Salmu 109:1-31
Na anademẹtọ hànjitọ lẹ tọn. Ohàn Davidi tọn.
109 A gbọṣi abọẹ blo, Jiwheyẹwhe E, hiẹ mẹhe yẹn nọ pà.+
2 Na mẹylankan po mẹklọtọ lẹ po nọ kẹnù bo nọ dọho sọta mi.
Yé nọ yí odẹ́ lalo tọn lẹ do dọho gando go e;+
3 Yé nọ lẹdo mi pé bo nọ to ohó ylankan lẹ dọ do go e,Bo nọ tọ́navùn mi matin whẹwhinwhẹ́n de.+
4 Yé nọ yí avùnnukundiọsọmẹ do suahọ owanyi he yẹn dohia tọn;+Ṣigba, yẹn pò to dẹ̀ho janwẹ.
5 Yé nọ yí oylan do suahọ dagbe tọn mi+Bosọ nọ yí wangbẹna do suahọ owanyi tọn mi.+
6 Na mẹylankan ni dawhẹna ẹn;Na avùnnukundiọsọmẹtọ* de ni nọte to adusilọ etọn mẹ.
7 Gbọ owhẹ̀ de ni yin mimọ dokọna ẹn* to whenue ewọ na yin whẹdana;Na odẹ̀ etọn lọsu ni yin pinpọnhlan di ylando.+
8 Gbọ gbẹzan etọn ni whègli;+Gbọ mẹdevo ni yí azọ́ntẹn nukunpedonugo tọn etọn.+
9 Gbọ ovi* etọn lẹ ni lẹzun tọṣiọvi,Podọ asi etọn ni lẹzun asuṣiọsi.
10 Na ovi* etọn lẹ ni nọ to fuflupé nado biọ núdù,Bo nọ tọ́n sọn owhé kija yetọn lẹ gbè nado yì dín núdùdù.
11 Na mẹhe e duahọ do ni hò* nuhe e tindo lẹpo yí,Podọ na jonọ lẹ ni bẹ nutindo etọn lẹ di ogblànnu.
12 Mẹdepope ni ma do homẹdagbe* hia ẹ blo,Podọ mẹdepope ni ma do nukundagbe hia tọṣiọvi etọn lẹ blo.
13 Gbọ kúnkan* etọn lẹ ni yin sinsánsẹ;+Na oyín yetọn ni yin súnsúnsún sẹ̀ to whẹndo dopo gblamẹ.
14 Na Jehovah ni flin nuṣiwa tọgbo etọn lẹ tọn,+Podọ ylando onọ̀ etọn tọn ni ma yin súnsúnsún sẹ̀ blo.
15 Jehovah ni nọ hẹn nuhe yé ko wà lẹ do ayiha mẹ to whepoponu;Na e nisọ súnsún oflin yetọn sẹ̀ sọn aigba ji.+
16 Na dawe enẹ ma flin nado do homẹdagbe* hia,+Ṣigba, e nọ to ogbé mẹhe yè gbidikọna,+ gọna wamọnọ po mẹhe ahun etọn jẹflumẹ po tọn yànNado hù i.+
17 E yiwanna nado hodẹ̀domẹ, enẹwutu wẹ dẹ̀hodo do wá ewọ lọsu ji;E ma tindo ojlo nado donamẹ, enẹwutu wẹ ewọ lọsu ma do mọ dona depope yí.
18 Dẹ̀hodo lẹ wẹ ṣinyọ́n ẹn di awù.
Yé sọ yin kinkọ̀n do lanmẹ na ẹn di osin,Podọ do ohú etọn lẹ mẹ di amì.
19 Na dẹ̀hodo etọn lẹ ni taidi awù to okọ̀ na ẹn+Podọ taidi gbànnú he e nọ sìn to whepoponu.
20 Ehe wẹ ahọ́ he Jehovah nọ sú mẹhe nọ diọavunnukunsọ mi+Po mẹhe nọ dọ nuylankan do go e* lẹ po.
21 Ṣigba, Oklunọ Nupojipetọ Jehovah E,Yinuwado ota ṣie mẹ na oyín towe wutu.+
Whlẹn mi, na owanyi nugbo towe yọ́n.+
22 Na agbátọnọ podọ wamọnọ de wẹ yẹn,+Yè sọ sọnú ahun ṣie to ohò ṣie mẹ.+
23 Yẹn to jujuyi kẹdẹdi oyẹ̀ he to bubusẹ vudevude;Yẹn ko yin fúfú sẹ̀ di owẹ̀n.
24 Nùbibla hẹn kligonu ṣie lẹ gbọjọ;Yẹn sọ to didepo bo to gohú.*
25 N’ko lẹzun aṣagbọ́nu de na yé.+
Eyin yé mọ mi, yé nọ mimí ota yetọn.+
26 Jehovah Jiwheyẹwhe ṣie E, gọalọna mi;Whlẹn mi to owanyi nugbo towe mẹ.
27 Gbọ yé ni yọnẹn dọ alọ towe wẹ wà ehe;Dọ hiẹ Jehovah wẹ ko wà ẹ.
28 Yewlẹ ni nọ lá dẹ̀hodo, ṣigba hiẹ ni nọ hẹn dona wá.
Gbọ yé ni duwinyan to whenue yé fọ́n do ji e,Ṣigba, gbọ devizọnwatọ towe ni jaya.
29 Gbọ winyan ni hù mẹhe nọ diọavunnukunsọ mi lẹ;Gbọ winyan yetọn ni ṣinyọ́n yé di tewu.*+
30 Onù ṣie na nọ pà Jehovah po zohunhun po;Yẹn na nọ pà ẹ to mẹsusu nukọn.+
31 Na ewọ na nọte to adusilọ wamọnọ tọn mẹNado whlẹn ẹn sọn mẹhe nọ gblewhẹdo e* lẹ si.
Nudọnamẹ Odò Tọn
^ Kavi “whẹsadokọnamẹtọ.”
^ Kavi “Gbọ ewọ ni yin mimọ di mẹylankan.”
^ To paa mẹ, “visunnu.”
^ To paa mẹ, “visunnu.”
^ Kavi “Na mẹhe nọ yàn akuẹ namẹ po akuẹvi he yiaga po lẹ ni do omọ̀ na.”
^ Kavi “owanyi nugbo.”
^ Kavi “ovivi.”
^ Kavi “owanyi nugbo.”
^ Kavi “do alindọn ṣie go.”
^ To paa mẹ, “Agbasalan ṣie ko húgo bo ma tindo ojó (amì) depope.”
^ Kavi “awù he ma tindo awà.”
^ Kavi “alindọn etọn.”
