Lub hwj huam dawb huv yog Vajtswv lub hwj chim uas nws siv los tsim ub tsim no. (Mikhas 3:8; Lukas 1:35) Vajtswv siv nws lub hwj huam dawb huv kom muaj tiav raws li nws lub siab nyiam.​—Phau Ntawv Nkauj 104:30; 139:7.

 Nyob rau hauv phau Vajlugkub lo lus “ntsuj plig” yog txhais los ntawd lo lus Henplais ruʹach thiab lo lus Kili pneuʹma. Ntau zaus ob lo lus ntawd yeej hais txog Vajtswv lub hwj chim los sis nws lub hwj huam dawb huv. (Chivkeeb 1:2) Phau Vajlugkub siv ob lo lus ntawd raws li nram no:

•   Rau siav rau pa.​—Tes Haujlwm 17:25.

•   Cua.​—Khiav Dim 14:21.

•   Txoj sia thiab lub zog uas ua rau txhua yam muaj sia ciaj taus.​—Chivkeeb 6:17.

•   Piv rau neeg lub siab los sis tus cwj pwm.​—Khiav Dim 35:21.

•   Cov Plig, xws li yog Vajtswv thiab cov tub txib saum ntuj.​—Yauhas 4:24.

 Cov ntsiab no puav leej qhia txog tej yam uas qhov muag tsis pom tiam sis yeej muaj tiag. Vajtswv lub hwj huam zoo ib yam li tej “huab cua uas qhov muag tsis pom tiam sis muaj zog heev.”

 Phau Vajlugkub qhia tias Vajtswv lub hwj huam dawb huv kuj zoo li nws “txhais tes” ua tsim txhua yam. (Efexus 2:10; Kevcai 26:8; Phau Ntawv Nkauj 102:25) Zoo ib yam li ib tug kws txua ub txua no uas siv nws txhais tes los txua ntau yam. Vajtswv siv nws lub hwj huam los tsim kom muaj tej yam xws li:

•   Tej uas nyob saum nruab ntug thiab lub ntiaj teb.​—Phau Ntawv Nkauj 33:6; Yaxayas 66:1, 2.

•   Phau Vajlugkub.​—2 Petus 1:20, 21.

•   Muab hwj chim rau nws cov tub txib txheej thaum ub ua tau tej txuj ci tseem ceeb thiab pab lawv kub siab lug tshaj tawm Vajtswv Txoj Lus.​—Lukas 4:18; Tes Haujlwm 1:8; 1 Kauleethaus 12:4-11.

•   Tej yeeb yam qhuas lug uas cov neeg hwm Vajtswv muaj.​—Kalatias 5:22, 23.

Lub hwj huam dawb huv tsis yog ib tug neeg

 Phau Vajlugkub pab peb pom tias lub hwj huam dawb huv tsis yog ib tug neeg thaum muab lub hwj huam dawb huv piv yam li yog Vajtswv “txhais tes”, cov ntiv tes, los sis txoj pa uas tshuab siav. (Khiav Dim 15:8, 10) Ib tug kws txua ub txua no, nws txhais tes yeej ua tsis tau ib yam dab tsi yog tias tsis muaj nws lub tswv yim thiab lub cev ntaj ntsug. Ib yam li ntawd Vajtswv lub hwj huam dawb huv tsuas ua raws li Vajtswv xav kom ua xwb. (Lukas 11:13) Phau Vajlugkub kuj muab Vajtswv lub hwj chim uas pab neeg muaj kev ntseeg thiab tswv yim piv rau cov dej uas Vajtswv pub rau neeg haus. Tej uas phau Vajlugkub muab lub hwj huam dawb huv piv rau pab peb pom tias lub hwj huam dawb huv tsis yog ib tug neeg.​—Yaxayas 44:3; Tes Haujlwm 6:5; 2 Kauleethaus 6:6.

 Phau Vajlugkub qhia tias Vajtswv muaj lub npe hu uas Yehauvas thiab nws tus Tub hu uas Yexus Khetos, tiam sis tsis pom qhia nyob rau ib qho twg tias lub hwj huam dawb huv muaj ib lub npe. (Saib cov lus taw ntawv ntawm Khiav Dim 3:14; Lukas 1:31) Thaum Vajtswv ua txuj ci kom Xatefanaus uas yog ib tug uas npuab siab heev rau Vajtswv ua yog toog pom ntuj ceeb tsheej, nws tsuas pom ob tug neeg xwb, tsis yog peb tug. Phau Vajlugkub hais tias: “Tiam sis lub hwj huam dawb huv nrog nraim Xatefanaus. Thaum nws ntsa muag ntsia saum ntuj, nws pom Vajtswv lub hwj chim ci ntsa iab thiab pom Yexus sawv ntawm Vajtswv sab xis.” (Tes Haujlwm 7:55) Ces lub hwj huam dawb huv yeej yog Vajtswv lub hwj chim uas nws siv los ua kom Xatefanaus pom ntuj ceeb tsheej.

 Coob tus xav yuam kev tias: “Vaj ntsuj plig” los sis lub hwj huam dawb huv, yog ib tug neeg thiab nws yog ib feem ntawd tus Vaj Peb Leeg uas hais hauv Mathais 28:19, 20.

 Qhov tseeb tiag: Mathais 28:19, 20 tib txhij hais txog Leej Txiv, Leej Tub, thiab lub hwj huam dawb huv. Vim li no ib txhia thiaj ntseeg tias qhov no yeej yog hais txog tus Vaj Peb Leeg. Tiam sis thaum peb nyeem, ob nqe no puas hais tias lawv peb leeg yog tib tug Vajtswv uas puav leej nyob mus ib txhis, muaj hwj chim, sib txig sib luag, thiab muaj tswv yim tib yam nkaus? Peb yeej tsis pom hais li ntawd. Thaum hais txog Leej Txiv, Leej Tub, thiab lub hwj huam dawb huv, txawm yog nyob rau lwm nqe Vajlugkub los tsuas hais li nqe no hais xwb.

 Coob tus xav yuam kev tias: Phau Vajlugkub muab lub hwj huam dawb huv hu yam li ib tug neeg ces qhov no qhia tias nws yeej yog ib tug neeg lawm.

 Qhov tseeb tiag: Tej nqe Vajlugkub muab lub hwj huam dawb huv hu yam li ib tug neeg rau qhov Yexus hais tias nws yuav tso “tus pab” (paraclete) los rau nej. Tus pab ntawd yuav qhia qhov tseeb txog txhua yam uas Yexus tau qhia, pab kom sawv daws nkag siab thiab coj raws li tej uas lawv tau hnov, thiab kom ua rau Yexus thiab Vajtswv nkawd tau ntsej muag. (Yauhas 16:7-15) Tej uas hais no qhia tsis tau tias lub hwj huam dawb huv yog ib tug neeg tiag. Phau Vajlugkub kuj qhia tias txoj kev ploj kev tuag thiab kev txhaum muaj hwj chim thiab ua tau tej yam uas neeg ua thiab. (Loos 5:17, 21) Piv txwv li no, Vajtswv Txoj Lus hais tias kev txhaum txawj ntxias, txawj tua, thiab txawj ua rau ib tug muaj lub siab ntshaw lwm tus li.​—Loos 7:8, 11.

 Coob tus xav yuam kev tias: Thaum tuav lub hwj huam dawb huv muab ib tug twg ua kev cai raus dej qhia tias lub hwj huam dawb huv yeej yog ib tug neeg.

 Qhov tseeb tiag: Thaum tuav “lub hwj huam dawb huv lub npe” muab ib tug neeg ua kev cai raus dej ces tus neeg ntawd lees paub tias lub hwj huam dawb huv muaj hwj chim heev thiab Vajtswv siv lub hwj huam no los ua nws tes hauj lwm kom tiav raws li Vajtswv lub siab nyiam.​—Mathais 28:19.

 Coob tus xav yuam kev tias: Yexus cov thwj tim thiab cov ntseeg txheej thaum ub yeej ntseeg tias lub hwj huam dawb huv yog ib tug neeg.

 Qhov tseeb tiag: Phau Vajlugkub thiab tej keeb kwm kuj tsis qhia li ntawd. Phau ntawv Encyclopædia Britannica hais tias: “Pawg thawj coj uas hu ua Council of Constantinople nyob rau xyoo 381 tau txhais tias lub hwj huam dawb huv yog ib tug vajtswv.” Thaum no twb yog tshaj li 250 xyoo tom qab Yexus cov tub txib twb tag sim neej lawm.