“Enyí mɛylankan tɔ́nkun ɖi ogbé bɔ ylanwatɔ lɛkpó to vùnvùn, ná yé nidó nyí huhusudó kakadói wutu wɛ.”—SALMU LƐ 92:7.

Ðilě xósɔ́ xe wayi dóxya ɖó, nuylankan fɔ́n bo to jijideji. É ma ɖóná kpaca mǐ. Biblu ko ɖɔ to 2 Timoti 3:1-5 mɛ ɖɔ to “azán godo tɔn lɛ” mɛ, gbɛtɔ́ lɛ ná kpeve to ylanwiwa mɛ. Azán godo tɔn etɛ tɔn? Azán godo tɔn ayihɔ́n ylankan exe tɔn xe mɛ gbɛtɔvi xe ma nɔ setonuna Jixwéyɛxwe lɛ gɔ́. Zanɖe din, Jixwéyɛxwe ná và mɛylankan xe ma jlo ná ɖyɔ́ jijɔ lɛkpó bɔ mɛɖagbe xe nɔ setonuna Jixwéyɛxwe lɛ kɛ́ɖɛ́ wɛ ná kpò. “Dodónɔ lɛ wɛ ná ɖugu ayigba tɔn, yé nasɔ́ nɔgbɛ̀ to é jí kakadói.”—Salmu lɛ 37:29.

“Jixwéyɛxwe xe nɔ namɛ jijɔxo ná gídí Satani.”—LOMUNU LƐ 16:20.

Hwenue mɛylankan ɖé ma nasɔ́ tíin, bɔ Satani kpó aovi lɛ kpó ná busɛ, jijɔxo ná tíin gbɔn ogbɛ̀ lɔ blebu mɛ. Mɛdatɔ lɔ dókpà ɖɔ: ‘Mɛɖé ma ná nɔ dóbuna we.’—Mika 4:4.

“Gòxɔ Jixwéyɛxwe tɔn tíin to gbɛtɔvi lɛ dè . . . Ewɔ nasɔ́ súnsún ɖasin lɛkpó sɛ̀ sɔ́n nukún yětɔn mɛ, okú ma nasɔ́ tíin ba, mɔ̌jánwɛ alùɛmɛninɔ kavǐ avǐ kavǐ awufiɛsà ma nasɔ́ tíin ba.”—OSƆ́XYA 21:3, 4.

Mɛɖé ma nasɔ́ jiya kavǐ jɛazɔ̀n ba, ná Jixwéyɛxwe ná vɔ́ nǔxe Satani, Adam, Evi kpó makpé mǐtɔn kpó ko hɛngble lɛkpó jlaɖo. Enɛ ná zɔ́n bɔ “okú ma nasɔ́ tíin ba.” Gbɛ́tɔvi xe yiwǎnna Mɛdatɔ lɔ bo nɔ setonuna ɛn lɛ ná nɔgbɛ̀ kakadói. To fitɛ?

“Danfafa kpó ayigba-klo kpó ná jɛaglin, bɔ dankló ná jaya bo ná gbàsɛ́ ɖi vounvoun gbémɛ tɔn.”—IZAYA 35:1.

Ayigba ná lɛzun paladisi to hwenue Jixwéyɛxwe ná ko và mɛylankan lɛ. Jikpa kpó nɔtɛn hwǎnkpɛnɔ lɛ kpó ná gɔ́ ayigba jí bɔ núɖùɖù ná sù bo kpémɛnu. (Salmu lɛ 72:16) Ðixó ɖékpókpé ma nasɔ́ tíin to oxù kpó otɔ̀ lɛ kpó mɛ ba. Hwèvi kpó nutogbɛ̀ xe nɔ nɔ̀ otɔ̀ mɛ lɛ kpó nasɔ́ sù. Mɛlɛ ná gbá oxwé yětɔn titi bo nɔ é mɛ. Mǐ ma nasɔ́ sè kpɔ́n ɖɔ mɛɖé tíin bo ma ɖó oxwé. Xuvɛ kpó ohɛ́n kpó ma nasɔ́ tíin ba.—Izaya 65:21, 22.

‘Fɔnsɔnku ɖé ná tíin.’—OWALƆ LƐ 24:15.

Be é nɔ jlo we ɖɔ a ni gɔ̀ mɛvivɛ towe xe ko kú lɛ mɔ ya? Jixwéyɛxwe gǎnhunǔkpótɔ́ lɔ ná fɔ́n yé sɔ́n ociɔ lɛ mɛ, bɔ yé ná nɔgbɛ̀ to ayigba jí to paladisi mɛ. To hwenue yé ná gɔwá ogbɛ̀, a ná nyɔ́ yé bɔ yelɔsu ná nyɔ́ we. É ná vivi ná mì tawun nadó gɔ̀ mìɖelɛ mɔ. Etɛ́wɛ dóxya ɖɔ exe ma nyí xójijlɛ? Biblu ɖɔxo yɔkpɔ́ kpó mɛxo ɖélɛ kpó tɔn, xe nyí hinhɛngɔwa ogbɛ̀ bɔ yé nɔkpɔ́ kpó omɛ yětɔn lɛ kpó. Gbɔnvona enɛ, hwlasusu wɛ Jesu fɔ́n ociɔ lɛ bɔ mɛsusu mɔ.—Luku 8:49-56; Johanu 11:11-14, 38-44.