Ẹsteli 4:1-17
4 To whenue Mọldekai+ sè nuhe ko yin bibasi lẹpo,+ e tlẹ́n awù etọn lẹ bo ze odẹ́vọ̀ do bosọ ba afín do ede go. Enẹgodo, e tọ́nyi tòdaho lọ mẹ bo yí ogbè lélé do to avivi badabada.
2 E yì kakajẹ họngbo ahọlu tọn kọ̀n, na mẹdepope ma dona do odẹ́vọ̀ biọ họngbo ahọlu tọn mẹ.
3 Podọ agbegbe* depope+ he mẹ ohó ahọlu tọn po gbedide etọn po yì jẹ, Ju lẹ nọ biọ aluẹmẹ sinsinyẹn bo nọ to nùbla+ bosọ nọ to avivi bo nọ to avihàndo. Mẹsusu wẹ nọ mlọn odẹ́vọ̀ po afín po mẹ.+
4 Whenue deviyọnnu Ẹsteli ahọsi lọ tọn lẹ po ojọ̀ etọn lẹ po wá dọna ẹn, ewọ blawu tlala. E sọ do awù lẹ hlan Mọldekai nado yí do diọ odẹ́vọ̀ etọn, amọ́ e gbẹ́ awù lọ lẹ.
5 Whenẹnu wẹ Ẹsteli ylọ Hataki he yin dopo to ojọ̀ ahọlu tọn lẹ mẹ, yèdọ mẹhe ahọlu ko de nado yilizọn na Ẹsteli, e sọ degbena ẹn nado dindona nuhe ehe zẹẹmẹdo po nuhe to jijọ po sọn Mọldekai dè.
6 Enẹwutu, Hataki tọ́nyi Mọldekai dè to tòplitẹn tòdaho lọ tọn to họngbo ahọlu tọn nukọn.
7 Mọldekai sọ dọ nuhe ko jọ do e go lẹpo na ẹn, gọna sọha akuẹ+ he Hamani ko dopà nado sú do adọkunnu ahọlu tọn mẹ lọ tọn pẹpẹ, na Ju lẹ nido yin vivasudo.+
8 E sọ ze vọkan kandai gbedide he ko yin didetọn to Ṣuṣani*+ na yé nido yin kúnsúdona lọ tọn na ẹn. Ewọ dona do e hia Ẹsteli bo basi zẹẹmẹ etọn na ẹn+ bosọ dọna ẹn nado yì ahọlu dè nado biọ nukundagbe etọn podọ nado vẹ̀ ẹ tlọlọ do omẹ etọn lẹ tamẹ.
9 Hataki lẹkọwa bo dọ nuhe Mọldekai ko dọ lẹ na Ẹsteli.
10 Ẹsteli gọ̀ Hataki dohlan Mọldekai po anademẹ lọ lẹ po+ dọmọ:
11 “Devizọnwatọ ahọlu tọn lẹpo po mẹhe tin to agbegbe* ahọlu tọn lẹ ji lẹ po wẹ yọnẹn dọ eyin sunnu kavi yọnnu de ma yin yiylọ, ṣigba bọ ewọ yì awánu homẹ tọn ahọlu tọn mẹ,+ osẹ́nbá dopo gee wẹ na hò e: Ewọ na yin hùhù; mẹlọ sọgan nọgbẹ̀ kiki eyin ahọlu dlẹn ogánpò sika tọn hlan ẹn.+ Podọ, e ko yì azán 30 todin he n’ma yin yiylọ yì ahọlu dè.”
12 Whenue nuhe Ẹsteli dọ lẹ yin didọna Mọldekai,
13 e gblọn hlan Ẹsteli dọmọ: “A lẹndọ gbọnvona Ju he pò lẹpo, e yọnbasi dọ emi ni họ̀ngán, na hiẹ tin to whédo ahọlu tọn mẹ wutu blo.
14 Na eyin hiẹ gbọṣi abọẹ to ojlẹ ehe mẹ, kọgbọ po whlẹngán po na wá na Ju lẹ sọn fidevo,+ amọ́ hiẹ po whédo otọ́ towe tọn po na dọ̀n. Podọ mẹnu wẹ yọnẹn eyin e ma yin na ojlẹ ehe nkọ wutu wẹ hiẹ do lẹzun ahọsi?”+
15 Whenẹnu wẹ Ẹsteli gblọn hlan Mọldekai dọmọ:
16 “Yì bo bẹ Ju he tin to Ṣuṣani* lẹpo pli, na mì ni blanù+ do ota ṣie mẹ. Mì dù kavi nù na azán atọ̀n blo,+ yèdọ to ozán po okle po. Yẹn po deviyọnnu ṣie lẹ po na blanù ga. N’nasọ yì ahọlu dè, yèdọ nuhe ma sọgbe hẹ osẹ́n, podọ eyin yẹn na dọ̀n janwẹ, yẹn ni bo dọ̀n.”
17 Enẹwutu, Mọldekai yì bo basi nuhe Ẹsteli ko na ẹn anademẹ nado wà lẹpo.
Nudọnamẹ Odò Tọn
^ Kavi “agbegbe fidugando.”
^ Kavi “Susa.”
^ Kavi “agbegbe fidugando.”
^ Kavi “Susa.”
