1. Tibneeg txawv tsiaj li cas?

YEHAUVAS tsim tibneeg txawv tej tsiaj. Nws tsim kom peb muaj lub siab paub cais qhov zoo qhov phem. Tej tsiaj tsis paub ua li ntawd. Ua li, Adas thiab Eva nkawd puas muaj lub siab uas paub qhov zoo qhov phem tiag? Yeej muaj rau qhov tom qab nkawd ua txhaum, nkawd lub siab rov nkaug nkawd. Adas thiab Eva thiaj khiav nraim Vajtswv.

2. Peb lub siab zoo li lub kauj tsav nkoj li cas? (Saib thawj daim duab hauv zaj no.)

² Lub siab uas paub cais qhov zoo qhov phem yuav coj tau peb txoj hau kev. Tiamsis yog peb tsis cob peb lub siab ces yuav zoo ib yam li lub kauj tsav nkoj uas puas lawm. Thaum muaj cua ntsawj, muaj dej nphau los ntaus lub nkoj ces lub nkoj yuav kawg lem mus tsoo pob zeb. Tiamsis yog peb cob qhia peb lub siab, peb yuav txiav txim siab tau zoo. Peb lub siab yuav zoo li lub kauj uas tig tau lub nkoj, kom zam dhau teeb meem.

3. Yog peb tsis cob qhia peb lub siab ces yuav zoo li cas?

 ³ Yog peb tsis cob qhia peb lub siab ces peb lub siab yuav tsis paub ceeb toom peb kom txhob mus ua txhaum. (1 Timaute 4:1, 2) Tej zaum lub siab tseem yuav ntxias tau peb muab qhov phem ua qhov zoo. (Yaxaya 5:20) Yexus hais tias: “Lub sijhawm tabtom los txog, txhua tus uas muab nej tua pov tseg yuav xav tias lawv ua koom tu Vajtswv.” (Yauhas 16:2) Cov uas muab Xatefanau tua pov tseg tau xav yuam kev li no. (Tubtxib Tes Haujlwm 6:8, 12; 7:54-60) Txij thaum ntawd los txog niaj hnub nimno, tibneeg tseem muaj txojkev xav no. Lawv tuav Vajtswv npe ua limhiam muab neeg tua pov tseg los lawv twb tsis pom tias lawv hla Vajtswv tej kevcai lawm. (Khiav Dim 20:13) Lawv lub siab tsis paub ceeb toom tias tej uas lawv ua ntawd txhaum loj npaum li cas!

4. Peb yuav ua li cas peb lub siab thiaj paub cais qhov zoo qhov phem?

⁴ Peb yuav ua li cas peb lub siab thiaj paub cais qhov zoo qhov phem? Peb yuav tau kawm tej kevcai thiab tej hauv paus ntsiab lus hauv phau Vajlugkub. Tej ntawd “siv tau qhuab qhia, qhuab ntuas, qhia tus uas txhaum rov ua zoo, thiab cob qhia ua ncaj ua ncees.” (2 Timaute 3:16) Peb yuav tsum kawm Vajlugkub tsis tu ncua, ua tib zoo xav txog tej uas peb kawm, thiab muab coj los siv rau hauv peb lub neej. Yog peb ua li no ces peb yuav yoog tau Yehauvas thiab paub txiav txim siab zoo. Cia peb kawm seb Yehauvas tej kevcai thiab tej hauv paus ntsiab lus pab tau peb li cas.

5, 6. Vajtswv tej kevcai pab tau peb li cas?

⁵ Txawm peb nyeem thiab paub Vajtswv tej kevcai npaum li cas los, yog peb tsis nyiam thiab tsis hwm tej kevcai ntawd ces yuav tsis muaj qab hau. Phau Vajlugkub thiaj hais tias: “Ntxub txojkev phem es nyiam txojkev zoo.” (Amau 5:15) Yuav kom peb coj tau raws li nqe no, peb yuav tsum muaj Yehauvas txojkev xav thiab ntseeg tias nws rhawv kevcai los tsom kwm peb xwb. Muab ua piv txwv tias koj pw tsis tsaug zog li, koj thiaj mus cuag kws kho mob seb nws puas pab tau koj li cas. Nws hais tias koj yuav tsum noj zaub mov zoo, yuav tsum dhia kom koj lub cev muaj zog, thiab hloov lwm yam. Thaum koj ua li nws hais, koj txawm tuaj dab ntub lawm. Koj puas zoo siab tias koj mloog tus kws kho mob lus? Zoo siab xwb!

⁶ Tus Tswv Tsim zoo ib yam li tus kws kho mob ntawd. Nws qhia tias peb yuav tsum ua li cas thiaj tsis ntsib teeb meem thiab noj qab nyob zoo. Phau Vajlugkub hais tias yog peb dag noj dag haus, ua nkauj ua nraug, ua nruj ua tsiv, lossis koom ua tej yam ntsig txog dab ces peb yuav ntsib teeb meem. (Nyeem Paj Lug 6:16-19; Qhia Tshwm 21:8) Thaum peb mloog Yehauvas lus es zam tej yam zoo li ntawd, peb pom tias ua cas yeej pab tau peb lub neej tiag. Thaum kawg peb yuav ris nws txiaj ntsig thiab yuav nyiam nws tej kevcai.

7. Tej qauv hauv phau Vajlugkub pab tau peb li cas?

⁷ Tsis tas peb yuav hla Vajtswv tej kevcai mus ntsib teeb meem peb mam li paub tias qhovtwg zoo qhovtwg phem. Peb twb muaj tej qauv hauv Vajtswv Txojlus los qhuab qhia peb. Paj Lug 1:5 hais tias: “Tus txawj ntse tau hnov thiab tsav kev paub rau nws.” Leejtwg yog tus hais rau tus txawj ntse hnov? Twb yog Vajtswv ntag. Tsis muaj ib tug yuav txawj qhia npaum li Vajtswv. Cia peb tham txog Davi tus qauv. Thaum nws ua txhaum rau Yehauvas mus deev luag poj luag sev, nws lub siab  rov nkaug nws thiab nws ntsib ntau yam teeb meem. (2 Xamuyee 12:7-14) Thaum koj nyeem txog zaj no, xav seb: ‘Davi yuav tsum ua li cas nws thiaj tsis mus ua txhaum? Yog koj ne, koj yuav zam kev txhaum li cas? Yog koj raug ntxias mus ua plees ua yi koj puas yuav coj li Davi los coj li Yauxej?’ (Chiv Keeb 39:11-15) Yog peb nco ntsoov tias kev txhaum tsim tau teeb meem loj heev ces peb yeej yuav “ntxub txojkev phem” zuj zus tuaj.

8, 9. (1) Yog peb cob peb lub siab, peb yuav paub ua li cas? (2) Yehauvas tej hauv paus ntsiab lus cob tau peb lub siab li cas?

⁸ Peb yeej paub zam tej uas Yehauvas ntxub. Tiamsis yog peb ho ntsib tej yam uas Vajtswv tej kevcai tsis txwv hlo ne, peb yuav txiav txim li cas? Yog peb cia phau Vajlugkub cob peb lub siab ces peb yuav paub txiav txim siab li Vajtswv pom zoo.

⁹ Yehauvas hlub peb heev, nws thiaj muab nws tej hauv paus ntsiab lus cob qhia peb. Nws hais tias: “Kuv yog [Yehauvas], yog nej tus Vajtswv, kuv qhuab qhia tej uas muaj nuj nqes rau nej thiab coj nej taug txojkev uas tsim nyog mus.” (Yaxaya 48:17, 18) Yog peb ua tib zoo xav txog phau Vajlugkub tej hauv paus ntsiab lus thiab cia tej ntawd poob rau hauv peb lub siab ces peb yuav paub kho thiab hloov peb lub siab kom haum Vajtswv. Yog peb ua li no ces yuav tsis nyuaj rau peb txiav txim siab zoo.

10. Tej hauv paus ntsiab lus pab tau peb li cas thiab Yexus siv tej hauv paus ntsiab lus li cas?

¹⁰ Tej hauv paus ntsiab lus pab tau peb txiav txim siab zoo. Yog peb to taub tej hauv paus ntsiab lus, ces peb yuav paub Vajtswv txojkev xav thiab to taub tias vim li cas nws ho rhawv kevcai rau peb coj. Yexus siv tej hauv paus ntsiab lus los qhia nws cov thwjtim tias tus cwj pwm lossis tes haujlwm tsis zoo yuav coj tau ib tug twg mus ua txhaum. Yexus qhia tias kev chim coj tau neeg mus tua neeg thiab lub siab ntshaw coj tau neeg mus deev luag poj luag txiv. (Mathai 5:21, 22, 27, 28) Yog peb ua raws li Vajtswv tej hauv paus ntsiab lus ces peb yuav cob tau peb lub siab kom paub cais qhov zoo qhov phem. Thiab tej uas peb txiav txim siab ua yuav qhuas tau Vajtswv.​—1 Khaulee 10:31.

11. Ib tug Khixatia lub siab txawv ib tug lub li cas?

¹¹ Txawm 2 tug Khixatia paub Vajtswv tej hauv paus ntsiab lus tib yam nkaus los puas yog nkawd yuav txiav txim siab tib yam nkaus? Tsis yog. Vim li cas? Muab ua piv txwv tias nkawd yuav tau txiav txim siab seb puas tsim nyog haus cawv. Phau Vajlugkub yeej tso cai haus cawv tiamsis phau Vajlugkub hais tias yuav tsum tsis txhob haus ntau ntau thiab tsis txhob haus kom qaug. (Paj Lug 20:1; 1 Timaute 3:8) Qhov no puas txhais tias tsuav ib tug Khixatia haus me me xwb ces yeej tsis ua li cas? Tsis yog. Txawm nws lub siab kheev nws haus los nws yuav tsum xam pom lwm tus thiab.

12. Yog luag lub siab tsis kheev luag ua ib yam dabtsi, Loos 14:21 pab kom peb saib taus luag li cas?

¹² Povlauj hais tias peb yuav tsum xam pom lwm tus. Yog lawv lub siab tsis kheev lawv ua ib yam dabtsi ces peb yuav tsum saib taus lawv. Povlauj hais tias: “Qhov uas tsis noj nqaij lossis tsis haus cawv txiv hmab lossis tsis ua ib yam dabtsi uas ua rau koj tus kwvtij dawm, kuj yog qhov zoo.” (Loos 14:21) Yog li ntawd, txawm peb muaj cai haus dej haus cawv los, yog peb paub tias peb tus kwvtij lub siab tsis kheev lossis nws yuav xav li cas rau peb, peb yuav tsum tsis txhob haus. Tej zaum ua ntej nws los paub Yehauvas nws yog ib tug neeg quav dej quav cawv nws thiaj caiv hlo tsis haus lawm los kuj muaj thiab. Peb yeej tsis xav ua rau nws tig rov mus coj lub neej qub ntawd, puas yog? (1 Khaulee 6:9, 10) Yog peb caw nws tuaj saib peb, peb puas txhob nws haus cawv? Yog nws pheej yig, peb yuav tsum tsis txhob yuam nws haus.

13. Timaute ua li cas thiaj pab tau lwm tus xav mloog txoj xov zoo?

¹³ Timaute twb yog ib tug tub hluas lawm tiamsis nws yeem hlo ua kevcai txiav. Txawm yuav mob nws npaum li cas los, nws yeej zoo siab hlo ua vim nws yuav mus tshaj tawm rau cov neeg Yudai. Nws paub tias lawv saib txoj kevcai ntawd tseem ceeb heev, nws tsis xav kom lawv xav yuam kev. Nws xam pom lwm tus ib yam li Povlauj. (Tubtxib Tes Haujlwm 16:3; 1 Khaulee 9:19-23) Koj puas yeem tso tej uas koj nyiam tseg kom pab tau lwm tus?

14, 15. (1) Yuav ua li cas ib tug Khixatia thiaj hlob tiav? (2) Ib tug Khixatia uas hlob tiav lawd coj li cas?

¹⁴ Henplais 6:1 hais tias peb tsis txhob niaj  hnub kawm Yexus Khetos txoj kevcai lub hauv paus, tiamsis peb yuav tsum kawm ntxiv lawm tom ntej, kom peb “hlob tiav.” Tsis yog peb los paub qhov tseeb tau ntau xyoo lawm ces yuav cia li yog ib tug Khixatia uas paub tab hlob tiav. Peb yuav tsum rau siab ntso kawm kom peb yimhuab to taub thiab paub Vajtswv Txojlus. Yog li ntawd, peb yuav tsum nyeem phau Vajlugkub txhua hnub. (Ntawv Nkauj 1:1-3) Yog koj ua li no, koj yuav to taub Yehauvas tej kevcai thiab tej hauv paus ntsiab lus zoo dua qub.

¹⁵ Txoj kevcai twg yog txoj tseem ceeb dua ntais rau ib tug Khixatia? Yog txoj kevcai kom sib hlub. Yexus hais tias: “Qhov uas nej sib hlub no yuav ua rau sawvdaws paub tias nej yog kuv li thwjtim.” (Yauhas 13:35) Phau Vajlugkub kuj muab txojkev hlub hu ua “vajntxwv txoj kevcai” thiab hais tias kev hlub “ua rau txoj kevcai tiav puv npo.” (Yakaunpau 2:8, NW; Loos 13:10) Peb paub tias kev hlub tseem ceeb heev rau qhov phau Vajlugkub hais tias “Vajtswv yog txojkev hlub.” (1 Yauhas 4:8) Vajtswv tsis yog hais tias nws hlub tshua peb xwb, tiamsis nws tes haujlwm ua pov thawj qhia meej tias nws yeej hlub peb tiag. Yauhas sau tias: “Vajtswv txojkev hlub kuj tshwm rau peb pom li no, yog Vajtswv txib nws tib tug Tub los rau hauv lub ntiajteb kom peb thiaj muaj txojsia nyob ntawm tus Tub ntawd.” (1 Yauhas 4:9) Thaum peb tes haujlwm qhia tias peb hlub Vajtswv, Yexus, cov kwvtij, thiab lwm leej lwm tus ces yuav qhia tias peb yog ib tug Khixatia uas hlob tiav lawm.​—Mathai 22:37-39.

16. Vim li cas cov Khixatia uas hlob tiav lawd ho pom tias tej hauv paus ntsiab lus muaj nqes heev?

¹⁶ Cov Khixatia uas hlob tiav lawd pom tias tej hauv paus ntsiab lus muaj nqes heev. Feem ntau tej kevcai tsuas qhia tsi ntsees rau ib lub caij lub nyoog xwb. Xws li thaum menyuam tseem yau, niam txiv hais tsi ntsees  kom txhob nrog tus ub tus no, rau qhov menyuam tsis tau paub tias nrog tej neeg phem yuav coj tau lawv mus ua phem. (1 Khaulee 15:33) Thaum menyuam paub tab zuj zus, lawv yuav paub siv phau Vajlugkub tej hauv paus ntsiab lus zuj zus. Tej hauv paus ntsiab lus ntawd yuav pab kom lawv paub xaiv cov phoojywg zoo. (Nyeem 1 Khaulee 13:11; 14:20.) Tej hauv paus ntsiab lus siv tau rau txhua fab txhua lub caij. Thaum peb paub siv phau Vajlugkub tej hauv paus ntsiab lus ces peb yuav paub cais qhov zoo qhov phem. Txawm peb ntsib tej yam dabtsi los peb yuav nkag siab tias Vajtswv xav kom peb ua li cas.

17. Vajtswv muab dabtsi rau peb xwv peb thiaj muaj tswvyim txiav txim raws li nws siab nyiam?

¹⁷ Vajtswv tau muab ntau yam rau peb xwv peb thiaj muaj tswvyim txiav txim siab raws li nws siab nyiam, peb yeej tsis tu ncua ib yam dabtsi li. Phau Vajlugkub muaj Vajtswv tej kevcai thiab tej hauv paus ntsiab lus uas pab tau “Vajtswv cov neeg . . . npaj txhij zog ua tau txhua yam haujlwm zoo.” (2 Timaute 3:16, 17) Phau Vajlugkub tej hauv paus ntsiab lus pab kom peb nkag siab tej uas Vajtswv lub siab nyiam. Tiamsis peb yuav tsum rau siab ntso kawm, peb thiaj to taub. (Efexau 5:17) Cia li siv tej twj uas peb muaj xws li, Yehauvas Cov Timkhawv Phau Ntawv Tshawb Nrhiav Vajlugkub, Watchtower Library, Watchtower LUB VEJ XAIJ TSHAWB NRHIAV VAJLUGKUB, thiab JW Library. Tej twj no yuav pab kom peb hajyam to taub tej uas peb kawm. Cia peb siv tej twj no thaum peb tsev neeg pe hawm Vajtswv ua ke thiab thaum peb kawm Vajlugkub peb ib leeg.

18. Thaum peb coj raws nkaus li Yehauvas tej kevcai thiab nws tej hauv paus ntsiab lus peb yuav tau lub neej zoo li cas?

¹⁸ Thaum peb coj raws nkaus li Yehauvas tej kevcai thiab tej hauv paus ntsiab lus, peb yeej tau lub neej zoo kawg nkaus! Ntawv Nkauj 119:97-100 hais tias: “Kuv nyiam koj txoj kevcai kawg nkaus, yog tej lus uas kuv tshawb nrhiav tas hnub tas hmo. Koj tej lus nkaw ua rau kuv txawj ntse dua kuv tej yeeb ncuab, vim koj tej lus nrog nraim kuv txhua lub sijhawm. Kuv muaj kev nkag siab ntau dua cov uas qhia kuv sawvdaws, rau qhov koj tej lus qhia yog tej uas kuv tshawb nrhiav. Kuv nkag siab ntau dua cov laus vim yog kuv tuav rawv koj tej kev tswjhwm.” Yog peb ua tib zoo xav txog Vajtswv tej kevcai thiab tej hauv paus ntsiab lus ces peb yuav muaj tswvyim thoob tsib to nrog. Yog peb cia Vajtswv tej kevcai thiab tej hauv paus ntsiab lus cob qhia peb lub siab ces peb yuav paub cais qhov zoo qhov phem. Peb yuav “hlob puv npo ib yam li Khetos rau txhua fab.”​—Efexau 4:13.