Plọn Ovi Towe Lẹ

Mẹhe Wlanwe Gando Jesu Go Lẹ

BE HOMẸ towe nọ hùn nado hiawe to pọmẹ gando Jesu go ya?— a E nọ paṣa mẹdelẹ nado mọdọ Jesu ma wlan depope to owe Biblu tọn lẹ mẹ. Etomọṣo, wekantọ Biblu tọn ṣinatọ̀n wẹ dọho susu gandego. Omẹ ehe lẹpo wẹ nọgbẹ̀ to ojlẹ Jesu tọn mẹ, podọ yé dọ nuhe e plọnmẹ lẹ na mí. Be hiẹ sọgan slẹ yinkọ omẹ ṣinatọ̀n lọ lẹ tọn ya?— Yewlẹ wẹ Matiu, Malku, Luku gọna Johanu. Omẹ ẹnẹ he pò lẹ wẹ Pita, Jakọbu, Juda po Paulu po. Etẹwẹ a yọnẹn gando wekantọ Biblu tọn ehelẹ go?—

Gbọ mí ni dọhodo wekantọ atọ̀n he sọ tin to apọsteli 12 Jesu tọn lẹ mẹ ji whẹ́. Be hiẹ yọ́n yinkọ yetọn ya?— Pita, Johanu po Matiu po. Owe awe wẹ Pita wlan hlan Klistiani hatọ lẹ. E dọhona yé gando nuhe e yọnẹn dọ Jesu wà bo dọ lẹ go. Hùn Biblu towe do 2 Pita 1:16-18, bo hia zẹẹmẹ Pita tọn gando lehe e sè Jehovah Jiwheyẹwhe to hodọna Jesu sọn olọn mẹ do go.—Matiu 17:5.

Owe Biblu tọn atọ́n wẹ apọsteli Johanu wlan. Ewọ wẹ to apá na Jesu to núdùdù godo tọn he devi lẹ dù hẹ Oklunọ yetọn whenu. Johanu sọ tin to Jesu dè to whenuena e kú. (Johanu 13:23-26; 19:26) Johanu wlan dopo to kandai ẹnẹ Biblu tọn he dọhodo gbẹzan Jesu tọn ji bo nọ yin yiylọdọ Owe wẹndagbe tọn lẹ mẹ. E sọ wlan Osọhia he Jesu na ẹn gọna wekanhlanmẹ atọ̀n he yinkọ etọn yin didó na to Biblu mẹ lẹ. (Osọhia 1:1) Wekantọ Biblu tọn atọ̀ntọ he wá lẹzun apọsteli Jesu tọn wẹ Matiu. Takuẹ-ṣinyantọ de wẹ ewọ yin dai.

Wekantọ Biblu tọn awe devo yọ́n Jesu to aliho vonọtaun de mẹ. Yewlẹ wẹ nọvisunnu-daa etọn lẹ, he sọ yin ovi Josẹfu po Malia po tọn lẹ. (Matiu 13:55) Yé ma yin devi Jesu tọn lẹ to tintan whenu. Yé tlẹ lẹndọ e hùn tadu na yẹwhehodidọ zohunhun tọn etọn wutu. (Malku 3:21) Mẹnu lẹ wẹ nọvisunnu etọn ehelẹ?— Jakọbu yin dopo to yé mẹ. Ewọ wẹ wlan owe Biblu tọn he nọ yin Jakọbu. Omẹ awetọ wẹ Juda. Ewọ wẹ wlan owe Biblu tọn he nọ yin Juda.—Juda 1.

Omẹ awe devo he wlanwe gando gbẹzan Jesu tọn go wẹ Malku po Luku po. Onọ̀ Malku tọn he nọ yin Malia, tindo owhé daho de to Jelusalẹm, fie Klistiani dowhenu tọn lẹ nọ pli te gọna apọsteli Pita. (Owalọ lẹ 12:11, 12) Owhe delẹ jẹnukọn, to ozán he mẹ Jesu dù Juwayi godo tọn hẹ apọsteli etọn lẹ te, e yọnbasi dọ Malku hodo yé to whenue yé yì jipa Gẹtsemani tọn mẹ. To whenue awhànfuntọ lẹ wle Jesu, yé tẹnpọn nado wle Malku, ṣigba e họnyi bo jo awugbó etọn do.—Malku 14:51, 52.

Doto he sewé taun de wẹ Luku yin, mẹhe e yọnbasi dọ e wá lẹzun dopo to devi lẹ mẹ to okú Jesu tọn godo. E basi dodinnanu kitokito do gbẹzan Jesu tọn ji bo wlan otàn he họnwun bosọ sọgbe de gandego. To godo mẹ, e wá lẹzun gbẹdohẹmẹtọ tomẹyitọ apọsteli Paulu tọn bosọ wlan owe Biblu tọn he nọ yin Owalọ lẹ.—Luku 1:1-3; Owalọ lẹ 1:1.

 Paulu wẹ wekantọ Biblu tọn ṣinatọ̀ntọ he wlanwe gando Jesu go. E plọnnu sọn Gamalieli osẹ́n plọnmẹtọ nukundeji lọ dè. Na Paulu he nọ yin yiylọdọ Saulu to whenẹnu yin pinplọn whẹ́n gbọn Falesi lẹ dali wutu, e gbẹwanna devi Jesu tọn lẹ bo nọ doalọ to okú yetọn mẹ. (Owalọ lẹ 7:58–8:3; 22:1-5; 26:4, 5) Be a yọ́n lehe Paulu wá plọn nugbo lọ gando Jesu go do ya?—

Paulu to aliji jei Damasku nado yì wle devi Jesu tọn lẹ to whenue hinhọ́n sisẹ́ de tọ́n sọn olọn mẹ bo tọ́nnukunna ẹn to ajiji mẹ. E sè ogbè de he kanse dọmọ: “Saulu, Saulu, naegbọn hiẹ do to homẹkẹndo mi?” Ogbè Jesu tọn wẹ! E dọna Paulu nado yì Damasku. Enẹgodo, Jesu deanana devi etọn Ananias nado yì dọho hẹ Paulu, podọ Paulu lẹzun devi Jesu tọn. (Owalọ lẹ 9:1-18) Owe Biblu tọn 14 wẹ Paulu wlan, bẹsọn Lomunu lẹ kakajẹ Heblu lẹ.

Be hiẹ ko jẹ owe Biblu tọn he dọho gando Jesu go lẹ hia ji kavi ko biọ to mẹde si nado nọ hia yé na we ya?— Dopo to nuhe yọ́n hugan he a sọgan wà to gbẹ̀mẹ lẹ mẹ wẹ nado jẹ nuhe Biblu dọ gando Jesu go lẹ hia ji todin he a gbẹ́ pò to ovu.

[Nudọnamẹ odò tọn]

Kanbiọ Lẹ:

▪ Apọsteli Jesu tọn tẹlẹ wẹ wá lẹzun wekantọ Biblu tọn lẹ?

▪ Wekantọ Biblu tọn awe tẹlẹ wẹ yin nọvisunnu-daa Jesu tọn lẹ?

▪ Naegbọn Malku sọgan ko yọ́n Jesu, ṣigba naegbọn e sọgan vẹawu dọ Luku ni yọ́n ẹn?

▪ Nawẹ Paulu wá lẹzun devi Jesu tọn gbọn?

[Yẹdide lẹ to weda 25]

Juda

Malku

Pita

Matiu

Paulu

Jakọbu

Luku

Johanu