Halin sang gintukod ang Cristianong kongregasyon sang unang siglo, nangin importante gid nga bahin sa kasaysayan sang mga katawhan ni Jehova ang Greece. Gani, sang 2025, gindumdom sang mga Saksi ni Jehova ang pila ka importante nga hitabo sa sini nga pungsod.

Sang nagligad nga isa ka gatos ka tuig: Halin sang Abril 23 asta 26, 1925, ginhiwat sang mga Saksi ni Jehova (nga ginatawag anay nga mga Estudyante sang Biblia) ang ila una nga asembleya sa Athens, Greece. Halos 200 ka tawo ang nagtambong sa sina nga asembleya kag 68 ang nabawtismuhan. Pagligad sang apat ka bulan, nagdaug sa korte sa una nga tion ang aton mga kauturan sa Greece. Bangod wala ginpasugtan sang konstitusyon didto ang pagpangumbertir sang iban sa lain nga relihion, ginkumpiskar sang pulis ang aton mga publikasyon kag gin-ban ang aton pagbantala nga hilikuton. Pero, sang Agosto 27, ang Athens Court of Misdemeanors nagdesisyon pabor sa aton mga kauturan kag ginkilala ang ila kinamatarong sa pagbantala. Nagsiling ini nga wala ginakontra sang aton mga publikasyon ang Konstitusyon, kundi “nagatudlo ini sang mga prinsipio sa moral para makatuon ang mga tawo.”

Sang nagligad nga singkuenta ka tuig: Sang Hunyo 3, 1975, ginkilala sang Greek Council of State ang mga Saksi ni Jehova nga “isa ka kilala nga relihion.” Ini nga desisyon ginpatuman pagkatapos sang madamo nga tinuig nga paghingabot kag pagpamatok sa aton pagbantala nga hilikuton sa tion nga may World War II, may civil war, kag may duha ka diktador nga naggahom. May ginsugid ang 84 anyos nga si sister Voula Kalaitzi parte sa iya ginbatas nga mga kabudlayan sang naggahom ang ikaduha nga diktador. Nagsiling sia: “Sina nga tion, kinahanglan namon malagyo sa mga kagulangan kag hiwaton ang amon mga miting sing sekreto.” Wala madugay, may bag-o nga gobierno ang nagbulos. Sang ginpatuman ang desisyon sang Hunyo 1975, nag-organisar dayon ang aton mga utod sang una nga asembleya sang mga Saksi ni Jehova sa bilog nga Greece. Halin sang Hulyo 10 asta 13, mga 19,200 ang nagtambong sa programa sa Apollon Stadium sa Athens, kag 301 ang nabawtismuhan. Si Voula nagsiling: “Sang hilway na kami nga magtipon sa publiko, grabe gid ang amon kalipay. Indi ko gid mapunggan ang akon mga luha!”

Subong, sobra 27,000 ka mga kauturan sa Greece ang nalipay bangod hilway na sila nga makatipon kag masugid sa iban ang mensahe sang Biblia. Nagapasalamat gid kita nga ginapakamaayo ni Jehova ang ila kakugi kag determinasyon nga ‘magtindog sing malig-on sa ila pagtuo.’—1 Corinto 16:13.