Plọn Ovi Towe Lẹ

Lebeka Jlo Na Hẹn Homẹ Jehovah Tọn Hùn

YINKỌ lọ Lebeka nọ saba yin didona ovi susu to awà voovo lẹ ji to egbehe. Be a yọ́n mẹde he nọ yinmọ ya?— a Lebeka yin omẹ nukundeji de to Biblu mẹ, yèdọ owe he yin yinyọnẹn hugan to aihọn mẹ. Etẹwẹ a yọnẹn gando Lebeka go?— Mí dona plọnnu gando ewọ go na apajlẹ etọn sọgan gọalọna mí nado sẹ̀n Jiwheyẹwhe nugbo lọ, Jehovah.

Lebeka wẹ yin yọnnu awetọ he go Biblu donù taidi sinsẹ̀n-basitọ nugbo Jehovah tọn. Be a yọ́n mẹhe yin yọnnu tintan lọ ya?— Sala, asi Ablaham tọn wẹ. Sala ko poyọnho whẹpo do ji Isaki—yèdọ ovi dopo gee he e tindo. Todin, mì gbọ mí ni pọ́n lehe Lebeka tindo ojlo nado hẹn homẹ Jehovah tọn hùn do, podọ lehe ewọ wá mọ Isaki he wá lẹzun asu etọn gbọn.

Owhe 60 linlán ko juwayi sọn whenue Jiwheyẹwhe dọna Ablaham po Sala po nado tọ́n sọn Halani bo yì aigba Kenani tọn ji. Whenuena Ablaham po Sala po poyọnho taun, Jiwheyẹwhe dopagbe na yé dọ yé na jivi de he na nọ yin yiylọdọ Isaki. Dile a sọgan ko lẹn do, mẹjitọ Isaki tọn lẹ yiwanna ẹn tlala. Whenue Sala kú to owhe 127 mẹho yinyin mẹ, visunnu etọn Isaki ko whẹ́n podọ okú onọ̀ etọn tọn hẹn ẹn blawu taun. Ablaham ma jlo dọ Isaki ni dà asi sọn yọnnu Kenani tọn lẹ mẹ na yé ma nọ sẹ̀n Jehovah wutu. Enẹwutu e do devizọnwatọ etọn, vlavo Eliezẹli, hlan nado dín asi de na Isaki sọn hẹnnumẹ Ablaham tọn lẹ mẹ to Halani, he dẹn na nuhe hugan kilomẹtlu 800!—Gẹnẹsisi 12:4, 5; 15:2; 17:17, 19; 23:1.

 To nukọn mẹ, Eliezẹli wá Halani po devizọnwatọ Ablaham tọn devo lẹ po gọna kanklosọ́ ao he hẹn núdùdù po nuhe yé na na asiyọyọ lọ lẹ po. Yé nọte to dotọ̀ tó na Eliezẹli yọnẹn dọ gbẹtọ lẹ nọ wá dà osin na kanlin po whẹndo yetọn lẹ po to whèmẹ. Todin Eliezẹli hodẹ̀ dọ eyin emi biọ osin mẹde bọ mẹlọ yigbe dọ, “Nù, yẹn nasọ dà na kanklosọ́poawenọ towe lẹ nù ga,” omẹ enẹ wẹ emi na de taidi asi na Isaki.

Nuhe jọ lọ pẹpẹ niyẹn! Lebeka, awhli he “yọnwhanpẹ tlala” de wá dotọ̀ lọ tó. Whenue Eliezẹli biọ ẹ osin nado nù, e dọmọ: “Yẹn na dà na kanklosọ́poawenọ towe lẹ ga.” Dile e to yigọyigọ basi po wezun po yì “dotọ̀pa nado dọ̀n osin” na kanlin lọ lẹ, Eliezẹli to pinpọn ẹn po nupaṣamẹ po. Pọ́n bo! Nado na osin kanklosọ́ ao he nugbla to hùhù bọ e na pé yé, Lebeka dona dà osin litli 1000!

Eliezẹli na nunina dagbedagbe lẹ Lebeka, podọ e sè dọ viyọnnu Bẹtuẹli he yin hẹnnumẹ Ablaham tọn de wẹ e yin. Lebeka dọna Eliezẹli po họntọn etọn lẹ po nado wá “jẹ” owhé whẹndo etọn tọn gbè. Enẹgodo e họ̀nwezun jẹnukọnna yé yì whégbè nado dọna omẹ etọn lẹ dọ Ablaham ko do jonọ delẹ hlan sọn Kenani gbọ́n nado wá pọ́n yé.

Whenuena nọvisunnu Lebeka tọn Labani mọ nunina họakuẹ he yin nina nọviyọnnu etọn lọ lẹ bosọ sè mẹhe Eliezẹli yin, e ylọ ẹ wá whégbè. Ṣigba Eliezẹli dọmọ: “Yẹn ma to onú na dù kaka yẹn nado do owẹ̀n ṣie pó.” E sọ dọ nuhewutu Ablaham do e hlan. Bẹtuẹli po asi etọn po gọna Labani hùnhomẹ bo yigbena alọwle lọ.

To whenuena yé dùnú fó, Eliezẹli po mẹhe hodo e lẹ po dọ́ finẹ. To wunkẹngbe, Eliezẹli dọmọ: “Mì do mi hlan oklunọ ṣie dè.” Ṣigba onọ̀ Lebeka tọn po nọvisunnu etọn po jlo dọ yé ni nọte “họ̀ azán ao mọ.” Whenue yé kanse Lebeka eyin ewọ jlo na yì to afọdopolọji, e yigbe dọ, “Yẹn na yì.” E sọ hodo Eliezẹli yì hadopo. To whenue yé jẹ whé, e lẹzun asi Isaki tọn.—Gẹnẹsisi 24:1-58, 67.

Be a lẹndọ e na ko bọawuna Lebeka nado jo whẹndo po họntọn etọn lẹ po do bo yì fidindẹn, dile e tlẹ yọnẹn dọ e sọgan nọma sọ wá mọ yé gbede ba ya?— Lala, e ma na ko bọawuna ẹn. Ṣigba, Lebeka mọ dona yí na ojlo he e tindo nado hẹn homẹ Jehovah tọn hùn wutu. Ewọ wá lẹzun dopo to onọ̀-daho Whlẹngántọ mítọn Jesu Klisti tọn lẹ mẹ. Mílọsu na mọ dona yí eyin mí tindo ojlo nado hẹn homẹ Jehovah tọn hùn taidi Lebeka.—Lomunu lẹ 9:7-10.

[Nudọnamẹ odò tọn]

Kanbiọ Lẹ:

▪ Mẹnu wẹ Lebeka, podọ fie wẹ Eliezẹli mọ ẹn te?

▪ Naegbọn Ablaham ma do jlo dọ Isaki ni dà yọnnu Kenaninu de?

▪ Nawẹ Lebeka dohia dọ ewọ na yin asi dagbe de gbọn?

▪ Etẹwẹ mí sọgan wà nado di Lebeka?