E taekina ke e karaoa te bwai teuana buum ae e maraki nanom iai, ao ko kataia ni kakaikoa unim. Ma e noria buum bwa e a bitaki teim ao e a titirakiniko ni kan ataa bukina. E a maraki riki nanom irouna. Ko na kangaa n taobaraa unim ngkana ko a rinanon te kangaanga n aron anne?

•  Te bwai ae ko riai n ataia

•  Te bwai ae ko kona ni karaoia

•   E kaaoraki te kiunun. E oti ni mwin te kakaae bwa te aroaro ae te kiunun, e karikirakei aoraki n aron te rietata n raraa, aorakin te buroo, te rawawatannano ae teimaan, ao kangaanga aika irekereke ma aorakin te biroto. E karekea naba te aki mamatu raoi, n ikotaki ma te tabeaianga ae bati, aorakin te kun, ao ai te boo itera. E teretere bukina ae raoiroi ngke e kangai te Baibara: “Kanakoa te un . . . , bwa e tii kona ni kairiri nakon te iowawa.”​—Taian Areru 37:​8, te kabwarabwara mai nano.

•   E karuanikai kaikoan te un. Ngkana ko kaikoa unim, ai aron ae ko kariaia rikiraken te aoraki ae kakaiaki i nanon rabwatam. N te katoto, e kona kaikoan te un ni karikirakea iroum te aroaro ae te kakabuakaka ao te titiribure. E kona anne n aki kanakoraoa reitakim ma aomata, ao e rotakibuaka naba iai tekatekam n taanga.

•   Tataraa raoiroini buum. Korei tenua anuani buum ake e anaaki iai nanom. Imwina riki ngkana ko a manga un naba n te bwai ae e karaoia, iaiangoi anuana akanne. E kona ni buokiko aei ni katoka unim.

   Ana boto n reirei te Baibara: “Kaotiota ami kakaitau.”​—I-Korote 3:​15.

•    Bwabwaina te kabwarabure. Te moanibwai, kataia n tarai bwaai man ana taratara buum. E na buokiko aei ni karikirakea te nanoanga, are e araranaki n te Baibara bwa “te atataiaomata.” (1 Betero 3:8) Imwina titirakiniko ni kangai, ‘Te koaua bwa e rangi ni kakaiaki bukin uniu aei, n te aro are I aikoa riai ni kabwaraa ana bure?’

   Ana boto n reirei te Baibara: “Bon tamaroana tarariaoan te bwai ae kaun.”​—Taeka N Rabakau 19:11.

•    Kaota am namakin ma te akoi ao te atataiaomata. Kakabongana “I” i nanon am maroro. N te katoto, n oneani mwin are ko na kangai: “Ko aki tabe ma au namakin ngke ko aki tarebooniai, ao n tuangai bwa ko mena ia,” taekina aei, “I tabeaianga iroum ngke e a bwakanako te tai, ao I aki ataia bwa ko reke n te kabuanibwai ke ko aki.” Kaotan am namakin ma te akoi, e kona ni buokiko n taobaraa unim.

   Ana boto n reirei te Baibara: “A na raonaki n taai nako ami taeka n te atataiaomata ao n taoronaki.”​—I-Korote 4:6.

•    Kakauongo ma te karinerine. Imwini kaotan am namakin, kariaia moa buum bwa e na taetae, ao tai kamangaoa ana kakarabakau. Ngkana e tia n taetae buum, manga kaokaoka te baere e taekinna ao n noria bwa ko ota raoi iai ke ko aki. E kona ni buokiko bwainan te kakauongo raoi bwa ko na rabakau n taobaraa unim.

   Ana boto n reirei te Baibara: “Waekoa n ongora . . . iremwe n taetae.”​—Iakobo 1:​19.