Buddtte uprant, Noah-chea putank zaitim bhurgim zolmolim. Tanchi famil vaddonk lagli ani Jehovan sanglolem toxem tim prithumechea veg-vegllea zagear ravonk laglim.

Punn thoddea familimnim Jehovachem aikonk na. Tim mhunnonk laglim: ‘Chol ia ami ek vhoddlem xar bandum-ia ani hangach ravum-ia. Sorgar pavta titlem unch ami ek bildding bandum-ia. Oxem kelʼlean, soglea lokam modem amchem nanv famad zatolem.’

 Hem soglem polloun Jehova khuxal naslo, dekhun tannem tanchem kam bond korunk tharailem. Tannem hem koxem kelem tem tumi zannant? Tannem tankam veg-veglleo bhaso uloum-xem kelem. Haka lagon, tim eka-mekachem ulovop somzona zalim ani tankam bilddingechem kam bond korchem poddlem. Tim jem xar bandtalim taka Babel oxem nanv poddlem, zacho orth “Goddbodd.” Tem xar soddun lok veg-vegllea zagear ravonk gele. Punn thoim pasun he lok vaitt kamam korit ravle. Jehovacho mog korpi konnuch naslo kai? Tem ami fuddlea odheai-ant polloum-ia.