Malku 14:1-72
-
Yẹwhenọ lẹ blasé nado hù Jesu (1, 2)
-
Amisisa yin kinkọ̀n do Jesu ji (3-9)
-
Juda de Jesu hia (10, 11)
-
Juwayi godo tọn (12-21)
-
Tenu-Núdùdù Oklunọ tọn (22-26)
-
E yin didọ dọ Pita na mọ́n Jesu (27-31)
-
Jesu hodẹ̀ to Gẹtsemani (32-42)
-
Jesu yin wiwle (43-52)
-
To Whẹdatẹn Daho Ju lẹ tọn nukọn (53-65)
-
Pita mọ́n Jesu (66-72)
14 Todin, Juwayi+ po Hùnwhẹ Akla Madotọ́n tọn+ po pò azán awe.+ Yẹwhenọgán lẹ po wekantọ lẹ po sọ to aliho de dín nado wle e gbọn ayiha gigẹdẹ* dali bo hù i;+
2 na yé to didọmọ: “E ma dona yin to hùnwhẹ lọ whenu; vlavo zingidi nikaa fọ́n to gbẹtọ lẹ ṣẹnṣẹn.”
3 Podọ to whenue e to Bẹtani bo to núdù* to owhé Simọni pòtọnọ lọ tọn gbè, nawe de wá bo hẹn ogo alabasta tọn* de he mẹ amisisa owán gblingblinnọ de, yèdọ nadi akú he vẹahi taun tin te. Nawe lọ wẹ́n okọ̀ na ogo alabasta tọn lọ bo jẹ kinkọ̀n do ota na ẹn ji.+
4 Enẹwutu, mẹdelẹ yí homẹgble do dọna ode awetọ dọmọ: “Naegbọn amisisa owán gblingblinnọ ehe do yin hinhẹngú?
5 Na amisisa owán gblingblinnọ ehe sọgan ko yin sisà yin nuhe hugan denali* 300 bọ akuẹ lọ na yin nina wamọnọ lẹ!” Yé sọ gblehomẹ sinsinyẹn do* nawe lọ go.
6 Ṣigba, Jesu dọmọ: “Mì jo nawe lọ do. Naegbọn mì to tintẹnpọn nado dotukla ẹ? Azọ́n dagbe de wẹ e wà na mi.+
7 Na wamọnọ lẹ tin to mì dè to whepoponu,+ podọ mì sọgan wà dagbe na yé to whedepopenu he mì jlo, ṣigba yẹn ma na tin to mì dè to whepoponu.+
8 Ewọ wà nuhe go e pé; e kọ̀n amisisa owán gblingblinnọ lọ do agbasa ṣie go nado wleawudaina mi jẹnukọnna ṣiọdidi ṣie.+
9 Nugbo wẹ yẹn dọna mì dọ, fidepope he yẹwheho wẹndagbe lọ tọn yin didọ te to aihọn lọ lẹpo mẹ,+ nuhe nawe ehe wà lọsu na yin didọ ga nado nọ flin in.”+
10 Podọ Juda Iskaliọti, dopo to Omẹ Wiawe lẹ mẹ tọ́nyi yẹwhenọgán lẹ dè nado sọgan de e hia na yé.+
11 Whenue yé sè ehe, homẹ yetọn hùn bọ yé dopagbe nado na ẹn fataka-kuẹ.+ Enẹwutu, e jẹ dotẹnmẹ hundote de dín ji nado de e hia.
12 Todin, to azán tintan Hùnwhẹ Akla Madotọ́n tọn+ gbè, yèdọ whenue avọ́sinsan Juwayi tọn lọ nọ yin bibasi to aṣa-liho,+ devi etọn lẹ dọna ẹn dọmọ: “Fie wẹ hiẹ jlo dọ mí ni wleawudaina we do nado dù Juwayi?”+
13 Enẹwutu, e do awe to devi etọn lẹ mẹ hlan bo dọna yé dọmọ: “Mì yì tòdaho lọ mẹ, podọ dawe de he hẹn tọ̀zẹ́n osin tọn de na pé mì. Mì hodo e,+
14 podọ fidepope he e biọ, mì dọna klunọ whédo lọ tọn dọ, ‘Mẹplọntọ lọ dọmọ: “Fie wẹ abò jonọyiyi tọn lọ he mẹ yẹn sọgan dù Juwayi hẹ devi ṣie lẹ te?”’
15 E nasọ do abò aga tọn daho de hia mì, he ko yin jijlado bo yin awú etọn wle dai. Finẹ wẹ mì ni wleawudaina mí do.”
16 Enẹwutu, devi lọ lẹ tọ́nyi, bo biọ tòdaho lọ mẹ bosọ mọ kẹdẹdile e ko dọna yé do, yé sọ wleawudaina Juwayi lọ.
17 To whenue owhè ko jai, e wá po Omẹ Wiawe lẹ po.+
18 Podọ dile yé jagla to tafo kọ̀n bo to núdù, Jesu dọmọ: “Nugbo wẹ yẹn dọna mì dọ, dopo to mì mẹ, he to núdù hẹ mi, na de mi hia.”+
19 Enẹwutu, yé jẹ awubla ji bọ dopodopo yetọn nọ dọna ẹn dọmọ: “E ma yin yẹn, kavi yẹn wẹ ya?”
20 E dọna yé dọmọ: “Dopo to Omẹ Wiawe lẹ mẹ, he to alọ do agbán mẹ hẹ mi wẹ.+
21 Na Visunnu gbẹtọ tọn jei, kẹdẹdile yè ko kanwe etọn gando e go do, ṣigba dindọn hlan dawe enẹ he de Visunnu gbẹtọ tọn hia!+ E na ko pọnte hugan na dawe enẹ eyin e ma ko yin jiji.”+
22 Podọ dile yé gbẹ́ pò to núdù, e yí akla de, bo dona bosọ wẹ́n ẹn, bo yí i na yé bosọ dọmọ: “Mì yí; ehe nọtena agbasa ṣie.”+
23 E sọ yí kọfo de bo dopẹ́ bosọ yí i na yé, yemẹpo sọ nù sọn e mẹ.+
24 Podọ e dọna yé dọmọ: “Ehe nọtena ‘ohùn ṣie+ he yin alẹnu lọ tọn,’+ he na yin kinkọndai do ota mẹsusu tọn mẹ.+
25 Nugbo wẹ yẹn dọna mì dọ, yẹn ma nasọ nù sinsẹ́n ovẹn tọn hẹ mì to aliho depope mẹ ba kakajẹ azán enẹ gbè whenue yẹn na nù yọyọ etọn hẹ mì to Ahọluduta Jiwheyẹwhe tọn mẹ.”
26 To godo mẹ, to ohàn pipà tọn* lẹ jiji godo, yé tọ́nyi Osó Olivie tọn ji.+
27 Jesu sọ dọna yé dọmọ: “Mìmẹpo wẹ na dahli, na e ko yin kinkandai dọ: ‘Yẹn na linú lẹngbọhọtọ lọ,+ bọ lẹngbọ lẹ na gbàdo.’+
28 Ṣigba, to whenue yẹn na ko yin finfọn godo, yẹn na jẹnukọnna mì yì Galili.”+
29 Amọ́, Pita dọna ẹn dọmọ: “Eyin mẹhe pò lẹpo tlẹ dahli, yẹn ma na wàmọ.”+
30 Enẹwutu, Jesu dọna ẹn dọmọ: “Nugbo wẹ yẹn dọna we dọ, to egbé, mọwẹ, to ozán ehe mẹ, whẹpo koklo na dosé whla awe, hiẹ na mọ́n mi whla atọ̀n.”+
31 Ṣigba, e tẹkudeji dọmọ: “Eyin etlẹ biọ dọ yẹn ni kú po hiẹ po, yẹn ma na mọ́n we gbede.” Humọ, mẹhe pò lẹpo jẹ nudopolọ dọ ji.+
32 Enẹwutu, yé wá fihe nọ yin Gẹtsemani bọ e dọna devi etọn lẹ dọmọ: “Mì sinai tofi, na yẹn ni yì hodẹ̀.”+
33 Podọ e plan Pita, Jakọbu po Johanu po hẹn,+ e sọ biọ ayimajai* mẹ sinsinyẹn bo yin tuklado badabada.
34 E sọ dọna yé dọmọ: “Yẹn* to awubla tlala,+ yèdọ kakajẹ okú. Mì nọfi bo nọ nukle.”+
35 Podọ to whenue e sẹyì nukọn vude, e họ́jai do kọmẹ bo jẹ dẹ̀ho ji dọ eyin e yọnbasi, gànhiho ehe ni juwayi sọn emi dè.
36 E sọ dọmọ: “Abba,* Otọ́,+ nulẹpo wẹ yọnbasi na we; de kọfo ehe sọn dè e. Ṣogan, e ma yin nuhe yẹn jlo, ṣigba nuhe hiẹ jlo.”+
37 E sọ lẹkọwa bo mọ yé to amlọndọ, bọ e dọna Pita dọmọ: “Simọni, amlọndọ wẹ a te ya? Be hiẹ ma tindo huhlọn nado gbọṣi nukle na gànhiho dopo wẹ?+
38 Mì gbọṣi nukle bo nọ hodẹ̀ to whepoponu, na mì nikaa biọ whlepọn mẹ.+ Nugbo wẹ dọ gbigbọ to jijlo taun, ṣigba agbasa yin madogánnọ.”+
39 E sọ vọ́ gọyì bo hodẹ̀, bosọ vọ́ nudopolọ dọ.+
40 Podọ e sọ vọ́ lẹkọwa bo mọ yé to amlọndọ, na nukun yetọn lẹ pẹ̀n na amlọn, enẹwutu yé ma yọ́n nuhe yé na gblọnna ẹn.
41 E sọ vọ́ lẹkọwa whla atọ̀ntọ bo dọna yé dọmọ: “To ojlẹ taidi ehe nkọ mẹ, mìwlẹ to amlọndọ bosọ to gbigbọjẹ! E pé! Gànhiho lọ ko wá!+ Mì pọ́n! Visunnu gbẹtọ tọn to yinyin didehia do alọ ylandonọ lẹ tọn mẹ.
42 Mì fọ́n bo gbọ mí ni yì. Mì pọ́n! Mẹdehiatọ ṣie ko dọnsẹpọ.”+
43 Podọ to afọdopolọji, dile e gbẹ́ pò to hodọ, Juda, dopo to Omẹ Wiawe lẹ mẹ wá bọ gbẹtọgun de hodo e sọn yẹwhenọgán lẹ, wekantọ lẹ po mẹho lẹ po dè bọ yé hẹn ohí lẹ po aglọpò lẹ po.+
44 Todin, mẹdehiatọ etọn ko na yé ohia de he ji yé kọngbedopọ do dọmọ: “Mẹdepope he yẹn donùnùgo na, mẹlọ wẹ; mì wle e bo plan ẹn sọyi, mì dike e họnyi blo.”
45 E sọ wá tlọlọ bo dọnsẹpọ ẹ bosọ dọmọ, “Labi!” bo donùnùgo na ẹn po zohunhun po.
46 Enẹwutu, yé wle e.
47 Ṣigba, dopo to mẹhe to ote to finẹ lẹ mẹ sún ohí etọn bo hú afanumẹ yẹwhenọ daho lọ tọn bosọ pà otó na ẹn.+
48 Ṣigba, Jesu dọna yé dọmọ: “Be yẹn wẹ mìwlẹ tọ́n wá wiwle gbé bo hẹn ohí lẹ po aglọpò lẹ po taidi mẹhe ja jaguda de dè ya?+
49 Egbesọegbesọ wẹ yẹn tin po mì po bo to mẹplọn to tẹmpli mẹ,+ ṣogan mìwlẹ ma wle mi. Ṣigba, ehe yinmọ na Owe-wiwe lẹ nido sọgan yin hinhẹndi.”+
50 Devi lẹpo sọ jo e do bo họnyi.+
51 Ṣigba, dẹpẹ de he do awù alavọ tọn kẹdẹ jẹ hihodo e ji afọsu-afọsi, yé sọ tẹnpọn nado wle e,
52 ṣigba e jo awugbó alavọ tọn etọn do bo họnyi to omẹ́.*
53 Todin, yé plan Jesu yì yẹwhenọ daho lọ dè,+ bọ yẹwhenọgán lẹpo po mẹho lẹ po gọna wekantọ lẹ sọ pli.+
54 Ṣigba, Pita to hihodo e to aganu kaka yì awánu yẹwhenọ daho lọ tọn; ewọ sọ sinai hẹ devizọnwatọ whégbè tọn lẹ bo to miyọ́n hú.+
55 Todin, yẹwhenọgán lẹ po hagbẹ Whẹdatẹn Daho Ju lẹ tọn* lọ pete po to kunnudenu dín sọta Jesu nado sọgan hù i, ṣigba yé ma to depope mọ.+
56 Na nugbo tọn, mẹsusu to kunnu lalo de sọta ẹ,+ ṣigba kunnudenu yetọn lẹ ma sọgbe hẹ yede.
57 Humọ, mẹdelẹ to finfọn bo to kunnu lalo de sọta ẹ, bosọ to didọmọ:
58 “Mí sè bọ e dọ dọ, ‘Yẹn na họ́ tẹmpli ehe, he yin bibasi po alọ po bo na gbá devo he ma yin bibasi po alọ po to azán atọ̀n gblamẹ.’”+
59 Ṣigba, kunnudenu yetọn ehelẹ lọsu ma sọgbe hẹ yede.
60 Whenẹnu, yẹwhenọ daho lọ fọnṣite to ṣẹnṣẹn yetọn bo kanbiọ Jesu dọmọ: “Hiẹ ma gblọn nudepope wẹ? Etẹwẹ hiẹ lọsu lẹn gando kunnu he omẹ ehelẹ to dide sọta we go?”+
61 Ṣigba, e ma kẹnù bo masọ gblọn nudepope.+ Whladopo dogọ, yẹwhenọ daho lọ jẹ hokanse e ji bo dọna ẹn dọmọ: “Be hiẹ wẹ Klisti lọ, yèdọ Visunnu Donanọ lọ tọn ya?”
62 To whenẹnu, Jesu dọmọ: “Yẹn wẹ; podọ mìwlẹ na mọ Visunnu gbẹtọ tọn+ to aisinsin to adusilọ+ huhlọn tọn mẹ bọ e nasọ ja to aslọ olọn tọn lẹ mẹ.”+
63 Enẹwutu, yẹwhenọ daho lọ tlẹ́n awù etọn lẹ bo dọmọ: “Etẹwẹ mí gbẹ́ pò to kunnudetọ lẹ dín na?+
64 Mì ko sè nùzinzan lọ. Etẹwẹ yin nudide mìtọn?”* Yemẹpo gblewhẹdo e dọ e jẹna okú.+
65 Mẹdelẹ sọ jẹ tántún do e go ji+ bo nọ ṣinyọnnudo nukunmẹ na ẹn bosọ nọ lì akotokún in bo nọ dọna ẹn dọmọ: “Dọ dọdai!” Podọ to whenue devizọnwatọ whẹdatẹn tọn lẹ ko hotómẹ na ẹn godo, yé plan ẹn yì.+
66 Todin, to whenue Pita tin to odò to awánu, dopo to deviyọnnu yẹwhenọ daho lọ tọn lẹ mẹ wá.+
67 To whenue e mọ Pita to miyọ́n hú, e pọ́n ẹn tlintlin bo dọmọ: “Hiẹ lọsu ga nọ zọnhẹ Nazalẹtinu lọ, yèdọ Jesu ehe.”
68 Ṣigba, e mọ́n bo dọmọ: “Yẹn ma yọ́n ewọ mọjanwẹ yẹn masọ mọnukunnujẹ nuhe dọ a te mẹ do niyẹn,” ewọ sọ tọ́njẹgbonu dedo họngbo ji.
69 Deviyọnnu lọ mọ ẹn to finẹ bosọ vọ́ jẹ didọna mẹhe to ote to finẹ lẹ ji dọmọ: “Dopo to yé mẹ die.”
70 Ewọ sọ vọ́ jẹ mimọ́n ji. Podọ to ojlẹ vude godo, mẹhe to ote to finẹ lẹ sọ vọ́ jẹ didọna Pita ji dọmọ: “Matin ayihaawe, hiẹ yin dopo to yé mẹ, na, nado dọ hójọhó, Galilinu de wẹ hiẹ.”
71 Ṣigba, e jẹ dẹ̀hodo ede ji bosọ jẹ whiwhle ji dọmọ: “Yẹn ma yọ́n dawe he hodọ mì te ehe!”
72 To afọdopolọji, koklo dosé whla awetọ,+ Pita sọ flin nuhe Jesu ko dọna ẹn dọmọ: “Whẹpo koklo na dosé whla awe, hiẹ na mọ́n mi whla atọ̀n.”+ E sọ blawu bo jẹ avivi ji.
Nudọnamẹ Odò Tọn
^ Kavi “ayiha wintinwintin.”
^ Kavi “jagla to tafo kọ̀n.”
^ Enẹ wẹ, ogo pẹvide he yè nọ yí zannu he nọ yin mimọ sẹpọ Alabastron to Egipti do basi.
^ Kavi “yí homẹgble do dọhona; wadán do.”
^ Kavi “salmu.”
^ Kavi “bẹwlu.”
^ Kavi “Alindọn ṣie.”
^ Hogbe Heblugbe kavi Alamaikigbe tọn de he zẹẹmẹdo “Otọ́ E.”
^ Kavi “to awù odò tọn kẹdẹ mẹ.”
^ Kavi “Etẹwẹ mì lẹn?”
