1. Hnub ua tshoob, cov txij nkawm xyiv fab heev tiamsis phau Vajlugkub ceeb toom lawv li cas? (Saib daim duab ntawm sab no.)

THAUM ib tug tub tseem nrog ib tug ntxhais sib tham lus, nkawd zoo siab heev. Thaum nkawd sib raug zoo heev lawd, nkawd thiaj txiav txim siab sib sau ua neej. Nkawd thiaj cog lus tias nkawd yuav sib hlub thiab sib npuab siab kom mus txog hnub kawg. Hnub ua tshoob, nkawd zoo siab xyiv fab tshaj plaws li. Tiamsis yuav ua li cas nkawd thiaj koom tau ib siab mus li? Vajtswv Yehauvas yog tus tsim kev txij nkawm. Nws xav kom cov txij nkawm sib yuav mus li thiab kom lawv ua neej kaj siab lug. Yehauvas thiaj muab nws Txojlus los qhuab qhia lawv. (Paj Lug 18:22) Phau Vajlugkub yeej qhia hlo tias vim peb yog noob txaug neeg txhaum xwb, cov uas yuav txij nkawm yuav “muaj kev ntxhov siab hauv lub neej.” (1 Khaulee 7:28) Cov txij nkawm yuav tu lawv tej teeb meem li cas? Yuav ua li cas lawv thiaj sib hlub mus li?

2. Cov txij nkawm yuav tsum muaj txojkev hlub zoo li cas?

 ² Phau Vajlugkub qhia tias cov txij nkawm yuav tsum sib hlub. Tiamsis txojkev hlub ntawd zoo li cas? Ib leeg yuav tsum ua siab mos muag rau ib leeg. Nkawd yuav tsum sib hlub yam li thaum nkawd tseem yog hluas nkauj hluas nraug. Yog nkawd muaj metub menyuam, nkawd yuav tsum muaj txojkev hlub uas leej niam leej txiv muaj rau cov menyuam. Tiamsis tsis muaj ib yam tseem ceeb npaum li qhov uas nkawd muaj Vajtswv txojkev hlub. Povlauj piav tias yog ob niam txiv muaj Vajtswv txojkev hlub ces nkawd yuav coj tau li no: ‘Nyias yuav tsum hlub nyias tus pojniam ib yam li nyias hlub nyias lub cev, thiab cov pojniam los nyias yuav tsum hwm nyias tus txiv.’​—Efexau 5:33.

3. Cov txij nkawm yuav tsum sib hlub npaum li cas?

³ Povlauj sau li no: “Cov txiv, cia li hlub nej cov pojniam ib yam li Khetos hlub pawg ntseeg thiab muab nws tus kheej this pawg ntseeg.” (Efexau 5:25) Cov Khixatia ib leeg yuav tsum hlub ib leeg ib yam li Yexus hlub nws cov thwjtim. (Nyeem Yauhas 13:34, 35; 15:12, 13.) Cov txiv thiab cov pojniam Khixatia yuav tsum sib hlub npaum li ntawd, ib leeg yeej yeem tuag this ib leeg ntag. Tiamsis yog cov txij nkawm muaj teeb meem loj, yuav ua rau lawv txojkev hlub tsuag. Lawv yuav kho lawv tej teeb meem li cas? Lawv yuav tsum nco ntsoov xyaum Yehauvas txojkev hlub li no: “Txojkev hlub nyiaj taus txhua yam, ntseeg mus li, muaj kev vam mus li thiab ua siab ntev thev txhua yam.” Txojkev hlub no yeej “tsis txawj kawg kiag li.” (1 Khaulee 13:7, 8) Cov txij nkawm yuav tsum nco ntsoov cov lus uas nkawd ib leeg tau cog rau ib leeg. Nkawd twb cog lus lawm tias nkawd yuav sib hlub thiab ib leeg yuav npuab siab rau ib leeg mus li. Yog nkawd ua tib zoo xav txog nkawd tej lus cog tseg, ces nkawd yuav muaj siab nrhiav Yehauvas lub tswvyim los kho nkawd lub neej.

4, 5. (1) Tus txiv muaj tes haujlwm twg? (2) Tus pojniam yuav tsum saib nws tus txiv zoo li cas? (3) Ob niam txiv hauv nqe no sib yoog li cas?

⁴ Tus txiv thiab tus pojniam tes haujlwm zoo li cas? Povlauj qhia li no: “Cov pojniam, cia li nyob hauv nej tus txiv qab kev tswjhwm ib yam li nyob hauv qab tus Tswv Yexus.” (Efexau 5:22, 23) Puas yog Vajtswv saib cov txiv tsim txiaj dua cov pojniam? Tsis yog. Yehauvas yeej saib pojniam rau nqe heev. Thaum chiv keeb Yehauvas thiaj tsim pojniam los ‘pab thiab phim’ tus txiv. (Chiv Keeb 2:18) Tus pojniam yuav tsum txhawb nws tus txiv tes haujlwm ua lub taubhau txiv. Tus txiv los yuav tsum muaj kev hlub saib xyuas nws tsev neeg, ib yam li Yexus uas yog “pawg ntseeg lub taubhau.” Yog tus txiv xyaum li Yexus, ces nws tus pojniam yuav kaj siab nrog nws ua neej. Kuj yoojyim dua rau tus pojniam hwm thiab txhawb nws tus txiv.

⁵ Muaj ib tug pojniam hu ua Kab Yeeb, nws tus txiv hu ua Pov Hwm. Kab Yeeb hais tias: “Thaum kuv tseem tsis tau yuav txiv, ib puas tsav yam yog kuv ua tus saib xyuas xwb. Thaum kuv yuav txiv lawd, kuv yuav tsum tau hloov kuv txojkev xav thiab xyaum tos kuv tus txiv. Yeej tsis yoojyim hloov li no, tiamsis vim wb xav coj wb lub neej raws li Yehauvas tau cob qhia, wb ob niam txiv hajyam sib raug zoo dua qub lawm.” ^[1] (Saib cov lus qhia rau zaj no.)  Pov Hwm ho hais tias: “Kuv ib txwm yog ib tug neeg ua xyem xyav, nyuaj rau kuv txiav txim siab heev. Thaum kuv yuav pojniam lawd, hajyam nyuaj rau qhov kuv yuav tau txiav txim siab kom haum wb ob niam txiv. Tiamsis vim kuv thov Yehauvas pab thiab kuv ua zoo mloog kuv tus pojniam hais, pab tau kuv lawm ntau. Kuv pojniam wb koom tau ib lub siab lawm tiag tiag!”

6. Thaum cov txij nkawm muaj teeb meem, kev hlub yuav “khi tau txhua yam sib koom ua ke” li cas?

⁶ Yog tus txiv thiab tus pojniam “ib leeg ua siab ntev rau ib leeg thiab . . . ib leeg kuj zam ib leeg,” ces nkawd txojkev txij nkawm yuav ruaj khov. Nkawd yog neeg txhaum, yog li ntawd ib leeg yeej yuav ua rau ib leeg tu siab. Thaum muaj li ntawd, nkawd yuav tsum nrhiav kev los kho qhov teeb meem es ib leeg zam ib leeg. Nkawd yuav tsum sib hlub ib yam li phau Vajlugkub tau qhia. Txojkev hlub ntawd “khi tau txhua yam sib koom ua ke.” (Khaulauxi 3:13, 14) Tsis tas li ntawd xwb, nkawd yuav tsum ua siab ntev es tsis txhob “cim ntsoov luag tej kev txhaum.” (1 Khaulee 13:4, 5) Thaum hais lus tsis sib haum, nkawd yuav tsum tu qhov teeb meem kom tas rau hnub ntawd. (Efexau 4:26, 27) Tus uas txo hwjchim thiaj yuav hais tau cov lus no rau nws tus txij nkawm: “Thov zam txim rau kuv, vim kuv ua rau koj tu siab lawm.” Nco ntsoov tias yog cov txij nkawm xyaum raws li no, lawv yuav paub daws teeb meem thiab hajyam sib raug zoo dua qub.

7, 8. (1) Phau Vajlugkub qhia kom cov txij nkawm coj li cas? (2) Vim li cas cov Khixatia yuav tsum hlub tshua thiab ua siab mos muag rau lawv tus txij nkawm?

⁷ Phau Vajlugkub cob qhia kom cov niam txiv paub coj thiab tsis txhob cais chaw pw. (Nyeem 1 Khaulee 7:3-5.) Cov txij nkawm ib leeg yuav tsum paub ib leeg siab, xam pom yus tus txij nkawm ua ntej. Tus txiv yuav tsum hlub tshua thiab ua siab mos muag rau nws tus pojniam txhua lub sijhawm, xwv tus pojniam thiaj li qab siab nrog nws ua neej thiab zoo siab nrog nws pw ua ke. Phau Vajlugkub qhia tias tus txiv yuav tsum “nkag siab” txog nws tus pojniam. (1 Petus 3:7) Tsis zoo rau tus txiv lossis tus pojniam ib leeg yuam ib leeg. Tus txiv lub cev txawv ntawm tus pojniam. Yog li ntawd, nkawd yuav tsum tos lub caij nyoog zoo, nkawd thiaj yeem los pw ua ke.

⁸ Phau Vajlugkub tsis tau tsa kevcai tias thaum cov niam txiv pw ua ke yuav tsum sib hlub sib tawb li cas thiaj raug cai. Tiamsis muaj cov qauv hauv phau Vajlugkub qhia tias kev sib hlub zoo li cas. (Xalaumoo Zaj Nkauj 1:2; 2:6) Cov txij nkawm Khixatia ib leeg yuav tsum hlub tshua thiab ua siab mos muag rau ib leeg rau qhov Yehauvas yeej tsim kom tibneeg muaj lub siab ntshaw li ntawd. Phau Vajlugkub kuj qhia li ntawd thiab.

9. Vim li cas tsis zoo rau peb lam nyiag nyiam lwm tus uas tsis yog peb tus txij nkawm?

⁹ Yog peb hlub Vajtswv thiab peb cov kwvtij, peb yeej tsis cia ib yam dabtsi los txuam yuaj peb txojkev txij nkawm. Ib txhia tiv tau tej duab liab qab ua rau lawv txojkev hlub tsuag zuj zus, kuj ua rau lawv lub neej tawg los muaj thiab. Peb sawvdaws yuav tsum ceev faj, tsis txhob saib tej duab liab qab kiag li. Tsis txhob pub lub siab ntshaw kev sib daj sib dee. Tsis tas li ntawd xwb, ceev faj txhob lam mus tawb los yog zes lwm tus uas tsis yog yus tus txij nkawm. Yog peb coj li ntawd, twb yog peb saib tsis taus peb tus txij nkawm. Yog peb nco ntsoov tias Vajtswv yeej paub tej uas  peb xav hauv nruab siab thiab tej uas peb ua ces peb yuav muab siab npuab peb tus txij nkawm thiab ua haum Vajtswv siab.​—Nyeem Mathai 5:27, 28; Henplais 4:13.

10, 11. (1) Nimno cov txij nkawm saib kev sib nrauj zoo li cas? (2) Phau Vajlugkub qhia li cas txog kev sib cais? (3) Cov txij nkawm yuav tsum nco ntsoov li cas?

¹⁰ Muaj tej nkawm niam txiv ntsib teeb meem loj heev. Ib txhia thiaj txiav txim siab sib cais lossis sib nrauj. ^[2] (Saib cov lus qhia rau zaj no.) Muaj tej lub tebchaws cov txij nkawm muaj ib nrab ntau yuav tsum kawg sib nrauj xwb. Zoo siab kawg hauv lub koom txoos tsis tshua ntsib li no. Tiamsis nimno pom tias cov txij nkawm Khixatia kuj ntsib teeb meem coob zuj zus lawm thiab.

¹¹ Phau Vajlugkub ntuas li no: “Yog [tus pojniam] muab nws tus txiv tso tseg, nws tsis txhob mus yuav dua txiv tshiab, tiamsis yog nws xav yuav txiv, nws cia li rov qab los yuav tus txiv qub xwb; thiab tus txiv tsis txhob muab nws tus pojniam nrauj.” (1 Khaulee 7:10, 11, TMZ) Muaj tej nkawm niam txiv pom tias lawv nyob tsis tau ua ke lawm tiag, lawv thiaj ua ib siab sib cais. Tiamsis pom tias ib txhia uas sib cais lawm los hajyam nyuaj siab xwb. Yexus thiaj hais Yehauvas cov lus tias tus txiv yuav tsum ncaim nws niam nws txiv nrog nws tus pojniam tsheej xeeb ua ke. Ces Yexus txhab ntxiv tias: “Yam uas Vajtswv muab lo tsheej xeeb ua ke lawm, neeg tsis txhob muab ua kom ncaim.” (Mathai 19:3-6; Chiv Keeb 2:24) Cov niam txiv yuav tsum pom tias tsis zoo rau lawv lam tau lam sib cais. Yehauvas yeej xav kom cov txij nkawm sib hlub mus li. (1 Khaulee 7:39) Peb yuav tsum nco ntsoov tias thaum kawg peb txhua tus nyias yuav tau piav nyias zaj rau Vajtswv. Yog li ntawd, tsim nyog cov txij nkawm nrhiav kev los kho teeb meem, txhob tos loj mam kho.

12. Ua cas tej nkawm niam txiv ho sib cais?

¹² Ua cas tej nkawm niam txiv ho muaj teeb meem ua luaj? Ib txhia pom tias tom qab lawv sib yuav tau lawd tsis zoo li lawv siab xav, lawv thiaj tsis qab siab ua neej. Ntau zaus yog tim ob niam txiv nyias nyiam nyias ib yam thiab nyias muaj nyias siab thiaj tsis sib haum, tsis hais kev siv nyiaj txiag los yog kev cob qhia metub menyuam. Tej zaum kuj yog cov laus cuam tshuam lub neej thiab. Tiamsis cov txij nkawm Khixatia feem coob siv Vajtswv lub tswvyim los pab lawv thiaj kho tau lawv tej teeb meem.

13. Thaum muaj teeb meem li cas thiaj sib cais tau?

¹³ Thaum muaj teeb meem li cas thiaj sib cais tau? Tej zaum muaj tej tug tsis kam yug lossis pab nws tsev neeg kiag li. Muaj tej tug ho tsim los yog ntaus nws tus txij nkawm heev. Muaj dua tej tug nrhiav nrhw kev los txo nws tus txij nkawm txojkev ntseeg. Yog muaj teeb meem loj li no, zoo rau cov txij nkawm mus cuag cov txwj laus. Cov txwj laus yuav paub muab Vajtswv Txojlus los daws lawv tej teeb meem. Yog cov txij nkawm thov Vajtswv kom nws pub lub hwj huam dawb huv los pab lawv, ces lawv yuav paub coj raws li phau Vajlugkub tej hauv paus ntsiab lus thiab coj tau tus cwj pwm uas tsim nyog tus Khixatia muaj. (Kalatia 5:22, 23) ^[3]​—Saib cov lus qhia rau zaj no.

14. Phau Vajlugkub qhia li cas rau cov uas muaj ib tug txij nkawm uas tsis ntseeg Yehauvas?

¹⁴ Phau Vajlugkub qhia tias txawm yus  tus txij nkawm tsis pe hawm Yehauvas los, tsis txhob muab nws tso tseg. (Nyeem 1 Khaulee 7:12-14.) Vim li cas? Vim tias tus txij nkawm uas tsis ntseeg twb “raug muab cais ua tus dawb huv” lawm, vim nws tus txij nkawm ntseeg Yehauvas. Yehauvas kuj suav tias nkawd cov menyuam uas tseem yau puavleej “dawb huv” thiab. Povlauj thiaj txhawb cov txij nkawm Khixatia li no: “Tus pojniam uas ntseeg, koj puas paub hais tias koj yuav coj tau koj tus txiv los ntseeg. Lossis tus txiv uas ntseeg, koj puas paub hais tias koj yuav coj tau koj tus pojniam los ntseeg.” (1 Khaulee 7:16, TMZ) Muaj coob tus Khixatia twb pab tau lawv tus txij nkawm los ntseeg Yehauvas lawm.

15, 16. (1) Phau Vajlugkub ntuas kom cov pojniam Khixatia coj li cas nrog tus txiv uas tsis ntseeg? (2) ‘Yog tus uas tsis ntseeg tso tus ntseeg tseg,’ tus Khixatia yuav ua li cas?

¹⁵ Petus ntuas cov pojniam Khixatia kom nyob hauv qab lawv tus txiv txojkev tswjhwm. Nws hais tias: “Txawm yog cov txiv qee leej tsis ntseeg Vajtswv txojlus los qhov uas cov pojniam xyaum zoo yuav coj tau cov txiv los ntseeg tsis txog hais ib los li, rau thaum lawv pom nej ua lub neej dawb huv thiab hwm lawv.” Yog li ntawd, tsis zoo rau tus pojniam yuam kom tus txiv kawm Vajlugkub. Tiamsis yog nws “ua lub siab mos siab muag thiab muaj lub siab tus yees” yuav hajyam pab tau nws tus txiv los kawm qhov tseeb dua.​—1 Petus 3:1-4.

¹⁶ Yog tias tus txij nkawm uas tsis ntseeg ho txiav txim siab cais ntawm tus uas ntseeg ne? Phau Vajlugkub hais tias: “Yog tus uas tsis ntseeg yuav tso tus ntseeg tseg, kuj ua tau. Yog zoo li no tus kwvtij uas ntseeg tsis hais pojniam txivneej tsis raug muab khi, rau qhov Vajtswv hu peb los nyob sib [haum] xeeb.” (1 Khaulee 7:15) Qhov uas tus ntseeg “tsis raug muab khi” puas tso cai rau nws mus yuav dua lwm tus? Tsis tso. Tiamsis nws yuav tsum nco ntsoov tias nws yuam tsis tau kom nws tus txij nkawm nrog nws nyob. Yog sib cais kuj  pab tau ib txhia ua neej kaj siab dua. Thaum muaj li no lawd, tus Khixatia yuav tau ua siab ntev tos seb nws tus txij nkawm puas yuav rov los kho nkawd lub neej. Tej zaum muaj ib hnub nws tus txij nkawm kuj yuav los teev tiam Yehauvas thiab.

17. Tsim nyog cov txij nkawm Khixatia muab dabtsi tso ua ntej hauv lawv lub neej?

¹⁷ Tamsim no peb nyob rau “tiam kawg” lawm, thiaj muaj kev “txom nyem nyuaj siab” ua luaj li. (2 Timaute 3:1-5) Yog li ntawd, peb yuav tsum muaj ib txojkev sib raug zoo nrog Yehauvas kom ruaj khov. Povlauj sau li no: “Lub sijhawm uas teem cia twb tag zuj zus lawm. Txij no mus cov uas muaj pojniam lawm cia li nyob zoo yam li tsis muaj . . . thiab cov uas tau siv tej qhov txhia chaw hauv lub ntiajteb no cia li nyob yam li tsis quav ntsej tej qhov txhia chaw ntawd.” (1 Khaulee 7:29-31) Puas yog Povlauj qhia kom cov Khixatia txhob quav ntsej txog lawv cov txij nkawm? Tsis yog. Tiamsis Povlauj ceeb toom kom peb nco ntsoov tias peb twb nyob rau tiam kawg lawm, tsim nyog peb muab peb txojkev pe hawm Yehauvas tso ua ntej hauv peb lub neej.​—Mathai 6:33.

18. Yuav ua li cas cov txij nkawm thiaj sib hlub mus li?

¹⁸ Nyob rau lub caij kawg no yeej tsis yoojyim. Muaj ntau nkawm niam txiv twb sib nrauj lawm. Yuav ua li cas cov txij nkawm thiaj sib hlub mus li? Lawv yuav tsum txav ze rau Yehauvas thiab nws haiv neeg. Lawv yuav tsum ua lawv lub neej raws li phau Vajlugkub tej hauv paus ntsiab lus thiab cia lub hwj huam dawb huv coj lawv txoj hau kev. Yog peb sawvdaws xyaum li no, ces qhia tias peb yeej saib taus txojkev txij nkawm uas yog “yam uas Vajtswv muab lo tsheej xeeb ua ke lawm.”​—Malakau 10:9.