Deuteronomi 21:1-23
21 “Bema umui ese idia alaia tauna ta umui davaria, Iehova emui Dirava ese umui noholaia totona umui dekenai do ia henia tano ena rei gabuna ai, bona umui diba lasi daika ese ia alaia,
2 namona be emui tau badadia bona hahemaoro taudia+ idia lao bona mase tauanina ia noho gabuna ela bona ena kahirakahira siti ena pada idia hahetohoa.
3 Bena kahirakahira ia noho siti ena tau badadia ese edia boromakau oreana amo boromakau natuna ta idia abia, guna idia gaukaralaia lasi eiava huaia auna ia veria lasi gauna,
4 bona unai siti ena tau badadia ese unai boromakau natuna be koura mai ena ranu gabuna dekenai idia hakaua lao, unai tano be idia do geia eiava uhe idia do hadoa lasi, bona unai koura dekenai boromakau natuna ena aiona idia makohia be namo.+
5 “Bona hahelaga taudia, Levi taudia unai, be do idia raka lao, badina Iehova emui Dirava ese idia ia abia hidi, ia idia hesiai henia+ bona Iehova ena ladanai hanamoa idia gwauraia totona.+ Bona idia ese dagedage karana dainai idia vara hepapahuahu hamaoromaoroa daladia do idia gwauraia.+
6 Bena mase tauanina kahirakahira ia noho siti ena tau badadia ibounai ese edia imana be boromakau natuna ataiai idia huria,+ koura ai ena aiona idia makohia boromakau unai,
7 bona namona be idia gwau, ‘Emai imana ese inai rara ia bubua lasi, bona emai matana amo ai itaia lasi danu.
8 Iehova e, namo lasi emu taunimanima Israela taudia dekenai kerere oi atoa,+ bona namo lasi kerere lasi taudia edia rara totona unai kerere be emu taunimanima Israela taudia latanai ia noho.’+ Vadaeni idia be rara dekenai do idia kerere lasi.
9 Unai bamona umui karaia neganai, umui ese emui huana amo kerere lasi taudia edia rara totona unai kerere umui kokia, badina Iehova ena vairanai unai be kara maorona.
10 “Bema emui inai taudia tuari henia totona umui lao bona Iehova emui Dirava ese umui totona idia ia halusia bona idia umui abia mauri,+
11 bona umui abia mauri taudia huanai hahine hairaina ta oi itaia bona oi ura henia bona oi ura oi adavaia,
12 emu ruma dekenai ia oi abia lao diba. Bena ia ese ena huina do ia sevia, iena ima koukou do ia hagoevaia,
13 bona idia abia mauri negana ai ia atoa dabua do ia haidaua, bona ia be emu ruma ai do ia noho. Hua tamona lalonai ena tamana bona sinana totona do ia taitai,+ bona unai murinai ia ida oi mahuta hebou diba. Oi be iena adavana ai do oi lao bona ia be emu hahine ai do ia lao.
14 To bema oi be ia dekenai oi moale lasi, ia ura lao gabuna dekenai ia lao be namo, ia oi koua lasi.+ To namo lasi moni totona ia oi hoihoilaia eiava ia oi kara auka henia, badina ia oi hahemaraia vadaeni.
15 “Bema tau ta ena adavana be rua bona ia ese ta ia lalokau henia bada bona ma ta be lasi,* bona idia rua be ia amo natudia memero idia abia bona vara guna natuna mero be ia lalokau henia lasi hahinena ena,+
16 ena natudia dekenai ahuna ia henia dinana ai, namo lasi ia lalokau henia lasi hahine ena natuna, vara guna mero unai, ia dadaraia bona ia lalokau henia hahine ena natuna mero dekenai vara guna ena ahuna ia henia.
17 Namona be ia abia dae, ia lalokau henia lasi hahine ena natuna mero be vara guna, bona ena kohu ibounai amo ia dekenai do ia henia gaudia be nega rua amo do ia habadaia, badina unai mero be ena vara guna natuna.* Vara guna natuna ena ahuna be iena.+
18 “Bema tau ta ena natuna mero ia kwara auka bona ia gwau-edeede bona ena tamana eiava sinana ia kamonai henia lasi,+ bona ia idia hamaoromaoroa toho, to ia ura lasi idia ia kamonai henia,+
19 namona be ena tamana bona sinana ese ia idia abia bona ena siti ena geiti ai idia noho tau badadia dekenai idia hakaua lao,
20 bona siti ena tau badadia dekenai do idia gwau, ‘Emai natuna be kwara auka bona gwau-edeede merona, bona ia ura lasi ai ia kamonai henia. Ia be aniani bona kekero momo merona.’+
21 Bena siti ena tatau ibounai ese nadi amo ia idia hodoa mase be namo. Umui ese dika gauna be emui huana amo umui kokia be namo, bona Israela taudia ibounai be unai do idia kamonai bona do idia gari.+
22 “Bema tau ta be kara dika ia karaia bona do idia hamasea herevana ia abia, bena ia umui hamasea+ bona au ta dekenai umui tauadae,+
23 ena mase tauanina be hanuaboi ibounai au dekenai do ia noho lasi.+ To, unai dina ai ia umui guria be namo, badina umui tauadae tauna be Dirava ese ia gwauraia dika vadaeni,+ namo lasi Iehova emui Dirava ese emui ahuna bamona umui dekenai ia henia tano umui hamiroa.+
Futnout
^ Heb., “adavana be rua, ta ia lalokau henia bona ta ia inai henia.”
^ Eiava natuna havaraia siahuna ena matamana.
