1, 2. Peb tibneeg txawv li cas ntawm tej tsiaj txhu?

TIBNEEG lub hlwb txawv tej tsiaj txhu lub. Tibneeg muaj peevxwm hais tau lus. Twb yog peb txawj hais lus, peb thiaj txawj sau ntawv, nyeem ntawv, thiab nkag siab tej uas peb tau hnov. Peb kuj txawj thov Vajtswv thiab hu nkauj qhuas nws. Cov neeg tshawb txujci kawm npaum li cas los lawv tsuas to taub qho ntsis txog tibneeg lub hlwb xwb. Lawv tsis paub tias xyov ua cas tibneeg lub hlwb ho txawj dhia li ntawd.

² Yehauvas yog tus tsim kom peb txawj hais lus. (Ntawv Nkauj 139:14; Qhia Tshwm 4:11) Peb tibneeg txawv tej tsiaj txhu lawm ntau heev, rau qhov phau Vajlugkub qhia tias Vajtswv “tsim neeg raws li nws tus yam ntxwv.” Nws tsim peb muaj kev ywj pheej los xaiv seb peb yuav ua yam twg. Yog peb xav siv peb lub suab thiab peb cov lus los qhuas Yehauvas thiab teev tiam nws los yeej tau.​—Chiv Keeb 1:27.

3. Yehauvas tau npaj dabtsi kom peb tau nws lub tswvyim?

³ Yehauvas npaj phau Vajlugkub los cob qhia kom peb txawj qhuas thiab teev tiam nws. Tau muab phau Vajlugkub txhais ua 2,800 tawm yam lus. Muaj tej yam lus twb txhais txhij lawm, tiamsis ib txhia txhais txog nrab xwb. Thaum peb ua tib zoo xav txog tej uas  phau Vajlugkub qhia, peb yuav khaws tau Vajtswv lub tswvyim coj los siv. (Ntawv Nkauj 40:5; 92:5; 139:17) Yehauvas tej lus qhuab qhia tsav tswvyim rau peb, thiab yuav coj peb mus tau txojsia ib txhis tsis kawg.​—Nyeem 2 Timaute 3:14-17.

4. (1) Thaum peb kawm txog Yehauvas thiab Yexus, peb yuav tsum ua li cas? (2) Peb yuav kawm cov lus nug twg?

⁴ Thaum peb kawm txog Yehauvas thiab Yexus, peb yuav tsum ua tib zoo xav txog tej uas peb kawm, thiaj pab tau peb tiag. (Ntawv Nkauj 77:12; Paj Lug 24:1, 2; Yauhas 17:3) Hauv zaj no peb yuav teb cov lus nug no: Thaum peb nyeem phau Vajlugkub, peb yuav ua li cas peb thiaj muaj lub siab tus yees xav txog tej uas peb tabtom nyeem ntawd? Peb yuav tsum xav txog dabtsi xwb? Yuav ua li cas nrhiav tau sijhawm los xav txog Vajtswv Txojlus tsis tu ncua?

5, 6. Yuav ua li cas koj thiaj cim tau tej uas koj nyeem?

⁵ Thaum peb ua pa, taug kev, lossis caij tsheb kauj vab, yoojyim heev puas yog? Tsis tas siv hlwb rau qhov peb twb ua kam tej ntawd lawm. Yog tsis ceev faj, thaum peb nyeem ntawv los peb yuav ua ib yam li ntawd thiab. Tej zaum peb lam nyeem ib zaj thoob plaws tiamsis tsis nco qab xav txog lub ntsiab li. Lossis yus lub siab tsis nyob qhov ntawd ces yus xav yus lawm ib yam. Yuav ua li cas peb thiaj cim tau tej uas peb nyeem? Tseem ceeb rau peb ua tib zoo xav seb lub ntsiab txhais li cas tiag. Thaum peb nyeem ntawv, nyeem ib ob nqes tas ces nres thiab xav txog tej uas peb tau nyeem. Ua tib zoo xav seb peb puas to taub tso.

⁶ Cov neeg tshawb txujci nrhiav pom tias yog peb nyeem tawm suab, peb cim tau zoo dua. Vajtswv yog tus tsim neeg lub hlwb, nws thiaj paub tias zoo rau peb nyeem tuj taws li ntawd. (Nyeem Nkauj Paj Nruag [Ntawv Nkauj] 1:2, NN. *) Yog li ntawd, yog peb nyeem Vajlugkub kom nrov ces peb yuav cim tau zoo dua thiab peb yuav xav ntsoov rau tej uas peb tau nyeem lawd.

7. Thaum twg thiaj zoo rau peb xav txog phau Vajlugkub? (Saib daim duab ntawm sab 25.)

⁷ Thaum peb kawm peb yuav tsum tswj peb lub siab tiag, peb thiaj xav ntsoov rau tej uas peb tabtom kawm ntawd. Zoo kawm rau lub sijhawm uas yus nquag plias, thiab nyob ntsiag to kom txhob muaj lwm yam los tab kaum yus. Vajntxwv Davi hais tias thaum nws mus pw saum txaj nws mam li xav ntsoov txog Yehauvas. (Ntawv Nkauj 63:6) Yexus yog ib tug neeg zoo kawg nkaus, tiamsis nws tseem mus nrhiav tej chaw ntsiag to, nws thiaj tau zoo xav txog Yehauvas thiab thov Vajtswv.​—Luka 6:12.

8. (1) Peb yuav tsum xav txog dabtsi xwb? (2) Yehauvas xav li cas xwb thaum peb qhuas txog nws?

⁸ Peb yuav tsum xav txog txhua yam uas Yehauvas tau tsim puag ncig peb. Thaum koj mus pom tej roob zeb roob tsuas, koj puas nres ib pliag ua tib zoo xav seb tej ntawd qhia li cas txog Vajtswv? Yog koj ua li ntawd, koj yuav xav qhuas Yehauvas thiab ua nws tsaug. Yog muaj neeg nrog koj mus pom tej ntawd, yeej ua rau nej sawvdaws xav qhuas Yehauvas ua ke thiab. (Ntawv Nkauj 104:24; Tubtxib Tes Haujlwm 14:17) Thaum Yehauvas pom peb ua li ntawd ua rau nws zoo siab kawg li. Phau Vajlugkub thiaj cog lus tias: “[Yehauvas] mloog lawv, nws hnov lawm. Tej lus ntawd twb sau cia tas rau hauv ib phau ntawv nyob ntawm [Yehauvas] xub ntiag, kom [Yehauvas] tau pab cov vam khom txog nws thiab nco txog nws lub npe.”​—Mas Las Kis (Malakhi) 3:16, NN.

9. (1) Povlauj qhia kom Timaute xav txog dabtsi? (2) Thaum peb npaj mus qhia Vajlugkub, peb yuav tsum xav txog dabtsi?

 ⁹ Tus tubtxib Povlauj qhia kom Timaute ua tib zoo xav txog tej uas nws yuav hais, nws tus cwj pwm, thiab tej uas nws qhia rau lwm tus. (Nyeem Tis Mos Tes Tsab Ib [1 Timaute] 4:12-16, NN. *) Peb yuav tsum xyaum li ntawd thiab. Muab xav li no, ua ntej peb yuav mus qhia ib tug twg ua tib zoo xav txog nws. Xav seb peb yuav nug thiab piav lus piv txwv li cas thiaj rub tau nws lub siab. Yog peb ua li no, yuav txhawb tau peb txojkev ntseeg thiab peb yuav hajyam txawj qhia Vajlugkub dua. Yog peb npaj peb lub siab ua ntej peb mus tshaj tawm txoj xov zoo, yuav pab tau peb li cas ntxiv? (Nyeem Exala 7:10.) Yog peb nyeem ib tshooj hauv Tubtxib Tes Haujlwm, peb yuav kub siab mus tshaj tawm dua. Ua tib zoo xav txog cov nqe Vajlugkub uas peb yuav nyeem rau tibneeg hnub ntawd. Thiab xav txog tej ntaub ntawv uas peb yuav tseb tawm. (2 Timaute 1:6) Ua tib zoo xav seb cov neeg hauv peb koog nyiam kawm txog dabtsi. Yog peb npaj li no, peb yuav txawj siv Vajlugkub mus qhia lwm tus.​—1 Khaulee 2:4.

10. Zoo rau peb xav txog dabtsi thiab?

¹⁰ Zoo rau peb xav txog dabtsi ntxiv thiab? Thaum peb mloog lus qhuab qhia tom tej kev sib txoos, ib txhia nyiam sau tej ntsiab lus tseem ceeb tseg. Zoo rau peb rov mus saib seb peb twb kawm tau dabtsi los ntawm Vajtswv Txojlus thiab lub koom haum lawm. Muaj tej ntaub ntawv zoo li Phau Tsom Faj thiab phau Awake! uas tawm txhua hli, thiab kuj muaj cov ntawv tawm tshiab txhua xyoo. Nyeem thiab ua tib zoo xav txog tej ntawd. Kuj muaj phau Yearbook sau txog peb cov kwvtij nyob txawv tebchaws. Thaum peb nyeem txog ib tug qauv twg, nres thiab muab ua tib zoo xav tso. Cia tej uas peb nyeem ntawd poob rau peb lub  siab. Tsis tas li ntawd xwb, kos cov lus tseem ceeb thiab muab sau rau ntawm ntug ntawv. Ua li no peb thiaj nco tau cov ntsiab lus thaum peb mus qhia Vajlugkub, npaj ib zaj lus qhuab qhia, lossis mus txhawb peb cov kwvtij nkauj muam. Vim li cas tseem ceeb ua luaj rau peb nres thiab ua tib zoo xav txog tej uas peb tau nyeem? Yog peb ua li ntawd tej lus ntawd thiaj poob rau hauv peb lub siab, ces peb yuav ua Yehauvas tsaug uas nws qhia ntau yam zoo heev rau peb.

11. (1) Peb yuav tsum ua tib zoo xav txog phau ntawv twg ua ntej? (2) Yog peb ua li ntawd, yuav pab peb li cas? (Saib cov lus hauv qab taw qhia.)

¹¹ Peb yuav tsum ua tib zoo xav txog tej uas peb kawm hauv phau Vajlugkub, rau qhov phau Vajlugkub yog phau tseem ceeb tshaj plaws. Tiamsis yog muaj ib hnub luag tsis pub peb muaj phau Vajlugkub lawm, yuav zoo li cas xwb? * (Saib cov lus hauv qab taw qhia.) Yog peb twb cim tau tej nqe Vajlugkub thiab tej nkauj qhuas Vajtswv lawm, ces tsis muaj leejtwg txeeb tau ntawm peb mus li. (Tubtxib Tes Haujlwm 16:25) Vajtswv lub hwj huam yuav pab kom peb nco tau tej uas peb twb kawm lawd, peb thiaj tuav tau kev ntseeg ruaj khov.​—Yauhas 14:26.

12. Peb yuav npaj li cas peb thiaj muaj sijhawm nyeem Vajlugkub?

¹² Peb yuav npaj li cas peb thiaj muaj sijhawm nyeem Vajlugkub txhua txhua hnub? Lub koom haum twb teem tej nqe Vajlugkub rau sawvdaws nyeem txhua lub lim tiam rau hmo uas muaj Kev Kawm Tshaj Tawm. Tej zaum zoo rau peb npaj ib ob hnub los nyeem cov nqe ntawd. Ces mam li npaj ib ob hnub los nyeem Mathai, Malakau, Luka, thiab Yauhas es xav txog Yexus tej lus thiab nws tes haujlwm. (Loos 10:17; Henplais 12:2; 1 Petus 2:21) Lub koom haum kuj npaj ib phau ntawv los qhia txog Yexus lub neej ua ntu zus pib thaum nws yug mus txog rau thaum nws rov mus saum ntuj. Phau ntawv no yuav pab peb hajyam nkag siab thaum peb nyeem Mathai, Malakau, Luka, thiab Yauhas.​—Yauhas 14:6.

13, 14. (1) Vim li cas tseem ceeb ua luaj rau peb xav txog Yehauvas thiab Yexus? (2) Yog peb xav txog Yehauvas thiab Yexus, yuav ua rau peb hajyam xav ua dabtsi ntxiv?

¹³ Yog peb ua tib zoo xav txog Yehauvas thiab Yexus, yuav pab peb ua tau ib tug Khixatia uas paub tab thiab tuav kev ntseeg ruaj nreeg. (Henplais 5:14; 6:1) Tus neeg uas qee mentsis sijhawm los xav txog Vajtswv xwb, yuav tu kev phoojywg nrog Yehauvas. Tej zaum nws kuj txhob txwm tso Yehauvas tseg los muaj thiab. (Henplais 2:1; 3:12) Yexus ceeb toom tias yog peb hnov Vajtswv Txojlus, tiamsis peb tsis muaj “lub siab uas ncaj thiab zoo” ces peb yuav “khaws” tsis tau cov lus ntawd los siv. Peb yuav cia ‘kev txhawj xeeb, nyiaj txiag, thiab kev lomzem’ los laum peb txojkev ntseeg.​—Luka 8:14, 15.

¹⁴ Yog li ntawd, cia peb siv sijhawm los ua tib zoo xav txog tej uas peb kawm hauv phau Vajlugkub, es txav ze rau Yehauvas. Yog peb ua li ntawd ces peb yuav hajyam xav yoog Yehauvas xwb. (2 Khaulee 3:18) Tsis muaj ib txoj koob hmoov zoo tshaj ntawd, puas yog? Peb yuav tau kawm txog peb Leej Txiv Yehauvas thiab xyaum raws li nws tus yam ntxwv mus ib txhis.​—Laj Lim Tswvyim 3:11.

15, 16. (1) Thaum koj xav txog Yehauvas thiab Yexus yuav pab tau koj li cas? (2) Vim li cas nyuaj rau peb lauj sijhawm los xav txog tej yam ntawm sab kev ntseeg, tiamsis ua cas tsim nyog peb ua tib zoo xav txog tej ntawd?

¹⁵ Yog peb ua tib zoo xav txog Yehauvas thiab Yexus peb yuav kub siab lug kawm qhov tseeb. Qhov ntawd yuav txhawb cov kwvtij thiab cov uas peb qhia Vajlugkub rau. Yog peb  ua tib zoo xav txog qhov uas Vajtswv txib Yexus los tuag txhiv noob neej, yuav ua rau peb hajyam saib peb txojkev sib raug zoo nrog Yehauvas rau nqe xwb. (Loos 3:24; Yakaunpau 4:8) Malakau yog ib tug kwvtij uas nyob tebchaws Afika Qab Teb (South Africa). Nws tsis kam hla phau Vajlugkub, luag thiaj muab nws kaw tsev loj cuj tau 3 xyoos. Nws hais tias: “Thaum kuv ua tib zoo xav txog Vajtswv txojlus, zoo ib yam li kuv mus ncig ib lub tebchaws deb heev thiab lomzem kawg. Yog peb hajyam xav txog tej yam ntawm sab kev ntseeg, ces peb yuav kawm tau tej yam tshiab txog Vajtswv Yehauvas. Thaum kuv qaug zog thiab ntxhov siab txog yav tom hauv ntej, kuv nthuav Vajlugkub los nyeem thiab xaiv ib co nqe Vajlugkub los xav tuj taws hauv kuv lub siab. Qhov ntawd pab tau kuv ua siab tus yees.”

¹⁶ Hauv lub qab ntuj no muaj ntau yam kev ntxhov siab. Tsis yoojyim rau peb lauj sijhawm los xav txog tej uas peb nyeem hauv phau Vajlugkub. Muaj ib tug kwvtij hu ua Patrick [pha·rhim] nyob sab Afika hais tias: “Kuv lub siab zoo ib yam li lub thawv rau ntau yam ntaub ntawv uas luag xa tuaj. Txhua hnub kuv yuav tsum fawb seb yuav muab cov twg pov tseg, muab cov twg khaws cia. Muaj ntau yam hauv kuv lub cim xeeb ua rau kuv ‘txhawj xeeb’ heev. Kuv thiaj thov Yehauvas txog tej ntawd. Thaum kuv thov tas, kuv mam li muaj lub siab tus yees, xav txog tej yam ntawm sab kev ntseeg. Txawm siv sijhawm ntev zog los, yeej tsim nyog rau qhov kuv tau nrog Yehauvas sib raug zoo. Kuv thiaj nkag siab qhov tseeb yoojyim dua.” (Ntawv Nkauj 94:19) Yog li ntawd, thaum peb nyeem thiab ua tib zoo xav txog phau Vajlugkub txhua txhua hnub, yeej pab tau peb zoo kawg li tiag.​—Tubtxib Tes Haujlwm 17:11.

17. Yuav ua li cas nrhiav tau sijhawm los xav txog Vajtswv Txojlus?

¹⁷ Ib txhia sawv ntxov los nyeem thiab xav txog Vajlugkub thiab thov Vajtswv. Lwm cov ho siv lub caij noj sus los kawm. Tej zaum ib txhia nyeem Vajlugkub ua ntej lawv yuav mus pw. Muaj dua lwm cov nyeem Vajlugkub thaum sawv ntxov thiab thaum tsaus ntuj. (Yausua 1:8) Txawm yus nyeem lub caij twg los xij, peb yuav tsum “siv lub sijhawm kom muaj nuj nqes.” Muab tej haujlwm tsis tseem ceeb tso ua qab, peb thiaj muaj sijhawm xav txog Vajtswv Txojlus txhua hnub.​—Efexau 5:15, 16.

18. Phau Vajlugkub cog lus li cas rau cov uas ua tib zoo kawm Vajtswv Txojlus thiab xyaum raws nraim li ntawd?

¹⁸ Phau Vajlugkub cog lus tias Yehauvas yuav foom koob hmoov rau txhua tus uas ua tib zoo xav txog nws Txojlus, thiab xyaum raws nraim li ntawd. (Nyeem Ntawv Nkauj 1:1-3.) Yexus hais tias: “Cov uas hnov Vajtswv tej lus thiab coj raws nraim thiaj yog cov uas tau nyob kaj siab lug.” (Luka 11:28) Tsis muaj ib yam tseem ceeb npaum li qhov uas peb coj lub neej qhuas Vajtswv Yehauvas. Yog peb ua li ntawd, Yehauvas yuav foom koob hmoov rau peb kom peb muaj kev zoo siab tamsim no, thiab mus ib txhis tsis kawg hauv lub qab ntuj tshiab.​—Yakaunpau 1:25; Qhia Tshwm 1:3.