Tej Uas Tus Tswv Tsim Npaj Tseg
Vajtswv cog lus tias yav tom ntej nws yuav muab txhua yam kho dua tshiab. Nws yuav tshem kev txom nyem mus thiab tibneeg yuav nyob kaj siab lug. (Phau Ntawv Nkauj 37:11) Peb yeej tso siab tau rau nws tej lus cog tseg vim “Vajtswv tsis zoo li tej neeg uas pheej hais lus dag.” (Teev Npe 23:19) Cia peb kawm txog tej uas Vajtswv yuav ua yav tom ntej no.
Cov Limhiam Yuav Raug Rhuav Tshem
‛Cov neeg siab phem yuav loj hlob ib yam li tej nroj tsuag, thiab cov neeg txhaum yuav vam meej; tiamsis lawv yuav raug kev puas tsuaj tas.’—PHAU NTAWV NKAUJ 92:7.
Raws li peb twb kawm lawm, kev phem yuav huam vam zuj zus. Peb paub li no vim phau Vajlugkub hais hauv 2 Timautes 3:1-5 tias “lub sijhawm uas ntiajteb yuav kawg” tibneeg yuav ua phem zuj zus. Yog li, yuav muaj li cas rau cov neeg phem ntawd? Vajtswv yuav muab cov uas tsis kam tso kev phem tseg rhuav tshem mus. Thaum kawg yuav muaj cov uas mloog Vajtswv lus lawm xwb. ‘Cov ncaj ncees yuav tau lub ntiajteb ua lawv teej lawv tug, thiab tau nyob rau hauv mus ib txhis.’—Phau Ntawv Nkauj 37:29, TT.
Vajtswv Yuav Rhuav Tshem Xatas
‘Vajtswv yuav tsuj nthi Xatas rau hauv nws qab xib taws.’—LOOS 16:20, NN.
Thaum tsis muaj Xatas thiab nws cov dab lawm lub ntiajteb yuav muaj kev thaj yeeb thiab nyob tiaj nyob tus. Tus tsim peb cog lus tias: ‘Yuav tsis muaj leejtwg ua rau peb tau kev txhawj kev ntshai li.’—Mikhas 4:4.
Kev Mob Kev Tuag Yuav Dua Mus
“Vajtswv twb los nrog neeg nyob lawm! . . . Nws yuav so lawv tej kua muag huv tibsi mus. Tej kev tuag, kev ntxhov siab, kev quaj ntsuag thiab kev mob kev nkeeg yuav tsis muaj ib zaug li lawm.”—TSHWMSIM 21:3, 4.
Tibneeg yuav tsis raug kev txom nyem kev ploj kev tuag ntxiv li lawm vim Vajtswv yuav tshem tej kev phem uas Xatas, Adas, Evas, thiab tibneeg tau ua. Thaum Vajtswv rhuav tshem txojkev tuag lawm, cov uas Vajtswv hlub yuav nyob mus ib txhis. Tiamsis lawv yuav nyob qhov twg?
Lub Vaj Kaj Siab
‘Tiaj suab puam thiab lub tebchaws uas qhuav nkig nkuav yuav zoo siab heev, thiab yuav muaj paj tawg ntsa iab rau saum tej av qhuav.’—YAXAYAS 35:1.
Thaum Vajtswv rhuav tshem cov neeg limhiam lawm, lub ntiajteb thiaj yuav ua tau ib lub Vaj Kaj Siab! Lub ntiajteb yuav tawg paj txi txiv thiab qoob loo yuav ntsu niab. (Phau Ntawv Nkauj 72:16) Dej yuav ntws ntshiab si. Ntses nuj ntses nias yuav huam vam puv nkaus tej kwj deg, tej pas dej thiab dej hiavtxwv. Tibneeg tig sab twg los yuav pom ib lub ntiajteb uas huv siab si. Lawv yuav tsis nco tias lub ntiajteb tau qias tsus dua los lawm. Nyias yuav ua nyias vaj nyias tsev nyob. Yuav tsis muaj cov txom nyem lossis cov tshaib nqhis ntxiv li lawm.—Yaxayas 65:21, 22.
Vajtswv Yuav Tsa Cov Tuag
‛Cov neeg uas tuag lawm yuav sawv rov qab los.’—TES HAUJLWM 24:15.
Koj puas xav rov pom cov koj hlub uas tau tag sim neej lawm? Vajtswv tus uas muaj hwjchim loj kawg nkaus yuav tsa cov tuag rov los ua neej nyob hauv ntiajteb no. Thaum koj rov pom lawv, koj yeej yuav cim tau lawv thiab lawv yeej yuav cim tau koj! Peb tso siab tau li no vim phau Vajlugkub qhia tias thaum Yexus tsa cov tuag, lawv tseem cim tau lawv tej txheeb ze huv tibsi.—Lukas 8:49-56; Yauhas 11:11-14, 38-44.
Tej Yam No Yuav Pab Tau Koj Thiab
TSIM DHEEV!
Thaum Muaj Kev Kub Ntxhov Txhob Tag Kev Cia Siab
Phau Vajlugkub pab peb nyiaj peb tej teeb meem thiab pab peb muaj kev cia siab rau yav tom ntej.
LUS NUG THIAB LUS TEB TXOG PHAU VAJLUGKUB
