A tataromauri Ana Tia Kakoaua Iehova uatai n te wiki n aia Tabo n Taromauri. Tera ae riki ikanne, ao ko na kangaa ni kakabwaiaaki ngkana ko kaea?

•  Tera ae riki n te Tabo n Taromauri?

•  E aera ngkai ko riai ni kaea?

•  Aia taeka tabonrorom

 Tera ae riki n te Tabo n Taromauri?

 Te Tabo n Taromauri boni ngaia nnera n reiakini baika boto i aon te Baibara. Ko kona ni buokaki iai:

•   n reiakina te koaua ibukin te Atua.

•   n ota n ae nanonaki ni baika riiriki ngkai.

•   n riki bwa te aomata ae raoiroi riki.

•    ni kuneia raoraom ni koaua.

 Ko ataia? E mamaroroakinaki riki Ana Tautaeka n Uea te Atua n Aia Tabo n Taromauri Ana Tia Kakoaua Iehova.—Mataio 6:9, 10; 24:14; Ruka 4:43.

 E aera ngkai ko riai ni kaea?

 Ko na buokaki n rongorongo ake iai. Booto n reirei man te Baibara ake a maroroakinaki n aia taromauri Ana Tia Kakoaua Iehova, a na buokiko ni “karekea te wanawana.” (Taeka N Rabakau 4:5) Nanon anne, e boni kona te Baibara ni buokiko ni karaoi motinnano aika raraoi ni maium. E kona naba ni buokiko ni kaekai titiraki aika kakawaki aika irekereke ma te maiu, n aron:

•   Tera manenani maiura?

•   E na bukinaki te Atua n rawawatara?

•   Tera ae riki ngkana ko mate?

 Aika tabeua atuni kabwarabwara aika kakaraoaki n ara taromauri n te wikeen:

•   E Aera Bwa Ti Riai ni Kariaia Kairakira n te Baibara?

•   Ko na Karekea Mai ia Buokam n Tain te Karawawataaki?

•   Te Bwai ae Karaoia Ngkai Ibukira Ana Tautaeka n Uea te Atua.

 “E kaea ara taromauri raou n reirei temanna. E tekateka i rarikiu ma au utu ao ti ibuobuoki ara boki ma ngaia. E tuangai imwina bwa e rangi n anaaki nanona n aia kaeka aomata ake a anga. E taku naba bwa akea booki n reirei n aron aikai n ana taromauri.”—Brenda.

 Ko ataia? E aki kanrin te roko n aia tabo n taromauri Ana Tia Kakoaua Iehova, ao akea te karemwangko iai.

 Ko na kaungaaki iai. E taekinaki n te Baibara teuana bukina ngkai a ikoikotaki Kristian bwa a na ‘kaungaia i marenaia.’ (Ebera 10:24, 25) E kabebetenano te ikoikotaki ma aomata aika moanibwaia te Atua ao tabemwaang, n te aonnaba ae a tii tatabeakinia i bon irouia kaaina.

 “Ngkana e rangi ni kakua au bong teuana, I kona n nanokawaki ao n rawawata nanou, ma a manga kabebeteai naake n te Tabo n Taromauri. Ngkana I oki man te taromauri, I a kukurei riki ao ni manga tauraoi nakon te bong are imwina.”—Elisa.

 Ko ataia? E raka i aon 120,000 aia ekaretia Ana Tia Kakoaua Iehova ni katobibia te aonnaba, ao a ikotaki n taabo aika raka i aon 60,000. E katautauaki ni katoa ririki bwa tao 1,500 Taabo n Taromauri aika kateaki, ni kaitaraa rikirakeni mwaitiia aomata aika kaea te taromauri. a