Yé “Nọ Hodo Lẹngbọvu lọ” to Whepoponu
Yé “Nọ Hodo Lẹngbọvu lọ” to Whepoponu
“Ehelẹ wẹ nọ hodo Lẹngbọvu lọ to godo yì fidepope [he] e jei.”—OSỌ. 14:4.
1. Nawẹ devi nugbonọ Jesu tọn lẹ magbe nado hodo e gbọn?
NUDI owhe awe daa to lizọnyizọn Jesu tọn whenu, e ‘to gbẹtọgun lẹ plọn to Kapẹlnaumi.’ Na yé mọdọ ohó etọn lẹ hẹnmẹjọsi wutu, “susu to nuplọntọ etọn lẹ mẹ gọ̀ do godo, bo masọ zọ̀n hẹ ẹ ba.” To whenuena Jesu kanse apọsteli 12 etọn lẹ eyin yelọsu na yì, Simọni Pita gblọn dọmọ: “Oklunọ, mẹnu dè míwlẹ na yì? Hiẹ wẹ tindo ohó ogbẹ̀ madopodo tọn. Míwlẹ ko sọ yise, bosọ yọnẹn dọ, hiẹ wẹ Klisti lọ, Ovi Jiwheyẹwhe ogbẹ̀nọ tọn.” (Joh. 6:48, 59, 60, 66-69) Devi nugbo Jesu tọn lẹ gbẹ́ nado lẹkọ sọn godona ẹn. To whenuena yé yin amisisadode gbọn gbigbọ wiwe dali godo, yé zindonukọn nado to taliaina anademẹ Jesu tọn.—Owalọ 16:7-10.
2. (a) Mẹnu wẹ “afanumẹ nugbonọ, nuyọnẹntọ” kavi “họ̀nkọnsi nugbonọ” lọ? (b) Nawẹ afanumẹ lọ ko yí nugbonọ-yinyin do “hodo Lẹngbọvu lọ” na whenu dindẹn gbọn?
2 Etẹwẹ dogbọn Klistiani yiamisisadode egbezangbe tọn lẹ dali? To dọdai Jesu tọn he gando ‘ohia tintin tofi etọn tọn po vivọnu aihọn tọn po’ go mẹ, e dlẹnalọdo pipli hodotọ yí gbigbọ do de etọn he tin to aigba ji lẹ tọn taidi “afanumẹ nugbonọ, nuyọnẹntọ” kavi “họ̀nkọnsi nugbonọ” lọ. (Mat. 24:3, 45; Luku 12:42) Taidi pipli de, afanumẹ lọ ko yí nugbonọ-yinyin do “hodo Lẹngbọvu lọ to godo yì fidepope [he] e jei” na whenu dindẹn. (Hia Osọhia 14:4, 5.) Hagbẹ pipli ehe tọn lẹ gbọṣi alọji to gbigbọ-liho bo ma hẹn yede flu gbọn nuyise po aṣa “Babilọni Daho” lọ, yèdọ ahọluigba aihọn tọn he yin sinsẹ̀n lalo tọn lẹ po dali. (Osọhia 17:5) Sinsẹ̀n-nuplọnmẹ lalo depope ma tin “to onù yetọn mẹ,” podọ yé ‘ma tindo oblọ’ aihọn Satani tọn. (Joh. 15:19) To sọgodo, pipotọ yiamisisadode he tin to aigba ji lẹ “na hodo” Lẹngbọvu lọ yì olọn mẹ tlọlọ.—Joh. 13:36.
3. Naegbọn e do yin nujọnu dọ mí ni dejido pipli afanumẹ lọ tọn go?
3 Jesu ko de afanumẹ nugbonọ, nuyọnẹntọ lọ do “whédo etọn,” yèdọ hagbẹ afanumẹ lọ tọn dopodopo ji nado “na núdùdù yetọn yé to osaa sisọ mẹ.” E ko sọ de afanumẹ lọ do ‘nutindo etọn lẹpo’ ji. (Mat. 24:45-47) ‘Nutindo’ ehelẹ bẹ “gbẹtọ susugege” “lẹngbọ devo” lẹ tọn he sọha yetọn fọ́n bo to jijideji lẹ hẹn. (Osọhia 7:9; Joh. 10:16) Be e ma jẹ dọ dopodopo hagbẹ mẹyiamisisadode po “lẹngbọ devo” lẹ po tọn ni dejido afanumẹ he yin dide nado deanana yé lọ go ya? Mí tindo whẹwhinwhẹ́n susu he wutu mí dona dejido pipli afanumẹ lọ tọn go. Whẹwhinwhẹ́n titengbe awe die: (1) Jehovah dejido pipli afanumẹ lọ tọn go. (2) Jesu lọsu dejido afanumẹ lọ go. Mì gbọ mí ni gbadopọnna kunnudenu he dohia dọ Jehovah Jiwheyẹwhe po Jesu Klisti po dejido afanumẹ nugbonọ, nuyọnẹntọ lọ go mlẹnmlẹn.
Jehovah Dejido Afanumẹ lọ Go
4. Naegbọn mí sọgan dejido núdùdù gbigbọmẹ tọn he afanumẹ nugbonọ, nuyọnẹntọ lọ nọ na mí go?
4 Lẹnnupọndo nuhe nọ hẹn ẹn yọnbasi na afanumẹ nugbonọ, nuyọnẹntọ lọ nado na mí núdùdù dojó gbigbọmẹ tọn to osaa sisọ mẹ ji. “Yẹn na plọn we, yẹn nasọ yí afọ towe do ali he ji hiẹ na gbọn,” wẹ Jehovah dọ. E yidogọ dọmọ: “Yẹn na yí nukun ṣie do dewé hẹ we.” (Ps. 32:8) Mọwẹ, Jehovah nọ deanana afanumẹ lọ. Enẹwutu, mí sọgan dejido wuntuntun, nukunnumọjẹnumẹ po anademẹ Owe-wiwe tọn he mí nọ mọyi sọn afanumẹ lọ dè po go mlẹnmlẹn.
5. Etẹwẹ dohia dọ gbigbọ Jiwheyẹwhe tọn nọ na huhlọn pipli afanumẹ lọ tọn?
5 Jehovah sọ nọ yí gbigbọ wiwe etọn do gọalọna pipli afanumẹ lọ tọn. Dile etlẹ yindọ mí ma sọgan mọ gbigbọ Jehovah tọn po nukun po, adà he e nọ yiwà to mẹhe e to anadena lẹ mẹ nọ sọawuhia hezeheze. Lẹnnupọndo nuhe afanumẹ nugbonọ, nuyọnẹntọ lọ ko wadotana na nuhe dù kunnudide lẹdo aihọn pé gando Jehovah Jiwheyẹwhe, Ovi etọn po Ahọluduta lọ po go ji. Sinsẹ̀n-basitọ Jehovah tọn lẹ yí zohunhun do to owẹ̀n Ahọluduta lọ tọn lá to aigba po lopo he hugan 230 lẹ po ji. Be ehe ma dohia hezeheze dọ gbigbọ Jiwheyẹwhe tọn wẹ to huhlọnna afanumẹ lọ ya? (Hia Owalọ lẹ 1:8.) Pipli afanumẹ lọ tọn dona basi nudide sinsinyẹn lẹ nado sọgan wleawu núdùdù gbigbọmẹ tọn na omẹ Jehovah tọn lẹ lẹdo aihọn pé to osaa sisọ mẹ. Afanumẹ lọ nọ do owanyi, walọmimiọn po adà sinsẹ́n gbigbọ tọn devo lẹ po hia to whenuena e to nudide ehelẹ basi kavi to nuyiwa sọgbe hẹ yé.—Gal. 5:22, 23.
6, 7. Obá tẹ mẹ wẹ Jehovah dejido afanumẹ nugbonọ lọ go jẹ?
6 Nado mọnukunnujẹ obá he mẹ Jehovah dejido afanumẹ nugbonọ lọ go jẹ mẹ, lẹnnupọndo opagbe he e do na hagbẹ afanumẹ lọ tọn lẹ ji. Apọsteli Paulu wlan dọmọ: “Opẹ̀n na dọnú, yè nasọ ze oṣiọ lẹ tite magble, yè nasọ diọ mí. Na gbigble he na ze magble do janwẹ, mọ wẹ kúkú he na ze makú do janwẹ.” (1 Kọl. 15:52, 53) Hodotọ yiamisisadode Klisti tọn he sẹ̀n Jiwheyẹwhe po nugbonọ-yinyin po bo kú po agbasa gbẹtọ tọn he nọ gble po lẹ nọ yin finfọnsọnku taidi nudida he yiaga hugan nudida gbigbọnọ he na nọgbẹ̀ kakadoi lẹ. Jehovah sọ nọ na yé jọmaku—yèdọ ogbẹ̀ madopodo po agbasa he ma nọ gble po. Humọ, yé nọ mọ magble yí, yèdọ agbasa he ma sọgan yọ̀n podọ e taidi dọ agbasa ehe nọ hẹn ede do ogbẹ̀. Osọhia 4:4 dlẹnalọdo mẹhe yin finfọnsọnku ehelẹ taidi mẹhe sinai do ofìn lẹ ji bo ṣinyọ́n jẹgbakun sika tọn lẹ. Gigo gandudu tọn to tepọn Klistiani yiamisisadode lẹ. Ṣigba kunnudenu devo lẹ tin he wutu mí dona dejido yé go.
7 “Alọwle Lẹngbọvu lọ tọn whenu wá, asi etọn ko sọ sọnú do ogo. Ewọ wẹ yè na dọ yè ni yí alavọ dagbedagbe, wewe he ma kudu do doaṣọ́na: na alavọ dagbedagbe lọ wẹ dodo mẹwiwe lẹ tọn,” wẹ Osọhia 19:7, 8 dọ. Jehovah ko de Klistiani yiamisisadode lẹ nado yin asiyọyọ Ovi etọn tọn to sọgodo. Magble, jọmaku, gandudu, “alọwle Lẹngbọvu lọ tọn”—nunina jiawu nankọ lẹ die! Ehelẹ yin kunnudenu sẹhundaga de dọ Jiwheyẹwhe dejido mẹyiamisisadode he “nọ hodo Lẹngbọvu lọ to godo yì fidepope [he] e jei” lẹ go.
Jesu Dejido Afanumẹ lọ Go
8. Nawẹ Jesu dohia dọ ewọ dejido hodotọ yí gbigbọ do de etọn lẹ go gbọn?
8 Kunnudenu tẹwẹ dohia dọ Jesu dejido hodotọ yí gbigbọ do de etọn lẹ go mlẹnmlẹn? To ozán godo tọn he Jesu yizan to aigba ji mẹ, e dopagbe de na apọsteli nugbonọ 11 etọn lẹ. E dọna yé dọmọ: “Mìwlẹ wẹ mẹhe ko nọte hẹ mi to whlepọn ṣie lẹ mẹ. Yẹn sọ de ahọludu de hlan mì, dile Otọ́ ṣie de hlan mi do; na mìwlẹ nido dù, bosọ nù to tafo ṣie ji, to ahọludu ṣie mẹ, na mì nido sinai to ofìn lẹ ji, bo to whẹdana whẹndo wiawe Islaeli tọn lẹ.” (Luku 22:28-30) Alẹnu he Jesu basi to whenẹnu hẹ apọsteli 11 etọn lẹ na dlẹnkan jẹ Klistiani yiamisisadode 144000 lẹ ji. (Luku 12:32; Osọhia 5:9, 10; 14:1) Be Jesu na basi alẹnu hẹ yé nado dugán hẹ ẹ eyin ewọ ma dejido yé go ya?
9. Etẹwẹ yin delẹ to ‘nutindo Klisti tọn lẹpo’ mẹ?
9 Humọ, Jesu Klisti ko de afanumẹ nugbonọ, nuyọnẹntọ lọ do ‘nutindo etọn lẹpo’ ji—yèdọ nuhe gando Ahọluduta lọ go lẹpo to aigba ji. (Mat. 24:47) Delẹ to nutindo ehelẹ mẹ wẹ owhé tatọ́-tẹnnọ Kunnudetọ Jehovah tọn lẹ tọn, wekantẹn alahọ tọn he tin to otò voovo mẹ lẹ, Plitẹnhọ Plidopọ tọn lẹ, Plitẹnhọ Ahọluduta tọn lẹ lẹdo aihọn pé gọna azọ́n yẹwhehodidọ Ahọluduta lọ tọn po mẹhẹnzun devi tọn po. Be mẹde sọgan de mẹhe go e ma dejido nado penukundo nuhọakuẹ etọn lẹ go bo yí yé zan ya?
10. Etẹwẹ dohia dọ Jesu Klisti tin hẹ hodotọ yiamisisadode etọn lẹ?
10 Ojlẹ vude whẹpo Jesu he yin finfọnsọnku lọ do hẹji yì olọn mẹ, e sọawuhia devi nugbonọ etọn lẹ bo dopagbe na yé dọmọ: “Pọ́n, yẹn tin to mì dè to whepoponu, kakajẹ opodo aihọn tọn.” (Mat. 28:20) Be Jesu hẹn opagbe ehe di ya? To owhe 15 agọe tọn lẹ mẹ, sọha agun Kunnudetọ Jehovah tọn lẹ tọn he yin nudi 70000 dai lẹdo aihọn pé ko lán to 100000 ji todin—yèdọ jideji he hugan 40 to kanweko ji. Podọ devi yọyọ nẹmu wẹ ko yin yiyidogọ? Nudi devi livi ẹnẹ daa wẹ yin bibaptizi to owhe 15 agọe tọn lẹ mẹ—ehe yin madozẹnzẹn devi yọyọ he hugan 800 tọn to gbèdopo. Jideji ayidego tọn ehelẹ dohia hezeheze dọ Klisti to anadena hodotọ yiamisisadode etọn lẹ to opli agun tọn yetọn lẹ ji bosọ to alọgọna yé to azọ́n mẹhẹnzun devi tọn yetọn mẹ.
Afanumẹ lọ Yin Nugbonọ Bosọ Yin Nuyọnẹntọ
11, 12. Nawẹ afanumẹ lọ ko do ede hia nado yin nugbonọ podọ nuyọnẹntọ gbọn?
11 To whenuena e yindọ Jehovah Jiwheyẹwhe po Jesu Klisti po dejido afanumẹ nugbonọ, nuyọnẹntọ lọ go mlẹnmlẹn, be e ma jẹ dọ mílọsu ni wàmọ ya? To popolẹpo mẹ, afanumẹ lọ ko do ede hia nado yin nugbonọ to azọ́n he yin didena ẹn lẹ hinhẹndi mẹ. Di apajlẹ, linlinnamẹwe Atọ̀họ̀-Nuhihọ́ Lọ Tọn ko to yinyin zinzinjẹgbonu sọn nudi owhe 130 die gbọ́n. Humọ, opli po plidopọ Kunnudetọ Jehovah tọn lẹ tọn po gbẹ́ to mí jlọ dote to gbigbọ-liho.
12 Afanumẹ nugbonọ lọ sọ yin nuyọnẹntọ na e nọ yinuwa po jlẹkaji po bo ma nọ jẹnukọnna Jehovah, mọjanwẹ e ma nọ dọ̀n yonu dogodo nado setonu to whenuena anademẹ Jiwheyẹwhe tọn họnwun na ẹn. Di apajlẹ, to whenuena nukọntọ sinsẹ̀n lalo tọn lẹ nọ yí ayiha do kẹalọyi walọ ṣejannabi gblezọn mẹhe tin to aihọn mẹ lẹ tọn kavi desọn ojlo mẹ nado miyọnnukundo yé, afanumẹ lọ nọ na avase gando omọ̀ aihọn ylankan Satani tọn lẹ go. Afanumẹ lọ nọ na avase nuyọnẹn tọn he wá do ganmẹ lẹ na Jehovah Jiwheyẹwhe po Jesu Klisti po to alọgọna ẹn wutu. Enẹwutu, e jẹ dọ mí ni dejido afanumẹ lọ go mlẹnmlẹn. Ṣigba, nawẹ mí sọgan dohia dọ mí dejido afanumẹ nugbonọ, nuyọnẹntọ lọ go gbọn?
“Yì hẹ” Mẹyiamisisadode lẹ Dile Yé to Hihodo Lẹngbọvu Lọ
13. Sọgbe hẹ dọdai Zekalia tọn, nawẹ mí sọgan dohia dọ mí dejido afanumẹ nugbonọ, nuyọnẹntọ lọ go gbọn?
13 Owe Zekalia tọn dlẹnalọdo “omẹ ao” he dọnsẹpọ “ewọ he yin Ju de” bo dọna ẹn dọmọ: “Míwlẹ na yì hẹ mì.”(Hia Zekalia 8:23.) To whenuena e yindọ “ewọ he yin Ju de” yin alọdlẹndo taidi “mì,” ehe dohia dọ pipli gbẹtọ lẹ tọn de wẹ e nọtena. To ojlẹ mítọn mẹ, e nọtena pipotọ Klistiani yiamisisadode lẹ tọn—yèdọ apadewhe “Islaeli Jiwheyẹwhe tọn.” (Gal. 6:16) “Omẹ ao . . . sọn akọgbè akọta lẹ tọn lẹpo mẹ” nọtena gbẹtọ susugege lẹngbọ devo lẹ tọn. Kẹdẹdile Klistiani yiamisisadode lẹ nọ hodo Jesu yì fidepope he e jei do, gbẹtọ susugege lọ nọ “yì hẹ,” kavi hodo afanumẹ nugbonọ, nuyọnẹntọ lọ. Gbẹtọ susugege lọ ma dona kuwinyan gbede nado do ede hia taidi gbẹdohẹmẹtọ “mahẹtọ oylọ olọn tọn” lẹ tọn. (Heb. 3:1) Jesu ma kuwinyan nado ylọ mẹyiamisisadode lẹ dọ “mẹmẹsunnu.”—Heb. 2:11.
14. Nawẹ mí sọgan gọalọna mẹmẹsunnu Klisti tọn lẹ po nugbonọ-yinyin po gbọn?
14 Jesu Klisti dọ dọ emi wẹ mí to alọgọna to whedepopenu he mí gọalọna mẹmẹsunnu emitọn lẹ. (Hia Matiu 25:40.) Eyin mọ wẹ, nawẹ mẹhe tindo todido aigba ji tọn lẹ sọgan nọgodona mẹmẹsunnu yí gbigbọ do de Klisti tọn lẹ gbọn? Na taun tọn, gbọn alọgigọna yé to azọ́n yẹwhehodidọ Ahọluduta lọ tọn mẹ dali. (Mat. 24:14; Joh. 14:12) Sọha lẹngbọ devo lẹ tọn ko jideji to whenuena sọha mẹyiamisisadode he tin to aigba ji lẹ tọn ko depò to owhe lẹ gblamẹ. Mẹhe tindo todido aigba ji tọn lẹ nọ nọgodona mẹyiamisisadode lẹ nado hẹn azọ́ndenamẹ gbẹtọ lẹ hinhẹn zun devi tọn lọ di gbọn mahẹ tintindo to azọ́n wẹndagbe lilá tọn mẹ dali bo nọ kẹalọyi sinsẹ̀nzọn whenu-gigọ́ tọn eyin e yọnbasi. (Mat. 28:19, 20) Aliho devo he mí ma dona yí nukunpẹvi do pọ́n wẹ lẹblanulọkẹyi lọ nado nọgodona azọ́n ehe gbọn nunina akuẹ tọn lẹ bibasi dali.
15. Nukun tẹwẹ Klistiani dopodopo dona yí do pọ́n núdùdù gbigbọmẹ tọn he afanumẹ lọ nọ na mí to osaa sisọ mẹ po nudide he e nọ basi gando titobasinanu lọ go lẹ po?
15 Taidi Klistiani, nukun tẹwẹ dopodopo mítọn nọ yí do pọ́n núdùdù gbigbọmẹ tọn he afanumẹ nugbonọ lọ nọ na mí to osaa sisọ mẹ gbọn owe sinai do Biblu ji lẹ po opli Klistiani tọn lẹ po gblamẹ? Be mí nọ gbọn pinpẹn-nutọn-yinyọnẹn dali dù núdùdù ehe bo nọ yí nuhe mí plọn lẹ do yizan mẹ sọn ojlo mẹ wá ya? Be mí nọ kẹalọyi nudide he afanumẹ lọ nọ basi gando titobasinanu lọ go lẹ ya? Eyin mí desọn ojlo mẹ bo setonuna anademẹ he yin nina lẹ, enẹ na dohia dọ mí dejido aliho he mẹ Jehovah nọ deanana mí te go.—Jak. 3:17.
16. Naegbọn Klistiani lẹpo dona setonuna mẹmẹsunnu Klisti tọn lẹ?
16 Jesu dọmọ: “Lẹngbọ ṣie lẹ sè ogbè ṣie, yẹn sọ yọ́n yé, yé sọ nọ hodo mi.” (Joh. 10:27) Ehe yin nugbo gando Klistiani yiamisisadode lẹ go. Etẹwẹ dogbọn mẹhe to ‘yìyì hẹ’ yé lẹ dali? Omẹ ehelẹ dona setonuna Jesu. Yé sọ dona setonuna mẹmẹsunnu etọn lẹ. To popolẹpo mẹ, azọngban tangan lọ nado penukundo omẹ Jiwheyẹwhe tọn lẹ go to gbigbọ-liho ko yin zizedo alọmẹ na yé. Etẹwẹ tonusisena ogbè mẹmẹsunnu Klisti tọn lẹ tọn zẹẹmẹdo?
17. Etẹwẹ tonusisena pipli afanumẹ lọ tọn zẹẹmẹdo?
17 To egbehe, Hagbẹ Anademẹtọ lọ he yin nukọntọ bosọ nọ deanana azọ́n yẹwhehodidọ Ahọluduta lọ tọn lẹdo aihọn pé wẹ yin afọzedaitọ afanumẹ nugbonọ, nuyọnẹntọ lọ tọn. Hagbẹ Anademẹtọ lọ bẹ mẹho yiamisisadode numimọnọ lẹ hẹn. Na taun tọn, mí sọgan dlẹnalọdo yé taidi ‘mẹhe to nukọntọ yin’ to ṣẹnṣẹn mítọn lẹ. (Heb. 13:7) Nugopọntọ yiamisisadode ehelẹ “tindo onú susu nado wà to azọ́n Oklunọ tọn mẹ,” na yé nọ penukundo wẹnlatọ Ahọluduta tọn he hugan 7000000 go to nuhe hugan agun 100000 mẹ lẹdo aihọn pé. (1 Kọl. 15:58, NW) Tonusisena pipli afanumẹ lọ tọn zẹẹmẹdo dọ mí dona kọngbedopọ mlẹnmlẹn hẹ Hagbẹ Anademẹtọ etọn.
Jehovah Nọ Dona Mẹhe Setonuna Afanumẹ lọ Lẹ
18, 19. (a) Nawẹ mẹhe setonuna afanumẹ nugbonọ, nuyọnẹntọ lọ lẹ na yin didona gbọn? (b) Etẹwẹ dona yin gbemima mítọn?
18 Afanumẹ nugbonọ, nuyọnẹntọ lọ to ‘mẹsusu lẹhlan dodo kọ̀n’ sọn whenue gbọ́n e ko yin dide. (Dan. 12:3) Mẹhe tindo todido nado lùn vasudo aihọn ylankan ehe tọn tọ́n lẹ tin to omẹ ehelẹ mẹ. Dona nankọ die nado tindo teninọ dodo tọn ehe to Jiwheyẹwhe nukọn!
19 To sọgodo, to whenuena ‘tòdaho wiwe lọ, yèdọ Jelusalẹm Yọyọ [he bẹ gbẹtọ 144000 lẹ hẹn], he yè wleawuna di asiyọyọ de he yè doaṣọ́na na asu etọn, na jẹte sọn olọn mẹ sọn Jiwheyẹwhe dè,’ etẹwẹ mẹhe setonuna ogbè afanumẹ lọ tọn lẹ na duvivi etọn? Biblu dọmọ: “Jiwheyẹwhe lọsu nasọ nọhẹ yé . . . [e] nasọ súnsún dasin lẹpo sẹ̀ sọn nukun yetọn mẹ; okú ma nasọ tin ba, kavi awubla, kavi avi, mọ awufiẹsa ma na tin ba: na onú tintan lẹ ko juwayi.” (Osọhia 21:2-4) Eyin mọ wẹ, mì gbọ mí ni wà nuhe go mí pé lẹpo nado setonuna Klisti po mẹmẹsunnu dejidego yí gbigbọ do de etọn lẹ po.
Etẹwẹ Hiẹ Plọn?
• Kunnudenu tẹwẹ dohia dọ Jehovah dejido afanumẹ nugbonọ, nuyọnẹntọ lọ go?
• Etẹwẹ dohia dọ Jesu Klisti dejido pipli afanumẹ lọ tọn go mlẹnmlẹn?
• Naegbọn mí dona dejido họ̀nkọnsi nugbonọ lọ go?
• Nawẹ mí nọ dohia dọ mí dejido afanumẹ lọ go gbọn?
[Kanbiọ Oplọn tọn lẹ]
[Yẹdide to weda 25]
Be a yọ́n mẹhe Jehovah de nado yin asiyọyọ Ovi etọn tọn to sọgodo lẹ ya?
[Yẹdide to weda 26]
Jesu Klisti ko ze ‘nutindo’ etọn lẹ do alọmẹ na afanumẹ nugbonọ, nuyọnẹntọ lọ
[Yẹdide to weda 27]
Mí nọ gọalọna mẹyiamisisadode lẹ gbọn mahẹ tintindo to azọ́n yẹwhehodidọ tọn lọ mẹ dali