Yin Whinwhàn Nado Wadevizọn

MÌ HÒ (video kavi hoyidokanji lọ)

Yin Whinwhàn Nado Wadevizọn

ETẸWẸ na whàn asu po asi po 24 he tin to owhe nugopipe hugan gbẹzan tọn yetọn lẹ mẹ nado jo whẹndo, họntọn, po lẹdo he yé jẹakọhẹ lẹ po do nado kẹalọyi azọ́n mẹdehlan tọn to aigba jonọ tọn lẹ ji? Naegbọn yé nado hùn homẹ nado yì otò mọnkọtọn lẹ mẹ taidi Papouasie-Nouvelle-Guinée, po Taiwan po, gọna otò Aflika tọn lẹ po Amérique latine tọn lẹ po mẹ? Be e sọgan yin na owanyi sadidi tọn wutu wẹ ya? Lala. Kakatimọ, yé yin whinwhàn gbọn owanyi nujọnu tọn hlan Jiwheyẹwhe po kọmẹnu lẹ po dali.—Matiu 22:37-39.

Mẹnu wẹ omẹ ehelẹ yin? Mẹhe mọ gbedewema yí sọn klasi 109tọ Wehọmẹ Biblu Pinplọn Watchtower Giliadi tọn lẹ wẹ. To samedi 9 septembre 2000, lẹndopọ gbẹtọ 5 198 tọn wẹ pli dopọ to Ahọ́nkan Wepinplọn Watchtower tọn—heyin didoai to Patterson, New York—podọ to nọtẹn heyin ṣiṣakadopọ devo lẹ mẹ nado dotoai na ayinamẹ owanyinọ he sọgan gọalọna gbedewema-yítọ lọ lẹ nado yin mẹdehlan kọdetọn dagbenọ lẹ.

Azinponọ tito-to-whinnu lọ tọn wẹ Stephen Lett, yèdọ dopo to hagbẹ Wedegbẹ́ Mẹpinplọn tọn heyin Hagbẹ Anademẹtọ Kunnudetọ Jehovah tọn lẹ tọn mẹ. E ze hodidọ bẹjẹeji tọn etọn sinai do Matiu 5:13 ji, “Mì wẹ ojẹ̀ aigba tọn.” Mẹmẹsunnu Lett basi zẹẹmẹ dọ hogbe Jesu tọn lẹ gando wehọmẹvi he to gbedewema mọyi lẹ go na taun tọn. Di dohia, ojẹ̀ tindo jẹhẹnu onú lẹ hinhẹn tindo otọ́n tọn. Mọdopolọ ga, gbọn azọ́n yẹwhehodidọ kọdetọn dagbenọ yetọn dali, mẹdehlan lẹ taidi ojẹ̀ to aliho yẹhiadonu tọn de mẹ.

Tulinamẹ Mẹjijodo Tọn

Enẹgodo Mẹmẹsunnu Lett basi oylọ na devizọnwatọ Jehovah tọn whenu-dindẹn tọn delẹ he na hodidọ he whègli ṣigba heyin huhlọnnọ lẹ sọn Owe-wiwe lẹ mẹ. Omẹ tintan wẹ John Wischuk, he nọ wazọ́n to Azọ́nwatẹn Nukinkan tọn. Hosọ etọn, heyin “Psalm He Whègli Hugan lọ Ze Gbigbọ Mẹdehlan Tọn Daga,” yin zize sinai do Psalm 117 ji. To egbehe, nuhudo de tin lẹdo aihọn pé nado dekunnu na “akọta lẹpo” po “gbẹtọ lẹpo” po gando Jehovah po Ahọluduta etọn po go. Wehọmẹvi lọ lẹ yin tulina nado hẹn nuhe Psalm 117 dọ lọ di gbọn tudidohomẹna mẹdevo lẹ nado ‘Pa Jah’ dali.

Enẹgodo azinponọ lọ basi oylọ na Guy Pierce heyin dopo to Hagbẹ Anademẹtọ mẹ. E dọho do hosọ lọ “Mì Yin Alọdiọtọ, Ṣigba Nujikudonọ” ji. Ohó Jiwheyẹwhe tọn lodo. Jehovah Jiwheyẹwhe yin yiylọdọ Osé to Deutelonomi 32:4 mẹ, ṣogan Ohó etọn nọ na dotẹnmẹ alọdidiọ to enẹ mẹ dọ e yin kinkàn na pipli ogbè po aṣa tọn lẹpo po—mọwẹ, na gbẹtọvi lẹpo. Wehọmẹvi lọ lẹ yin tudohomẹna nado dọyẹwheho Ohó Jiwheyẹwhe tọn, bo dike owẹ̀n etọn ni yinuwa do ahun po ayihadawhẹnamẹnu gbẹtọ lẹ tọn po ji. (2 Kọlintinu lẹ 4:2) “Mì yin nujikudonọ gando nunọwhinnusẹ́n he sọgbe lẹ go, ṣigba mì sọ yin alọdiọtọ. Mì ma vlẹ mẹhe mì dukosọhẹ to azọ́ndenamẹ mìtọn mẹ lẹ na aṣa yetọn gbọnvo wutu blo,” wẹ Mẹmẹsunnu Pierce dotuhomẹna yé dọ.

Karl Adams, heyin dopo to nuplọnmẹtọ Giliadi tọn lẹ mẹ, he ko to sinsẹ̀nzọnwa to tatọ́-tẹnnọ aihọn tọn mẹ na nudi owhe 53, dọho do hosọ mẹwhantọ lọ ji heyin “Fie Wẹ Hiẹ Na Yì sọn Ofi?” Nugbo wẹ dọ, asu po asi po 24 lọ lẹ mọ azọ́ndenamẹ mẹdehlan tọn yí nado yì otò voovo 20 mẹ lẹdo aihọn pé, ṣigba kanbiọ lọ yin finfọndote dọ, To whenuena mì ko jẹ finẹ bo ko mọ otò mìtọn yọyọ lọ godo, etẹwẹ mì na wà to enẹgodo? Mí to gbẹnọ to aihọn he tindo gbigbọ sọmawhe tọn de mẹ. Gbẹtọ lẹ nọ jlo nado yì nọtẹn yọyọ lẹ mẹ podọ nado wà onú yọyọ lẹ to vivẹnudido mẹ nado hẹn homẹ yedelẹ tọn hùn. To alọ devo mẹ, wehọmẹvi lọ lẹ mọ azọ́ndenamẹ de yí sọn Jehovah dè nado yì fie ewọ jlo dọ yé ni nọ̀ nado penukundo “lẹngbọ” etọn lẹ go matin ṣejannabi. Yé ma dona tin taidi mẹdelẹ to Islaelivi hohowhenu tọn lẹ mẹ he na ṣejannabi wutu gbọ̀ dotẹnmẹ hundote lọ go nado yin yiyizan gbọn Jehovah dali nado dona gbẹtọ lẹpo gba. Kakatimọ, yé dona hodo apajlẹ Jesu Klisti tọn, mẹhe nọ wà ojlo Otọ́ etọn tọn to whepoponu matin ṣejannabi bosọ nọ setonu to ninọmẹ he e pannukọn lẹpo mẹ.—Johanu 8:29; 10:16.

“Wlebòna Onú Sisosiso Jiwheyẹwhe Tọn Lẹ” wẹ yin hosọ Wallace Liverance tọn, yèdọ mẹhe yin kandai-hẹntọ Wehọmẹ Giliadi tọn tọn. Pludopludo, Owe-wiwe lẹ dọho gando Ohó Jiwheyẹwhe tọn go bo yí ì jlẹdo adọkun, aṣọdonu họakuẹ lẹ, gànmú họakuẹ lẹ, po nuhe yè nọ yí nukun nujọnu taun tọn do pọ́n he yè nọ dín vẹkuvẹku lẹ po go. Howhinwhẹn lẹ 2:1-5 dohia dọ nado mọ ‘oyọnẹn tangan Jiwheyẹwhe tọn,’ mí dona dín in taidi “adọkunnu he whlá.” Hodọtọ lọ na tuli wehọmẹvi lọ lẹ nado to dòkùn biọ onú sisosiso Jiwheyẹwhe tọn lẹ mẹ zọnmii dile yé to sinsẹ̀nzọnwa to azọ́ndenamẹ yọyọ yetọn lẹ mẹ. Mẹmẹsunnu Liverance yihojlẹdohogo dọmọ: “Ehe yọn-na-yizan, na e nọ jlọ yise po jidide po dote to Jehovah mẹ bo nasọ hẹn gbemima mìtọn nado gbọṣi azọ́ndenamẹ mìtọn mẹ lodo. E na gọalọna mì nado dọho po nujikudo po podọ nado yin mẹplọntọ kọdetọn dagbenọ dogọ lẹ dile mì to zẹẹmẹ lẹndai Jiwheyẹwhe tọn lẹ tọn basi na mẹdevo lẹ.”

To ninọmẹ tito klasi tọn de yiyizan mẹ, nuplọnmẹtọ Wehọmẹ Giliadi tọn devo gbadopọnna lehe Jehovah ko dona nuyiwa lizọnyizọnwiwa kunnudegbe tọn wehọmẹvi lọ lẹ tọn do to osun atọ́n he ko wayi lẹ gblamẹ. Lawrence Bowen dlẹnalọdo hodidọ Paulu tọn lẹ to Owalọ lẹ 20:20 mẹ gando lizọnyizọn gbangba tọn etọn to Efesu go, bo zinnudeji dọ Paulu yí dotẹnmẹ hundote lẹpo zan nado dekunnu. Numimọ wehọmẹvi lọ lẹ tọn dohia dọ, taidi apọsteli Paulu, mẹhe yin whinwhàn gbọn owanyi na Jiwheyẹwhe po kọmẹnu po dali to ojlẹ mítọn mẹ lẹ ma nọ joagọyigodo sọn nugbo lọ didọ po didike na huhlọn Ohó Jiwheyẹwhe tọn ni wazọ́n to mẹdevo lẹ mẹ po mẹ gba. Ehe nọ dekọtọn do dona susugege Jehovah tọn lẹ mẹ.

Ayinamẹ Numimọnọ lẹ Tọn

To ojlẹ wehọmẹ tọn yetọn whenu, wehọmẹvi he tin to klasi Giliadi tọn ehe mẹ lẹ mọaleyi na taun tọn gbọn pipenugo nado dogbẹ́ hẹ hagbẹ Wedegbẹ́ Alahọ tọn lẹ sọn aigba 23 ji dali, he yé lọsu tin to Ahọ́nkan Wepinplọn Patterson tọn na azọ́nplọnmẹ vonọtaun de. Leon Weaver po Merton Campbell po he nọ wazọ́n to Azọ́nwatẹn Sinsẹ̀nzọnwiwa tọn lẹ deanana hokansemẹ lẹ hẹ hagbẹ Wedegbẹ́ Alahọ tọn voovo, he delẹ to yé mẹ yin mẹhe mọ gbedewema yí sọn Giliadi lẹ. Jidevọnamẹ de wẹ e yin na wehọmẹvi lọ lẹ po whẹndo gọna họntọn yetọn lẹ po nado sèhó sọn mẹdehlan numimọnọ ehelẹ dè.

Ayinamẹ heyin nina klasi he to gbedewema mọyi lọ nado gọalọna yé nado diọada sọgbe hẹ azọ́ndenamẹ tògodo tọn yetọn bẹ hodidọ lẹ hẹn taidi ehelẹ: “Mì yin nujikudonọ. Eyin mì dukosọ hẹ nude he yin nubajonọmẹ taun kavi he mì ma sọgan mọnukunnujẹemẹ, mì gbọjọ blo. Mì ganjẹ Jehovah go”; “mì plọn nado yin ayajẹnọ to nuhe tin-to-aimẹ lẹ mẹ, bo deji dọ Jehovah na wleawuna dandannu gbẹ̀mẹ tọn lẹ na mì.” Hodidọ devo lẹ zinnudo alọgigọna wehọmẹvi lẹ nado hẹn ayajẹ go to azọ́ndenamẹ yetọn mẹ ji. Hodidọ vude lẹ wẹ: “Mì ma yí fie mì tọ́nsọn jlẹdo fie mì yin azọ́ndena do go blo”; “mì plọn ogbè lẹdo lọ tọn bosọ nọ do e ganji na mì nido sọgan dọhodopọ hẹ omẹ lọ lẹ”; “mì plọn aṣa omẹ lọ lẹ tọn lẹ, na ehe na gọalọna mì nado tẹdo azọ́ndenamẹ mìtọn go.” Hodidọ ehelẹ yin tulinamẹnu daho de na mẹdehlan yọyọ lẹ.

Bọdo hokansemẹ lọ lẹ go, David Splane, yèdọ mẹdehlan dai tọn de he mọ gbedewema yí sọn klasi 42tọ Giliadi tọn mẹ bo to devizọnwa todin taidi dopo to Hagbẹ Anademẹtọ Kunnudetọ Jehovah tọn lẹ tọn mẹ, wleawuna hodidọ tangan lọ sinai do hosọ he fọ́n ayidonugo dote ji heyin “Wehọmẹvi lẹ Kavi Mẹhe Ko Mọ Gbedewema Yí Lẹ—Detẹ Wẹ?” E kanse klasi he to gbedewema yí lọ dọ: “Nawẹ mì na wá pọ́n mìdelẹ hlan gbọn to whenuena mì yì azọ́ndenamẹ mẹdehlan tọn mìtọn mẹ? Taidi mẹhe ko mọ gbedewema yí he yọ́n onú lẹpo gando azọ́n mẹdehlan tọn go kavi taidi wehọmẹvi he gbẹsọ tindo nususu nado plọn lẹ?” Mẹmẹsunnu Splane dohia dọ mẹhe mọ gbedewema yí heyin nuyọnẹntọ de nọ pọ́n ede hlan taidi wehọmẹvi de. Mẹdehlan lọ lẹ dona kẹalọyi pọndohlan lọ dọ mẹhe yé dukosọ hẹ to azọ́ndenamẹ mẹdehlan tọn yetọn mẹ lẹpo wẹ tindo nugopipe lọ nado plọn yé nude. (Filippinu lẹ 2:3) Wehọmẹvi lọ lẹ yin tulina nado kọngbedopọ pẹkipẹki hẹ mẹdehlan hatọ yetọn lẹ, wekantẹn alahọ tọn, po agun yetọn po. “Mì ko dín na mẹtẹnpọn godo tọn mìtọn lẹ, ṣigba mì ma ko doalọtena wehọmẹvi yinyin gba. Mì hẹn ẹn diun na mẹlẹpo dọ mì tin to finẹ nado plọnnu wẹ,” wẹ Mẹmẹsunnu Splane dotuhomẹnamẹ dọ.

To hodidọ ehe godo, wehọmẹvi lọ lẹ mọ gbedewema yetọn yí, bọ azọ́ndenamẹ yetọn lẹ sọ yin lilá na mẹplidopọ lẹ. Ojlẹ mẹwhantọ de wẹ e yin na wehọmẹvi he to gbedewema yí lẹ dile nukunmọnu klasi lọ tọn hia gbemima de bọdego he dọho gando gbemima mẹhe to gbedewema yí lẹ tọn go nado dike nuhe yé ko plọn sọn Ohó Jiwheyẹwhe tọn mẹ lẹ ni sisẹ́ yé hlan nuyiwa sinsẹ̀nzọn wiwe tọn he yiaga lẹ kọ̀n.

Mẹplidopọ lẹpo wẹ na yigbe dọ ayinamẹ heyin mimọyi lẹ hẹn gbemima mẹhe to gbedewema yí lẹ tọn lodo nado do owanyi Jiwheyẹwhe tọn po kọmẹnu tọn po hia. E sọ hẹn yé yin nujikudonọ dogọ hugan gbede pọ́n nado gọalọna gbẹtọ lẹ to gbigbọ-liho to azọ́ndenamẹ mẹdehlan tọn yetọn mẹ ga.

[Apotin to weda 25]

SỌHA NULINLẸN KLASI TỌN

Sọha otò he mẹ yé wá sọn lẹ tọn: 10

Sọha otò he mẹ yè do yé hlan lẹ tọn: 20

Sọha wehọmẹvi lẹ tọn: 48

Madozẹnzẹn owhe tọn: 33.7

Madozẹnzẹn owhe to nugbo mẹ tọn: 16.2

Madozẹnzẹn owhe to lizọnyizọn whenu-gigọ́ mẹ tọn: 12.5

[Yẹdide to weda 26]

Gbedewema-Yíyí Klasi 109tọ Wehọmẹ Biblu Pinplọn Watchtower Giliadi Tọn

To yinkọ he tin to odò lẹ mẹ, hukan lẹ yin sọha yí na sọn nukọn yì godo, bọ yinkọ lẹ yin sislẹ sọn amiyọnwhé yì adusiwhé to hukan dopodopo ji.

(1) Collins, E.; Miles, L.; Alvarado, A.; Lake, J. (2) Van Dusen, L.; Biharie, A.; Heikkinen, H.; Koós, S.; Smith, H. (3) Ashford, J.; Ashford, C.; Boor, C.; Richard, L.; Wilburn, D.; Lake, J. (4) Chichii, K.; Chichii, H.; Ramirez, M.; Baumann, D.; Becker, G.; Biharie, S.; Ramirez, A. (5) Van Dusen, W.; Lemâtre, H.; Pisko, J.; Cutts, L.; Russell, H.; Johnson, R. (6) Becker, F.; Baumann, D.; Johnson, K.; Pifer, A.; Madsen, C.; Lemâtre, J.; Heikkinen, P. (7) Smith, R.; Russell, J.; Collins, A.; Pisko, D.; Wilburn, R.; Koós, G. (8) Cutts, B.; Boor, J.; Madsen, N.; Pifer, S.; Richard, E.; Miles, B.; Alvarado, R.

ATỌ̀HỌ̀-NUHIHỌ́ LỌ TỌN—ZINJẸGBONU OPLỌN TỌN