1, 2. Muaj dabtsi tshwm sim rau hnub Peetekos xyoo 33?

HNUB Peetekos xyoo 33 yog ib hnub tshwj xeeb kawg. Hnub ntawd Yexus cov thwjtim 120 leej tuaj sib txoos hauv ib lub tsev txheej sab saud hauv Yeluxalees. (Tes Haujlwm 1:13-15; 2:1) Ob peb hnub ua ntej ntawd, Yexus hais kom nws cov thwjtim nyob twj ywm hauv Yeluxalees rau qhov lawv yuav tau txais ib yam koob hmoov ntawm Vajtswv. (Tes Haujlwm 1:4, 5) Tau muaj li cas xwb?

² “Ua ciav txawm muaj ib lub suab nrov nroo ntws saum ntuj los ib yam li ib nthwv cua hlob hlob los rau hauv lub tsev. . . . Lawv pom ib yam zoo li tus nplaim taws los faib pes rhe liab pes vog” mus rau saum cov thwjtim txhua tus taub hau. Lub hwj huam dawb huv txawm “los kav tagnrho lawv txhua tus lub siab.” (Tes Haujlwm 2:2-4) Thaum no yog thaum Yehauvas pub nws lub hwj huam dawb huv rau lawv. (Tes Haujlwm 1:8) Lawv yog thawj cov uas Yehauvas lub hwj huam dawb huv xaiv * tsa los mus nrog Yexus kav saum ntuj.

3. Ua cas cov uas lub hwj huam dawb huv xaiv rau hnub Peetekos thiaj paub meej tias lawv raug xaiv lawm?

³ Xav seb, yog koj yog ib tug uas nrog Yexus cov thwjtim tuaj sib koom ua ke rau hnub ntawd, koj yuav xav li cas xwb? Koj yeej yuav nco qab ntsoov hnub ntawd mus li. Koj pom zoo li  nplaim taws los rau saum sawvdaws taub hau thiab koj txawm cia li txawj hais lwm yam lus. (Tes Haujlwm 2:5-12) Koj yeej paub meej meej tias Yehauvas lub hwj huam xaiv koj lawm. Tiamsis puas yog txhua tus uas Yehauvas lub hwj huam dawb huv xaiv yuav raug xaiv ib yam nkaus? Tsis yog. Ua cas peb thiaj paub li ntawd?

4. Piav seb, puas yog txhua tus Khixatia thawj 100 xyoo raug xaiv ib yam nkaus?

⁴ Cia peb tham seb Vajtswv siv nws lub hwj huam dawb huv los xaiv ib tug neeg thaum twg. Hnub Peetekos xyoo 33 tsis yog 120 leej ntawd thiaj li raug xaiv xwb. Tiamsis tib hnub ntawd kuj muaj li 3,000 tus uas lub hwj huam dawb huv tau xaiv thaum lawv ua kevcai raus dej thiab. (Tes Haujlwm 2:37, 38, 41) Tiamsis tsis yog tag nrho cov Khixatia raug xaiv rau thaum lawv ua kevcai raus dej. Thaum cov Xamalis ua kevcai raus dej tau ib ntus lawd lawv mam li tau txais lub hwj huam dawb huv. (Tes Haujlwm 8:14-17) Hos Vajtswv siv nws lub hwj huam dawb huv los xaiv Kauneli-us thiab nws tsev neeg ua ntej lawv twb tsis tau ua kevcai raus dej li.​—Tes Haujlwm 10:44-48.

5. Raws li 2 Kauleethaus 1:21, 22, muaj li cas xwb thaum Yehauvas siv nws lub hwj huam dawb huv los xaiv ib tug?

⁵ Cia peb tham seb thaum Yehauvas siv nws lub hwj huam dawb huv los xaiv ib tug mus saum ntuj muaj li cas xwb? Muaj ib txhia thaum lawv raug xaiv, lawv ntseeg tsis tau tias Yehauvas tseem xaiv lawv thiab. Tej zaum lawv yuav xav tias, ‘Ua cas Vajtswv ho xaiv kuv?’ Tiamsis ib txhia ho tsis xav li ntawd. Txawm li cas los xij, thaum ib tug raug xaiv tus tubtxib Paulus hais tias: ‘Thaum nej ntseeg Yexus Khetos. Vajtswv pub lub hwj huam dawb huv rau nej raws li nws tau coglus tseg rau nej lawm. Lub hwj huam dawb huv ntawd yog lub homthawj * uas Vajtswv nias rau nej. Qhov uas Vajtswv pub lub hwj huam dawb huv rau nej ntawd yog ib qho tseemceeb uas qhia rau nej paub hais tias nej yuav tau tej uas Vajtswv tau coglus.’ (Efexus 1:13, 14) Yog li ntawd, Yehauvas siv nws lub hwj huam dawb huv los qhia kom cov Khixatia paub meej tias Yehauvas xaiv lawv lawm. Lub  hwj huam dawb huv ua “timkhawv” lossis ua puav pheej tias yav tom hauv ntej lawv yuav nyob mus ib txhis saum ntuj, tsis yog hauv ntiajteb no.​—Nyeem 2 Kauleethaus 1:21, 22.

6. Yog ib tug Khixatia raug xaiv tseg lawd, nws yuav tsum ua li cas nws thiaj yuav tau mus saum ntuj?

⁶ Yog ib tug Khixatia raug xaiv tseg lawm, puas yog nws yeej yuav tau mus saum ntuj xwb xwb li? Tsis yog. Nws yeej paub tias nws yuav tau mus saum ntuj, tiamsis nws yuav tsum nco ntsoov cov lus sam hwm no: “Cov kwvtij, nej yuav tsum muab siab rau ua haujlwm heev dua yav tas los thiaj tsimnyog qhov uas Vajtswv hu thiab xaiv nej cia lawm. Yog nej ua li ntawd, nej yuav tsis yuam kev ib zaug li.” (2 Petus 1:10) Txawm tias Vajtswv twb xaiv lawv mus saum ntuj lawm los, lawv yuav tsum muab siab npuab Vajtswv, lawv thiaj yuav tau txais nqi zog.​—Filipis 3:12-14; Henplais 3:1; Tshwmsim 2:10.

7. Ua li cas cov xaiv tseg thiaj paub tias Vajtswv caw lawv mus saum ntuj?

⁷ Ua li cas ib tug thiaj paub tias Vajtswv caw nws mus saum ntuj lawm? Paulus hais li no rau cov xaiv tseg hauv lub nroog Loos tias: ‘Nej tsis tau lub hwj huam uas coj nej mus ua qhev kom nej txhawj nej ntshai, tiamsis nej tau lub hwj huam uas coj nej los ua Vajtswv cov menyuam, kom nej muaj cuabkav hu Vajtswv hais tias, “Anpas! Kuv Txiv!” Vajtswv lub hwj huam qhia rau peb lub siab hais tias peb yog Vajtswv cov menyuam.’ (Loos 1:7; 8:15, 16) Yog li ntawd, Vajtswv siv nws lub hwj huam dawb huv los qhia kom cov xaiv tseg paub meej tias lawv raug xaiv mus saum ntuj lawm.​—1 Thexalaunikes 2:12.

8. Raws li Loos 8:16, ua cas cov xaiv tseg thiaj paub tias Vajtswv xaiv lawv tseg lawm?

⁸ Yehauvas qhia meej meej rau cov uas nws caw mus nyob saum ntuj ceeb tsheej lub siab lawm tias lawv raug xaiv lawm. (Nyeem Loos 8:16.) Puas yog cov xaiv tseg paub txhua yam thiab tsis tos leejtwg qhia dabtsi rau lawv lawm? Tsis yog. Cov xaiv tseg los yuav tsum tau kawm Vajlugkub tsis tu ncua ib yam li sawvdaws thiab. Tiamsis lawv tsis tos lwm tus qhia lawv tias Vajtswv xaiv lawv tseg lawm. Yehauvas lub hwj huam dawb huv uas yog lub zog loj tshaj plaws hauv qab ntuj khwb twb qhia rau lawv paub meej lawm tias lawv yog ib tug xaiv tseg!

9. Raws li Efexus 1:18, thaum Vajtswv xaiv ib tug mus nyob saum ntuj, muaj li cas rau nws xwb?

⁹ Vajtswv cov neeg feem coob yuav tsis to taub tias muaj li cas rau ib tug uas raug xaiv tseg lawm. Lawv tsis to taub rau qhov Vajtswv tsis tau xaiv lawv. Tsis tas li ntawd xwb, nyuaj rau peb to taub rau qhov Vajtswv tsis yog tsim tibneeg mus nyob saum ntuj tiamsis tsim kom tibneeg nyob hauv ntiajteb no mus ib txhis. (Chivkeeb 1:28; Phau Ntawv Nkauj 37:29) Txawm li ntawd los, Yehauvas tau xaiv ib txhia mus nyob saum ntuj. Thaum nws xaiv lawv, nws hloov lawv txojkev xav thiab txojkev cia siab. Twb yog vim li ntawd cov xaiv tseg thiaj muaj siab zim yuav mus nyob saum ntuj.​—Nyeem Efexus 1:18.

10. Qhov uas cov xaiv tseg “yug dua tshiab” zoo li cas tiag? (Saib cov lus hauv qab taw qhia.)

¹⁰ Thaum Vajtswv siv nws lub hwj huam dawb huv xaiv cov Khixatia, ces yog lawv “yug dua tshiab.” * Yexus hais tias yeej nyuaj heev rau cov xaiv tseg piav rau cov uas yuav nyob hauv ntiajteb no tias “yug dua tshiab” zoo li cas tiag.​—Yauhas 3:3-8.

11. Piav seb thaum ib tug Khixatia raug xaiv tseg lawm, nws txojkev xav hloov li cas xwb?

 ¹¹ Thaum ib tug Khixatia raug xaiv tseg lawm, nws txojkev xav hloov li cas xwb? Ua ntej Yehauvas xaiv cov Khixatia mus nyob saum ntuj, lawv cia siab tias lawv yuav nyob mus ib txhis hauv ntiajteb no. Lawv tos ntsoov lub caij uas Yehauvas yuav rhuav tshem txhua yam kev phem thiab muab lub ntiajteb kho ua ib lub vaj kaj siab. Tej zaum lawv twb vam tias lawv yuav tau tos txais cov nruab ze thiab tej phoojywg kwvluag uas tas sim neej lawm sawv rov los. Tiamsis thaum Vajtswv xaiv lawv mus saum ntuj, lawv txojkev xav hloov lawm. Yog vim li cas? Puas yog vim lawv tsis txaus siab nyob hauv ntiajteb mus ib txhis lawm? Puas yog lawv muaj kev nyuaj siab ntau yam, lawv thiaj xav mus nyob saum ntuj? Puas yog lawv xav tias yog nyob mus ib txhis hauv ntiajteb no ces ntshe yuav dhuav tsis xav nyob? Tsis yog. Tsuas yog tias thaum Vajtswv xaiv lawv ces nws siv nws lub hwj huam dawb huv los hloov lawv txojkev xav thiab lawv txojkev cia siab lawm xwb.

12. Raws li 1 Petus 1:3, 4, cov xaiv tseg xav li cas txog qhov uas lawv yuav tau mus nyob saum ntuj?

¹² Tej zaum tus uas raug xaiv tseg yuav xav tias tsis tsim nyog nws tau txais txoj koob hmoov uas Yehauvas pub rau nws. Txawm li ntawd los, nws yeej paub meej tias Yehauvas xaiv nws lawm. Thaum nws xav txog tias nws yuav tau mus nyob saum ntuj, yeej ua rau nws zoo siab kawg thiab nco Vajtswv txiaj ntsig heev.​—Nyeem 1 Petus 1:3, 4.

13. Puas yog tias cov xaiv tseg tsis xav ua neej nyob hauv ntiajteb no lawd?

¹³ Puas yog tias cov xaiv tseg tsis xav ua neej nyob hauv ntiajteb no lawd? Tsis yog. Tus tubtxib Paulus piav tias cov xaiv tseg lub cev zoo ib yam li lub tsev pheeb suab thiab hais tias: “Thaum peb tseem ua neej nyob no peb niaj hnub nyuaj siab kawg li. Tsis yog peb xav rhuav peb lub cev uas zoo li lub tsev pheebsuab, tiamsis peb xav mus nyob lub tsev uas Vajtswv ua saum ntuj ceebtsheej rau peb nyob, kom peb lub cev uas txawj tuag hloov ua lub uas tsis txawj tuag.” (2 Kauleethaus 5:4) Yog li ntawd, yeej tsis yog tias cov xaiv tseg tsis xav ua neej nyob hauv ntiajteb no lawm. Lawv yeej muaj siab hlo ua neej nrog lawv tsev neeg thiab lawv tej phoojywg kwvluag thiab nrog lawv teev tiam Yehauvas ua ke. Txawm li ntawd los, lawv yeej nco ntsoov tias Yehauvas tau xaiv lawv mus nyob saum ntuj lawm.​—1 Kauleethaus 15:53; 2 Petus 1:4; 1 Yauhas 3:2, 3; Tshwmsim 20:6.

14. Yog ib tug kub siab lug ua Yehauvas tes haujlwm lossis pom Yehauvas txhais tes pab lawv, puas yog tias lub hwj huam dawb huv xaiv lawv lawm?

¹⁴ Tej zaum koj yuav xav tias Yehauvas lub hwj huam dawb huv puas tau xaiv koj? Yog koj xav paub ces sim xav seb: Koj puas mob siab ua Yehauvas tes haujlwm? Koj puas kub siab lug tshaj tawm txoj xov zoo? Koj puas nyiam tshawb nrhiav Vajlugkub thiab kawm txhua yam uas “nyob tob tob hauv Vajtswv”? (1 Kauleethaus 2:10, TT ) Koj puas pom tias Yehauvas foom koob hmoov rau koj thaum koj mus tshaj tawm txoj xov zoo? Koj puas hlub tibneeg heev thiab xav tias koj yuav tsum pab lawv los paub Yehauvas? Hauv koj lub neej, koj puas pom Yehauvas txhais tes pab koj? Yog koj teb tau tag nrho cov lus nug no, puas yog tias Vajtswv xaiv koj lawd? Tsis yog. Vim li cas ho tsis yog? Rau qhov Vajtswv cov tub qhe txhua tus puavleej xav li no. Txawm yog cov yuav nyob hauv ntiajteb no lossis cov uas yuav mus nyob saum ntuj los Vajtswv Yehauvas yeej pub tau nws lub hwj huam dawb huv rau txhua tus ib yam nkaus. Yog koj tsis paub meej tias koj yog ib tug xaiv tseg ces qhia tias Vajtswv tsis tau xaiv  koj. Cov uas Yehauvas xaiv tseg lawd yeej paub meej meej tias Vajtswv xaiv lawv lawm tiag!

15. Ua cas thiaj tsis yog txhua tus uas tau lub hwj huam dawb huv raug xaiv mus nyob saum ntuj?

¹⁵ Hauv phau Vajlugkub, muaj coob tus uas Yehauvas pub nws lub hwj huam dawb huv rau tiamsis lawv tsis yog cov uas yuav tau mus nyob saum ntuj. Daviv yog ib tug uas tau Vajtswv lub hwj huam dawb huv. (1 Xamuyees 16:13) Lub hwj huam dawb huv pab kom Daviv to taub tej yam tob tob txog Yehauvas thiab pab nws sau ntau zaj hauv phau Vajlugkub. (Malakaus 12:36) Txawm li ntawd los, tus tubtxib Petus hais tias Daviv “tsis tau mus saum ntuj ceebtsheej.” (Tes Haujlwm 2:34) Yauhas tus uas muab neeg ua kevcai raus dej los, tau lub hwj huam dawb huv “puv npo.” (Lukas 1:13-16) Yexus hais tias “tsis muaj ib tug muaj hwjchim npaum li Yauhas” tiamsis Yexus hais ntxiv tias Yauhas yuav tsis tau mus saum ntuj. (Mathais 11:10, 11) Yehauvas pub nws lub hwj huam dawb huv los pab nws cov tub qhe ua ntau yam haujlwm phimhwj tiamsis nws tsis tau siv nws lub hwj huam los xaiv lawv mus nyob saum ntuj. Puas yog lawv tsis muaj kev ntseeg npaum li cov uas yuav mus saum ntuj, Vajtswv thiaj tsis xaiv lawv? Tsis yog. Qhov no tsuas qhia tias Yehauvas yuav tsa lawv ciaj sawv rov los nyob hauv lub Vaj Kaj Siab hauv ntiajteb no xwb.​—Yauhas 5:28, 29; Tes Haujlwm 24:15.

16. Vajtswv cov tub qhe feem coob muaj kev cia siab li cas?

¹⁶ Niaj hnub no Vajtswv cov tub qhe feem coob tsis raug xaiv mus saum ntuj ib yam li Anplahas, Xalas, Daviv, Yauhas tus uas muab neeg ua kevcai raus dej, thiab coob leej ntau tus hauv phau Vajlugkub. Lawv cia siab tias thaum Vajtswv lub Nceeg Vaj kav, lawv yuav tau nyob hauv ntiajteb no.​—Henplais 11:10.

17. Peb yuav teb cov lus nug twg rau zaj tom ntej?

¹⁷ Niaj hnub nimno tseem tshuav cov xaiv tseg ib txhia nrog peb nyob. (Tshwmsim 12:17) Yog li ntawd tej zaum peb xav paub seb: Cov xaiv tseg yuav tsum coj li cas? Thaum txog hmo ua kevcai nco txog Yexus txojkev tuag, yog muaj ib tug hauv koj lub koom txoos pib noj lub ncuav thiab haus khob cawv, koj yuav saib nws zoo li cas? Thiab puas tsim nyog peb txhawj yog tias cov uas noj lub ncuav thiab haus khob cawv coob zuj zus tuaj? Peb yuav teb cov lus nug no rau zaj tom ntej.