Mì Pegan Bosọ Sọgbe
Mì Pegan Bosọ Sọgbe
“[E] yí odẹ̀ vivẹ do to azọ́nwa na mì whepoponu dọ, na mìwlẹ ni pegan bosọ sọgbe to ojlo Jiwheyẹwhe tọn lẹpo mẹ.”—KỌLỌSINU LẸ 4:12.
1, 2. (a) Etẹ go wẹ gbonutọ lẹ doayi gando Klistiani fliflimẹ tọn lẹ go? (b) Nawẹ owe Kọlọsinu lẹ tọn do ojlo owanyinọ de hia gbọn?
HODOTỌ Jesu tọn lẹ tindo ojlo sisosiso to sinsẹ̀n-basitọ hatọ lẹ mẹ. Tertullien (wekantọ owhe kanweko awetọ po atọ̀ntọ W.M. tọn po,) dọho gando homẹdagbe he yé dohia tọṣiọvi, wamọnọ, po mẹhomẹ lẹ po go. Kunnudenu owanyi heyin didohia tọn lẹ yinuwado mayisenọ lẹ ji sọmọ bọ mẹdelẹ dọ gando Klistiani lẹ go dọ, ‘Mì pọ́n lehe yé yiwanna ode awetọ do.’
2 Owe Kọlọsinu lẹ tọn do ojlo owanyinọ mọnkọtọn he apọsteli Paulu po gbẹdohẹmẹtọ etọn Epafla po dohia na mẹmẹsunnu lẹ po mẹmẹyọnnu lẹ po to Kọlọsi hia. Paulu wlanwe hlan yé dọmọ: Epafla “yí odẹ̀ vivẹ do to azọ́nwa na mì whepoponu dọ, na mìwlẹ ni pegan bosọ sọgbe to ojlo Jiwheyẹwhe tọn lẹpo mẹ.” To owhe 2001 whenu, Kunnudetọ Jehovah tọn lẹ na tindo ohó Kọlọsinu lẹ 4:12 tọn ehelẹ taidi hosọ owhe tọn yetọn dọmọ: “[Mì] pegan bosọ sọgbe to ojlo Jiwheyẹwhe tọn lẹpo mẹ.”
3. Onú awe tẹlẹ go wẹ Epafla hodẹ̀ gando?
3 Hiẹ sọgan mọ dọ odẹ̀ Epafla tọn lẹ do mẹyiwanna etọn lẹ tamẹ tindo adà awe: (1) dọ yé “ni pegan” podọ (2) dọ yé ni “sọgbe to ojlo Jiwheyẹwhe tọn lẹpo mẹ.” Nudọnamẹ ehe yin yíyí do Owe-wiwe lẹ mẹ na alemọyi mítọn. Enẹwutu kanse dewe, ‘Etẹwẹ yẹn dona wà nado pegan bosọ sọgbe to ojlo Jiwheyẹwhe tọn lẹpo mẹ? Podọ dile yẹn to mọwà, etẹwẹ na yin nugandomẹgo lọ?’ Mì gbọ mí ni pọ́n.
Vánkan Nado “Pegan”
4. Kọlọsinu lẹ dona “pegan” to linlẹn tẹ mẹ?
4 Ojlo vẹkuvẹku Epafla tọn wẹ yindọ mẹmẹsunnu po mẹmẹyọnnu gbigbọmẹ tọn etọn lẹ po to Kọlọsi “ni pegan.” Hogbe he Paulu yizan, heyin lilẹdogbedevomẹ tofi dọ “pegan,” sọgan tindo linlẹn pipé, whẹ́n-ganji, kavi whèwhín tọn. (Matiu 19:21; Heblu lẹ 5:14; Jakobu 1:4, 25) Vlavo hiẹ yọnẹn dọ yinyin Kunnudetọ Jehovah tọn he ko yí baptẹm poun ma ko zẹẹmẹdo dọ mẹde yin Klistiani he ko whẹ́n-ganji de gba. Paulu wlanwe hlan Efesunu lẹ, he nọ nọ̀ whèyihọ-waji Kọlọsi tọn, dọ lẹngbọhọtọ lẹ po mẹplọntọ lẹ po ni tẹnpọn nado gọalọna ‘yemẹpo nado wá lẹzun dopo to yise mẹ podọ to oyọnẹn Ovi Jiwheyẹwhe tọn tọn mẹ, bo yin mẹhe whẹ́n-ganji de, hlan ojlẹnu tedidi gigọ́ Klisti tọn.’ To fidevo Paulu dotuhomẹna Klistiani lẹ nado lẹzun ‘mẹhe whẹ́n-ganji to huhlọn nukunnumọjẹnumẹ tọn mẹ.’—Efesunu lẹ 4:8-13; 1 Kọlintinu lẹ 14:20.
5. Nawẹ mí sọgan hẹn pipegan yin yanwle tangan de gbọn?
5 Eyin mẹdelẹ tin to Kọlọsi he ma ko whẹ́n-ganji, kavi whèwhín to gbigbọ-liho, enẹ dona yin yanwle yetọn. Be onú dopolọ ma dona yin nugbo to egbehe ya? Vlavo mí ko yí baptẹm to owhe ao ao lẹ die wayi kavi to agọe, be mí sọgan mọ dọ mí ko zindonukọn ganji to nugopipe nulẹnpọn tọn po pọndohlan mítọn lẹ po mẹ ya? Be mí nọ lẹnnupọndo nunọwhinnusẹ́n Biblu tọn lẹ ji whẹpo do basi nudide lẹ ya? Be whẹho he gando Jiwheyẹwhe po dagbenu agun tọn lẹ po go nọ tindo adà tangan de to gbẹzan mítọn mẹ, kakati nido yin nuwiwa kosọdudu tọn de ya? Mí ma sọgan na apajlẹ aliho lẹpo tọn to ehe mẹ mí sọgan do whinwhẹ́n mọnkọtọn hia te jẹ pipé-yinyin kọ̀n gba, ṣigba gbadopọnna apajlẹ awe.
6. Etẹwẹ yin adà de he mẹ mẹde sọgan penugo nado tindo nukọnyiyi dohlan pipé yinyin kọ̀n, dile Jehovah te do?
6 Apajlẹ tintan: Mí ni dọ dọ mí whẹ́n to lẹdo de mẹ fie nuvẹun kavi kanyinylan dohlan gbẹtọ heyin akọ̀, akọta, kavi agbegbe devo lẹ tọn gbayipe te. Mí ko yọnẹn todin dọ Jiwheyẹwhe mayin mẹnukuntahopọntọ podọ mí ma dona yinmọ gba. (Owalọ lẹ 10:14, 15, 34, 35) To agun kavi lẹdo mítọn mẹ, mí tindo mẹhe wá sọn dodonu devo mẹ lẹ, enẹwutu mí tin po yé po. Ṣogan, to obá tẹmẹ wẹ mí nọ hẹn numọtolanmẹ agọ̀ delẹ do homẹ kavi tindo nuvẹdomẹ dohlan gbẹtọ he tindo dodonu mọnkọtọn lẹ jẹ? Be mí nọ ‘dọ̀n avundai,’ bo nọ yawu lẹnnupọn to aliho agọ̀ mẹ eyin mẹde he sọn dodonu enẹ mẹ ṣinuwa kavi gboawupo to aliho kleun delẹ mẹ do mí go ya? Kanse dewe, ‘Be yẹn dona tindo nukọnyiyi dogọ nado tindo pọndohlan mẹnukuntamahopọn Jiwheyẹwhe tọn tọn wẹ ya?’
7. Lilẹzun mẹhe pegan taidi Klistiani de sọgan bẹ etẹ yinyọnẹn gando pọndohlan mẹdevo lẹ tọn go hẹn?
7 Apajlẹ awetọ: Sọgbe hẹ Filippinu lẹ 2:3, mí ma dona “yí avùn kavi ogoyi ovọ́ do wà nudepope . . . , ṣigba to ayiha whiwhẹ mẹ dopodopo mìtọn ni nọ lẹn mẹdevo [dọ yé yiaga hugan mí].” Nawẹ mí to nukọnyiyi tindo to whẹho ehe mẹ gbọn? Omẹ dopodopo tindo madogán po nugopipe lẹ po. Eyin mí nọ yawu doayi madogán mẹdevo lẹ tọn go to ojlẹ he wayi lẹ mẹ, be mí ko tindo nukọnyiyi, bo ma nasọ nọ donukun sọn yé dè nado dibla yin ‘pipé’ ya? (Jakobu 3:2) Hugan gbede pọ́n todin, be mí ko penugo nado mọ—yèdọ tlẹ dín —aliho lẹ he mẹ mẹdevo lẹ yiaga te ya? ‘Yẹn dona yigbe dọ mẹmẹyọnnu ehe yiaga hugan mi to homẹfanọ-yinyin mẹ.’ ‘Omẹ enẹ do yise he lodo hia.’ ‘Nado dọhójọhó, ewọ yin mẹplọntọ dagbe hugan yẹn.’ ‘Ewọ yiaga to didava homẹgble etọn mẹ.’ Vlavo Kọlọsinu delẹ tindo nuhudo nado tindo nukọnyiyi to whẹho ehe mẹ. Míwlẹ ka lo?
8, 9. (a) To linlẹn tẹmẹ wẹ Epafla hodẹ̀ na Kọlọsinu lẹ nado “pegan” te? (b) Etẹwẹ ‘pipegan’ bẹhẹn gando sọgodo go?
8 Epafla hodẹ̀ dọ Kọlọsinu lẹ ni ‘pegan.’ E họnwun dọ, Epafla to dẹ̀ho hlan Jiwheyẹwhe dọ obá he mẹ Kọlọsinu lẹ ko yin Klistiani he pegan, whèwhín, bo ko whẹ́n-ganji jẹ, yé ni ‘nọte,’ kavi gbọṣi ninọmẹ dopolọ mẹ.
9 Mí ma sọgan dọ po nujikudo po dọ mẹdopodopo he lẹzun Klistiani de, etlẹ yin mẹhe whèwhín de, na gbọṣi mọ yinyin mẹ gba. Jesu dọ dọ angẹli de heyin visunnu Jiwheyẹwhe tọn ‘ma nọte gligli to nugbo mẹ’ gba. (Johanu 8:44) Podọ Paulu flinnu Kọlintinu lẹ gando mẹdelẹ go to ojlẹ he wayi mẹ he ko sẹ̀n Jehovah na ojlẹ de ṣigba gboawupo to enẹgodo. E na avase mẹmẹsunnu heyin dide gbọn gbigbọ dali lẹ dọmọ: “Mì gbọ ewọ he lẹndọ e to ote ni payi, e nikaa jai.” (1 Kọlintinu lẹ 10:12) Ehe na huhlọn odẹ̀ lọ dọ Kọlọsinu lẹ ‘ni pegan.’ To afọdopolọji he yé pegan, bo whẹ́n-ganji, yé dona sinyẹnlin, bo ma nado joagọyigodo, gbọjọ, kavi dúdú kọnyinai gba. (Heblu lẹ 2:1; 3:12; 6:6; 10:39; 12:25) Gbọnmọ dali yé na “pegan” to azán mẹdlapọn tọn po alọkẹyi godo tọn yetọn po gbè.—2 Kọlintinu lẹ 5:10; 1 Pita 2:12.
10, 11. (a) Apajlẹ tẹwẹ Epafla zedai na mí gando odẹ̀ go? (b) To kọndopọmẹ hẹ nuhe Epafla wà, gbemima tẹwẹ hiẹ na jlo nado basi?
10 Mí ko dọhodo nujọnu-yinyin dẹ̀hiho na mẹdevo lẹ gbọn yinkọ dali tọn ji, nado biọ tlọlọ dọ Jehovah ni gọalọna yé, miọnhomẹna yé, dona yé, bosọ na gbigbọ wiwe yé. Odẹ̀ Epafla tọn na Kọlọsinu lẹ yin wunmẹ mọnkọtọn tọn. Podọ míwlẹ sọgan—na nugbo tọn, mí dona—mọ ayinamẹ họakuẹ de sọn ohó nẹlẹ mẹ nado yizan to odẹ̀ mítọn titi mẹ hlan Jehovah. Matin ayihaawe, mí na wà dagbe nado biọ alọgọ Jehovah tọn mlẹnmlẹn bọ mílọsu nado “pegan.” Be hiẹ nọ wàmọ ya?
11 Naegbọn hiẹ ma nado donù ninọmẹ towe go to odẹ̀ mẹ? Dọho na Jiwheyẹwhe gando obá he mẹ hiẹ ko yinukọn jẹ to yinyin mẹhe “pegan,” whẹ́n-ganji bosọ whèwhín mẹ go. Vẹ̀vẹ̀ na ẹn nado gọalọna we nado yọ́n awà he ji hiẹ gbẹsọ tindo nuhudo nado whẹ́n to gbigbọ-liho te lẹ. (Psalm 17:3; 139:23, 24) Matin ayihaawe, hiẹ tindo awà mọnkọtọn delẹ. To whelọnu lo, kakati nado yin hinhẹn gbọjọ do ehe ji, biọ to Jiwheyẹwhe si tlọlọ, na alọgọ nado tindo nukọnyiyi. Wà ehe pludopludo. Na nugbo tọn, naegbọn hiẹ ma nado magbe dọ to osẹ he ja ehe mẹ hiẹ na hodẹ̀ jẹ obá de mẹ bọ hiẹ nado ‘pegan mlẹnmlẹn.’ Podọ basi tito nado wà ẹ dogọ dile hiẹ gbadopọnna hosọ owhe tọn lọ. To odẹ̀ towe lẹ mẹ, zinnudo ayilinlẹn he hiẹ sọgan ko tindo nado joagọyigodo, gbọjọ, kavi dúdú kọnyinai sọn sinsẹ̀nzọn Jiwheyẹwhe tọn mẹ podọ lehe hiẹ sọgan dapana enẹ wiwà do ji.—Efesunu lẹ 6:11, 13, 14, 18.
Hodẹ̀ Nado Sọgbe
12. Naegbọn Kọlọsinu lẹ do tindo nuhudo ‘gbesisọ’ tọn na taun tọn?
12 Epafla sọ hodẹ̀ na nuhe yin nujọnu devo eyin Kọlọsinu lẹ na yin mimọ nado nọte to aliho heyin alọkẹyi hlan Jiwheyẹwhe mẹ. Dandannu wẹ e yin na míwlẹ lọsu ga. Etẹwẹ yin onú lọ? E hodẹ̀ dọ yé ni ‘sọgbe to ojlo Jiwheyẹwhe tọn lẹpo mẹ.’ Yé yin lilẹdo pé gbọn mẹhe tẹdo linlẹn agọ̀ po tamẹnuplọnmẹ he gblezọn lẹ po go dali, delẹ he tindo awusọhia oklọ sinsẹ̀n-bibasi nugbo tọn. Di apajlẹ, yé yin kọgbidina nado doayi azán vonọtaun lẹ go to pọmẹ hẹ nùbibla kavi hùnwhẹ bibasi, dile nuhudo etọn tin do to sinsẹ̀n-bibasi Juvi lẹ tọn mẹ to ojlẹ de mẹ wayi. Mẹplọntọ lalonọ lẹ zinnudo angẹli lẹ ji, yèdọ gbigbọ huhlọnnọ enẹlẹ heyin yiyizan nado na Osẹ́n lọ Mose. Lẹnnupọndo mẹmẹglọ yinyin na kọgbidinamẹ mọnkọtọn lẹ ji! Linlẹn tasọdonanu tọn susugege wẹ tin.—Galatianu lẹ 3:19; Kọlọsinu lẹ 2:8, 16-18.
13. Ayidido etẹ go wẹ sọgan gọalọna Kọlọsinu lẹ, podọ nawẹ onú mọnkọtọn sọgan gọalọna mí gbọn?
13 Paulu yihojlẹdohogo gbọn nuzinzindo azọngban Jesu Klisti tọn ji dali. “[Dile] mì yí Klisti Jesu Oklunọ do, mọwẹ mì ni nọ to zọnlinzin to ewọ mẹ do: na yè ni yí afọ mìtọn hẹnai, na yè ni sọ dó mì daga to e mẹ, bo hẹn mì lodo to yise mẹ, yèdọ dile yè plọn mì do.” Mọwẹ, nuhudo de tin (na Kọlọsinu lẹ podọ na míwlẹ) nado sọgbe mlẹnmlẹn gando azọngban Klisti tọn go to lẹndai Jiwheyẹwhe tọn podọ to gbẹzan mítọn mẹ. Paulu basi zẹẹmẹ dọmọ: “Ewọ mẹ wẹ gigọ́ ozọnji Jiwheyẹwhe tọn lẹpo nọ nọ̀ to agbasa mẹ. E ko sọ basi mì sọgbe to ewọ mẹ, mẹhe basi ota ogán lẹ, po huhlọntọ lẹpo po tọn.”—Kọlọsinu lẹ 2:6-10.
14. Naegbọn todido do yin onú titengbe na mẹhe tin to Kọlọsi lẹ?
14 Kọlọsinu lẹ yin Klistiani he yè yí gbigbọ do de lẹ. Yé tindo todido he gbọnvo de, ogbẹ̀ to olọn lẹ mẹ, podọ yé tindo whẹwhinwhẹ́n lẹpo nado hẹn todido enẹ họnwun. (Kọlọsinu lẹ 1:5) “Ojlo Jiwheyẹwhe tọn” wẹ e yin dọ yé ni sọgbe gando nugbo-yinyin todido yetọn tọn go. Be depope to yé mẹ dona ko tindo ayihaawe gando todido enẹ go wẹ ya? Paali! Be e dona gbọnvo to egbehe na mẹlẹpo he tindo nukundido ogbẹ̀ he Jiwheyẹwhe na namẹ to paladisi aigba ji tọn mẹ wẹ ya? Na nugbo tọn, e mayin mọ! E họnwun dọ todido nujọnu tọn enẹ yin apadewhe “ojlo Jiwheyẹwhe tọn” tọn. Gbadopọnna kanbiọ ehelẹ todin: Eyin hiẹ to kanván nado yin dopo to “gbẹtọ susugege” he na lùn “nukunbibia daho” lọ tọ́n lẹ mẹ, nawẹ todido towe yin nujọnu do? (Osọhia 7:9, 14) Be e yin apadewhe ‘gbesisọ to ojlo Jiwheyẹwhe tọn lẹpo mẹ’ towe tọn ya?
15. Paulu basi todohukanji hodidọ debọdo-dego tọn tẹlẹ he bẹ todido hẹn?
15 Na nuhe dù “todido,” mí ma to hodọdo yanwle he dózin kavi odlọ nukle tọn de ji gba. Mí sọgan mọ ehe sọn nuagokun debọdo-dego he Paulu zedonukọnna Lomunu lẹ jẹnukọn mẹ. To hodidọ debọdo-dego enẹ mẹ, onú dopodopo he yin nùdego yin ṣiṣadopọ kavi yin kinkọndopọ hẹ ehe bọdego. Doayi fie Paulu ze “todido” do to hoyijlẹdohogo etọn mẹ go: ‘Mì gbọ mí ni nọ doawagun to nukunbibia lẹ mẹ, dile mí yọnẹn dọ nukunbibia nọ de akọndonanu tọ́n; akọndonanu, to godo mẹ, ninọmẹ alọkẹyi tọn de; ninọmẹ alọkẹyi tọn lọ, to godo mẹ, nọ de todido tọ́n, podọ todido ma nọ dowinyanmẹ gba; na yè ko kọ̀n owanyi Jiwheyẹwhe tọn do ahun mítọn lẹ mẹ gbọn gbigbọ wiwe gblamẹ.’—Lomunu lẹ 5:3-5.
16. Dile hiẹ plọn nugbo Biblu tọn, todido tẹwẹ hiẹ mọyi?
16 To whenuena Kunnudetọ Jehovah tọn lẹ má owẹ̀n Biblu tọn hẹ we to tintan whenu, nugbo taun de sọgan ko dọ̀n ayidonugo towe, taidi ninọmẹ oṣiọ lẹ tọn kavi fọnsọnku. Na mẹsusu, ayidonugo yọyọ tintan lọ wẹ yin yọnbasi gbẹninọ to paladisi aigba ji tọn de mẹ he sinai do Biblu ji. Flin whenuena hiẹ sè nuplọnmẹ enẹ to tintan whenu. Todido jiawu nankọtọn die—azọ̀n po yọnhowhe po ma na tin ba, hiẹ sọgan nọgbẹ̀ bo duvivi sinsẹ́n alọnuzọn towe tọn, podọ jijọho na tin hẹ kanlin lẹ! (Yẹwhehodọtọ 9:5, 10; Isaia 65:17-25; Johanu 5:28, 29; Osọhia 21:3, 4) Hiẹ tindo todido jiawu de!
17, 18. (a) Nawẹ hodidọ debọdo-dego he Paulu zedonukọnna Lomunu lẹ planmẹ jẹ todido kọ̀n gbọn? (b) Todido wunmẹ tẹwẹ yin hodọdeji to Lomunu lẹ 5:4, 5 mẹ, podọ be hiẹ tindo enẹ ya?
17 To madẹnmẹ, e yọnbasi dọ hiẹ ni pannukọn nukundiọsọmẹ kavi homẹkẹn delẹ. (Matiu 10:34-39; 24:9) Etlẹ yin to ojlẹ agọe tọn lẹ mẹ, nutindo Kunnudetọ lẹ tọn ko yin fìnfìn to otò voovo lẹ mẹ kavi yé ko yin hinhẹn po huhlọn po nado lẹzun fibẹtado dintọ lẹ. Yè ko yangbe mẹdelẹ tọn, owe Biblu tọn yetọn lẹ ko yin bibẹ sọn yé si, kavi ko yin yanwle linlin lalo tọn lẹ tọn to linlinnamẹnu lẹ ji. Homẹkẹn wunmẹ depope he hiẹ sọgan ko pannukọn, dile Lomunu lẹ 5:3 dọ do, hiẹ sọgan jaya to nukunbibia mẹ, podọ e nọ hẹn kọdetọn dagbe de wá. Etlẹ yin dile Paulu wlan do, nukunbibia nọ wleawuna akọndonanu. Enẹgodo akọndona nọ planmẹ jẹ ninọmẹ alọkẹyi tọn de kọ̀n. Hiẹ nọ yọnẹn dọ hiẹ to nuhe sọgbe wà, yèdọ to ojlo Jiwheyẹwhe tọn wà, enẹwutu hiẹ nọ tindo numọtolanmẹ jide tọn dọ hiẹ tindo alọkẹyi etọn. To hogbe Paulu tọn lẹ mẹ, hiẹ nọ tindo numọtolanmẹ yinyin ‘mẹhe tin to ninọmẹ alọkẹyi tọn de mẹ’ tọn. To nukọnzinzindo mẹ, Paulu wlan dọ ‘ninọmẹ alọkẹyi tọn, to godo mẹ, nọ wleawuna todido.’ Enẹ sọgan taidi nupaṣamẹ de. Naegbọn Paulu ma do slẹ “todido” to bẹjẹeji hodidọ debọdo-dego lọ tọn? Be hiẹ ma ko tindo todido dai, jẹnukọn na whenue hiẹ sè wẹndagbe lọ to tintan whenu ya?
18 Tofi, e họnwun dọ, Paulu ma to alọdlẹndo numọtolanmẹ tintan whenu tọn mítọn heyin todido ogbẹ̀ pipé tọn gba. Nuhe e to alọdlẹndo lọ yinukọn zẹ̀ enẹ go; e siso tlala, bosọ whanmẹ dogọ. To whenuena mí doakọnnanu po nugbonọ-yinyin po bo gbọnmọ dali yọnẹn dọ mí tindo alọkẹyi Jiwheyẹwhe tọn, ehe nọ tindo nugandomẹgo sisosiso he nọ yidogọna bosọ nọ hẹn todido tintan mítọn lodo. Todido he mí tindo nọ wá lẹzun nujọnu dogọ, dolido dogọ, mẹdetiti tọn dogọ todin. Todido dolido ehe nọ họnwun hezeheze dogọ. E nọ sọawuhia to gbẹtọ-yinyin mítọn, yèdọ walọyizan mítọn lẹpo mẹ. ‘Podọ todido enẹ ma nọ planmẹ biọ flumẹjijẹ mẹ gba; na owanyi Jiwheyẹwhe tọn ko yin kinkọndo ahun mítọn lẹ mẹ gbọn gbigbọ wiwe dali wutu.’
19. Nawẹ todido towe dona yin apadewhe odẹ̀ towe tọn to gbesisọmẹ gbọn?
19 Odẹ̀ vẹkuvẹku Epafla tọn wẹ yindọ mẹmẹsunnu po mẹmẹyọnnu etọn lẹ po to Kọlọsi ni yin nuyiwadeji bosọ tindo nujikudo zọnmii gando nuhe yé na wá pehẹ to nukọnmẹ lọ go, bo “sọgbe to ojlo Jiwheyẹwhe tọn lẹpo mẹ.” Mì gbọ dopodopo mítọn to aliho dopolọ mẹ ni dọnsẹpọ Jiwheyẹwhe to gbesisọmẹ gando todido mítọn go. Nọ yí todido towe gando aihọn yọyọ lọ go dogọ odẹ̀ mẹdetiti tọn towe lẹ. Nọ dọna Jehovah lehe hiẹ tindo ojlo vẹkuvẹku na ẹn sọ, po nujikudo he dolido po dọ e na wá. Nọ biọ alọgọ sọn e dè nado hẹn nujikudo towe siso bosọ hẹn ẹn gbloada. Dile Epafla hodẹ̀ dọ Kọlọsinu lẹ ni “sọgbe to ojlo Jiwheyẹwhe tọn lẹpo mẹ” do, nọ wà onú dopolọ. Nọ wà ẹ pludopludo.
20. Eyin omẹ kleun delẹ tọ́nsọn aliho Klistiani tọn ji, naegbọn ehe ma dona yin asisa mẹhẹngbọjọ tọn?
20 Hiẹ ma dona yin ayihafẹsẹna kavi yin hinhẹn gbọjọ gbọn nugbo lọ dali dọ e mayin mẹlẹpo wẹ pegan bosọ sọgbe. Mẹdelẹ sọgan gboawupo, yin ayihafẹsẹna, kavi jogbe poun. Enẹ jọ do mẹhe sẹpọ Jesu pẹkipẹki lẹ go, yèdọ apọsteli etọn lẹ. Ṣigba to whenuena Juda lẹzun mẹdehiatọ, be apọsteli he pò lẹ dèkanpò kavi doalọte wẹ ya? Na nugbo tọn, e mayin mọ! Pita yí Psalm 109:8 zan nado dohia dọ mẹdevo na yí otẹn Juda tọn. Mẹjẹmẹtẹnmẹ de yin dide, podọ omẹ nugbonọ Jiwheyẹwhe tọn lẹ zindonukọn to azọ́ndenamẹ yẹwhehodidọ tọn yetọn mẹ po zohunhun po. (Owalọ lẹ 1:15-26) Yé magbe nado pegan bosọ sọgbe.
21, 22. To linlẹn tẹmẹ wẹ pipegan po gbesisọ towe po na yin ayidego te?
21 Hiẹ sọgan tindo jide mlẹnmlẹn dọ pipegan po gbesisọ towe po to ojlo Jiwheyẹwhe tọn lẹpo mẹ ma na yin jìwọn e go gba. E na yin ayidego bosọ yin pinpẹn etọn yọnẹn tlala. Gbọn mẹnu dali?
22 Eyọ́n, mẹmẹsunnu po mẹmẹyọnnu towe lẹ po, he yọ́n we bosọ yiwanna we lẹ, na doayi e go. Eyin suhugan yetọn ma tlẹ nọ dọ ẹ to hogbe lẹ mẹ, nugandomẹgo lọ na taidi nuhe mí hia to 1 Tẹsalonikanu lẹ 1:2-6 mẹ dọmọ: “Míwlẹ [to] pẹdona Jiwheyẹwhe whepoponu na mì omẹ pó, mí sọ to mì flin to odẹ̀ mítọn mẹ; míwlẹ to finflin magbọjẹ azọ́n yise tọn mìtọn, po tuklajijẹ owanyi tọn mìtọn po, podọ [akọndonanu] todido tọn mìtọn to Jesu Klisti Oklunọ mítọn mẹ to Jiwheyẹwhe Otọ́ mítọn nukọn. [Na] . . . wẹndagbe mítọn ma wá mì dè to ohó kẹdẹ mẹ gba, ṣigba to huhlọn mẹ ga, to [gbigbọ wiwe] mẹ, podọ to tudido susu mẹ. . . . Mìwlẹ sọ lẹzun mẹhodotọ mítọn, po Oklunọ tọn po.” Klistiani nugbonọ he lẹdo we pé lẹ na tindo numọtolanmẹ dopolọ dile yé doayi e go dọ hiẹ “pegan bosọ sọgbe to ojlo Jiwheyẹwhe tọn lẹpo mẹ.”—Kọlọsinu lẹ 1:23.
23. Etẹwẹ na yin gbemima towe to owhe he ja ehe mẹ?
23 Na taun tọn, Otọ́ olọn mẹ tọn towe na doayi e go bo nasọ yin homẹhunnọ. Tindo jide gando enẹ go. Etẹwutu? Na hiẹ pegan bosọ sọgbe ‘to ojlo Jiwheyẹwhe tọn lẹpo mẹ’ wutu. Paulu wlanwe tulinamẹ tọn hlan Kọlọsinu lẹ gando zọnlinzinzin yetọn ‘dile e jẹna Jehovah nado hẹn homẹ etọn hùn to gigọ́mẹ’ do go. (Kọlọsinu lẹ 1:10) Mọwẹ, e yọnbasi na gbẹtọvi mapenọ lẹ nado hẹn homẹ etọn hùn to gigọ́mẹ. Mẹmẹsunnu po mẹmẹyọnnu towe Kọlọsi tọn lẹ po wàmọ. Klistiani he lẹdo we pé lẹ to mọwà todin. Hiẹ lọsu sọgan wàmọ ga! Enẹwutu, to gblagbla owhe he ja ehe tọn mẹ, gbọ̀ na odẹ̀ egbesọegbesọ tọn towe po nuyiwa gbesisọ tọn towe po ni dohia dọ hiẹ ko magbe “[nado] pegan bosọ sọgbe to ojlo Jiwheyẹwhe tọn lẹpo mẹ.”
Be Hiẹ Sọgan Flin Ya?
• Etẹwẹ ‘pipegan’ towe bẹhẹn?
• Onú tẹlẹ gando hiẹ lọsu titi go wẹ hiẹ dona yidogọ to odẹ̀ mẹ?
• Dile e yin ayinamẹ etọn na to Lomunu lẹ 5:4, 5 mẹ do, todido wunmẹ tẹwẹ hiẹ jlo nado tindo?
• Oplọn mítọn ko dozolanmẹna we nado tindo yanwle nankọ to owhe he ja lọ mẹ?
[Kanbiọ Oplọn Tọn Lẹ]
[Yẹdide to weda 20]
Epafla hodẹ̀ dọ mẹmẹsunnu emitọn lẹ ni pegan, bosọ sọgbe gando Klisti po todido yetọn po go
[Yẹdide to weda 23]
Todido nujikudo tọn towe po gbesisọ po yin tintindo gbọn omẹ livi susu devo lẹ dali