Mì Do Walọyizan Teninọ Tọn Hia!
Mì Do Walọyizan Teninọ Tọn Hia!
“Yẹn na nọtepọn Jiwheyẹwhe whlẹngán ṣie tọn lọ, Jiwheyẹwhe ṣie nasọ sè mi.”—MIKA 7:7.
1, 2. (a) Nawẹ walọyizan agọ̀ gbleawuna Islaelivi lẹ to zungbo mẹ gbọn? (b) Etẹwẹ sọgan jọ do Klistiani he ma wleawuna walọyizan nujikudo tọn de go?
NUSUSU wẹ tin to aihọn mẹ he sọgan yin pinpọnhlan po nujikudo po kavi to ninọmẹ agọ̀ mẹ, sinai do walọyizan mítọn ji. To whenuena Islaelivi lẹ tin to zungbo mẹ, yè wleawu manna tọn na yé gbọn azọ́njiawu dali. Yé dona ko pọ́n aigba gbọgbé lọ lẹdo pé bo na ko do pinpẹn-nutọn-yinyọnẹn sisosiso hia Jehovah na awuwiwlena núdùdù yetọn. Enẹ na ko do walọyizan nujikudo tọn de hia. Kakatimọ, yé flin núdùdù wunmẹ voovo he tin to Egipti lẹ bo wule dọ manna ma nọ dotọ́n gba. Walọyizan agọ̀ nankọtọn die!—Osọha lẹ 11:4-6.
2 Mọdopolọ to egbehe walọyizan Klistiani de tọn sọgan hẹn onú lẹ nado sọawuhia taidi onú dagbe kavi nuhe gblezọn. Matin walọyizan he sọgbe lọ, Klistiani de sọgan hẹn ayajẹ etọn bu po awubibọ po, podọ enẹ na yin nujọnu na, dile Nẹhemia dọ do: “Ayajẹ OKLUNỌ tọn wẹ huhlọn [mítọn].” (Nẹhemia 8:10) Walọyizan nujikudo tọn, heyin ayajẹ tọn nọ gọalọ nado hẹn mí lodo bo nọ ze jijọho po pọninọ po daga to agun mẹ.—Lomunu lẹ 15:13; Filippinu lẹ 1:25.
3. Nawẹ walọyizan nujikudo tọn gọalọna Jẹlemia to ojlẹ awusinyẹnnamẹ tọn lẹ mẹ gbọn?
3 Mahopọnna dọ e nọgbẹ̀ to ojlẹ awusinyẹn tọn lẹ mẹ, Jẹlemia do walọyizan nujikudo tọn hia. Etlẹ yin to whenuena e ko mọ aijijẹ mẹhẹnjọsi Jelusalẹm tọn to 607 J.W.M., e gbẹsọ mọ adà nujikudo tọn na onú lẹ. Jehovah ma na wọnji Islaeli go gba, podọ akọta lọ na luntọ́n. Jẹlemia wlan to owe Avigbè Jẹlemia tọn mẹ dọmọ: “Lẹblanu OKLUNỌ tọn lẹ mẹ e sọn bọ yè ma do và mí sudo, na akọ́ndonanu etọn ma nọ gbọ̀vọ́ wutu. Yọyọ wẹ yé to afọnnu afọnnu; daho wẹ nugbowa etọn.” (Avigbè Jẹlemia tọn 3:22, 23) To whenuho mẹ jẹdò, devizọnwatọ Jiwheyẹwhe tọn lẹ ko nọ dín nado hẹn walọyizan nujikudo tọn de go, yèdọ etlẹ yin ayajẹ tọn to ninọmẹ he sinyẹnawu hugan lẹ glọ.—2 Kọlintinu lẹ 7:4; 1 Tẹsalonikanu lẹ 1:6; Jakobu 1:2.
4. Walọyizan tẹ go wẹ Jesu hẹn, podọ nawẹ e gọalọna ẹn gbọn?
4 Owhe 600 to Jẹlemia godo, Jesu yin alọgọna nado doakọnnanu na walọyizan nujikudo tọn etọn wutu. Mí hia dọmọ: “Na ayajẹ he yè ze do nukọn [Jesu tọn] wutu e doakọnna [yatin] lọ, ma hò winyan lọ pọ́n, bosọ sinai to adusilọ ofìn Jiwheyẹwhe tọn ji.” (Heblu lẹ 12:2) Mahopọnna nukundiọsọmẹ kavi homẹkẹn he Jesu dona pannukọn lẹ—etlẹ yin awubla yatin lọ tọn—e ze ayiha etọn do “ayajẹ he yè ze do nukọn etọn” ji. Ayajẹ enẹ wẹ lẹblanulọkẹyi whẹsuna nupojipetọ-yinyin Jehovah tọn po kinklandowiwe oyín etọn tọn po gọna nukundido dona daho lẹ hinhẹnwa na gbẹtọvi tonusetọ lẹ to sọgodo tọn.
Hẹn Walọyizan Teninọ Tọn Go
5. Etẹwẹ yin ninọmẹ tangan dopo he mẹ walọyizan teninọ tọn na gọalọna mí nado hẹn pọndohlan he sọgbe whẹho lẹ tọn go te?
5 Eyin mí wleawuna walọyizan apọ̀nmẹ tọn de he taidi enẹ heyin Jesu tọn, mí ma na hẹn ayajẹ mítọn bu to Jehovah mẹ gba yèdọ eyin onú lẹ ma tlẹ jọ dile mí lẹn kavi to whenuena mí donukun yé do. Yẹwhegán Mika dọmọ: “Na yẹn tọn, yẹn na nọ pọ́n hlan OKLUNỌ dè; yẹn na nọtepọn Jiwheyẹwhe whlẹngán ṣie tọn lọ.” (Mika 7:7; Avigbè Jẹlemia tọn 3:21) Mílọsu sọgan do walọyizan teninọ tọn hia. Gbọnna? To aliho susu mẹ. Onú dopo wẹ yindọ, mí sọgan lẹndọ mẹmẹsunnu de he tin to otẹn aṣẹpipa tọn mẹ ko ṣinuwa podọ dọ nuhudo tin na vọjlado niyaniya tọn. Walọyizan teninọ tọn na gọalọna mí nado gbadopọnna dọ, ‘Be ewọ ṣinuwa nugbonugbo wẹ, kavi be yẹn wẹ to nuṣiwa ya? Eyin ewọ wẹ to nuṣiwa, be e sọgan yin dọ Jehovah to dotẹnmẹ na nujijọ lẹ nado jọ na e lẹndọ omẹ lọ na basi vọjlado bọ nuhudo ma na tin na afọdide nuyiwa vọjlado niyaniya tọn lẹ wẹ ya?’
6. Nawẹ walọyizan teninọ tọn na gọalọna mẹhe to ahidihẹ nuhahun mẹdetiti tọn de gbọn?
6 Nuhudo walọyizan teninọ tọn sọgan tin eyin mí yin tuklado gbọn nuhahun mẹdetiti tọn de dali kavi to ahidihẹ madogán de. Mí ni dọ dọ mí biọ alọgọ Jehovah tọn, ṣigba nuhahun lọ gbọṣi aimẹ janwẹ. Etẹwẹ mí na wà to whenẹnu? Mí dona to nuhe go mí pé lẹpo wà zọnmii nado didẹ nuhahun lọ podọ to enẹgodo tindo yise to ohó Jesu tọn lẹ mẹ dọmọ: “Mì to bibiọ zọnmii, yè nasọ yí na mì; mì to dindin zọnmii, mì nasọ mọ; mì to họ̀n húhú zọnmii, yè nasọ hùn dai hlan mì.” (Luku 11:9, NW ) Mì nọ to dẹ̀ho zọnmii, bo nọtepọn Jehovah. To ojlẹ he sọgbe de mẹ podọ to aliho edetiti tọn mẹ, Jehovah na na gblọndo na odẹ̀ towe lẹ.—1 Tẹsalonikanu lẹ 5:17.
7. To aliho tẹmẹ wẹ walọyizan teninọ tọn nọ gọalọna pọndohlan mítọn gando nukunnumọjẹnumẹ Biblu tọn he to yinyin hinhẹn pọnte vudevude go gbọn?
7 Dile dọdai Biblu tọn lẹ to hẹndi tindo, nukunnumọjẹnumẹ Owe-wiwe lẹ tọn mítọn nọ yin hinhẹn họnwun deji. Nalete, to whedelẹnu, mí sọgan lẹndọ nukunnumọjẹnumẹ de ko dẹn gbau. Eyin e ma to wiwá to whenuena mí na jlo e do, be mí nọ jlo nado nọte ya? Flindọ, Jehovah mọdọ e jẹ nado de “nudabla Klisti tọn” hia vudevude podọ to ojlẹ he hugan owhe 4 000 lẹ gblamẹ. (Efesunu lẹ 3:3-6) To whelọnu lo, be mí tindo whẹwhinwhẹ́n depope nado yin sọmawhenọ ya? Be mí nọ tindo ayihaawe dọ “afanumẹ, nugbonọ nuyọnẹntọ” lọ ko yin dide nado na ‘núdùdù omẹ Jehovah tọn lẹ to ojlẹ he sọgbe lọ mẹ’ wẹ ya? (Matiu 24:45) Naegbọn mí dona glọnalina mídelẹ ma nado tindo ayajẹ jijọ-di-Jiwheyẹwhe tọn na e mayin onú lẹpo wẹ yin nukunnumọjẹemẹ mlẹnmlẹn wutu? Flindọ, Jehovah wẹ nọ de dide whenuena podọ lehe e na de ‘whẹho aṣli tọn lẹ’ hia gbọn tọn.—Amọsi 3:7.
8. Nawẹ linsinsinyẹn Jehovah tọn sọawuhia nado yin alemọyi na mẹsusu lẹ gbọn?
8 Mẹdelẹ sọgan yin hinhẹn gbọjọ na yé tindo numọtolanmẹ lọ dọ to owhe susu sinsẹ̀nzọnwiwa nugbonọ tọn godo, yé sọgan nọ ma nọgbẹ̀ nado mọ “azán daho bosọ dobu [Jehovah, NW ] tọn lọ.” (Joẹli 2:30, 31) Etomọṣo, yé sọgan yin tulina to whenuena yé pọ́n adà nujikudo tọn lọ hlan. Pita na ayinamẹ dọmọ: “Mì nisọ lẹn dọ, linsinsinyẹn Oklunọ mítọn tọn whlẹngán wẹ.” (2 Pita 3:15) Linsinsinyẹn Jehovah tọn ko na dotẹnmẹ gbẹtọ ahunjijlọnọ livi susu lẹ dogọ nado plọn nugbo lọ. Be enẹ ma jiawu ya? Humọ, dile Jehovah yí linsinsinyẹn zan dẹnsọ, mọwẹ ojlẹ he mí tindo nado “nọ wazọ́n whlẹngán [mítọn] tọn jẹgbonu to osi po sisọsisọ po mẹ” na dite do niyẹn.—Filippinu lẹ 2:12; 2 Pita 3:11, 12.
9. Eyin nuhe mí sọgan wà to sinsẹ̀nzọn Jehovah tọn mẹ tindo dogbó, nawẹ walọyizan teninọ tọn de na gọalọna mí nado doakọnna ninọmẹ lọ gbọn?
9 Walọyizan teninọ tọn nọ gọalọna mí ma nado yin hinhẹn gbọjọ to whenuena nukundiọsọmẹ, awutu, yọnhowhe, kavi nuhahun devo lẹ dekanpona mí to sinsẹ̀nzọn Ahọluduta lọ tọn mẹ. Jehovah nọ donukun dọ mí ni sẹ̀n emi po ahun lẹpo po. (Lomunu lẹ 12:1) Ṣigba, Visunnu Jiwheyẹwhe tọn, he tindo numọtolanmẹ “lẹblanu [tọn] to oyatọ po agbátọnọ po ji,” ma biọ hugan nuhe mí sọgan na po lẹnpọn dagbe po gba; mọjanwẹ Jehovah lọsu ma wàmọ do niyẹn. (Psalm 72:13) Gbọnmọ dali, mí nọ yin tulina nado wà nuhe go mí pé lẹpo, bo nọ yí linsinsinyẹn do nọte kakajẹ whenuena ninọmẹ lẹ na diọ—vlavo to titonu ehe mẹ kavi enẹ he na wá mẹ. Flindọ: “Jiwheyẹwhe mayin mawadodonọ nado wọn azọ́n mìtọn po tukla owanyi mìtọn tọn po, he mì ko sọhia gbọn oyín etọn dali, na le mì to devizọnwa hlan mẹwiwe lẹ do, bosọ to bibasi i.”—Heblu lẹ 6:10.
10. Walọyizan jijọ-madi-Jiwheyẹwhe tọn tẹwẹ sọgan yin didapana gbọn mẹhe tindo walọyizan teninọ tọn de dali? Basi zẹẹmẹ.
10 Walọyizan teninọ tọn sọ nọ gọalọna mí nado dapana saklanọ-yinyin. Mẹdelẹ he ko lẹzun atẹṣitọ ma nọ tindo ojlo nado nọte gba. Yé sọgan ko lẹndọ nuhudo tin na vọjlado lẹ, vlavo to nukunnumọjẹnumẹ Biblu tọn mẹ kavi to whẹho titobasinanu tọn lẹ mẹ. Ṣogan, yé nọ gboawupo nado yọnẹn dọ gbigbọ Jehovah tọn nọ whàn afanumẹ nugbonọ nuyọnẹntọ lọ nado basi vọjlado mọnkọtọn lẹ to ojlẹ sisọ̀ Etọn mẹ, e mayin to whenuena míwlẹ sọgan lẹndọ ehe jẹ gba. Podọ vọjlado depope dona tin to kọndopọmẹ hẹ ojlo Jehovah tọn, e mayin linlẹn míde titi tọn lẹ gba. Atẹṣitọ lẹ nọ na dotẹnmẹ walọyizan sakla tọn nado slokọna lẹnpọn yetọn bo hẹn yé dahli. Ṣigba eyin yé ko kẹalọyi walọyizan apọ̀nmẹ tọn Klisti tọn wẹ, yé sọgan ko hẹn ayajẹ yetọn go bo gbọṣi omẹ Jehovah tọn lẹ ṣẹnṣẹn.—Filippinu lẹ 2:5-8.
11. Nawẹ mí sọgan yí ojlẹ he mí nọ yizan na teninọ zan po kọdetọn dagbe po gbọn, to apajlẹ mẹnu tọn lẹ hihodo mẹ?
11 Na nugbo tọn, nado hẹn walọyizan teninọ tọn go ma zẹẹmẹdo yinyin adidọnọ kavi gbọjọ gba. Mí tindo onú lẹ nado wà. Di apajlẹ, mí dona hẹn alọnu ján to Biblu pinplọn mẹdetiti tọn mẹ podọ gbọnmọ dali do ojlo vẹkuvẹku dopolọ hia to onú gbigbọmẹ tọn lẹ mẹ yèdọ dile yẹwhegán nugbonọ lẹ podọ etlẹ yin angẹli lẹ dohia do. To hodidọ gando ojlo mọnkọtọn go mẹ, Pita dọmọ: “[Gando] whlẹngán he tọn yẹwhegán lẹ kanbiọ, bosọ yí vivẹnu do dindona tlala [go] . . . onú he angẹli lẹ jlo nado doun e mẹ pọ́n.” (1 Pita 1:10-12) E mayin dọ oplọn mẹdetiti tọn yin dandannu kẹdẹ wẹ gba ṣigba opli lẹ yìyì to gbesisọmẹ po odẹ̀ po lọsu ga. (Jakobu 4:8) Mẹhe nọ do oyọnẹn nuhudo gbigbọmẹ tọn yetọn hia gbọn núdùdù gbigbọmẹ tọn dùdù po gbẹdido hẹ Klistiani hatọ lẹ po to gbesisọmẹ po dali lẹ to didohia dọ yé ko kẹalọyi walọyizan apọ̀nmẹ tọn Klisti tọn.—Matiu 5:3.
Tindo Pọndohlan Lẹnpọn Dagbe Tọn
12. (a) Mẹdekannujẹ tẹwẹ Adam po Evi po dín? (b) Etẹwẹ ko yin kọdetọn hihodo aliho nuyiwa Adam po Evi po tọn gbọn gbẹtọvi lẹ dali?
12 To whenuena Jiwheyẹwhe dá gbẹtọvi asu po asi po tintan, e hẹn jlọjẹ lọ nado ze nujinọtedo nuhe sọgbe po oylan tọn po do ede kẹdẹ dè. (Gẹnẹsisi 2:16, 17) Adam po Evi po jlo mẹdekannujẹ sọn anademẹ Jiwheyẹwhe tọn glọ, podọ ehe dekọtọn do aihọn he mẹ mí tin te to egbehe lọ mẹ. Apọsteli Paulu dọmọ: “Le ylando gbọn omẹ dopo dè biọ aihọn mẹ, podọ okú gbọn ylando dali; mọwẹ gbẹtọ lẹpo kú do, na omẹ popo wẹ waylan wutu.” (Lomunu lẹ 5:12) Owhe fọtọ́n donu ṣidopo whenuho gbẹtọvi tọn sọn ojlẹ Adam tọn mẹ gbọ́n ko do nugbo-yinyin hogbe Jẹlemia tọn lẹ tọn hia dọmọ: “OKLUNỌ E, yẹn yọnẹn dọ aliho gbẹtọ tọn matin to ewlọsu mẹ gba: e matin to omẹ he to zọnlinzin mẹ nado do afọdide etọn lẹ gba.” (Jẹlemia 10:23) Nado yigbe dọ hogbe Jẹlemia tọn lẹ yin nugbo mayin alọkikẹyi nugomape gba. Nuhe sọgbe hẹ lẹnpọn dagbe wẹ eyin. E basi zẹẹmẹ owhe kanweko susu enẹ lẹpo tọn to whenuena “mẹde to gandu do omẹ awetọ ji . . . na awugble etọn” na gbẹtọvi lẹ ko dugán matin anademẹ Jiwheyẹwhe tọn wutu.—Yẹwhehodọtọ 8:9.
13. Pọndohlan he sọgbe hẹ lẹnpọn dagbe tẹwẹ Kunnudetọ Jehovah tọn lẹ tindo gando nuhe gbẹtọvi lẹ sọgan wadotana go?
13 To pọndohlan mẹ na ninọmẹ gbẹtọvi tọn, Kunnudetọ Jehovah tọn lẹ yọnẹn dọ dogbó tin na nuhe sọgan yin wiwadotana to titonu egbehe tọn mẹ lẹ. Walọyizan nujikudo tọn sọgan gọalọ nado hẹn ayajẹ mítọn dote, ṣigba e mayin pọngbọ lọ na nulẹpo gba. To fliflimẹ 1950 lẹ tọn, sinsẹ̀ngán Amelika tọn de zín owe he disa taun de tọ́n jẹgbonu heyin yiylọdọ The Power of Positive Thinking. Owe lọ na ayinamẹ dọ yè sọgan dù to suhugan aliglọnnamẹnu lẹ tọn ji eyin yè dọnsẹpọ yé po walọyizan nujikudo tọn de po. Nulẹnpọn nujikudo tọn yin nude he yè nọ jlo na taun tọn. Ṣigba numimọ lẹ ko dohia dọ oyọnẹn, azọ́nyinyọnẹn, nutindo agbasa tọn lẹ, po whẹwhinwhẹ́n susu devo lẹ po nọ glọnalina nuhe dopodopo mítọn lẹ sọgan wadotana. Podọ to obá aihọn tọn to pọmẹ, na poun tọn nuhahun lẹ ko klohugan na gbẹtọvi lẹ nado didẹ po kọdetọn dagbe po—yèdọ dile nulẹnpọn yetọn lẹ tlẹ yin nujikudo tọn do sọ!
14. Be Kunnudetọ Jehovah tọn lẹ nọ tindo walọyizan agọ̀ wẹ ya? Basi zẹẹmẹ.
14 Na lehe yé nọ pọ́n whẹho mọnkọtọn lẹ hlan po lẹnpọn dagbe po do wutu, Kunnudetọ Jehovah tọn lẹ nọ yin whẹsadokọna to whedelẹnu dọ yé tindo walọyizan agọ̀. Kakatimọ, yé wleawufo nado dọna gbẹtọ lẹ gando Omẹ dopo kẹdẹ lọ he sọgan hẹn ninọmẹ gbẹtọvi lẹ tọn pọnte kakadoi lọ go. Yé nọ hodo apajlẹ walọyizan apọ̀nmẹ tọn Klisti tọn to ehe lọsu mẹ ga. (Lomunu lẹ 15:2) Podọ alọnu yetọn nọ ján to alọgigọna gbẹtọ lẹ nado duale haṣinṣan dagbe de hẹ Jiwheyẹwhe tọn mẹ. Yé yọnẹn dọ yigodo-yinukọn, ehe na basi wadotana dagbe he yọ́n hugan lọ tọn.—Matiu 28:19, 20; 1 Timoti 4:16.
15. Nawẹ azọ́n Kunnudetọ Jehovah tọn lẹ tọn nọ hẹn ninọmẹ mẹdopodopo lẹ tọn pọnte gbọn?
15 Kunnudetọ Jehovah tọn lẹ ma nọ yí nukunpẹvi do pọ́n nuhahun lẹdo tọn lẹ gba—titengbe nuyiwa he nọ hẹn nunọwhinnusẹ́n Owe-wiwe tọn flu lẹ—he lẹdo yé pé lẹ. Whẹpo jlodotọ de nido lẹzun dopo to Kunnudetọ Jehovah tọn lẹ mẹ, e nọ basi diọdo lẹ, he nọ saba yin nado duto ylanwiwa onú lẹ ṣiṣizan tọn he nọ hẹn homẹ Jiwheyẹwhe tọn gble lẹ tọn ji. (1 Kọlintinu lẹ 6:9-11) Gbọnmọ dali Kunnudetọ Jehovah tọn lẹ ko gọalọna mẹhe yigbe lẹ nado duto ahànnumu, amasin adínọ ṣiṣizan, fẹnnuwiwa, po akọhiho mẹhẹn po huhlọn po tọn ji. Mẹdopodopo he ko diọ mọnkọtọn lẹ ko plọn nado wleawudai na whẹndo yetọn lẹ to aliho azọngbannọ-yinyin po nugbonọ-yinyin tọn de po mẹ. (1 Timoti 5:8) To whenuena mẹdopodopo po whẹndo lẹ po yin alọgọna to aliho ehe mẹ, nuhahun lẹ to lẹdo mẹ nọ yin didepo—amasin adínọ ṣizantọ vude wẹ nọ tin, whẹho danuwiwa whẹndo tọn vude wẹ nọ tin, po mọmọ po. Gbọn yinyin tovi tonusẹtọ na osẹ́n lẹ na yedelẹ dali podọ gbọn alọgigọna mẹdevo lẹ nado diọ gbẹzan yetọn na dagbe dali, Kunnudetọ Jehovah tọn lẹ nọ hẹn agbàn pinpẹn azọ́nwatẹn tohọluduta tọn he nọ penukundo hihọ́ go tọn he tindo azọngban lọ nado penukundo nuhahun ogbẹ́ tọn lẹ go tọn fua.
16. Naegbọn Kunnudetọ Jehovah tọn lẹ ma nọ tindo mahẹ to nuyiwa vọjlado bibasi tonudidọ tọn lẹ mẹ?
16 Enẹwutu, be Kunnudetọ Jehovah tọn lẹ ko diọ nuyiwadomẹji walọyizan tọn he gbayipe to aihọn lọ mẹ wẹ ya? Eyọn, to owhe ao he wayi lẹ mẹ, sọha Kunnudetọ zohunhunnọ lẹ tọn jideji sọn nuhe whè vude sọn 3 800 000 mẹ jẹ diblayi 6 000 000. Enẹ yin agayiyi nudi 2 200 000 tọn, he suhugan yetọn ko gbẹ́ nuyiwa mawadodo tọn lẹ dai to whenuena yé lẹzun Klistiani. Gbẹzan susu pọnte deji! Ṣogan, sọha ehe whè taun to whenuena e yin yiyijlẹdo jideji to agayiyi sọha aihọn tọn mẹ to ojlẹ dopolọ whenu—yèdọ 875 000 000! Kunnudetọ Jehovah tọn lẹ ko mọ ẹn taidi asisa ayajẹ tọn de nado gọalọna mẹdopodopo he yigbe lẹ, dile yé tlẹ yọnẹn do dọ omẹ vude sọn gbẹtọvi lẹ mẹ wẹ na kẹalọyi aliho he yì ogbẹ̀ mẹ lọ. (Matiu 7:13, 14) Dile Kunnudetọ lẹ to tenọpọn diọdo aihọn lọ blebu tọn do dagbe ji he Jiwheyẹwhe kẹdẹ wẹ sọgan basi do, yé ma nọ tindo mahẹ to nuyiwa vọjlado tonudidọ tọn lẹ mẹ, he nọ saba bẹjẹeji po linlẹn dagbe po ṣigba nọ wá vivọnu to flumẹjijẹ mẹ podọ etlẹ yin to danuwiwa mẹ lẹ mẹ gba.—2 Pita 3:13.
17. Etẹwẹ Jesu wà nado gọalọna mẹhe tin lẹdo e pé lẹ, ṣigba etẹwẹ e ma wà?
17 To aliho nuyiwa tọn ehe zize mẹ, Kunnudetọ Jehovah tọn lẹ nọ do jidide dopolọ he Jesu tindo to Jehovah mẹ to whenuena e tin to aigba ji hia. To owhe kanweko tintan mẹ dọ́n, Jesu wà azọ́njiawu azọ̀nhẹngbọ tọn lẹ. (Luku 6:17-19) E tlẹ fọ́n oṣiọ lẹ sọnku. (Luku 7:11-15; 8:49-56) Ṣigba e ma dè nuhahun azọ̀njijẹ tọn sẹ̀ kavi gbawhàn kẹntọ lọ okú tọn gba. E yọnẹn dọ ojlẹ sisọ̀ Jiwheyẹwhe tọn ma ko wá na ehe gba. Po nugopipe he yiaga tlala gbẹtọ pipé de tọn lẹ po, e yọnbasi dọ Jesu na ko wà onú susu nado didẹ nuhahun sinsinyẹn tonudidọ po ogbẹ́ tọn lẹ po. E taidi dọ delẹ to mẹhe nọgbẹ̀ to ojlẹ etọn mẹ lẹ jlo dọ e ni dugán bosọ yinuwa to aliho ehe mẹ, ṣigba Jesu gbẹ́. Mí hia dọmọ: “Whenuena gbẹtọ lẹ mọ ohia he e basi, yé dọmọ, Nugbo, ehe wẹ yẹwhegán he ja aihọn mẹ lọ. Enẹwutu whenuena Jesu tunwun dọ yé pọ́ yíyí huhlọn do hẹn ẹn do basi ahọlu, e sọ vọ́ gọyì osó de ji ewọ dopokẹdẹ.”—Johanu 6:14, 15.
18. (a) Nawẹ Jesu do walọyizan teninọ tọn hia gbọn to whepoponu? (b) Nawẹ nuwiwa Jesu tọn ko diọ sọn 1914 gbọ́n gbọn?
18 Jesu gbẹ́ nado tindo mahẹ to tonudidọ kavi azọ́n heyin ogbẹ́ tọn mlẹnmlẹn lẹ mẹ na e yọnẹn dọ ojlẹ ma ko sọ̀ na emi nado kẹalọyi huhlọn ahọlu tọn podọ nado wazọ́n azọ̀nhẹngbọ tọn lẹ na mẹlẹpo to filẹpo gba. Etlẹ yin to agayiyi yì ogbẹ̀ jọmaku gbigbọmẹ tọn etọn mẹ godo, e gbẹsọ tindo ojlo nado nọtepọn ojlẹ dide Jehovah tọn whẹpo do yinuwa. (Psalm 110:1; Owalọ lẹ 2:34, 35) Ṣigba, sọn zizedo ofìn ji etọn taidi Ahọlu Ahọluduta Jiwheyẹwhe tọn to 1914 gbọ́n, e tọnjẹgbonu yì “to awhàngbigba mẹ, podọ nado [dotana awhàngbigba etọn, NW ].” (Osọhia 6:2; 12:10) Lehe míwlẹ yọ́n pinpẹn etọn do sọ nado litaina gandudu etọn, to whenuena mẹdevo lẹ he sọalọakọ́n nado yin Klistiani de nado gbọṣi wunvi mẹ gando nuplọnmẹ Biblu tọn he gando Ahọluduta lọ go lẹ mẹ!
Teninọ—Asisa Flumẹjijẹ Tọn Kavi Ayajẹ Tọn?
19. Whetẹnu wẹ teninọ nọ ‘hẹn ahun jẹazọ̀n,’ podọ whetẹnu wẹ e nọ yin asisa ayajẹ tọn de?
19 Sọlọmọni yọnẹn dọ teninọ sọgan hẹnmẹ jẹflumẹ. E wlan dọmọ: “Nukundido he ma mọ hẹndi yí nọ hẹn ahun jẹazọ̀n.” (Howhinwhẹn lẹ 13:12, NW). Na jide tọn, eyin mẹde to nulẹnpọndo todido he ma tindo dodonu lẹ ji, ahun sọgan yin hinhẹn jẹazọ̀n gbọn flumẹjijẹ dali. Ṣigba, teninọpọn nujijọ ayajẹ tọn lẹ—vlavo hùnwhẹ alọwle tọn de, jiji ovi de tọn, kavi yinyin vivọ́ kọndopọ hẹ mẹhe mí yiwanna lẹ—sọgan hẹn ayajẹ nukundido tọn gọ́ ahun mítọn lẹ mẹ whẹpo azán hẹndi tọn lọ nido wá. Ayajẹ enẹ nọ yin hinhẹn sinyẹn deji eyin mí yí ojlẹ teninọ tọn lọ zan po nuyọnẹn po, bo to awuwle lẹ basi dai na nujijọ he ja lọ.
20. (a) Nujijọ jiawu tẹlẹ wẹ míwlẹ to nukundo po jidide po nado mọ? (b) Nawẹ mí sọgan mọ ayajẹ yí gbọn dile mí to tenọpọn lẹndai Jehovah tọn lẹ nado yin hinhẹndi?
20 Eyin mí tindo jidide mlẹnmlẹn dọ nukundido mítọn lẹ na mọ hẹndi yí—yèdọ eyin mí ma tlẹ yọ́n whenuena yé na yin hinhẹndi—ojlẹ teninọ tọn lọ ma dona ‘hẹn ahun jẹazọ̀n’ gba. Sinsẹ̀n-basitọ nugbonọ Jiwheyẹwhe tọn lẹ yọnẹn dọ Gandudu Owhe Fọtọ́n Klisti tọn na wá dandan. Yé deji dọ yé na mọ vivọnu okú po awutu po tọn. Po nukundido jejejininọ tọn po, yé nọ yí ayajẹ do nọtepọn ojlẹ lọ to whenuena yé na dokuavọ na gbẹtọ liva susu lẹ lẹkọ sọn okú, gọna mẹyiwanna yetọn he ko kú lẹ. (Osọhia 20:1-3, 6; 21:3, 4) To ojlẹ hunyanhunyan tọn he tin to nudida lẹ po lẹdo yetọn po mẹ tọn ehelẹ mẹ, yé nọ tindo jide nado mọ todido Paladisi heyin didoai do aigba ji tọn. (Isaia 35:1, 2, 7) To whelọnu lo, lehe e gọna nuyọnẹn do sọ nado yí ojlẹ teninọ tọn lọ zan po nuyọnẹn po, “bo nọ to susu deji to azọ́n Oklunọ tọn mẹ whepoponu”! (1 Kọlintinu lẹ 15:58) Mì to núdùdù gbigbọmẹ tọn dù zọnmii. Mì wleawuna haṣinṣan he to sinsinyẹn deji zọnmii de hẹ Jehovah. Mì dín mẹdevo lẹ he ahun yetọn nọ whàn yé nado sẹ̀n Jehovah lẹ mọ. Mì nọ na tuli yisenọ hatọ lẹ. Mì yí dagbenu gigọ́ ojlẹ depope he Jehovah na gbẹsọ na dotẹnmẹ etọn tọn zan. Enẹgodo, teninọpọn Jehovah ma na hẹn ‘ahun mìtọn jẹazọ̀n’ gbede gba. Kakatimọ, e na yí ayajẹ do gọ́ ahun mìtọn mẹ!
Be Hiẹ Sọgan Basi Zẹẹmẹ Ya?
• Nawẹ Jesu do walọyizan teninọ tọn hia gbọn?
• To ninọmẹ tẹlẹ mẹ wẹ Klistiani lẹ tindo nuhudo walọyizan teninọ tọn te?
• Naegbọn Kunnudetọ Jehovah tọn lẹ nọ tindo pekọ nado nọtepọn Jehovah?
• Nawẹ teninọpọn Jehovah sọgan yin asisa ayajẹ tọn de gbọn?
[Kanbiọ Oplọn Tọn Lẹ]
[Yẹdide to weda 12]
Jesu doakọnnanu na ayajẹ he yè ze do nukọn etọn wutu
[Yẹdide to weda 13]
Etlẹ yin to owhe susu sinsẹ̀nzọnwiwa tọn godo, mí sọgan gbẹsọ hẹn ayajẹ mítọn go
[Yẹdide to weda 15]
Gbẹtọ livi susu lẹ ko hẹn gbẹzan yetọn lẹ pọnte gbọn lilẹzun Kunnudetọ Jehovah tọn lẹ dali