Akea taekaia taainatioa n te Baibara. Ma e kamoamoaaki te Atua n te Baibara ibukina bwa e “karikii bwaai ni kabane,” ngaia are e teretere bwa a boni mena naba i buakoni baike e karikii. a (Te Kaotioti 4:​11) E aki taekinia taainatioa te Baibara, ma e taekinia karinan ni man ake a kona ni mena naba i buakoia:

•   “Manin marawa aika totoa,” ke “taian rakon.”​—Karikani Bwaai 1:21; New American Bible.

•   “Maan ni kabane aika kawakawa i aontano.”​—Karikani Bwaai 1:25.

•   “Manin te aonnaba aika moaanti.”​—Karikani Bwaai 1:25.

A riki taainatioa mairouia maan ake tabeua?

 Ri aika kuneaki a aki kaotia bwa a riki taainatioa ngke e bitaki te man temanna teutana imwin teutana n uaa ae e a riki n taainatioa. Ma a a bon tii kuneaki naba ri aika riin te taainatioa. E tonuraoi aei ma ana kabwarabwaraa te Baibara ae e karikiia maan ni kabane te Atua. N te katoto, e kabwarabwaraaki te Atua n Taian Areru 146:6 bwa “te tia Karaoa karawa ma aonnaba, ao taari ma bwaai nako ake iai.”

A maiu n ningai taainatioa?

 E kabwarabwaraia manin taari ma manin aon te aba te Baibara bwa a karikaki n te kanimaua ao n te kaonoua ni bong, ke n taai ngkoa ni karikibwai. b (Karikani Bwaai 1:20-25, 31) Ngaia are e boraoi ma rongorongon te Baibara te iango ae, kaotiia ao maiuia taainatioa e kona ni waaki nako i nanon te tai ae maan.

Te koaua bwa Ibobatemati ma Ribaietan bon taainatioa?

 Tiaki. E ngae ngke a taekinaki maan aikai n te boki ae Iobi ao a aki kona n ataaki raoi, ma e ataaki te beemota bwa te ibobatemati, ao te Ribaietan bwa te korokorotaire. A tonuraoi kinaakini baikai ma kabwarabwaraaia man te Baibara. (Iobi 40:15-23; 41:1, 14-17, 31) N taai tabetai ao taeka aika “Ibobatemati” ao “Ribaietan” a aki kona ni kaineti nakoia taainatioa. E tuanga Iobi te Atua bwa e na matakuakinia maan aikai, ao e maiu Iobi n te tai ae maan imwini kamaunaaia taainatioa.​—Iobi 40:16; 41:8.

Tera ae e riki nakoia taainatioa?

 E aki taekina taekani buaia taainatioa te Baibara. Ma e taekinna bwa a bane ni karikaki bwaai “ibukin [nanon te Atua],” ngaia are e boni bae n iai ana kantaninga te Atua ae teretere raoi ibukini karikaia taainatioa. (Te Kaotioti 4:11) Ngke e a koro bukin te kantaninga anne, ao e a kariaia ngkanne te Atua bwa a nang maunanako mataia.