Sivarai Iharuana 4:1-22
4 Bena ia ese kopa boubou patana ia karaia,+ ena lata be 20 kiubit,* ena lababa be 20 kiubit, bona ena ataiai be 10 kiubit.
2 Ia ese kopa disi badana ia karaia, idia gwauraia Davara.+ Ia be kuboru, iena uduna kahana ta amo ia lao kahana ma ta be 10 kiubit bona ena ataiai be 5 kiubit, bona unai disi be varo latana 30 kiubit amo idia hagegea diba.+
3 Bona kopa disi badana ena uduna kahana henunai, kuboru huahua maragidia be herahera gaudia bamona ia karadia hegege,+ kiubit ta ta be herahera gaudia 10 ia karaia. Herahera gaudia ese kopa disi badana ena uduna idia hagegea bona laini rua dekenai ia karaia.
4 Unai kopa disi be kopa boromakau 12 latanai ia helai.+ Boromakau toi be not kahana idia vaira henia, ma toi be west kahana idia vaira henia, bona ma toi be saut kahana idia vaira henia, bona ma toi be ist kahana idia vaira henia, bona kopa disi be edia latanai ia noho, bona idia ibounai edia murina kahana be huanai.
5 Bona disi ena lababa be 7 sentimita bamona, bona ena uduna kahana be kapusi ena uduna bamona idia karaia, lili flaoaflaoa ia kehoa bamona. Unai disi be ranu 3,000 bat* ia dogoatao.
6 Danu, ia ese disi 10 ia karaia bona 5 be idiba kahanai ia atoa bona ma 5 be lauri kahanai ia atoa.+ Idia ese gabua boubou totona idia gaukaralaia kohudia be unai disi lalodiai idia huria.+ To ranu disi badana be hahelaga taudia edia imana bona aena huria totona.+
7 Bena ia ese golo amo lamepa atoa gaudia 10 ia karaia,+ idia torea palani hegeregerena,+ bona dubu helaga lalonai ia atodia, 5 be idiba kahanai bona ma 5 be lauri kahanai.+
8 Danu ia ese teibolo 10 ia karaia bona dubu helaga lalonai ia atodia, 5 be idiba kahanai bona 5 be lauri kahanai.+ Bona golo disi 100 ia karaia.
9 Bena ia ese hahelaga taudia edia ariara+ bona ariara badana ia karaia,+ bona unai ariara edia iduara ia karaia danu, unai iduara be kopa amo ia koudia.
10 Bona kopa disi badana be dubu helaga ena idiba kahanai ia atoa, unai be sautist kahanai.+
11 Hirama ese lahi ena kahu udaia gaudia, savolo, bona uro ia karadia danu.+
Vadaeni Hirama ese King Solomona totona Dirava momokanina ena ruma ai ia karaia gaukara ibounai ia haorea. Ia karaia gaudia be inai:+
12 Du rua+ bona disi bamona du kwaradia, du ataiai idia noho gaudia unai, bona du kwaradia koua totona reke rua,+
13 bona unai reke rua totona pomogranet* 400 ia karaia,+ unai reke ta ta totona pomogranet be laini rua dekenai ia atodia, unai amo disi bamona du kwaradia ia hahairaia,+
14 treila 10 bona treila latanai idia noho disi 10,+
15 kopa disi badana bona ena henunai idia gini kopa boromakau 12,+
16 lahi ena kahu udaia gaudia, savolo, foka,+ bona edia kohu ibounai, Hurama-avi+ ese King Solomona totona Iehova ena ruma ai unai gaudia ibounai be ia diaridiari kopa amo ia karaia.
17 King Solomona ese oda ia henia idia havevea kopa gaudia be raro gaudia lalonai do idia bubua, unai gaudia be Ioridane ena distrik ai idia karadia, Sukoto bona Seredaha edia huanai.+
18 Solomona ese unai gaudia be momo herea ia karaia. Unai dainai kopa ena metau be ta ia diba lasi.+
19 Solomona ese Dirava momokanina ena ruma totona, ia karaia gaudia ibounai be inai:+ Golo boubou patana,+ paraoa helagana* do idia atoa teibolo,+
20 golo goevana amo idia karaia lamepa atoa gaudia bona mai edia lamepa,+ unai be lalona momokani daiutu vairanai idia ara, idia gwauraia dalana hegeregerena.
21 Bona flaoaflaoa, lamepa, bona wiki dogoatao gaudia, idia ibounai be golo goevana amo idia karaia.
22 Lamepa ena wiki utua gaudia, uro, kapusi, lahi gida udaia urodia, idia ibounai be golo goevana amo idia karaia. Bona lalona momokani daiutuna, Helaga Herea Gabuna unai,+ ena iduara bona dubu helaga ena iduara be golo amo idia karaia.+
Futnout
^ Inai huahua ena kala be kakakaka bona ena toana be apolo bamona.
