi dalana idia badinaia. Iesu be unai tano dekenai ia lao, to Baibel ia gwau lasi ia be unai siti ta ia vadivadi henia. (Mt 4:25; Mr 5:20)—Ap. A7 bona B10 itaia.

• Demoni.

  Ita itaia diba lasi lauma dikadia mai edia siahu bada. Genese 6:2 ese ia gwauraidia “Dirava momokanina ena natudia” bona Iuda 6 ai be “aneru.” Dirava ese ia karaia neganai idia be goevadae, to Noa ena nega ai Satani ena gwau-edeede karana idia durua dainai Iehova ena inai taudia ai idia lao.—De 32:17; Lu 8:30; Ka 16:16; Ia 2:19.

• Denario.

  Roma ena siliva koini ta, ena metau be 3.85 g. Koini ena kahana ta ai be Kaisara ena laulau ia noho. Ia be hesiai tauna ta ena dina tamona ena gaukara davana bona Iuda taudia ese Roma taudia dekenai unai “takisi moni” idia henia. (Mt 22:17; Lu 20:24)—Ap. B14 itaia.

• Diabolo.

  Keristani Grik Toretoredia ai unai ladana ese Satani ena kara ia hahedinaraia. Ena anina be “Ladana Hadikaia Tauna.” Satani dekenai unai ladana idia henia badina ia be Iehova ena ladana ia hadikaia tauna badana, bona Iehova, Iena hereva namona, bona Iena ladana helagana ia gwauraia dika.—Mt 4:1; Ioa 8:44; Apo 12:9.

• Dika Tauna.

  Inai be Satani Diabolo ia herevalaia, ia be Dirava bona kara maoromaoro taravatudia ia inai henia.—Mt 6:13; 1Io 5:19.

• Dina gabedia.

  Baibel ena peroveta herevadia lalonai, inai hereva bona “dina dokodia” idia gaukaralaia gabeai do idia vara hisihisi badana idia hahedinaraia totona. (Ese 38:16; Da 10:14; Ka 2:17) Peroveta herevadia haida dekenai inai hereva idia gaukaralaia neganai, ia be lagani haida eiava momo murinai do idia vara gaudia ia herevalaia. To danu, Baibel lalonai inai hereva “dina gabedia” idia gaukaralaia iseda nega ai, unai be Iesu ena noho negana ai, do idia vara gaudia idia ­herevalaia totona.—2Ti 3:1; Ia 5:3; 2Pe 3:3.

• Dio.

  Inai be Grik taudia edia dirava badana ta. Lusitera ai, idia laloa Banaba be Dio. Lusitera siti badinai idia davaria idaunegai toretoredia ai inai hereva “Dio ena hahelaga taudia” bona “dina dirava Dio” idia noho. Paulo be Melita motumotu dekenai ia lao neganai, ia guia bouti ena vaira kahana dekenai “Dio Ena Hekapa Memero Rua” edia toana ia noho, unai be, Kastoro bona Poluks edia toana.—Ka 14:12; 28:11.

• Dirava badinaia karana.

  Anina be Iehova Dirava dekenai hemataurai ita hahedinaraia, ia ita tomadiho henia, ita hesiai henia, bona iena lohia siahuna ita badinaia.—1Ti 4:8; 2Ti 3:12.

• Dirava ena Basileia.

  Unai hereva ese Dirava ena lohia siahuna, iena Natuna Iesu Keriso ese ia lohiaia gavamanina ia herevalaia.—Mt 12:28; Lu 4:43; 1Ko 15:50.

• Dirava momokanina.

  Heberu herevadia rua Ha-Elohim bona Ha-El idia hahanaia “Dirava momokanina.” Nega momo, unai hereva rua ese idia hahedinaraia Dirava momokanina, Iehova, be dirava koikoidia amo ia idau. Inai hereva “Dirava momokanina” ese unai Heberu herevadia edia anina korikorina ia hahedinaraia.—Ge 5:​22, 24; 46:3; De 4:39.

• Dirava tanikiu henia boubouna.

  Dirava ese ia henia gaudia bona ia hahedinaraia lalokau dainai, inai boubou gauna amo ia ita hanamoa. Idia bouboulaia animal ena vamu bona paraoa mai ena isti bona isti lasi gauna idia ania. Vamu be unai dina tamona lalonai idia ania be namo.—2Si 29:31.

• Doana.

  Animal edia doana, unai idia gaukaralaia ranu inua totona, dehoro, inka bona tauanina hagoevaia muramura ma haida atoa totona, danu miusiki bona kibi gaudia idia karaia. (1Sa 16:​1, 13; 1Ki 1:39; Ese 9:2) Nega momo “doana” be laulau dalanai idia gaukaralaia goada, tuari ai tano ta abia, bona kwalimu karana herevalaia totona.—De 33:17; Mi 4:13; Sek 1:19.

• Drekma.

  Keristani Grik Toretoredia ai, inai hereva be Grik siliva koini ta ia herevalaia, unai nega ai ena metau be 3.4 g. Heberu Toretoredia ese golo drekma koini ta ia herevalaia. Unai be Parasa basileiana ena nega ai, bona  ia be dariki ta hegeregerena. (Ne 7:70; Mt 17:24)—Ap. B14 itaia.

• Du.

  Histori lalonai idia vara kara badadia laloatao totona idia haginidia. Unai bamona du be Solomona ese ia haginia dubu helaga bona king ena ruma lalonai idia gaukaralaidia. Tomadiho koikoi taudia be edia tomadiho lalonai du helagadia idia gaukaralaia, bona nega haida Israela taudia be unai idia tohotohoa. (Hah 16:29; 1Ki 7:21; 14:23)—DU ENA KWARANA GAUNA itaia.

• Dubu biaguna.

  Heberu Toretoredia ai “hahelaga tauna badana” idia gwauraia. Keristani Grik Toretoredia ai, inai hereva “dubu biaguna” ese hahelaga taudia badadia ia herevalaia, hahelaga tauna badana ena gaukara amo idia kokia taudia bona hahelaga taudia badadia 24 ia herevalaia danu.—2Si 26:20; Esr 7:5; Mt 2:4; Mr 8:31.

• Dubu Hahelagaia Ariana.

  Antiochus Epiphanes ese dubu helaga ia hamiroa bona idia hagoevaia murinai, lagani ta ta ai inai aria idia karaia unai nega idia laloatao totona. Unai aria be Kisileve ena dina 25 ai idia karaia bona dina 8 lalonai idia moale.—Ioa 10:22.

• Dubu helaga.

  Ierusalema ai idia haginia ruma ta, palai ruma ena gabu ia abia. Ia be Israela taudia edia tomadiho gabuna ai ia lao. Dubu helaga ginigunana be Solomona ese ia haginia bona Babulonia taudia ese idia hadikaia. Iharuana be Serubabele ese ia haginia, unai be Babulonia ena igui amo idia giroa mai murinai, bena gabeai Heroda Badana ese ia haginia lou. Baibel ai, nega momo dubu helaga idia gwauraia “Iehova ena ruma.” (Esr 1:3; 6:​14, 15; 1Si 29:1; 2Si 2:4; Mt 24:1)—Ap. B8 bona B11 itaia.

• Du Ena Kwarana Gauna.

  Ia be mai ena herahera gaudia. Du badadia edia kwarana gaudia rua Iakini bona Boasi be Solomona ena dubu helaga vairana idia gini. (1Ki 7:16)—Ap. B8 itaia.

E

• Edoma.

  Isako ena natuna Esau ena ladana ma ta. Esau (Edoma) ena tubudia ese Seiri ena ororo gabudia idia abia, unai be Mase Davarana bona Akaba Gohuna (Gulf of Aqaba) huanai. Gabeai unai gabu idia gwauraia ­Edoma. (Ge 25:30; 36:8)—Ap. B3 bona B4 itaia.

• Elda; Tau badadia.

  Mauri lagani bada tauna, to Baibel lalonai ia be bese ta eiava hanua ta lalonai dagi bada eiava maduna ia huaia tauna ia herevalaia. Apokalupo bukana ai unai hereva idia gaukaralaia guba ai idia noho taudia herevalaia totona. Grik gado ai inai hereva pre·sbyʹte·ros idia hahanaia “elda” bema ia be kongrigeisen idia gunalaia taudia ia herevalaia.—Eso 4:29; Ao 31:23; 1Ti 5:17; Apo 4:4.

• Elulu.

  Israela besena be Babulonia ena igui idia rakatania murinai, Iuda tomadiho ena kalenda dekenai ia be hua namba 6, bona uma gaukara ena kalenda dekenai be hua namba 12. Unai be August huanai ia lao September huanai. (Ne 6:15)—Ap. B15 itaia.

• Eparaima.

  Iosepa ena natuna iharuana ena ladana. Unai ladana be Israela ena iduhu ta dekenai idia hatoa. Israela besena ia parara neganai, Eparaima be bese badana dainai, ia ese iduhu 10 basileiana ia gunalaia.—Ge 41:52; Ier 7:15.

• Epikuro taudia.

  Grik ena aonega tauna Epikuro idia badinaia taudia (341-270 B.C.E.). Idia gwau taunimanima ta ta sibona ese moale ia tahua be gau badana ena mauri lalonai.—Ka 17:18.

• Epodi.

  Hahelaga tauna ena gaukara dabua. Hahelaga tauna badana ese epodi ia hahedokilaia, ena latanai be kemena gauna ta mai ena dava bada nadidia 12. (Eso 28:​4, 6)—Ap. B5 itaia.

• Etanimi.

  Iuda tomadiho ena kalenda dekenai ia be hua namba 7, bona uma gaukara ena kalenda dekenai ia be hua ginigunana. Unai be September huanai ia lao October huanai. Israela besena be Babulonia ena igui idia rakatania murinai, idia gwauraia Tishri. (1Ki 8:2)—Ap. B15 itaia.

• Etiopia.

  Idaunegai besena ta, Egypt ena saut kahana ai ia noho. Ena tano ena hetoana be Egypt tanona ena saut kahana momokani bona Sudan tanona ena not kahana. Nega haida Heberu herevana “Kusu” idia gwauraia totona, unai hereva idia gaukaralaia.—Est 1:1

• Eunuko.

  Abona idia utua oho tauna ia herevalaia. Unai bamona tatau be king ena ruma ai idia gaukara eiava kwini bona king ena hahine ma haida idia naria. Eunuko taudia momokanidia lasi, to king ena ruma dekenai ofesa gaukara idia karaia taudia dekenai unai ladana idia henia danu. Laulau dalanai inai hereva idia gaukaralaia “Basileia dainai idia headava lasi” taudia idia herevalaia totona. Inai taudia be sibodia edia ura idia biagua, unai amo Dirava ena hesiai gaukara  idia karaia goadagoada diba.—Mt 19:12; Est 2:15; Ka 8:27.

• Euperate sinavai.

  Asia ena sautwest kahana ena sinavai, ia be lata herea bona mai anina bada, bona ia be Mesopotamia ena sinavai badana ta. Genese 2:14 ai ia be nega ginigunana ia hedinarai. Ia hahedinaraia ia be Eden umana ena sinavai namba 4. Baibel lalonai nega momo idia gwauraia “Sinavai.” (Ge 31:21) Bona ia be Israela besena ese idia abia not kahana tanona ena hetoana. (Ge 15:18; Apo 16:12)—Ap. B2 itaia.

F

• Farao.

  Aigupito taudia edia king edia dagi ladana. Baibel ese farao 5 ia gwauraia (Sisaka, So, Tirihaka, Neko, bona Hopera), to haida edia ladana ia gwauraia lasi, Aberahamo, Mose, bona Iosepa edia negai idia noho farao danu.—Eso 15:4; Ro 9:17.

• Farisea taudia.

  Aposetolo edia negai ia noho Iuda tomadiho oreana ta. Idia be hahelaga taudia besena amo idia mai lasi, to Taravatu ena hereva maragimaragi ibounai idia badinaia goada, bona taunimanima ese idia badinaia taravatudia idia laloa bada danu. (Mt 23:23) Idia ese Greek taudia edia kastom karadia idia dadaraia, bona Taravatu bona sene karadia idia diba namonamo dainai, edia siahu idia gaukaralaia taunimanima idia biagua auka totona. (Mt 23:​2-6) Idia haida be Sanhedrin ena memba taudia. Sabati hahelagaia totona, kastom karadia, bona kara dika bona takisi gogoa taudia bamoa karana dekenai nega momo Iesu idia gwauraia dika. Idia haida be Keristani taudia ai idia lao, hegeregere Taso tauna Saulo.—Mt 9:11; 12:14; Mr 7:5; Lu 6:2; Ka 26:5.

• Fatom.

  Inai mesament idia gaukaralaia ranu ena dobu idia makaia totona, fatom tamona be 1.8 m. (Ka 27:28)—Ap. B14 itaia.

• Filistia; Filistia taudia.

  Israela tano ena saut kone kahana idia gwauraia Filistia. Kerete amo unuseni idia lao bona idia noho taudia idia gwauraia Filistia taudia. Davida ese idia ia halusia, to idia be sibona idia lohiaia bona nega momo Israela taudia idia inai henia. (Eso 13:17; 1Sa 17:4; Am 9:7)—Ap. B4 itaia

• Frenkinsens.

  Au ladana Boswellia amo idia abia ranu amo idia karaia. Idia gabua neganai, bonana namo herea ia daekau. Palai Dubu bona dubu helaga ai idia gaukaralaia bonana namo muramura lalonai idia atoa. Ia be witi boubou ida idia henia bona Helaga Gabuna ai paraoa helagana ida idia atoa.—Eso 30:​34-36; Le 2:1; 24:7; Mt 2:11.

G

• Gabua boubou.

  Boubou totona boubou patana ai idia gabua animal ibounai, Dirava dekenai idia henia gauna. Dirava ia tomadiho henia tauna be animal (boromakau, mamoe tau, nanigosi tau, pune, eiava kerea manu) ena kahana ta ia abia lasi.—Eso 29:18; Le 6:9.

• Gadara ta.

  Nadi kuboruna eiava au maragidia eiava nadi ma haida idia gaukaralaia abia hidi ta idia karaia totona. Inai gaudia be dabua ta eiava uro ta lalonai idia haboua bena idia hamarerea. Bona ia moru eiava idia abia gauna idia abia hidi. Nega momo idia guriguri guna bona unai idia karaia.—Ios 14:2; Ao 16:33; Mt 27:35.

• Gavamani ofesa tauna.

  Babulonia gavamani lalonai dagi bada tauna ta, to ena dagi be provinsi ena lohia tauna ena henunai. Baibel ai, king ena ruma ai idia noho Babulonia ena aonega taudia ibounai be gavamani ofesa taudia edia siahu henunai. Media ena king Dariuse ena lohia negana lalonai gavamani ofesa taudia idia noho danu.—Da 2:48; 6:7.

• Gavana.

  Roma gavamani ese ia biagua provinsi ia naria tauna. Ia be mai ena siahu kota ia karaia bona tuari taudia ia biagua totona, bona ena be Roma gavamani ese ena gaukara ia sekea, to provinsi lalonai ia be mai ena siahu bada.—Ka 13:7; 18:12.

• Gehena.

  Unai be Grik ladana, Hinoma Koura totona. Ia be Ierusalema ena saut bona sautwest kahana ai ia noho. (Ier 7:31) Peroveta herevadia ia hahedinaraia unai gabu ai mase tauanidia be gabu ibounai do idia hekure kava. (Ier 7:32; 19:6) Gau ta ese ia hamomokania lasi, idia mauri animal eiava taunimanima be Gehena ai idia negedia bona gabudia eiava hahisidia. Unai dainai, ia be ita itaia diba lasi gabuna lasi, oibe, taunimanima be lahi momokani ese idia hahisidia hanaihanai gabuna ta ia laulaulaia lasi. To, Iesu bona ena hahediba taudia ese Gehena be laulau dalanai idia herevalaia “mase iharuana,” ena hisihisi idia hahedinaraia totona, anina be hadikaia ore momokani.—Apo 20:14; Mt 5:22; 10:28.

• Gera.

  Ena metau be 0.57 g. Unai be sikel 1/20 ena metau hegeregerena. (Le 27:25)—Ap. B14 itaia.

• Gileada.

  Inai be tano namona Ioridane Sinavai ena ist kahana amo ia lao Iaboka Koura ena  not bona saut kahana. Nega haida unai ladana idia gaukaralaia Israela tanona Ioridane ena ist kahana ai idia herevalaia totona. Unuseniai be Rubena, Gado, bona Manase ena bese kahana idia noho. (Nu 32:1; Ios 12:2; 2Ki 10:33)—Ap. B4 itaia.

• Gima tauna.

  Dika amo taunimanima eiava gabu ia gimaia tauna, nega momo hanuaboi lalonai ia gaukara, bona dika ta ia itaia neganai kibi ia hiriria. Gima tauna be nega momo siti ena haba ataiai eiava kohoro dekenai ia gini idia mai noho taudia ia itaia totona. Tuari lalonai gima taudia idia gwauraia gadi taudia. Laulau dalanai peroveta taudia be Israela besena ena gima taudia bamona, idia vara dika idia hadibaia totona.—2Ki 9:20; Ese 3:17.

• Gititi.

  Miusiki herevana ta bona ena anina be ta ia diba lasi, to ia be reana Heberu herevana gath amo ia mai. Haida idia laloa inai hereva be reana wain idia karaia neganai idia abia ane edia miusiki ia herevalaia, badina gath ena anina be wain idia moia gauna.—Sal 81:Sup.

• Goeva.

  Baibel lalonai inai hereva be tauanina ia goeva karana sibona ia herevalaia lasi, to tomadiho dalanai ia goeva noho, eiava ia miro tauna be ia goeva lou, eiava ta be Dirava ena kara maoromaoro taravatudia ia badinaia bona gau ta ese ia hamiroa lasi karana ia herevalaia. Mose Ena Taravatu henunai, unai hereva ese sibona idia hagoevaia karana ia herevalaia.—Le 10:10; Sal 51:7; Mt 8:2; 1Ko 6:11.

• Gorere dikana.

  Idia hanaia haraga diba gorere badadia bona mase idia havaraia diba danu. Nega momo unai gorere dikana be Dirava ena hahemaoro karana.—Nu 14:12; Ese 38:​22, 23; Am 4:10.

• Grik.

  Inai be Greece taudia edia gado. Danu, Greece hanua tauna eiava iena bese be unai gabu amo ia mai tauna. Keristani Grik Toretoredia ai, inai hereva ena anina be idauidau, unai be Iuda lasi taudia eiava Grik gado bona kastom idia dae taudia ia herevalaia danu.—Ioe 3:6; Ioa 12:20.

• Guba Ena Kwini.

  Ieremia ena nega ai Dirava idia dadaraia Israela taudia ese idia tomadiho henia dirava hahinena ena dagi ladana. Haida idia gwau unai be Babulonia ena dirava hahinena Ishtar (Astarte) ia herevalaia. Sumeria ai ia hegeregerena dirava hahinena ena ladana be, Inana, anina be “Guba Ena Kwini.” Idia laloa ia be guba ena dirava hahinena bamona, bona idia abia dae ia ese gau idauidau ia karaia natuna momo ia havaraia totona. Danu Aigupito ena toretore lalonai Astarte idia gwauraia “Guba Ena Kwini.”—Ier 44:19.

• Gunalaia Tauna Badana.

  Ia be Grik herevana ta amo idia abia. Inai be Iesu Keriso ena maduna badana ia herevalaia. Ia ese abidadama taudia be kara dika amo ia ruhadia bona mauri hanaihanai dekenai ia hakaudia lao.—Ka 3:15; 5:31; He 2:10; 12:2.

• Guri dobu masemase.

  Grik herevana aʹbys·sos amo idia abia, ena anina be “dobu masemase” eiava “dokona be lasi.” Grik Toretoredia ai, inai hereva ese gabu ta eiava gabu ta dekenai taunimanima koua karana ia herevalaia. Mase gurina ia laulaulaia danu, to unai sibona lasi.—Lu 8:31; Ro 10:7; Apo 20:3.

• Gwaubou.

  Ia be Dirava bona taunimanima huanai eiava taunimanima rua huanai idia karaia gwauhamatana. Idia gwauhamata gau ta idia karaia eiava karaia lasi totona. Nega haida orea tamona sibona ese unai gwaubou dainai kara ta do ia karaia. Ma nega haida, orea rua ese gwaubou dainai kara ta do idia karaia. Baibel ese Dirava be taunimanima ida ia karaia gwaubou ia herevalaia, bona taunimanima, iduhu, bese, eiava orea rua huanai idia karaia gwauhamatana ia herevalaia danu. Gwaubou ibounai huanai, Dirava ese Aberahamo, Davida, Israela besena (Taravatu gwaubou), bona Dirava ena Israela (gwaubou matamata) ida ia karaia gwaubou be mai anina bada.—Ge 9:11; 15:18; 21:27; Eso 24:7; 2Si 21:7.

• Gwau-edeede hemarai karadia.

  Inai be Grik herevana a·selʹgei·a amo idia abia. Inai hereva be Dirava ena taravatu badadia idia makohia karadia ia herevalaia eiava hemarai lasi karana ia hahedinaraia. Unai bamona kara ese gavamani bona taravatu matauraia lasi karana ia hahedinaraia. Inai hereva ese kara kerere maragina ia herevalaia lasi.—Ga 5:19; 2Pe 2:7.

• Gwauhamata boubou.

  Ta be ena gwauhamata hegeregerena mai ura ida ia henia boubou gaudia.—Le 23:38; 1Sa 1:21.

• Gwauhamata hamomokania gauna.

  Abitorehai tauna ese ena kohu ta be henitorehai tauna dekenai ia henia, unai amo ia hamomokania vaira nega ai ena abitorehai do ia haloua. Idia gwauraia danu gwauhamata hamomokania gauna. Mose Ena Taravatu lalonai unai kara ia herevalaia danu, unai amo Israela bese lalonai idia noho ogogami bona goada lasi taudia ia gimaia.—Eso 22:26; Ese 18:7.

•  Gwauhamata metauna.

  Gau ta hamomokania totona idia karaia gwauhamata, eiava tau ta ese do ia karaia eiava karaia lasi gauna ta ena gwauhamata aukana. Nega momo unai be gau ibounai ia hereaia tauna ta, Dirava, dekenai idia karaia gwauhamata. Iehova be gwauhamata metauna amo Aberahamo ida ia karaia gwaubou ia hagoadaia.—Ge 14:22; He 6:​16, 17.

• Gwauhamata saini helagana.

  Ia be golo amo idia karaia kwara gauna, ia latanai be inai Heberu herevana idia koroa, “Helaga karana be Iehova ena.” Unai kwara gauna be Hahelaga tauna ena kwara kumia dabua vairanai idia atoa. (Eso 39:30)—Ap. B5 itaia.

H

• Hades.

  Ia be Grik herevana bona Heberu herevana “Sheol” ida ia hegeregere. Idia hahanaia Mase Gurina, unai amo ia be guria gabuna ia herevalaia.—MASE GURINA itaia.

• Hahelaga tauna.

  Ia be Dirava ena gwaukau tauna, ia ese taunimanima dekenai Dirava bona ena taravatu ia hadibaia. Danu, hahelaga taudia be taunimanima totona Dirava idia hereva henia, boubou gaudia idia henia, bona idia totona Dirava idia noinoi henia. Mose Ena Taravatu ia do hedinarai lasi neganai, ruma bese edia kwarana taudia be edia famili totona hahelaga gaukara idia karaia. Mose Ena Taravatu henunai, Levi iduhu amo Arona ena famili tatau be hahelaga gaukara idia karaia. Levi iduhu ena tatau oredia ese idia durudia. Taravatu matamata ia gini neganai, lauma Israela be hahelaga taudia edia bese ai ia lao, bona edia Hahelaga Tauna Badana be Iesu Keriso.—Eso 28:41; He 9:24; Apo 5:10.

• Hahelaga tauna badana.

  Mose Ena Taravatu hegeregerena, hahelaga tauna badana be Dirava vairanai taunimanima totona ia hereva bona hahelaga taudia ma haida ia naria. (2Si 26:20; Esr 7:5) Ia sibona be Helaga Herea Gabuna, palai dubu bona gabeai dubu helaga ena lalona momokani daiutuna ai ia vareai diba. Kara Dika Davana Karaia Dinana sibona ai unai ia karaia. Inai hereva “hahelaga tauna badana” be Iesu Keriso dekenai idia gaukaralaia danu.—Le 16:​2, 17; 21:10; Mt 26:3; He 4:14.

• Hahemaoro Dinana.

  Inai dina eiava nega ai, orea idauidau, bese idauidau, eiava taunimanima ibounai be Dirava ese do ia hahemaoro henia. Unai nega ai, kota ese hahemaoro ia karaia haida do idia mase, bona hahemaoro ia karaia haida idia mase lasi to do idia mauri hanaihanai. Iesu Keriso bona ena aposetolo taudia be vaira nega ena “Hahemaoro Dinana” idia herevalaia. Unai nega ai mauri taudia sibona lasi, to guna idia mase taudia danu be hahemaoro do idia abia.—Mt 12:36.

• Hahemaoro sea.

  Unai be pata ta mai ena vadavada ia herevalaia, unai pata ai idia helai taudia ese hutuma idia hereva henia bona edia hahemaoro herevadia idia gwauraia. Inai hereva rua, “Dirava ena hahemaoro sea” bona “Keriso ena hahemaoro sea” be Iehova ese taunimanima do ia hahemaoro henia karana ia laulaulaia.—Ro 14:10; 2Ko 5:10; Ioa 19:13.

• Hahemaoro taudia.

  King taudia ese Israela taudia idia lohiaia lasi neganai, Iehova ese inai tatau ia abia hidi ena taunimanima idia hamauria totona.—Hah 2:16.

• Hahetohoa siriho.

  Hahetohoa siriho ena lata be 6 kiubit. Hanaihanai idia gaukaralaia kiubit ena mesament be 2.67 m; kiubit latana ena mesament be 3.11 m. (Ese 40:​3, 5; Apo 11:1)—Ap. B14 itaia.

• Hahine ma ta.

  Ia be tau ta ena adavana ma ta, bona vaia ia be hesiai kekenina ta.—Eso 21:8; 2Sa 5:13; 1Ki 11:3.

• Heau mauri siti.

  Unai be Levi taudia edia siti. Aksiden amo tau ta ia hamasea tauna be unai siti dekenai ia heau lao diba, unai amo mase tauna ena varavara ese do ia hamasea lasi. Gwauhamata Tanona ibounai ai, Iehova ena hereva hegeregerena, Mose bona gabeai Iosua ese unai bamona siti 6 idia abia hidi. Heau tauna be unai siti ta dekenai ia ginidae neganai, geiti ai elda taudia dekenai ia vara gauna ena sivarai ia gwauraia bona mai hebogahisi ida idia abia dae. Mai lalona ibounai ida tau ta ia alaia tauna ese unai hahenamo ia gaukaralaia kerere lasi totona, ia heau tauna be kerere ia vara hanuana dekenai do idia kota henia, bona do ia hamomokania ia karaia karana be aksiden. Bema idia davaria unai ala-ala karana be aksiden amo ia vara, ia be heau mauri siti dekenai do idia siaia lou, bona unai hanua ena magu lalonai do ia noho ela bona ia mase eiava ela bona hahelaga tauna ia mase.—Nu 35:​6, 11-15, 22-29; Ios 20:​2-8.

• Heberu.

  Aberamo (Aberahamo) be inai ladana ia gaukaralaia guna, unai ese ia hahedinaraia ia be Amoro taudia amo ia idau. Gabeai unai hereva idia gaukaralaia Iakobo ena natudia  dekenai, Aberahamo ena tubudia unai, bona edia gado dekenai danu. Iesu ena nega ai, Heberu gado ai Aramia herevadia momo idia gaukaralaia danu, bona Keriso bona ena hahediba taudia ese unai gado idia gaukaralaia.—Ge 14:13; Eso 5:3; Ka 26:14.

• Hebogahisi hereadaena.

  Ia be Grik herevana ta bona ena anina be namo herea bona hairai. Nega momo unai hereva idia gaukaralaia mai hebogahisi ida idia henia hariharibada gauna eiava karana herevalaia totona. Dirava ena hebogahisi hereadaena ia herevalaia neganai, unai hereva ese Dirava ena hariharibada karana ia hahedinaraia, bona davana totona ia laloa lasi. Unai be Dirava ese taunimanima dekenai ia hahedinaraia harihari bada karana, mai lalokauna bona hebogahisina ia herevalaia. Grik gado ai unai hereva idia hahanaia “hanamoa” bona “mai hebogahisi ida idia henia harihari gauna.” Unai hahenamo ia abia tauna be kara ta ia karaia dainai lasi, to henia tauna ena hebogahisi dainai ia henia.—2Ko 6:1; Ef 1:7.

• Hebou Dubu.

  Mose ena palai ruma bona taunimanima lasi gabuna ai idia haginia palai dubu helagana totona inai hereva idia gaukaralaia.—Eso 33:7; 39:32.

• Hegaegae Dinana.

  Ia be Sabati dinana do lasi ai idia gwauraia ladana, unai negadia ai Iuda taudia be idia hegaegae. Unai dina be dina ia diho negana ai ia ore, hari ita gwauraia Friday, unai nega ai Sabati ia matamaia. Iuda taudia edia dina be adorahi amo ia lao adorahi ma ta ai ia ore.—Mr 15:42; Lu 23:54.

• Helaga.

  Iehova ena kara badana. Ia be goeva bona helaga herea karana. (Eso 28:36; 1Sa 2:2; Ao 9:10; Isa 6:3) Inai hereva be taunimanima (Eso 19:6; 2Ki 4:9), animal (Nu 18:17), kohu (Eso 28:38; 30:25; Le 27:14), gabu (Eso 3:5; Isa 27:13), nega (Eso 16:23; Le 25:12), eiava gaukara haida ia herevalaia neganai (Eso 36:4), Heberu gado ai, ena anina be gau ta amo parara, lalona ibounai ida sibona ita henia eiava ita helaga Dirava helagana hesiai henia totona. Iseda mauri ibounai ita henia Iehova ena hesiai gaukara totona. Keristani Grik Toretoredia ai, inai hereva “helaga” ena anina be gau haida amo ita parara Dirava hesiai henia totona. Inai hereva idia gaukaralaia danu ta ena kara goevana idia herevalaia totona.—Mr 6:20; 2Ko 7:1; 1Pe 1:​15, 16.

• Helaga Gabuna.

  Palai Dubu eiava dubu helaga ena daiutu ginigunana eiava badana. Ia be lalona momokani eiava Helaga Herea gabuna amo ia idau. Palai Dubu ena Helaga Gabuna lalonai golo lamepa atoa gauna, bonana namo muramura ena golo teibolo, paraoa helagana ena teibolo bona golo gaudia ma haida idia noho. Bona dubu helaga ena Helaga Gabuna ai golo boubou patana, golo lamepa atoa gaudia 10, bona paraoa helagana ena teibolo 10 idia noho. (Eso 26:33; He 9:2)—Ap. B5 bona B8 itaia.

• Helaga Herea Gabuna.

  Dubu helaga bona Palai Dubu ena lalona momokani gabuna, unuseniai taravatu mauana idia atoa. Idia gwauraia danu Helaga Ena Helaga Herea gabuna. Mose Ena Taravatu hegeregerena, unuseni do ia vareai diba tauna be hahelaga tauna badana sibona. Ia be lagani ta ta ai Kara Dika Davana Karaia Dinana sibona ai do ia vareai.—Eso 26:33; Le 16:​2, 17; 1Ki 6:16; He 9:3.

• Helalo-kerehai.

  Baibel ai inai hereva idia gaukaralaia, bema ta be ia hahedinaraia ena mauri gunana, kara kereredia, eiava ia hagugurua lasi gauna totona ena lalona ia haidaua momokani. Helalo-kerehai momokani karana ese huahua namona ia havaraia.—Mt 3:8; Ka 3:19; 2Pe 3:9.

• Hena.

  Tubutubu gauna ta, ena flaoaflaoa be mai edia bonana namona; unai tubutubu gauna ena raurau amo dai kakakaka idia karaia.

• Hereme.

  Grik taudia edia dirava ta, Dio ena natuna. Lusitera ai, Paulo idia boiria Hereme, badina idia gwau unai dirava be dirava idauidau edia hereva gwauraia tauna bona hereva namonamo karana ena dirava.—Ka 14:12.

• Heroda.

  Inai be lohia besena ta ena ladana. Roma ese ia abia hidi Iuda taudia idia lohiaia totona. Heroda Badana, ia be Ierusalema ena dubu helaga ia haginia lou bona Iesu hamasea totona, oda ia henia memero maragidia do idia alaia, unai kara dainai ia be ladana badana ia abia. (Mt 2:16; Lu 1:5) Heroda Badana ena natudia, Heroda Akelao bona Heroda Antipa, be edia tamana ese ia lohiaia gabudia idia lohiaia. (Mt 2:22) Antipa be edia distrik ia lohiaia tauna ta, nega momo idia gwauraia “king.” Ena lohia ne­gana ai, Iesu be lagani toi mai kahana ia haroro bona unai nega amo ia lao Kara karoa 12 ena sivarai negana. (Mr 6:​14-17; Lu 3:1, 19, 20; 13:​31, 32; 23:​6-15; Ka 4:27; 13:1) Unai murinai, Heroda Badana ena tubuna, Heroda Agripa I, be Dirava ena aneru ese ia hamasea, ia be nega sisina sibona lalonai ia lohia. (Ka 12:​1-6, 18-23) Iena natuna,  Heroda Agripa II, ia lohia matamaia bona ia lohia ela bona Iuda taudia ese Roma gavamani idia gwau-edeede henia.—Ka 23:35; 25:​13, 22-27; 26:1, 2, 19-32.

• Heroda ena orea taudia.

  Idia gwauraia Heroda idia badinaia taudia danu. Idia ese Heroda besena be Roma ia lohiaia neganai, unai politikol pati idia durua bona edia bese idia abia isi. Sadukea taudia haida be reana unai orea taudia. Heroda ena orea taudia be Farisea taudia ida idia haboua Iesu idia dagedage henia totona.—Mr 3:6.

• Hesiai gaukara helagana.

  Hesiai gaukara, unai be helaga. Ia be ta ena hesiai gaukara Dirava tomadiho henia karana lalonai ia herevalaia.—Ro 12:1; Apo 7:15.

• Hesiai tauna.

  Grik gado herevana di·aʹko·nos amo idia abia, nega momo idia hahanaia “hesiai tauna.” “Hesiai tauna” be kongrigeisen ena elda oreana ia durua tauna. Namona be Baibel ese ia gwauraia gaudia do ia hagugurua unai gaukara ia abia totona.—1Ti 3:​8-10, 12.

• Heudahanai.

  Inai be headava tau eiava hahine be sibona ena ura dainai hahine eiava tau ma ta ida ia mahuta hebou.—Eso 20:14; Mt 5:27; 19:9.

• Higaioni.

  Miusiki ai idia gaukaralaia herevana ta. Salamo 9:16 dekenai idia gaukaralaia hegeregerena, inai hereva ese miusiki gadaralaia taudia ia hadibaia hap ena miusiki regena maragina sibona do idia gadaralaia, eiava nega sisina lalonai miusiki idia hadokoa laloa dobu negana hahedinaraia totona.

• Hin.

  Ranu ena mesament bona ena konteina. Hin tamona be 3.67 L. (Eso 29:40)—Ap. B14 itaia.

• Hisihisi badana.

  Grik herevana idia hahanaia “hisihisi” be hekwakwanai idia vara noho dainai ita mamia lalohisihisi ia herevalaia. Iesu be Ierusalema dekenai do ia vara “hisihisi badana” ia herevalaia bona gabeai Iesu be ‘mai ena hairai’ ida do ia mai negana ai taunimanima ibounai dekenai do ia vara hisihisi badana ia herevalaia danu. (Mt 24:​21, 29-31) Paulo ia gwau Dirava be mai ena maoro unai hisihisi badana be “Dirava idia diba lasi taudia bona iseda Lohiabada Iesu ena sivarai namona idia abia dae lasi taudia” dekenai do ia mailaia. Apokalupo karoa 19 ese ia hahedinaraia Iesu be ena guba tuari oreana ia gunalaia, “dagedage animal bona tanobada ena king taudia mai edia tuari oreadia” idia tuari henia totona. (2Te 1:6-8; Apo 19:​11-21) “Hutuma bada” be unai hisihisi badana idia hanaia karana ia hahedinaraia. (Apo 7:​9, 14)—ARAMAGEDONO itaia.

• Hisiu Stadilaia Babalau Tauna.

  Dina, hua, bona hisiu edia heau dalana ia stadilaia, vaira nega ia gwauraia hedinarai totona.—Da 2:27; Mt 2:1.

• Hoa karadia; Siahu karadia.

  Idia vara kara idaudia haida be taunimanima edia siahu amo idia vara lasi to siahu badana ta ese ia havaraia. Baibel lalonai inai hereva “toa,” bona “siahu karadia” idia gaukaralaia.—Eso 4:21; Ka 4:22; He 2:4.

• Homa.

  Kaukau gaudia edia mesament, ia be kor mesament bamona. Bona unai mesament abia totona bat ena mesament idia gaukaralaia, unai be 220 L. (Le 27:16)—Ap. B14 itaia.

• Horeba; Horeba Ororona.

  Sinai Ororona ia hagegea ororo gabuna. Sinai Ororona ena ladana ma ta. (Eso 3:1; De 5:2)—Ap. B3 itaia.

• Horoa.

  Heberu herevana ena anina be “dehoro amo idia dahua.” Taunimanima ta o gau ta dekenai dehoro idia dahua neganai idia hahedinaraia ia idia makaia mai anina bada gaukara ta ia karaia totona. Keristani Grik Toretoredia ai, unai hereva idia gaukaralaia guba lao taudia latanai lauma helaga ia bubua karana herevalaia totona.—Eso 28:41; 1Sa 16:13; 2Ko 1:21.

• Huaia auna.

  Inai au be ta ena pagana latanai idia atoa, bona ena dokona kahana rua dekenai metau gaudia idia atoa, eiava animal rua (hegeregere boromakau) edia aiona dekenai idia kwatua uma geia gauna eiava treila idia veria totona. Nega momo igui hesiai taudia ese huaia auna idia gaukaralaia metau gaudia idia huaia totona, unai dainai huaia auna be laulau dalanai idia gaukaralaia idia guia tauna eiava ta ena siahu henunai ia noho tauna idia herevalaia totona. Bona danu, dagedage eiava hisihisi idia davaria taudia ia laulaulaia diba. Ta ena huaia auna kokia eiava makohia karana ese ia hahedinaraia ia idia ruhaia eiava ia be ta ese do ia hahisia lou lasi.—Le 26:13; Mt 11:​29, 30.

• Hua matamata.

  Iuda kalenda ai hua ta ta ena dina ginigunana, unai dina be haboua gaukarana totona, aria totona, bona boubou gaudia namo hereadia henia totona. Gabeai, unai dina be Israela taudia edia dina badana ai ia lao, bona unai dina ai ta be gaukara ta ia karaia lasi.—Nu 10:10; 2Si 8:13; Kl 2:16.

•  Hunia hereva helagana.

  Unai be Dirava ia ura do ia hagugurua gauna ta bona Dirava amo ia mai. Idia gwauraia hedinarai lasi ela bona ena nega korikorina, bona Dirava ia ura taudia sibona dekenai ia hahedinaraia.—Mr 4:11; Kl 1:26.

• Husopo.

  Tubutubu gauna mai ena rigi bona raurau maragidia. Nega momo idia gaukaralaia rara negea lao negea mai bona hagoevaia gaukara totona. Grik bona Heberu gado ai idia gaukaralaia herevadia Baibel lalonai be tubutubu gaudia idauidau ia herevalaia. Ioane 19:29 ese ia herevalaia ‘husopo’ be tubutubu gauna latana ta ia herevalaia, badina idia gaukaralaia diba spansi mai ena wain iditana be Iesu ena uduna dekenai idia atoa totona.—Ioa 19:29; Eso 12:22; Sal 51:7.

I

• Iakobo.

  Isako bona Rebeka edia natuna. Gabeai Dirava ese iena ladana ia hatoa Israela, bona ia be Israela besena (idia gwauraidia Israela taudia danu, bona gabeai, Iuda taudia) ena kwarana ai ia lao. Ia be natudia memero 12 edia tamana, unai memero bona edia bese be Israela besena ena iduhu 12 ai idia lao. Inai ladana Iakobo be Israela besena eiava taudia totona idia gaukaralaia.—Ge 32:28; Mt 22:32.

• Iasipa nadi.

  Hari nega ena Iasipa nadi be galasi bamona lasi bona ena kala be idauidau, hegeregere kurokuro, kakakaka, ielo, braun, bona korema. Iasipa nadi haida edia davana be sisina bada. Diba bada taudia haida idia laloa reana idaunegai Iasipa nadi ena davana be bada, reana unai be daimon ena davana ida ia hegeregere.

• Idia bubua wain boubouna.

  Inai wain be boubou patana latanai idia bubua bona boubou gaudia ma haida ida idia bouboulaia. Paulo ese laulau dalanai unai hereva ia gaukaralaia, unai amo ia hahedinaraia ia ura bada ena Keristani tadikaka ia durua.

• Iedutunu.

  Inai hereva ena anina be idia diba lasi, bona ia be Salamo 39, 62, bona 77 ena supaskripsen dekenai ia noho. Inai supaskrip­sen be ane abia dalana ia gwauraia, reana miusiki ena sitaelo ta eiava miusiki gauna ta ia herevalaia. Unai nega ai Levi tauna ta be miusiki ia gadaralaia, bona ena ladana be Iedutunu, unai dainai inai miusiki ena sitaelo eiava miusiki gauna be reana ia eiava ena natudia totona.

• Iehova.

  Inai ladana be English gado amo idia hahanaia. Ia be Tetragramaton (Dirava ena ladana totona idia gaukaralaia Heberu leta 4) amo idia abia. Inai Baibel ai ia be nega 7,000 mai kahana ia hedinarai.—Ap. A4 bona A5 itaia.

• Ifa.

  Ia be kaukau gaudia edia mesament bona ena konteina ia herevalaia. Ia be ranu ena bat mesament hegeregerena, bona ena metau be 22 L. (Eso 16:36; Ese 45:10)—Ap. B14 itaia.

• Iluriko.

  Ia be Roma ena provinsi ta, bona ­Greece ena notwest kahanai ia noho. Paulo ena haroro gaukara lalonai, unai kahana ia lao danu, to Baibel ia gwau lasi ia be Iluriko dekenai ia haroro eiava ia haroro ela bona unai hanua. (Ro 15:19)—Ap. B13 itaia.

• Israela.

  Dirava ese inai ladana be Iakobo dekenai ia henia. Bona unai be ena bese ena ladana ai ia lao, herevana idia be edena nega ai idia noho. Iakobo ena natudia memero 12 edia bese be vaia idia gwauraidia Israela ena natudia memero, Israela besena (tatau), eiava Israela taudia. Danu, saut kahana amo ia parara iduhu 10 basileiana dekenai unai ladana idia atoa, bona gabeai idia gaukaralaia horoa Keristani taudia, “Dirava ena Israela” totona.—Ga 6:16; Ge 32:28; 2Sa 7:23; Ro 9:6.

• Isti.

  Paraoa eiava ranu ida idia mikisia ia gudu totona; ia be idia mikisia vadaeni bona idia rakatania ia gudu totona paraoana ia herevalaia. Nega momo Baibel lalonai laulau dalanai inai hereva idia gaukaralaia kara dika bona kara gageva idia herevalaia totona, bona danu hehuni ai metairametaira ia tubu gauna ta idia hahedinaraia totona.—Eso 12:20; Mt 13:33; Ga 5:9.

• Isti lasi paraoa.

  Isti idia atoa lasi paraoa ia herevalaia.—De 16:3; Mr 14:12; 1Ko 5:8.

• Isti Lasi Paraoa Ena Aria.

  Lagani ta ta ai Israela taudia ese idia karaia aria badadia toi amo inai be aria ginigunana. Ia be Nisan 15 ai ia matamaia, unai be Pasova dinana murinai, bona dina 7 lalonai idia karaia. Unai nega ai isti lasi paraoa sibona idia anina, Aigupito idia rakatania negana idia laloatao totona.—Eso 23:15; Mr 14:1.

• Iubili.

  Unai be lagani 50 iboudiai, Israela besena be Gwauhamata Tanona ai idia vareai negana amo idia duahia matamaia. Iubili laganina ai tano be do ia noho kava, bona Heberu hesiai taudia idia ruhaia. Bema bese ena tano idia hoihoilaia do idia abia lou. Unai Iubili laganina be moale laganina, unai lagani ai Israela besena be idia ruhaia negana  bamona idia noho, Dirava ese idia ia abia hidi negana unai.—Le 25:10.

• Iuda.

  Iakobo ena natuna merona namba 4, ena adavana Lea amo. Iakobo be kahirakahira ia mase gwauraia neganai, ia peroveta Iuda ena bese amo noho hanaihanai lohia tauna ta do ia mai. Iesu be taunimanima bamona ia mai neganai, ia be Iuda besena lalonai ia vara. Unai ladana be Iuda iduhu ia herevalaia bona gabeai Iuda basileiana dekenai idia gwauraia danu. Baibel ese Iuda be saut kahana basileiana ia gwauraia, unai be Israela besena ena Iuda bona Beniamina iduhu taudia, bona hahelaga taudia bona Levi taudia be idia ida idia noho danu. Iuda basileiana be Israela tanona ena saut kahana ai bona unuseniai be Ierusalema bona dubu helaga ia noho.—Ge 29:35; 49:10; 1Ki 4:20; He 7:14.

• Iuda tauna.

  Israela ena iduhu 10 basileia ia moru murinai, Iuda iduhu tauna be unai bamona idia gwauraia. (2Ki 16:6) Israela taudia be Babulonia ena igui idia rakatania murinai, Israela dekenai idia giroa iduhu idauidau taudia be unai bamona idia boiridia. (Esr 4:12) Gabeai, tanobada hegegemadai unai ladana idia gaukaralaia karana amo idia hahedinaraia Israela taudia be Idau Bese taudia amo idia idau. (Est 3:6) Aposetolo Paulo ese laulau dalanai unai ladana ia gaukaralaia danu. Ia hahedinaraia Keristani kongrigeisen lalonai bese idauidau taudia ibounai be hegeregere.—Ro 2:​28, 29; Ga 3:28.

K

• Kaisara.

  Roma ruma bese ena ladana ta, to gabeai Roma ena lohia taudia edia dagi ladana ai ia lao. Baibel lalonai Augusto, Tiberio, bona Klaudio idia gwauraia Kaisara, bona Nero dekenai idia gwauraia lasi, to ia be idia ta danu. Keristani Grik Toretoredia ai nega haida “Kaisara” idia gaukaralaia gavamani bona ena gaukara taudia ia herevalaia totona.—Mr 12:17; Ka 25:12.

• Kaivakuku; Kaivakuku tomadiho henia karana.

  Kaivakuku be gau ta ena laulau, herevana ia be momokani eiava lalohadai ta sibona, bona taunimanima ese idia gaukaralaia tomadiho totona. Kaivakuku tomadiho henia karana be kaivakuku dekenai hemataurai bada, lalokau, bona abia isi karana ia herevalaia.—Sal 115:4; Ka 17:16; 1Ko 10:14.

• Kaledea; Kaledea taudia.

  Guna unai be Taigarisi sinavai bona Euperate sinavai badinai idia noho tano bona taunimanima ia herevalaia. Gabeai unai ladana be Babulonia bona ena taunimanima totona idia gaukaralaia. Ma danu inai hereva “Kaledea taudia” idia gaukaralaia diba bada taudia idia herevalaia totona. Idia ese saiens, histori, gado idauidau bona guba gaudia idia stadilaia, bona danu hisiu ena heau dalana idia stadilaia edia babalau herevadia idia gwauraia totona.—Esr 5:12; Da 4:7; Ka 7:4.

• Kanana.

  Noa ena tubuna tau bona Hamo ena natuna mero namba 4. Kanana amo idia mai iduhu 11 be Meditereinien ena ist kahanai idia noho, unai be Aigupito bona Suria huanai. Unai gabu idia gwauraia “Kanana tanona.” (Le 18:3; Ge 9:18; Ka 13:19)—Ap. B4 itaia.

• Kara dika boubouna.

  Bema ta ia diba lasi bona ia kara dika, ia ese unai boubou gauna do ia henia. Animal idauidau idia gaukaralaia, hegeregere boromakau tau eiava kerea manu, ia kara dika tauna be ena noho dalana hegeregerena unai boubou gauna do ia henia.—Le 4:​27, 29; He 10:8.

• Kara Dika Davana Karaia Dinana.

  Israela taudia dekenai ia be dina helagana, bona idia gwauraia Yom Kippur danu (Heberu gado ai yohm hak·kip·pu·rimʹ, “koua dinana”) unai be Etanimi hua namba 10 ai idia karaia. Lagani ta ta ai unai dina sibona dekenai hahelaga tauna badana be Palai Dubu, gabeai idia gwauraia dubu helaga, ena Helaga Herea Gabuna ai ia vareai. Unuseniai ia ese ena kara dika, Levi taudia ma haida edia kara dika, bona taunimanima edia kara dika totona idia henia animal edia rara ia bouboulaia. Unai dina be hebou helagana bona aniani lasi negana, bona ia be sabati dinana danu, bona gaukara ta do idia karaia lasi.—Le 23:​27, 28.

• Kara Dika Ena Boubou.

  Heberu Toretoredia ai, taunimanima be boubou gaudia idia henia, unai amo idia be Dirava kahirakahira idia lao bona ia idia tomadiho henia diba. Mose ena Taravatu hegeregerena, Kara Dika Davana Karaia Dinana ai boubou gaudia idia henia, unai amo Dirava ida maino ai idia noho, ena be Israela taudia ta ta bona bese ibounai be mai edia kara dika. Unai boubou gaudia ese Keriso ena boubou gauna idia laulaulaia, unai ese taunimanima ibounai edia kara dika be nega tamona ia kokia ela bona hanaihanai, bona dala ia kehoa taunimanima be Iehova ida maino ai idia noho totona.—Le 5:10; 23:28; Kl 1:20; He 9:12.

• Kara dika gwauatao.

  —KARA DIKA DAVANA KARAIA DINANA itaia. 

• Kara dika koua gauna.

  Taravatu maua ena koua gauna, unai koua gauna ena vairanai hahelaga tauna badana be kara dika bouboudia edia rara ia negea lao mai, unai be Kara Dika Davana Karaia Dinana ai ia karaia. Unai Heberu herevana ena anina be “(kara dika) koua” eiava reana “(kara dika) dahua oho.” Unai koua gauna be golo aukana amo idia karaia, kerubi rua idia noho, ta ta be koua gauna ena dokona kahana ai ia noho. Nega haida idia gwauraia “koua gauna.” (Eso 25:​17-22; 1Si 28:11; He 9:5)—Ap. B5 itaia.

• Kasia.

  Ia be kasia au ena kopina amo idia karaia. Kasia auna be sinamon au hegeregerena. Kasia be pefium bamona idia gaukaralaia bona ta horoa totona idia gaukaralaia dehoro helagana lalonai idia atoa.—Eso 30:24; Sal 45:8; Ese 27:19.

• Keb.

  Kaukau gaudia edia mesament 1.22 L, unai mesament abia totona bat ena mesament idia gaukaralaia. (2Ki 6:25)—Ap. B14 itaia.

• Kemena gauna.

  Israela ena hahelaga tauna badana be Helaga Gabuna lalonai ia vareai neganai unai dabua maragina mai ena herahera nadidia be ena kemena dekenai ia kwatua. Ena ladana idia gwauraia “hahemaoro kemena gauna” badina ia dekenai be Urima bona Tumima idia noho, unai idia gaukaralaia Iehova ena hahemaoro karana idia hahedinaraia totona. (Eso 28:​15-30)—Ap. B5 itaia.

• Kemoso.

  Moaba taudia edia dirava badana.—1Ki 11:33.

• Kepata.

  Lohia tauna ese ia dogoatao itotohi, unai ese ena king siahuna ia laulaulaia.—Ge 49:10; He 1:8.

• Kerere boubouna.

  Kara dika ia karaia tauna ese ia henia boubouna. Ia be kara dika boubou ma haida amo ia idau sisina. Badina ia helalo-kerehai tauna be iena kara dika dainai, taravatu ese ia gwauraia gaudia haida ia karaia diba lasi. Vadaeni, kerere boubouna ese iena kerere ena davana ia karaia bona panisi amo ia ruhaia.—Le 7:37; 19:22; Isa 53:10

• Keriso.

  Iesu ena dagi ladana ta, Grik herevana Khri·stosʹ, amo idia abia, Heberu gado ai idia hahanaia neganai ena anina be “Mesia” eiava “Horoa Tauna.”—Mt 1:16; Ioa 1:41.

• Keriso inai henia tauna.

  Grik herevana ena anina be rua. Inai hereva ese Keriso inai henia tauna ia herevalaia diba. Bona Keriso koikoina, eiava Keriso ena gabu ia abia tauna ia herevalaia diba danu. Taunimanima ibounai, orea badadia o maragidia, eiava sibodia idia gwau idia be Keriso ena gwaukau taudia o idia gwau idia be Mesia o Keriso bona ena hahediba taudia idia dadaraia taudia ita gwauraidia diba Keriso inai henia taudia.—1Io 2:22.

• Keristani.

  Iesu murinai idia raka taudia dekenai Dirava ese inai ladana ia henia.—Ka 11:26; 26:28.

• Kerubi.

  Idia be dagi bada anerudia bona mai anina bada gaukaradia idia karaia. Idia be serapi amo idia idau.—Ge 3:24; Eso 25:20; Isa 37:16; He 9:5.

• Keten.

  Linen dabua namo hereana amo idia karaia bona ia latanai kerubi aneru edia laulau idia turia. Palai Dubu bona dubu helaga ai unai keten ese Helaga Gabuna bona Helaga Herea Gabuna ia hapararaia. (Eso 26:31; 2Si 3:14; Mt 27:51; He 9:3)—Ap. B5 itaia.

• King ena gadi.

  Roma soldia ena grup ta, Roma basileia gimaia totona. Inai gadi oreana be mai ena siahu basileia ta ia durua eiava halusia totona.—Fp 1:13.

• Kisileve.

  Israela taudia be Babulonia amo idia giroa murinai, edia tomadiho ena kalenda dekenai ia be hua namba 9, bona uma gaukara ena kalenda dekenai be hua namba 3. Ia be November huanai ia lao December huanai. (Ne 1:1; Sek 7:1)—Ap. 15 itaia.

• Kiubit.

  Inai mesament idia gaukaralaia gau ta ena lata idia diba totona, unai be diuna amo ela bona huana ima kwakikwakina amo. Israela taudia be nega momo kiubit tamona ena mesament idia gaukaralaia, unai be 44.5 cm bamona, to idia ese kiubit badana idia gaukaralaia danu, unai be ima kwakikwaki 4 edia lababa, ia be 51.8 cm bamona. (Ge 6:15; Lu 12:25)—Ap. B14 itaia.

• Kona nadi.

  Inai nadi be ruma ta ena kona, haba rua idia joini gabuna ai idia atoa, unai haba rua idia hakapua totona unai nadi be mai anina bada. Mai anina bada nadi be ruma ena badina ena kona nadina. Ruma badadia bona siti ena magu totona nadi aukana momokani idia abia hidi. Tanobada ena vara negana ia herevalaia neganai, laulau dalanai inai hereva idia gaukaralaia. Danu, laulau dalanai Iesu be Keristani kongrigeisen ena “kona nadi badana” bamona ia herevalaia, badina kongrigeisen be Dirava ena lauma helaga ese ia haginia rumana bamona.—Ef 2:20; Iob 38:6.

• Kongrigeisen.

  Taunimanima idia hebou, kara ta eiava gaukara ta idia karaia totona.  Heberu Toretoredia ai, unai be Israela besena ia herevalaia. Keristani Grik Toretoredia ai, ia be Keristani taudia edia kongrigeisen ta ta ia herevalaia, to nega momo ia be Keristani kongrigeisen ibounai ia herevalaia.—1Ki 8:22; Ka 9:31; Ro 16:5.

• Kopina utua.

  Tau ena usina kopina idia utua karana. Unai kara be Aberahamo bona ena natudia ese idia badinaia taravatuna, to Keristani taudia be idia badinaia lasi. Baibel lalonai unai hereva be laulau dalanai idia gaukaralaia danu.—Ge 17:10; 1Ko 7:19; Fp 3:3.

• Kor.

  Kaukau gaudia bona ranu gaudia edia mesament. Ia be 220 L, bona unai mesament abia totona bat ena mesament idia gaukaralaia. (1Ki 5:11)—Ap. B14 itaia.

• Korol.

  Davara lalonai idia noho animal maragidia edia turia amo ia vara, bona ia auka, nadi bamona. Ena kala be idauidau hegeregere kakakaka, kurokuro, bona korema oi davaria diba. Davara Kakakaka ai korol be momo herea. Baibel negadiai, korol kakakakana be dava bada gauna bona ia amo ageva nadinadi bona herahera gaudia ma haida idia karaia.—Ao 8:11.

• Kwadi oreana.

  Inai kwadi oreana be nega tamona idia roho loaloa. Mose Ena Taravatu henunai, idia be goeva aniani totona. Idia be orea tamona hegeregerena idia loaloa dainai, gau momo idia ania, bona dika bada idia havaraia, unai dainai idia gwauraia idia be dika ta.—Eso 10:14; Mt 3:4.

• Kwara kumia dabua.

  Inai dabua be kwarana dekenai idia kumia bona kwara gauna bamona idia kwatua. Hahelaga tauna badana ena kwara kumia dabua be linen namo hereana amo idia karaia, bona golo medolo mai ena bulu kotini varo be unai dabua vaira kahanai idia kwatua. King be kwara kumia dabua ia kwatua murinai, ena korona ia atoa. Danu, Iobu ia gwau ena hahemaoro karadia be kwara kumia dabua bamona.—Eso 28:​36, 37; Iob 29:14; Ese 21:26.

L

• Lahi gida udaia gaudia.

  Golo, siliva eiava kopa amo idia karaia. Palai dubu bona dubu helaga dekenai idia gaukaralaia bonana namo muramura gabua totona, bona boubou patana ena lahi gida bona golo lamepa ena wiki momoru kokia totona. Idia gwauraia danu bonana namo gabua gauna.—Eso 37:23; 2Si 26:19; He 9:4.

• Lahi gohuna.

  Inai be laulau herevana, ia be “lahi bona salipa gohuna,” danu idia gwauraia “mase iharuana.” Helalo-kerehai lasi taudia, Diabolo, mase bona Mase Gurina (eiava, Hades) be unuseni idia negea danu. Lahi ese ia araia diba lasi gaudia hegeregere, lauma tauna, mase bona Hades be Baibel ese ia herevalaia dainai, ita diba inai gohu be laulau herevana, ia be hisihisi ania hanaihanai karana ia herevalaia lasi, to hadikaia ore vaitani karana ia herevalaia.—Apo 19:20; 20:​14, 15; 21:8.

• Lalohisihisi ane.

  Miusiki sibona eiava mai ena hereva danu, lalohisihisi neganai idia abia ane, hegeregere turana o lalokau tauna ta ia mase dainai ta ia mamia lalohisihisina. Ane mai taitai ida.—2Sa 1:17; Sal 7:Sup.

• Latanai imana atoa.

  Tau ta latanai imana atoa karana ese ia hahedinaraia ia idia abia hidi mai anina bada gaukarana eiava hahenamo ta ia abia totona, ena gorere idia hanamoa, eiava lauma helaga ena harihari gauna do ia abia. Nega haida animal latanai imana idia atoa murinai idia bouboulaia.—Eso 29:15; Nu 27:18; Ka 19:6; 1Ti 5:22.

• Lauma helaga.

  Ita itaia diba lasi gaukara siahuna. Dirava ese ia gaukaralaia ena ura ia hagugurua totona. Iehova amo ia mai dainai, ia be helaga. Ia be ia goeva bona maoromaoro momokani, badina Dirava ena gaukara helagadia ia hagugurua.—Lu 1:35; Ka 1:8.

• Lebanona ororo gabuna.

  Inai be Lebanona tanona ena ororo gabuna ta. Ororo gabudia be rua, Lebanona ororo gabuna be west kahanai bona Enti-Lebanona ororo gabuna be ist kahanai. Koura latana ta mai tano namona ese unai ororo gabudia rua ia hapararaia. Lebanona ena ororo gabudia be Meditereinien ena kone kahirakahira amo ia matamaia, bona ororo ena atai kahana be ia daekau momokani kahirakahira 1,800 bona 2,100 m huanai. Idaunegai, Lebanona be sida au badadia amo ia honu, bona ena badina hanuadia ese unai au be dava bada gauna ai idia halaoa. (De 1:7; Sal 29:6; 92:12)—Ap. B7 itaia.

• Lepera gorere; Lepera tauna.

  Kopina dekenai ia vara gorere dikana ta. Baibel lalonai, lepera gorere be hari ena lepera gorere amo ia idau, badina ia be taunimanima sibona lasi, to dabua bona ruma dekenai ia vara danu. Lepera gorere ia abia tauna idia gwauraia lepera tauna.—Le 14:54; Lu 5:12.

• Lepta.

  Keristani Grik Toretoredia idia torea neganai, inai be Iuda taudia edia kopa koini maragi hereana. (Mr 12:42; Lu 21:2)—Ap. B14 itaia. 

• Levi; Levi tauna.

  Iakobo ena natuna mero ihatoina, ena adavana Lea amo; ia be iduhu ena ladana danu. Iena natudia toi amo Levi taudia edia orea badadia toi idia vara. Nega haida, inai hereva “Levi taudia” be iduhu ibounai ia gwauraia, to nega momo Arona ena bese ai idia noho hahelaga taudia ia herevalaia lasi. Gwauhamata Tanona ai, Levi iduhuna be tano ta idia abia lasi, iduhu ma haida edia tano hetoana amo siti 48 be idia dekenai idia henia.—De 10:8; 1Si 6:1; He 7:11.

• Leviatano.

  Ia be ranu lalonai ia noho animal ta. Iobu 3:8 bona 41:1 ai, toana be huala ta eiava ranu lalonai ia noho animal badana bona goadana ta ia herevalaia. Salamo 104:26 ai, reana ia be lakaradonodono ia herevalaia. Gabu ma haida ai, Baibel ese laulau dalanai ia gaukaralaia, to ia gwau lasi ia be edena bamona animal.—Sal 74:14; Isa 27:1.

• Log.

  Baibel lalonai, ia be ranu ena mesament maragi herea. Iuda taudia edia Talmud bukana ai, ia be hin kahana (1/12) ta. Unai mesament idia gaukaralaia log tamona ena mesament abia totona, unai be 0.31 L. (Le 14:10)—Ap. B14 itaia.

• Lohiabada Ena Anibou.

  Inai anibou ai isti lasi paraoa bona wain idia noho, unai ese Keriso ena tauanina bona rara ia laulaulaia; ia be Iesu ena mase laloatao dinana. Baibel ia gwau Keristani taudia be inai hebou idia karaia be namo, unai dainai ia maoro idia gwauraia “Memorial hebouna.”—1Ko 11:​20, 23-26.

• Lokua toretore.

  Unai be animal ena kopina eiava siriho latana, bona kahana tamona sibona ai toretore ia noho, bona au ta dekenai idia lokua. Toretore helagadia ena hereva be lokua pepa ai idia torea, unai be Baibel idia torea negana ai idia gaukaralaia buka.—Ier 36:​4, 18, 23; Lu 4:​17-20; 2Ti 4:13.

M

• Mahalata.

  Inai hereva be miusiki totona idia gaukaralaia, Salamo 53 bona 88 ena supaskrip­sen dekenai idia torea. Reana ia be Heberu hereva ta hegeregerena, ena anina be “manoka eiava gorere,” unai ese ia hahedinaraia unai miusiki be moale lasi eiava lalohisihisi anena. Unai ese ataiai salamo anedia rua edia hemami ia hahedinaraia.

• Maino karaia boubou.

  Inai boubou gauna be Iehova dekenai idia henia, ia ida maino karaia totona. Boubou ia henia tauna bona ena ruma bese, boubou ia karaia hahelaga tauna, bona unai nega ai idia gaukara hahelaga taudia ibounai be unai boubou gauna idia ania. Iehova ese unai boubou gauna ena digara ena kwalahu namona ia abia dae. Rara, mauri ia laulaulaia gauna, be ia dekenai idia henia danu. Unai be hegeregere, hahelaga taudia bona boubou idia henia taudia be Iehova ida idia aniani hebou, bona unai ese ia hahedinaraia idia be maino ai idia noho.—Le 7:​29, 32; De 27:7.

• Majistret taudia.

  Babulonia ena gavamani henunai, majistret be distrik ta ta ena ofesa taudia, idia be taravatu idia diba bona kota dekenai edia siahu be maragi. Roma ese ia biagua tanodia ai, majistret taudia be gavamani ena administreita taudia. Edia gaukara be taunimanima idia naria namonamo, moni idia naria, taravatu utua taudia idia hahemaoro henia, bona oda idia henia idia panisidia totona.—Da 3:2; Ka 16:20.

• Maka.

  Inai gauna idia gaukaralaia gau ta dekenai maka idia atoa totona, (nega momo raro eiava kandolo ena anina idia gaukaralaia). Inai maka amo idia hamomokania gau ta be ta ena, eiava ta ena hereva be momokani, eiava gau ta dekenai idia lalotamona. Guna idia gaukaralaia gaudia be nadi, aivori, eiava au amo idia karaia, idia latanai be leta eiava laulau idia noho, dokona amo ia matamaia ela bona matamana. Laulau dalanai unai maka idia gaukaralaia unai amo idia hahedinaraia gau ta be momokani, eiava ia be ta ena, eiava gau ta idia hunia totona.—Iob 38:14; Sol 8:6; Apo 5:1; 9:4

• Makedonia.

  Unai tano be Greece ena not kahanai ia noho. Alesana Badana ena lohia negana ai unai tano be ladana bada ia abia, bona sibona ia biagua ela bona Roma ese ia abia. Makedonia be Roma ese ia biagua negana ai, aposetolo Paulo be nega ginigunana Europe kahana ia vadivadi henia. Paulo be nega toi unai gabu ia vadivadi. (Ka 16:9)—Ap. B13 itaia.

• Malikama.

  Reana ia be Moleka, Amono taudia edia dirava badana hegeregerena. (Sef 1:5)—MOLEKA itaia.

• Mana.

  Israela taudia be lagani 40 taunimanima lasi gabuna dekenai idia loaloa neganai, unai idia ania. Iehova ese idia dekenai ia henia. Hoa dalanai, mana be tano dekenai ia hedinarai bona daba ibounai daba ena paripari be ia latanai ia moru, to Sabati dinana ai be lasi. Israela taudia be nega ginigunana unai idia itaia neganai, idia gwau, “Inai be dahaka?” eiava, Heberu ai, “man huʼ?”  (Eso 16:​13-15, 35) Siri haida ai, inai bamona idia gwauraia “guba ena witi” (Sal 78:24), “guba amo paraoa” (Sal 105:40), bona “goada taudia edia paraoa” (Sal 78:25). Iesu ese laulau dalanai mana ia herevalaia danu.—Ioa 6:​49, 50.

• Mase Gurina.

  Bema inai hereva be leta maragina ai idia torea, unai be tau tamona ena guria gabuna ia herevalaia, to bema ena leta ginigunana be leta badana, unai be taunimanima edia guria gabuna ia herevalaia, Heberu be “Sheol” bona Grik be “Hades.” Baibel ese laulau dalanai ia gaukaralaia bona ia hahedinaraia ia be gabu ta, unuseniai gaukara ta bona lalohadai ta be lasi.—Ge 47:30; Had 9:10; Ka 2:31.

• Masikili.

  Inai be Heberu herevana bona ena anina ia hedinarai lasi, ia be salamo anedia 13 edia supaskripsen dekenai idia torea. Reana ena anina be “laloa dobu anena.” Haida idia laloa inai hereva be “hesiai henia namonamo” ida ia hegeregere.—2Si 30:22; Sal 32:Sup.

• Matabodaga karadia.

  Greek herevana por·neiʹa be heudahanai, ariara karadia, headava lasi taudia idia mahuta hebou, tau be ma tau ta ida ia mahuta hebou eiava hahine be hahine ma ta ida ia mahuta hebou, animal ida idia mahuta hebou karadia ia herevalaia. Apokalupo bukana ese laulau dalanai ariara hahine be tomadiho orea ta bamona ia herevalaia, ena ladana be “Babulonia Badana,” unai ese ia hahedinaraia ia be tanobada ena lohia taudia ida ia gaukara hebou siahu bona kohu ia abia totona. (Apo 14:8; 17:2; 18:3; Mt 5:32; Ka 15:29; Ga 5:19)—ARIARA TAU O HAHINE itaia.

• Matahanai itaia tauna.

  Dirava ese ia abia hidi iena ura ia gwauraia hedinarai totona. Taunimanima ese idia itaia lasi eiava lalopararalaia diba lasi gauna be unai tauna ese ena matana amo ia itaia bona ia lalopararalaia diba. Heberu herevana be hereva ta ena anina “itaia” amo idia abia, unai be anina korikori eiava laulau dalanai itaia karana ia herevalaia. Haida be matahanai itaia tauna dekenai idia lao aonega sisiba totona bona edia hekwakwanai hamaoromaoroa totona.—1Sa 9:9.

• Mauri auna.

  Eden umana ai ia noho au. Baibel ia hahedinaraia lasi bema inai au ena huahua be mauri ia henia diba, to ena huahua idia ania taudia dekenai Dirava ena gwauhamata mauri hanaihanai totona ia laulaulaia.—Ge 2:9; 3:22.

• Mauri davana.

  Inai be davana idia henia tau ta abia mauri totona, panisi, hisihisi, kara dika eiava maduna ta amo ruhaia totona. Moni sibona amo mauri davana idia karaia lasi. (Isa 43:3) Gau idauidau totona mauri davana idia henia. Hegeregere, Israela ai vara guna memero ibounai eiava animal tatau ibounai be Iehova ena, unai dainai Iehova ena hesiai gaukara amo idia ruhaia totona, mauri davana eiava hoia lou davana idia henia be namo. (Nu 3:​45, 46; 18:​15, 16) Bema dagedage boromakau ta ese tau ta ia hamasea, biaguna be mauri davana ia henia be namo, unai amo idia gwauraia mase davana amo do idia hamauria. (Eso 21:​29, 30) To, ala-ala tauna amo mauri davana do idia abia dae lasi. (Nu 35:31) Baibel ese ia hahedinaraia mai anina bada mauri davana be Keriso sibona ese ena mauri ia bouboulaia, kara maoromaoro taudia be kara dika bona mase amo ia ruhaia totona.—Sal 49:​7, 8; Mt 20:28; Ef 1:7.

• Meamea karadia.

  Meamea karadia lalonai, idia abia dae mase tauna ena lauma be tauanina ia rakatania bona mauri taudia ida ia herevahereva diba, nega momo edia siahu henunai idia gaukara babalau taudia amo idia hereva. Grik herevana idia hahanaia “meamea karadia” be phar·ma·kiʹa, ena anina korikori be “drag gaukaralaia karana.” Unai hereva be meamea karadia ida idia herevalaia hebou, badina idaunegai meamea karadia lalonai drag idia gaukaralaia, demoni edia siahu idia tahua totona.—Ga 5:20; Apo 21:8.

• Media taudia; Media.

  Idia be Iapeta ena natuna, Media, ena bese taudia; idia be Iran ena ororo gabudia ai idia noho, bona unai gabu be Media tanona ai ia lao. Media taudia be Babulonia ida idia haboua, bona Asuria taudia idia halusia. Unai nega ai, Parasa provinsi be Media ese ia biagua, to Kurese ese edia lohia dalana ia gwau-edeede henia, bena Media bona Parasa idia hatamonaia, bona Mede-Parasa Basileiana ia vara. Unai murinai lagani 539 B.C.E. ai, idia ese Babulonia Basileiana idia halusia. Media taudia be Pentekoste 33 C.E. negana ai, Ierusalema dekenai idia noho. (Da 5:​28, 31; Ka 2:9)—Ap. B9 itaia.

• Medieita.

  Taunimanima rua huanai maino ia karaia tauna. Baibel lalonai Mose be Taravatu gwaubou ena medieita, bona Iesu be gwaubou matamana ena medieita.—Ga 3:19; 1Ti 2:5.

• Merodaka.

  Babulonia siti ena dirava badana ta. Babulonia ena king bona taravatu atoa tauna Hammurabi ese Babulono be Babulonia  ena siti badana ai ia halaoa murinai, Merodaka (eiava Marduk) be ladana badana ia abia, gabeai dirava ma haida edia gabu ia abia bona Babulonia ena dirava badana ai ia lao. Lagani haida murinai, inai ladana Merodaka (eiava Marduk) ena gabu be “Belu” (“Biaguna”) ese ia abia, bona Merodaka idia gwauraia Bele.—Ier 50:2.

• Mesia.

  Heberu herevana amo idia abia, ena anina be “abia hidi” eiava “abia hidi tauna.” Grik gado ai idia gwau, “Keriso.”—Da 9:25; Ioa 1:41.

• Mikitama.

  Inai Heberu herevana be salamo anedia 6 edia supaskripsen dekenai idia torea (Sal 16, 56–60). Inai hereva ena anina be ta ia diba lasi, to reana ena anina be “nadi dekenai koroa toretore.”

• Milekoma.

  Inai be Amono taudia ese idia tomadiho henia dirava ta, reana Moleka dirava bamona. (1Ki 11:​5, 7) Solomona ena lohia laganina be kahirakahira ia doko neganai, ia ese inai koikoi diravana totona ataiai gabudia ia haginia.—MOLEKA itaia.

• Mina.

  Esekiela bukana ai idia gwauraia “mane.” Gau ta ena metau sikelea bona moni totona idia gaukaralaia. Akioleji taudia edia tahua gaukara lalonai idia davaria mina tamona be 50 sikel hegeregerena, bona sikel ta ena metau be 11.4 g, Heberu Toretoredia ese ia gwauraia mina ena metau be 570 g. Reana mina idaudia rua idia noho, ta be taunimanima ese idia gaukaralaia bona ta be king bona iena ofesa taudia ese idia gaukaralaia. Keristani Grik Toretoredia ai mina tamona be 100 drekma hegeregerena. Ena metau be 340 g. Mina ibounai 60 ena metau be talent tamona. (Esr 2:69; Lu 19:13)—Ap. B14 itaia.

• Miro.

  Inai be tauanina dalanai ta ia miro eiava kara maoromaoro taravatu ia utua. To Baibel lalonai unai hereva idia gaukaralaia bema ta be Mose Ena Taravatu ia utua eiava ia goeva lasi karana ta ia karaia. (Le 5:2; 13:45; Mt 10:1; Ka 10:14; Ef 5:5)—GOEVA itaia.

• Moleka.

  Amono taudia edia dirava, reana ia be Milekama, Milekoma bona Moloka hegeregerena. Reana ia be dagi ladana to dirava ta ena ladana lasi. Mose Ena Taravatu ia gwau bema tau ta ese ena natuna be Moleka dekenai ia bouboulaia, ia do idia hamasea.—Le 20:2; Ier 32:35; Ka 7:43.

• Moloka.

  —MOLEKA itaia.

• Mose Ena Taravatu.

  Lagani 1513 B.C.E. ai, taunimanima lasi gabuna dekenai Iehova ese Sinai Ororo ai Mose amo Israela taudia dekenai ia henia taravatuna. Baibel lalonai idia noho buka ginigunadia 5 be idia gwauraia Taravatu bukadia.—Ios 23:6; Lu 24:44.

• Muro.

  Au maragidia mai edia ginigini ladana Commiphora edia kopina amo idia abia ranu. Ta horoa totona idia gaukaralaia dehorona lalonai muro idia atoa danu. Ia be dabua eiava bedi dekenai idia atoa, bona tauanina gigia totona idia gaukaralaia dehoro bona tauanina dahua dehoro lalonai idia atoa danu. Mase tauanina guria negana ai muro amo idia dahua.—Eso 30:23; Ao 7:17; Ioa 19:39.

• Mutalabena.

  Inai hereva be Salamo 9 ena supaskripsen dekenai idia torea. Heberu gado ai, ena anina be “natuna mero ta ena mase dainai.” Haida idia gwau inai be miusiki ta ena ladana eiava unai salamo anena ena hamatamaia herevadia.

N

• Nadi du helagana.

  Inai du be ia gini maoromaoro bona ia be tau ena tauanina ena toana ia hahedinaraia bona Bala eiava dirava ma haida ia laulaulaia.—Eso 23:24.

• Nado.

  Dava bada bonana namo dehoro ta, ena kala be kakakaka sisina, bona spaiknad tubutubu gauna amo idia karaia (Nardostachys jatamansi). Ia be dava bada dehoro dainai, nega momo idia namo momokani lasi dehoro ida idia mikisia, bona nega haida nado koikoina idia karaia. Mareko bona Ioane idia gwau “nado korikorina” be Iesu dekenai idia gaukaralaia.—Mr 14:3; Ioa 12:3.

• Nakimi adavaia karana.

  Ia be kastom karana ta, bona gabeai Mose Ena Taravatu lalonai idia torea. Bema tau ta ia mase, ena tadikaka ese ia mase tauna ena vabu do ia adavaia, unai amo ena tadikaka totona natudia do ia havaraia.—Ge 38:8; De 25:5.

• Namo bona dika dibaia auna.

  Eden umana ai ia noho au ta, Dirava ese unai au ia gaukaralaia iena maoro taunimanima dekenai dahaka be “namo” bona dahaka be “dika” ia gwauraia totona.—Ge 2:​9, 17.

• Naria tauna.

  Tau ena maduna be kongrigeisen ia naria bona ia hakaua. Greek herevana e·piʹsko·pos anina be gimaia karana namona. Keristani kongrigeisen lalonai, inai hereva “naria tauna” bona “elda” (pre·sbyʹte·ros) be dagi tamona ia herevalaia. Inai hereva “elda” be idia abia hidi tauna ena kara namodia ia herevalaia, bona “naria tauna” be ia karaia gaukara idauidau ia herevalaia.—Ka 20:28; 1Ti 3:​2-7; 1Pe 5:2. 

• Nasareta tauna.

  Iesu totona idia gaukaralaia ladana ta, badina ia be Nasareta taoni amo. Reana unai be Isaia 11:1 ai idia gaukaralaia Heberu herevana “ramuna” ida ia hegeregere. Gabeai Iesu ena murinai idia raka taudia dekenai unai hereva idia gaukaralaia danu.—Mt 2:23; Ka 24:5

• Nasiri.

  Heberu gado amo idia abia herevana ta, ena anina be, “Idia Makaia Tauna; Gwauhamatalaia Tauna; Hapararaia Tauna.” Nasiri oreadia be rua, (1) sibona idia henia gaukara idia karaia taudia, bona (2) unai gaukara karaia totona Dirava ese ia abia hidi taudia. Tau ta eiava hahine ta be nega kwadogi lalonai Nasiri tauna bamona do ia noho Iehova dekenai ena gwauhamata ia hagugurua totona. Unai gaukara karaia totona sibona idia henia bona gwauhamata idia karaia taudia be taravatu toi do idia badinaia: Idia be alkahol do idia inua lasi eiava vain huahua amo idia karaia gauna ta do idia ania lasi, edia huina do idia utua lasi, bona mase tauanina do idia dogoatao lasi. Dirava ese ia abia hidi taudia be edia mauri ibounai lalonai Nasiri taudia bamona do idia noho, bona Iehova ese idia totona taravatu haida ia atoa.—Nu 6:​2-7; Hah 13:5.

• Nefilim.

  Tanobada hahinedia bona tanobada tauanina idia abia aneru edia natudia. Idia be taunimanima badadia momokani bona idia dagedage. Abata ia do mai lasi negana ai idia noho.—Ge 6:4.

• Nega oromana.

  Unai be Greek herevana ai·onʹ amo idia hahanaia, ia be hari idia vara karadia ena nega ia herevalaia, eiava kara badana ta ia vara ena nega ia herevalaia. Baibel ese “inai nega oromana” ia gwauraia neganai, ia be hari idia vara karadia bona tanobada ena mauri dalana ia herevalaia. (2Ti 4:​10) Taravatu gwaubou amo, Dirava ese nega oromana ta ia hamatamaia, bona momo ese unai nega idia gwauraia Israela taudia edia nega. Mauri davalaia boubouna amo, Dirava ese Iesu Keriso ia gaukaralaia nega oromana idauna ma ta ia hamatamaia totona, unai be horoa Keristani taudia ia herevalaia. Unai ese nega oromana matamatana ia hamatamaia, unai amo Taravatu gwaubou ese ia laulaulaia gaudia ia hamomokania. Inai hereva ese nega oromana idauidau ia herevalaia diba danu.—Mt 24:3; Mr 4:19; Ro 12:2; 1Ko 10:11.

• Nega oromana ena dokona.

  Satani ese ia biagua negana eiava tanobada dikana ena nega orena. Unai be Iesu ena noho negana ai. Iesu ena oda hegeregerena, aneru ese “kara maoromaoro taudia be kara dika taudia amo do idia hapararaia” bona idia hadikaia ore. (Mt 13:​40-42, 49) Iesu ena hahediba taudia be “dokona” ena nega idia ura diba. (Mt 24:3) Kahirakahira guba dekenai do ia giroa neganai, iena murinai idia raka taudia dekenai ia gwauhamata, ia be idia ida do ia noho ela bona unai nega.—Mt 28:20.

• Nehilote.

  Inai hereva ena anina be ia hedinarai lasi, Salamo 5 ena supaskripsen ai ia noho. Haida idia gwau ia be miusiki gauna ta, bona Heberu herevana ta cha·lilʹ (flute) ida idia hahegeregerea. To ia be ane ia herevalaia.

• Neʹphesh; Psy·kheʹ.

  Inai Heberu herevana neʹphesh bona Grik herevana psy·kheʹ edia anina be inai: (1) Taunimanima, (2) animal, eiava (3) taunimanima eiava animal edia mauri. (Ge 1:20; 2:7; 1Pe 3:20) Unai dainai, inai Baibel ai, inai Heberu bona Grik herevadia idia hedinarai gabudia ai edia anina hegeregerena ai hahanaia, hegererere “mauri,” “animal” eiava “taunimanima.” Inai hereva rua ese mase tauanina idia herevalaia diba danu.—Nu 6:6; Hag 2:13.

• Netinim.

  Idia be Israela lasi taudia bona dubu ai idia gaukara. Heberu herevana ena anina be “Idia Henia Taudia,” ia hahedinaraia idia be dubu gaukaradia totona sibona idia henia. Netinim taudia momo be Gibeona ena bese amo idia mai, Iosua ese unai bese be “au gogoa taudia bona ranu utua taudia ai ia halaoa, Israela taudia totona bona Iehova ena boubou patana totona.”—Ios 9:​23, 27; 1Si 9:2; Esr 8:​17.

• Nisan.

  Babulonia amo idia giroa lou murinai, unai ladana matamata be Abiba hua totona idia gaukaralaia, Iuda tomadiho ena kalenda ai unai be hua ginigunana bona gaukara taudia edia kalenda ai unai be hua namba 7. Unai be March ena huanai amo ia lao April ena huanai. (Ne 2:1)—Ap. B15 itaia.

• Noho hanaihanai lalokauna.

  Nega momo ia be Heberu hereva cheʹsedh amo idia abia, unai lalokau be ta badinaia momokani, abidadama henia, bona laloa bada karana ia hahedinaraia. Nega momo ia be Dirava ese taunimanima ia lalokau henia karana ia herevalaia, to taunimanima rua huanai ia noho lalokauna ia herevalaia danu.—Eso 34:6; Ru 3:10.

• Noho negana.

  Keristani Grik Toretoredia ena kahana haida dekenai, inai hereva be Iesu Keriso ena noho negana ia herevalaia, unai  be Mesia King dagi ia abia negana amo ela bona inai nega oromana ena dokona. Inai hereva Keriso ena noho ese ia hahedinaraia lasi ia be ia mai bona ia giroa lou haraga, lasi, to ia be ia mai bona nega daudau ia noho karana ia herevalaia.—Mt 24:3.

O

• Omera.

  Ia kaukau gauna ta ena mesament. Ena metau be 2.2 L, eiava ifa ta ena 10 pesen. (Eso 16:​16, 18)—Ap. B14 itaia.

• Onuku.

  Dava bada nadi ta bona ena kala be idauidau, (korema, braon, kakakaka, grei, eiava grin) bona mai ena kala kurokuro danu. Hahelaga tauna badana ena dabua dekenai unai nadi idia gaukaralaia.—Eso 28:​9, 12; 1Si 29:2; Iob 28:16.

P

• Palai dubu.

  Israela taudia be Aigupito idia rakatania murinai, unai palai be edia tomadiho totona idia gaukaralaia, ia be gabu idauidau dekenai idia abia lao diba. Iehova ena Taravatu Mauana, Iehova ena noho ia laulaulaia gauna, be unai palai dubu lalonai ia noho, bona unai gabu ai boubou gaudia idia gabua bona idia tomadiho. Nega haida idia gwauraia “hebou dubu.” Iena freim be au amo idia karaia, bona linen dabua amo idia koua, unai dabua ai kerubi edia laulau idia noho. Ena daiutu be rua, ginigunana idia gwauraia Helaga Gabuna, bona iharuana be Helaga Herea Gabuna. (Ios 18:1; Eso 25:9)—Ap. B5 itaia.

• Paradaiso.

  Gabu hairaina ta, eiava uma bamona gabuna ta. Unai bamona gabu ginigunana be Eden, Iehova ese taunimanima ginigunadia rua totona ia karaia. Iesu ese hisihisi auna dekenai iena badinai idia tauadae kara dika tauna ia hereva henia noho lalonai, ia gwau tanobada be paradaiso ai do ia lao. Korinto Iharuana 12:4 ai, unai hereva ese vaira nega ena paradaiso ia herevalaia, bona Apokalupo 2:7 ai, guba paradaisona ia herevalaia.—Sol 4:​13; Lu 23:43.

• Paraoa helagana.

  Palai Dubu bona dubu helaga ena Helaga gabuna ai teibolo latanai paraoa 12 be grup rua dekenai idia atoa, grup ta ta be paraoa 6. Idia gwauraia danu, “ta ta latanai idia atoa paraoa” bona “boubou paraoa.” Unai boubou paraoa be Dirava totona, bona Sabati dinana ta ta ai paraoa matamata idia atoa. Idia kokia paraoa be hahelaga taudia sibona ese idia ania. (2Si 2:4; Mt 12:4; Eso 25:30; Le 24:​5-9; He 9:2)—Ap. B5 itaia.

• Parasa; Parasa taudia.

  Tano ta bona taunimanima ia herevalaia, bona nega momo Media taudia ia herevalaia. Histori lalonai, Parasa taudia be Iran tano ena sautwest kahana sibona idia abia. Kurese Badana (idaunegai histori taudia idia gwau ena tamana be Parasa tauna bona ena sinana be Media hahinena) ena lohia henunai, Parasa taudia ese Media taudia idia biagua, ena be unai nega ai basileia rua idia lohia hebou. Lagani 539 B.C.E. ai, Kurese ese Babulonia Basileiana ia halusia bona gwaumaoro ia henia abia mauri Iuda taudia be edia tano dekenai idia giroa lou totona. Parasa Basileiana ese ia lohiaia gabudia be Indus Sinavaina ena ist kahana amo ia lao Aegean Davara ena west kahana. Iuda taudia be Parasa ena lohia henunai idia noho ela bona lagani 331 B.C.E. ai Alesana Badana ese Parasa taudia ia halusia. Daniela ese matahanai ai Parasa Basileiana ia itaia, bona Baibel bukadia Esera, Nehemia, bona Eseta ai unai matahanai ia noho danu. (Ese 1:1; Da 5:28)—Ap. B9 itaia.

• Pasova.

  Abiba (gabeai idia gwauraia Nisan) hua ena dina namba 14 ai idia karaia aria, unai dina ai Israela taudia ese Aigupito amo ia hamauria karana idia laloatao. Unai dina hahelagaia totona mamoe (eiava nanigosi) idia alaia bona gabua, bona raurau iditana bona isti lasi paraoa ida idia ania.—Eso 12:27; Ioa 6:4; 1Ko 5:7.

• Pentekoste.

  Ierusalema ai Iuda tatau ese aria badadia toi idia karaia, bona Pentekoste be aria namba 2. Pentekoste, anina be “(Dina) Namba 50,” unai ladana be Keristani Grik Toretoredia dekenai idia gaukaralaia, to Heberu Toretoredia dekenai idia gwauraia Uma Ena Anina Haboua Aria eiava Wiki Edia Aria. Unai aria be dina namba 50 ai idia moalelaia, unai be Nisan 16 amo idia duahia matamaia.—Eso 23:16; 34:22; Ka 2:1.

• Peroveta hereva.

  Dirava amo ia mai hereva ta, unai be matahanai amo Dirava ena ura ia hedinarai eiava idia gwauraia hedinarai karana. Peroveta hereva ena anina be, Dirava ese ta ia gaukaralaia taunimanima ia hadibaia totona, Dirava ena oda eiava hahemaoro herevana gwauraia totona, eiava do ia vara gauna ta harorolaia totona.—Ese 37:​9, 10; Da 9:24; Mt 13:14; 2Pe 1:​20, 21.

• Peroveta tauna.

  Ia amo Dirava ena ura ia hahedinaraia. Peroveta taudia be Dirava ena gwaukau taudia bamona idia kara, idia be vaira nega gaudia idia gwauraia hedinarai sibona lasi to Iehova ena hadibaia herevadia,  iena taravatu, bona hahemaoro herevadia idia gwauraia danu.—Am 3:7; 2Pe 1:21.

• Pim.

  Ia be metau hahetohoa gauna, bona danu ia be Filistia taudia ese idia gaukaralaia auri gaudia idia segea ena davana. Israela ai akioleji taudia ese tano idia geia neganai nadi haida idia davaria, unai be metau hahetohoa gaudia, bona unai nadi latanai “pim” ena Heberu leta ia noho. Edia metau be 7.8 g, unai be 2/3 sikel bamona.—1Sa 13:​20, 21.

• Pomogranet.

  Au huahua ta, ena toana be apolo bamona, bona ena dokona kahana ai ia noho gauna ena toana be korona bamona. Ena kopina be auka bona ena lalona dekenai idia noho gaudia be ranu mamina namo hereana amo ia honu, bona ena uhe maragidia edia kala be pinki eiava kakakaka. Hahelaga tauna badana ena imana lasi dabua ena isena ai idia noho herahera gaudia edia toana be pomogranet bamona. Danu, dubu helaga ena vaira kahana ai idia noho du badadia rua, edia ladana Iakini bona Boasi, edia kwarana be pomogranet amo idia hahairaia.—Eso 28:34; Nu 13:23; 1Ki 7:18.

• Porneia.

  —MATABODAGA KARANA itaia.

• Purimi.

  Ia be Adara hua ena dina namba 14 bona 15 ai idia karaia aria. Unai aria be Kwini Eseta ena nega ai Iuda taudia be dika amo idia mauri neganai idia karaia. Heberu lasi herevana pu·rimʹ anina be “gadara.” Hamana ese Puru (Gadara) ia karaia, unai amo Iuda taudia hadikaia ore dinana ia abia hidi, unai dainai inai ladana Purimi Aria, eiava Gadara Aria, idia hatoa.—Est 3:7; 9:26.

• Puse dabua.

  Inai dabua idia gaukaralaia baege idia karaia totona, hegeregere witi udaia baege. Ia be nanigosi ena huina amo idia karaia, ena kala be korema. Guna negadia ai, unai dabua be lalohisihisi negana totona idia gaukaralaia.—Ge 37:34; Lu 10:13

R

• Rahaba.

  Inai hereva be inai buka Iobu, Salamo, bona Isaia ai laulau dalanai idia gaukaralaia (unai be Iosua bukana ese ia herevalaia hahine, Rahaba lasi). Iobu bukana ese Rahaba ia herevalaia dalana amo ia hahedinaraia, unai Rahaba be davara ena dagedage gauna ta. Baibel siri ma haida ai unai davara ena dagedage gauna ese Aigupito ia laulaulaia.—Iob 9:13; Sal 87:4; Isa 30:7; 51:​9, 10.

• Ranu guri.

  Inai guri lalonai be medu ranu eiava sinavai ranu idia haboua. Nega haida, unai guri lalonai ranu be lasi. [it-1-E p. 470].

• Rini.

  Ia be maka karaia gauna ta. Ta ese ena ima kwakikwaki dekenai ia atoa eiava varo dekenai idia kwatua, reana aiona dekenai atoa totona. Unai rini ese lohia tauna eiava ofesa ta ena siahu ia hahedinaraia. (Ge 41:42)—MAKA itaia.

• Ruʹach; Pneuʹma.

  Inai Heberu hereva ruʹach bona Grik hereva pneuʹma edia anina be “laga.” Edia anina ma haida be (1) lai, (2) tanobada ena mauri gaudia edia mauri siahuna, (3) taunimanima ena lalona amo ia mai lalohadai, unai ese ta ena hereva bona kara ia biagua, (4) ita itaia diba lasi lauma tauna amo idia mai hereva, (5) lauma taudia, bona (6) Dirava ena gaukara siahuna, eiava lauma helaga. (Eso 35:21; Sal 104:29; Mt 12:43; Lu 11:13) Unai dainai, inai Baibel ai, inai Heberu bona Grik gado herevadia idia hedinarai gabudia ai edia anina hegeregerena ai hahanaia.

S

• Sabata.

  Israela taudia be Babulonia idia rakatania murinai, edia tomadiho ena kalenda ena hua namba 11, bona uma gaukara ena kalenda dekenai ia be hua namba 5. Ia be January huanai ia lao February huanai. (Sek 1:7)—Ap. B15 itaia.

• Sabati.

  Ia be Heberu herevana ta amo, ena anina be “laga-ani; gaukara lasi.” Iuda taudia edia wiki ai, ia be dina namba 7 (Friday ena dina diho ia lao Saturday ena dina diho). Lagani ai idia karaia aria dinadia haida, lagani namba 7 bona lagani namba 50, be idia gwauraia sabati danu. Sabati dinana ai, gaukara do idia karaia lasi, to hahelaga taudia sibona be dubu ai idia gaukara. Sabati laganidia ai, tano do idia birulaia lasi bona Heberu tauna ta do idia noia lasi abitorehai davana karaia totona. Mose Ena Taravatu ai, Sabati ena taravatu be hegeregere taunimanima idia badinaia totona, to tomadiho gunalaia taudia ese taravatu momo idia atoa, unai dainai Iesu ena nega ai ia auka taunimanima idia badinaia totona.—Eso 20:8; Le 25:4; Lu 13:​14-16; Kl 2:16.

• Sadukea taudia.

  Idia be Iuda tomadiho ena orea badana, unai orea ai ladana bada taga taudia bona hahelaga taudia idia noho, bona dubu helaga lalonai gaukara ibounai idia biagua. Taunimanima ese idia gwauraia taravatudia, Farisea bona Farisea taudia ese idia badinaia taravatudia unai, idia dadaraia. Idia be toreisi lou eiava aneru idia noho herevana idia abia dae lasi. Idia ese Iesu idia dadaraia.—Mt 16:1; Ka 23:8. 

• Salamo.

  Dirava hanamoa ane ta. Salamo be tomadiho totona idia hebou taudia ese miusiki dalanai idia karaia bona idia anelaia, hegeregere Iehova Dirava tomadiho henia totona Ierusalema ai iena dubu dekenai unai bamona idia karaia.—Lu 20:42; Ka 13:33; Ia 5:13.

• Samaria.

  Lagani 200 lalonai, ia be Israela ena not kahana ena iduhu 10 ena siti badana, bona danu ia be not kahana ibounai ena tano ena ladana. Unai siti be Samaria ororona latanai idia haginia. Iesu ena nega ai, Samaria be distrik ta, ia be Galilea ena not kahana bona Iudea ena saut kahana edia huanai ia noho. Iesu ia loaloa negadiai, unai gabu dekenai ia haroro lasi, to nega ta ta ai unai gabu ia hanaia bona unuseni idia noho taudia ia hereva henia. Samaria taudia ese lauma helaga idia abia neganai, Petero ese laulau dalanai Basileia ena ki iharuana ia gaukaralaia. (1Ki 16:24; Ioa 4:7; Ka 8:14)—Ap. B10 itaia.

• Samaria taudia.

  Inai be Israela ena not kahana ena iduhu 10 taudia ia herevalaia, to lagani 740 B.C.E. ai, Asuria taudia ese Samaria idia halusia murinai, Asuria ese idia abia mai idau bese taudia danu idia gwauraia Samaria taudia. Iesu ena nega ai, unai ladana be bese eiava politikol ia herevalaia lasi, to idaunegai Sekema bona Samaria badinai ia noho tomadiho orea taudia ia herevalaia. Unai orea ese idia abia dae gaudia be Iuda taudia edia amo ia idau.—Ioa 8:48.

• Sanhedrin.

  Ierusalema ai ia noho Iuda taudia edia kota badana. Iesu ena nega ai, unai kota badana ena memba taudia ibounai be 71 bona idia be hahelaga tauna badana, hahelaga gaukara idia karaia taudia ma haida, hahelaga tauna badana ena ruma bese taudia, tatau badadia, iduhu lohia taudia bona ruma bese kwarana, bona taravatu hadibaia taudia.—Mr 15:1; Ka 5:34; 23:​1, 6.

• Satani.

  Heberu gado ai, inai hereva ena anina be “Gwau-Edeede Tauna.” Baibel ai idia gaukaralaia neganai, ia be Satani Diabolo, Dirava ena Inai Tauna Badana ia herevalaia.—Iob 1:6; Mt 4:10; Apo 12:9.

• Sela.

  Salamo bona Habakuku ai inai hereva ia noho, ia be miusiki eiava ane ena hereva ta. Reana ena anina be miusiki eiava ane ia doko, unai amo ta ia laloa dobu diba, eiava ane ena anina hahedinaraia totona. Greek Septuagint ena hereva be di·aʹpsal·ma, anina be “miusiki do ia doko sisina.”—Sal 3:4; Hab 3:3.

• Seminiti.

  Inai be miusiki herevana ta, ena anina be “namba 8” bona ia hahedinaraia tiuni maragina do idia gadaralaia eiava anelaia. Miusiki gauna ta ia herevalaia neganai, beis (bass) tiuni ia karaia diba gauna ia herevalaia. Ane neganai, gadona regena dobu ida ane idia abia hebou taudia ia herevalaia.—1Si 15:21; Sal 6:Sup; 12:Sup.

• Serapi.

  Guba ai Iehova ena terona idia hagegea aneru. Heberu hereva sera·phimʹ ena anina korikori be “idia hururu noho taudia.”—Isa 6:​2, 6.

• Sheol.

  Inai Heberu herevana be Grik herevana “Hades” ida ia hegeregere. Idia hahanaia “Mase Gurina” (leta ginigunana be toretore badana ai) neganai, ia be mase taudia guria gabuna ia herevalaia, to tau tamona ena guria gabuna ia herevalaia lasi.—Ge 37:35; Sal 16:10; Ka 2:​31, ftn.

• Sia.

  Kaukau gaudia edia mesament. Sia tamona be 7.33 L, unai mesament abia totona bat ena mesament idia gaukaralaia (2Ki 7:1)—Ap. B14 itaia.

• Sikel.

  Israela taudia ese gau ta ena metau sikelea bona moni totona idia gaukaralaia. Sikel ena metau be 11.4 g. Inai hereva “helaga gabuna ena sikel” be reana dubu helaga lalonai idia gaukaralaia, gau ta ena metau maorona idia abia eiava metau maorona idia badinaia totona. Reana king be mai ena sikel (taunimanima ese idia gaukaralaia sikel amo ia idau) eiava ena ruma ai metau hahetohoa gauna ta ia noho.—Eso 30:13.

• Sinagoga.

  Inai hereva ena anina be “idia haboua; hebou,” to siri momo ai, ia be ruma eiava gabu ta, unuseniai Iuda taudia be Toretore Helagadia idia duahia, hakaua herevadia idia abia, bona haroro eiava guriguri totona idia hebou. Iesu ena nega ai, Israela taoni badadia momo be mai edia sinagoga, bona siti badadia be mai edia sinagoga momo.—Lu 4:16; Ka 13:​14, 15.

• Siona; Siona Ororo.

  Inai be Iebusu taudia edia siti. Ia be mai ena magu goadana bona Ierusalema ena ororo ena sautist kahanai ia noho. Davida be tuari amo unai siti ia abia murinai, unuseniai ena ruma ia haginia, bona unai siti idia gwauraia “Davida Ena Siti.” (2Sa 5:7, 9) Davida ese Maua be unuseni ia abia lao neganai, Iehova ena matanai Siona be ororo helagana ai ia lao. Gabeai, inai ladana Siona be dubu helaga ia noho gabuna, Moraia Ororona, dekenai idia gwauraia, bona nega haida ia be Ierusalema siti ibounai ia herevalaia.  ­Keristani Grik Toretoredia ai, inai ladana be vaia laulau dalanai idia gaukaralaia.—Sal 2:6; 1Pe 2:6; Apo 14:1.

• Sipeleta.

  Ia be witi namona lasi (Triticum spelta), bona ena uhe be kopina amo idia kokia be auka.—Eso 9:32.

• Siriho.

  Inai hereva be paripari gabudiai idia tubu hadohado gaudia idia herevalaia. Nega momo idia herevalaia tubutubu gauna ena ladana be Arundo donax. (Iob 8:11; Isa 42:3; Mt 27:29; Apo 11:1)—HAHETOHOA SIRIHO itaia.

• Sitis.

  North Africa tanona, Libia, ena kone kahana ai, davara be kahana rua dekenai ia vareai lao, bona idaunega ai sisima ai idia gaukara taudia be unai gabu dekenai idia gari, badina hurehure ena aru dalana be hanaihanai idia senisi dainai miri be unuseni idia haboua. (Ka 27:17)—Ap. B13 itaia.

• Sivan.

  Israela taudia be Babulonia idia rakatania murinai, edia tomadiho ena kalenda ena hua namba 3, bona uma gaukara ena kalenda dekenai ia be hua namba 9. Ia be May huanai ia lao June huanai. (Est 8:9)—Ap. B15 itaia.

• Sivarai namona.

  Keristani Grik Toretoredia ai, unai be Dirava ena Basileia bona Iesu Keriso abidadama henia karana amo ita abia hahemauri ena sivarai namona.—Lu 4:​18, 43; Ka 5:42; Apo 14:6

• Sivi.

  Ia be Israela taudia edia tomadiho ena kalenda ena hua iharuana ena ladana, bona uma gaukara ena kalenda dekenai ia be hua namba 8. Ia be April huanai ia lao May huanai. Israela taudia be Babulonia idia rakatania murinai Talmud bona toretore haida lalonai idia gwauraia Iara. (1Ki 6: 37)—Ap. B15 itaia.

• Solomona ena du.

  Iesu ena nega ai ia be ariara badana ena ist kahanai ia noho raka gabuna ta mai ena guhi. Taunimanima momo idia laloa ia be Solomona ena dubu ena kahana maragina ta. “Keru negana” ai, Iesu be unuseniai ia raka, bona Keristani taudia ginigunadia be unuseniai idia hebou. (Ioa 10:​22, 23; Ka 5:12)—Ap. B11 itaia.

• Stoa edia aonega taudia.

  Grik ena aonega taudia edia orea, idia abia dae tau ta ia moale totona namona be do ia laloa namonamo bona iunives idia biagua taravatudia do ia badinaia. Idia gwau aonega tauna momokanina be hisihisi eiava moale karadia ia laloa bada lasi.—Ka 17:18.

• Supaskripsen.

  Salamo bukana ena karoa haida edia matamanai ia noho herevana. Unai ese salamo anena ia torea tauna ena ladana, ia ane ena sivarai, ane abia eiava miusiki gadaralaia dalana, bona unai salamo ena badina eiava gaukaralaia dalana ia hahedinaraia.​—Salamo 3, 4, 5, 6, 7, 30, 38, 60, 92, 102 edia supaskripsen itaia.

• Suria; Suria taudia.

  —ARAMA; ARAMA TAUDIA itaia.

T

• Taitai.

  Mase dainai eiava dika ma ta dainai ta ese ena lalohisihisi ia hahedinaraia karana. Baibel negadia ai, edia kastom be tau ta be nega daudau lalonai ena lalohisihisi do ia hahedinaraia. Taitai taudia be mai boiboi ida idia tai, lalohisihisi ena dabua idia atoa, lahi gida be edia kwarana dekenai idia atoa, edia dabua idia darea bona edia kemena idia botaia. Nega haida taitai diba namonamo taudia idia boiria danu.—Ge 23:2; Est 4:3; Apo 21:4.

• Talent.

  Heberu Toretoredia ai gau ta ena metau sikelea bona moni totona idia gaukaralaia. Ena metau be 34.2 kg. Grik Toretoredia ai talent be maragina, ena metau be 20.4 kg. (1Si 22:14; Mt 18:24)​—Ap. B14 itaia.

• Tamusu.

  (1) Inai be dirava ta ena ladana, Ierusalema ai aposteit Heberu hahinedia be ia totona idia taitai. Taunimanima idia gwau Tamusu be king ta bona ia mase murinai, ia idia tomadiho henia. Sumeria toretoredia ai, Tamusu idia gwauraia Dumusi bona ia be natudia momo havaraia dirava hahine Inana (Babulonia taudia edia dirava hahine Ishtar) ida ia loa hebou. (Ese 8:14) (2) Israela taudia be Babulonia idia rakatania murinai, edia tomadiho ena kalenda dekenai hua namba 4, bona gaukara kalenda ena hua namba 10. Inai hua be June huanai ia lao July huanai.—Ap. B15 itaia.

• Tarasisi ena bouti.

  Baibel negadiai, inai hereva be Tarasisi (hari idia gwauraia Spain) dekenai idia lao bouti ia herevalaia. Gabeai inai hereva idia gaukaralaia gabu daudau idia lao bouti badadia idia herevalaia totona. Solomon bona Iehosapata be unai bamona bouti badadia idia gaukaralaia bisinesi karaia totona.—1Ki 9:26; 10:22; 22:48.

• Taravatu.

  Bema inai hereva ena leta ginigunana be leta badana, ia be Mose Ena Taravatu eiava Baibel ena buka ginigunadia 5 ia herevalaia. To bema ia be leta maragina ai idia torea, unai be Mose Ena Taravatu lalonai idia  noho taravatu ta ta eiava taravatu ena hakaua herevana ia herevalaia.—Nu 15:16; De 4:8; Mt 7:12; Ga 3:24.

• Taravatu hadibaia tauna.

  Iesu ena nega ai, inai ladana be Taravatu idia diba momo taudia dekenai idia henia. Idia ese Iesu idia inai henia.—Mr 12:​38, 39; 14:1.

• Taravatu Maua.

  Inai maua be akasia auna amo idia karaia bona golo amo idia koua. Ia be Palai Dubu ena Helaga Herea Gabuna lalonai ia noho bona gabeai Solomona ese ia haginia dubu helagana ena Helaga Herea Gabuna lalonai idia atoa. Iena koua gauna be golo amo idia karaia bona ia latanai kerubi rua be ta ta idia vaira henia. Ia lalonai Taravatu 10 idia torea nadi palaka rua idia noho. (De 31:26; 1Ki 6:19; He 9:4)—Ap. B5 bona B8 itaia.

• Taravatu torea hanai tauna.

  Ia be ofesa ta. Ia ese idia vara gaudia edia rekodi ia torea bona ia naria namonamo, eiava Heberu Toretoredia ia torea hanai.—2Ki 19:2; 2Si 24:11; Esr 7:​6, ftn.

• Tataros.

  Keristani Grik Toretoredia ai, ia be dibura ruma bamona gabuna ta ia herevalaia, unuseniai Mose ena nega ai idia gwau-edeede aneru idia negedia. Petero Iharuana 2:4 ai inai hereva tar·ta·roʹo (anina be “Tataros dekenai idia negea”) idia gaukaralaia, to ia gwau lasi unai “kara dika aneru” be tomadiho koikoi edia gori bamona Tataros gabuna dekenai idia negea (unai be, tano henunai ia noho dibura ruma ta bona dibura masemase gabuna, dirava maragidia totona). To, ena anina be Dirava ese unai aneru dikadia be guba amo ia lulua bona edia hahenamo amo ia kokia bona dibura masemase gabuna ai ia atodia, unai amo Dirava ena ura ena diari idia itaia lasi. Danu, Baibel ese ia hahedinaraia dibura ai idia noho ena anina be vaira nega ai unai aneru dikadia bona edia lohia tauna, Satani Diabolo be Dirava ese do ia hadikadia ore momokani. Unai dainai, Tataros ese ia hahedinaraia unai gwau-edeede aneru be Dirava ese henuna momokani dekenai ia atodia diho momokani. To ia be Apokalupo 20:​1-3 ese ia herevalaia “guri dobu masemase” hegeregerena lasi.

• Taunimanima ena natuna.

  Evanelia sivaraidia lalonai inai hereva be nega 80 bamona ia noho. Unai be Iesu Keriso ia herevalaia bona ia hahedinaraia ia be taunimanima bamona ia vara neganai, ia be taunimanima korikorina bona lauma tauna ta lasi. Unai ladana ese ia hahedinaraia danu Iesu ese Daniela 7:​13, 14 ena hereva do ia hagugurua. Heberu Toretoredia ai, unai hereva be Esekiela bona Daniela dekenai idia gwauraia danu. Unai ese ia hahedinaraia inai gwaukau taudia ruaosi be tanobada taudia sibona bona idia ia hereva henia tauna be Dirava.—Ese 3:17; Da 8:17; Mt 19:28; 20:28.

• Tebete.

  Israela taudia be Babulonia idia rakatania murinai, edia tomadiho ena kalenda ena hua namba 10 bona uma gaukara ena kalenda ena hua namba 4. Ia be December huanai ia lao January huanai. Nega momo idia gwauraia “hua namba 10.” (Est 2:16)—Ap. B15 itaia.

• Terafimi.

  Famili edia dirava eiava kaivakuku, nega haida toa karaia totona idia gaukaralaia. (Ese 21:21) Unai kaivakuku haida edia bada bona toana be taunimanima bamona, haida be maragi momokani. (Ge 31:34; 1Sa 19:​13, 16) Mesopotamia dekenai akioleji ai idia davaria gaudia ese idia hahedinaraia, unai terafimi edia laulau amo idia diba daika ese ruma bese ena ahuna do ia abia. (Rahela ese ena tamana ena terafimi ia abia ena badina ia hahedinaraia.) Israela taudia dekenai unai be ia idau, hahelaga taudia bona king taudia edia nega ai tomadiho totona terafimi idia gaukaralaia, bona King Iosaia ese ia hadikaia gaudia edia huanai unai kaivakuku idia noho danu.—Hah 17:5; 2Ki 23:24; Hos 3:4.

• Tishri.

  —ETANIMI bona Ap. B15 itaia.

• Tomadiho oreana.

  Hahediba herevana ta eiava gunalaia tauna ta bona sibona edia lalohadai idia badinaia oreana. Iuda ena orea badadia rua ia herevalaia, Farisea taudia bona Sadukea taudia. Keristani lasi taudia danu idia gwauraia Keristani “orea” eiava “Nasareta taudia edia tomadiho oreana,” badina idia laloa idia be Iuda tomadiho amo idia parara. Unai tomadiho oreadia be Keristani kongrigeisen lalonai idia vara matamaia; Apokalupo bukana ese “Nikolaita taudia edia tomadiho oreana” ia gwauraia.—Ka 5:17; 15:5; 24:5; 28:22; Apo 2:6; 2Pe 2:1.

• Toreisi lou.

  Mase amo mauri lou karana. Greek herevana a·naʹsta·sis ena anina be “toreisi; gini toreisi.” Baibel lalonai toreisi lou sivaraidia toi idia noho, Iehova Dirava ese Iesu ia hatorea isi lou ena sivarai danu. Ena be Elia, Elisaia, Iesu, Petero, bona Paulo ese ma haida idia hatorea isi lou, to unai hoa karadia ibounai be Dirava ena siahu amo idia karaia. Dirava ia ura tanobada ai “kara maoromaoro taudia bona kara maoromaoro lasi taudia”  do idia toreisi lou, unai be mai anina bada. (Ka 24:15) Danu Baibel ese guba toreisi lou ia herevalaia, idia gwauraia toreisi lou “ginigunana,” unai be Iesu ena horoa tadikaka ia herevalaia.—Fp 3:11; Apo 20:​5, 6; Ioa 5:​28, 29; 11:25.

• Toretore Helagadia.

  Unai be Dirava Ena Hereva helagadia. Inai hereva be Keristani Grik Toretoredia sibona lalonai ia noho.—Lu 24:27; 2Ti 3:16.

• Tuari dabua.

  Tuari taudia ese idia karaia, sibodia gimaia totona, hegeregere kwara gauna, kouti, beleta, aena gimaia auri, bona kesi.—1Sa 31:9; Ef 6:​13-17.

• Tuari oreadia edia Iehova.

  Inai hereva “tuari oreadia edia Iehova” be siahu bada Diravana ia herevalaia, ia be guba bona tanobada edia Lohia Badana, bona iena oda hegeregerena aneru oreadia be gaukara idia karaia.

U

• Uma Ena Anina Haboua Aria; Wiki Edia Aria.

  —PENTEKOSTE itaia.

• Urima bona Tumima.

  Hahelaga tauna badana ese ia gaukaralaia gaudia, nadi gadara totona idia gaukaralaia gaudia hegeregerena. Bema taunimanima idia daradara bona idia ura Iehova amo haere idia abia, hahelaga tauna badana ese unai ia gaukaralaia. Hahelaga tauna badana be palai dubu lalonai ia vareai neganai, Urima bona Tumima be kemena gauna dekenai idia atoa. Babulonia taudia ese Ierusalema idia hadikaia murinai, unai gaudia idia gaukaralaia lou lasi.—Eso 28:30; Ne 7:65.

• Uro karaia tauna.

  Raro amo uro, disi, bona unai bamona gaudia ma haida ia karaia. Heberu gado ai inai hereva uro karaia tauna ena anina be “karaia tauna.” Uro karaia tauna ese raro ia biagua karana ena haheitalai be nega momo Iehova ese taunimanima ta ta bona bese ia biagua karana dekenai idia gaukaralaia.—Isa 64:8; Ro 9:21.

V

• Vara guna.

  Ia be tamana ena vara guna merona (to sinana ena vara guna natuna lasi). Baibel negadiai, ruma bese lalonai vara guna natuna be maduna badana ia abia bona tamana ia mase neganai ia be ruma bese ena kwarana ai ia lao. Unai hereva be animal ena natuna mero ginigunana totona idia gaukaralaia danu, nega haida idia gwauraia “vara guna natuna.”—Eso 11:5; 13:12; Ge 25:33; Kl 1:15.

• Vilipopo.

  Ia be boromakau kopina, animal ena varovaro, ena huina, eiava ranu badinai idia tubu ava latadia amo idia karaia. Ena huana kahana be ia lababa bona unuseniai nadi idia atoa. Vilipopo ena dokona kahana ta be imana dekenai idia kwatua, bona ena dokona kahana ma ta be idia dogoatao bona vilipopo idia davea murinai idia ruhaia. Idaunegai besedia edia tuari oreana lalonai vilipopo gaukaralaia taudia idia abia hidi danu.—Hah 20:16; 1Sa 17:50.

W

• Wain boubouna.

  Ia be boubou patana ai idia bubua wain bona boubou gaudia ma haida ida idia bouboulaia. Paulo ese ia sibona be Keristani tadikaka durua totona ia henia karana ia herevalaia neganai, laulau dalanai unai hereva ia gaukaralaia.—Nu 15:​5, 7; Fp 2:17.

• Wain puse.

  Ia be animal kopina, hegeregere nanigosi eiava mamoe kopina amo idia karaia, wain idia udaia totona. Wain be wain puse matamata lalonai idia udaia, badina wain ia senisi neganai, kabon daioksaid ia havaraia bena wain puse ia gudu. Wain puse matamata ia bada, to puse gunana be ia kaukau dainai ia pou.—Ios 9:4; Mt 9:17.

• Wiki dogoatao gaudia.

  Inai tulu be golo amo idia karaia. Palai Dubu bona dubu helaga dekenai idia gaukaralaia, lamepa ena lahi habodoa totona.—Eso 37:23.

• Witi moia gabuna.

  Unai gabu ai witi ena momoru idia kokia. Witi ena anina kokia totona au amo idia botaia, bona bema witi be momo herea animal ese ia veria witi moia gauna idia gaukaralaia. Witi ibounai be witi moia gabuna ai idia atoa bona witi moia gauna be edia latanai idia veria. Unai witi moia gabuna be ororo ataiai bona lai ia toa momo gabuna.​—Le 26:5; Isa 41:15; Mt 3:12.

• Witi moia nadi.

  Nadi palakana ta be nadi palakana ma ta latanai idia atoa witi moia totona. Au ta be huanai idia haginia ataiai ia noho nadi ia giroagiroa totona. Baibel negadiai, ruma momo ai hahine ese witi moia nadi be imana amo idia gaukaralaia. Dina ta ta ai, ruma bese momo be witi moia nadi amo edia paraoa idia karaia. Unai dainai Mose Ena Taravatu ia gwau tau ta ese unai nadi eiava ena ataiai nadina be abitorehai hamomokania gauna bamona do ia abia lasi. Unai bamona witi moia nadi badadia haida be animal ese idia girodia.—De 24:6; Mr 9:42.

• Witi momoru.

  Unai be witi edia kopina. Witi idia moia eiava savolo amo idia negea neganai unai kopina ia kokia. Witi momoru be laulau dalanai idia gaukaralaia anina lasi eiava ta ese ia ura henia lasi gauna idia herevalaia totona.—Sal 1:4; Mt 3:12.