Habakuku 1:1-17
1 Nulila de he yẹwhegán Habakuku* mọyi to numimọ de mẹ:
2 Jehovah E, nawẹ yẹn na to awhádo na alọgọ dẹnsọ bọ hiẹ ma na sè?+
Nawẹ yẹn na to alọgọ biọ sọn danuwiwa mẹ dẹnsọ bọ hiẹ ma na dademẹ?*+
3 Naegbọn hiẹ do hẹn mi nado to kanyinylan mọ?
Podọ naegbọn hiẹ do jotẹnna kọgbidinamẹ?
Naegbọn vasudo po danuwiwa po do tin to nukọnna mi?
Podọ naegbọn jlẹdidọ po avùnhiho po do gbayipe?
4 Gbọnmọ dali, osẹ́n yin zínzín do odò,Bọ owhẹ̀ dodo ma nọ yin didá gbede.
Na mẹylankan lẹ wẹ lẹdo dodonọ lẹ pé;Enẹwutu wẹ yè do nọ gada whẹdida dodo.+
5 “Mì pọ́n akọta lẹ ṣẹnṣẹn bo na ayidonugo!
Mì pọ́n po nupaṣamẹ po na awú ni ji mì;Na nude na jọ to azán mìtọn lẹ gbè
He mìwlẹ ma na yise eyin e tlẹ yin didọna mì.+
6 Na yẹn na fọ́n Kaldeanu lẹ,+Yèdọ akọta danuwatọ po kanylantọ po.
Yé nọ to yìyì lẹdo aigba pé
Nado yí owhé he ma yin yetọn lẹ.+
7 Yé nọ hẹnmẹ jọsi bosọ dobu.
Yé nọ ze whẹdida dodo po aṣẹpipa* yetọn titi po dai.+
8 Osọ́ yetọn lẹ nọ yawu hú opọ̀ lẹ,Mọ yé sọ dobu hú ohla lẹ to zánmẹ.+
Osọ́ awhànfunfun tọn yetọn lẹ nọ to wezun ji;Fidindẹn wẹ osọ́ yetọn lẹ wá sọn.
Yé nọ dlí wá odò taidi akùn he to whlẹndo ji nado yì dùnú.+
9 Yemẹpo wẹ wá kiki nado wà danú.+
Eyin nukunmẹ yetọn lẹ yin bibẹpli dopọ, e nọ taidi jẹhọn whèzẹtẹn tọn,+Bọ yé nọ bẹ kanlinmọ lẹ pli di tọkẹ́n lẹ.
10 Yé nọ ṣàn ahọlu lẹ kò
Bo nọ yí ahọluzọnwatọ nukundeji lẹ+ do davlẹ.
Yé nọ vlẹ figángán lẹpo kò;+Yé nọ dọ̀n kọ́gudu pli bo nọ hò e yí.
11 Enẹgodo, yé nọ dlí yinukọn taidi jẹhọn bo nọ juwayi,Ṣigba, yé na lẹzun whẹhutọ,+Na yé nọ pà yẹwhe yetọn na huhlọn he yé tindo.”*+
12 Jehovah E, be hiẹ ma ko tin sọn madopodo ya?+
Jiwheyẹwhe ṣie E, Omẹ Wiwe ṣie, hiẹ ma nọ kú.*+
Jehovah E, hiẹ ko de yé nado dawhẹna yé;Osé ṣie E,+ hiẹ ko do yé ai nado sayana* yé.+
13 Nukun towe lẹ yin wiwe-ṣeke gbau nado nọ pọ́n nuylankan,Podọ hiẹ ma sọgan jotẹnna kanyinylan.+
To whelọnu lo, naegbọn hiẹ do jotẹnna mẹklọtọ+
Bosọ nọ nabọẹ to whenuena mẹylankan de ze mẹhe yin dodonọ hú i mì?+
14 Naegbọn hiẹ do hẹn gbẹtọ nado taidi whèvi hùmẹ tọn,Yèdọ taidi nuhe nọ lìn bo ma tindo gandutọ de?
15 Omẹ ehe lẹpo wẹ ewọ* ko yí omlẹn whèhuhu tọn de do dọ̀n wá aga.
E nọ yí odọ̀-gbó etọn do wle yé,Bo nọ yí odọ̀ whèhuhu tọn etọn do bẹ yé pli.
Enẹ wẹ zọ́n bọ e do nọ jaya susu.+
16 Enẹwutu wẹ e do nọ sanvọ́ hlan odọ̀-gbó etọnBo nọ basi avọ́sinsan* lẹ hlan odọ̀ whèhuhu tọn etọn;Na gbọn yé gblamẹ wẹ mimá etọn do dojó,Bọ núdùdù etọn do yin dagbe.
17 Whenẹnu, be ewọ na zindonukọn nado to odọ̀-gbó etọn hẹn jẹvọ́* wẹ ya?
Be e na zindonukọn nado to akọta lẹ hù matin awuvẹmẹ wẹ ya?+
Nudọnamẹ Odò Tọn
^ Vlavo zẹẹmẹdo “Mẹgbòfán Zohunhunnọ.”
^ Kavi “whlẹnmẹ.”
^ Kavi “gbégbò.”
^ Kavi vlavo, “Na huhlọn yetọn wẹ yẹwhe yetọn.”
^ Kavi vlavo, “mí ma na kú.”
^ Kavi “wọhẹ.”
^ Enẹ wẹ, kẹntọ Kaldeanu lọ.
^ Kavi “mẹ̀ avọ́nunina.”
^ Kavi vlavo, “to ohí etọn dọ̀nsún.”
