Henplais 5:12 txhawb kom peb “ua tau xibhwb qhia.” Yehauvas yog tus Xibhwb uas txawj qhia tshaj plaws, los nws tseem nqua hu peb mus qhia kom tibneeg los paub txog nws thiab. Tes haujlwm qhia qhov tseeb txog Yehauvas rau peb tsev neeg, lub koom txoos, thiab tej neeg zej zos, yog ib tes tseem ceeb kawg nkaus li. Yuav ua li cas peb thiaj txawj qhia?

Tus tubtxib Povlauj sau mus rau Timaute tias nws yuav tsum xyaum li no thiaj txawj qhia: “Cia li kub siab nyeem Vajtswv txojlus rau sawvdaws mloog, thiab txhawb lawv lub zog thiab qhuab qhia mus txog thaum kuv tuaj.” Povlauj kuj hais ntxiv tias: “Yog koj ua li no koj yuav cawm tau koj tus kheej thiab cov uas mloog koj qhia kom dim.” (1Tmt. 4:13, 16) Txoj xov zoo uas peb tshaj tawm yuav cawm tau tibneeg txojsia. Tsim nyog peb xyaum kom peb yimhuab txawj nyeem txawj qhia. Phau ntawv no yuav pab koj xyaum ntxiv. Koj yuav pom cov cim zoo li no:

Yehauvas yog “tus xibhwb” uas txawj qhia tshaj plaws. (Yxy. 30:20) Phau ntawv no yuav pab kom peb hajyam txawj nyeem txawj qhia. Tiamsis nco ntsoov tias txoj xov zoo yog Yehauvas li. Nws thiaj yog tus uas yuav rub tau tibneeg los paub nws xwb. (Yh. 6:44) Yog li ntawd, peb yuav tsum thov Yehauvas tsis tu ncua kom nws pub lub hwj huam dawb huv pab peb. Thaum peb qhia tibneeg cia peb siv Vajtswv Txojlus tsis tseg, luag thiaj pom tias lub tswvyim ntawd yog Vajtswv lub. Peb yeej xav txhawb kom tibneeg muaj lub siab hlub Yehauvas.

Tsis muaj ib txoj xov uas yuav tshwj xeeb tshaj no lawm. Vajtswv nqua hu koj mus tshaj tawm txoj xov zoo rau noob neej. Peb tso siab tias koj yuav vam khom “lub zog uas Vajtswv pub,” koj thiaj ua tau tes haujlwm no tiav.​—1Pt. 4:11.

Cov uas nrog nej qhia,

Pab Uas Ntaus Thawj ntawm Yehauvas Cov Timkhawv