Nou ka suiv ègzaktèman sa Labib ka di pou sélébré « Rèpa a Ségnè la », kè yo ka kriyé osi Lasent Sèn oben Mémoryal a mò a Jézi (1 Korentyen 11:20). Pawkont, ni onlo biten dòt rèlijyon ka anségné é ka fè, anrapò èvè sérémoni-lasa, ki pa bazé asi Labib.

Òbjèktif-la

 Si nou ka sélébré Rèpa a Ségnè la sé pou nou sonjé Jézi, pou nou montré rèkonésans an nou pou sakrifis-la i fè ban nou la (Matyé 20:28 ; 1 Korentyen 11:24). Konmémorasyon-la a pa on sérémoni Témwen a Jéova ka fè pou ni favè a Bondyé oben pou i padonné péché a yo a. Labib ka di kè a pa grasa on sérémoni Bondyé pé padonné péché an nou, men sèlman si nou ni fwa an Jézi (Women 3:25 ; 1 Jan 2:1, 2).

Konmen fwa ?

 Jézi ba disip a-y lòd konmémoré Rèpa a Ségnè la, men i pa di konmen fwa pou yo té fè-y (Lik 22:19). Pou sèwten moun, fò yo sélébré-y chak mwa, pou dòt sé chak simenn, chakjou, plizyè fwa adan on jouné, oben chakfwa yo ka pansé sa nésésè. Men an-nou tchenn kont dè déotwa lidé.

 Jézi mèt Rèpa a Ségnè la anplas menm dat ki Pak a sé Juif-la, é i mò tibwen plita menm jou-la (Matyé 26:1, 2). I pa enn fè sa konsa ! Labib ka konparé sakrifis a Jézi èvè ta timouton a Pak-la (1 Korentyen 5:7, 8). Yo té ka fété Pak-la on fwa an lanné-la (Ègzòd 12:1-6 ; Lévitik 23:5). Menmjan-la, sé prèmyé krétyen-la té ka sélébré Mémoryal a mò a Jézi on fwa an lanné-la b, é sé Témwen a Jéova la ka suiv menm modèl-lasa.

Ki dat é ki lè ?

 Modèl-la Jézi ban-nou la ka édé-nou sav nonsèlman, konmen fwa pou nou sélébré Mémoryal-la, men osi a ki dat é ki lè pou nou fè-y. I mèt konmémorasyon-lasa anplas apré solèy kouché lè 14 nizan 33 sèlon kalandriyé a lalin yo té ka itilizé an tan a Labib (Matyé 26:18-20, 26). Témwen a Jéova ka kontinyé sélébré Mémoryal-la chak lanné a dat-lasa menmjan ki sé prèmyé krétyen-la c.

 Menmsi lè 14 nizan 33 sé té on vandrèdi, lè 14 nizan pa oblijé ka tonbé on vandrèdi chak lanné. Pou nou rivé konnèt ki dat lè 14 nizan ka tonbé chak lanné, nou ka sèvi èvè menm métòd ki an tan a Jézi, olyé nou suiv ta kalandriyé-la sé Juif-la ka itilizé jòdijou d.

Pen-la é diven-la

 Pou mèt konmémorasyon-lasa anplas, Jézi sèvi èvè rèstan a pen san lèven la é rèstan a diven wouj la yo té itilizé pou rèpa a Lapak (Matyé 26:26-28). Menmjan-la, nou ka sèvi èvè pen san lèven, on pen yo pa mèt ayen dòt adan é èvè diven wouj. Nou pa ka sèvi èvè ji-d-rézen ni èvè diven yo mèt dòt biten adan pou fè-y vin dous oben pou ba-y gou.

 Sèwten rèlijyon ka sèvi èvè pen ki ni lèven adan-y, men byensouvan adan Labib, lèven-la sé on senbòl pou palé dè péché oben dè sa ki ka gaté ondòt biten (Lik 12:1 ; 1 Korentyen 5:6-8 ; Galat 5:7-9). Kifè, sé yenki pen ki pa ni ni lèven adan-y ni pondòt biten ki pé rèprézanté konm i fo kò a Jézi ki té san péché (1 Pyè 2:22). Ondòt biten moun ka fè ki pa bazé asi Labib, sé lè yo ka sèvi èvè ji-d-rézen an plas a diven-la. Sèwten légliz ka fè sa pas yo ka entèwdi moun bwè alkòl alòskè sa pa an Bib-la (1 Timoté 5:23).

Senbòl pou palé dè chè-la é dè san-la

 Pen san lèven la é diven wouj la yo ka itilizé pannan Mémoryal-la, sé dé anblèm, oben dé senbòl, ki ka rèprézanté chè a Jézi é san a-y. Pa ni pon mirak ka fèt pou fè sé anblèm-lasa touné an chè a Jézi oben an san a-y é yo pa’a mélanjé èvè chè a-y é san a-y nonplis, kon sèwten moun ka pansé. An-nou vwè ki prèv nou ni an Bib-la ki ka fè-nou di sa.

•   Si Jézi té ba disip a-y lòd dè bwè san a-y, sé konsi i té mandé-yo dézobéyi lwa a Bondyé ki ka entèwdi pran san (Jénèz 9:4 ; Akt 15:28, 29). Sa pa posib, pas Jézi pa té’é jen bay lòd dézobéyi lwa a Bondyé anrapò èvè san-la ki sakré (Jan 8:28, 29).

•   Si sé apòt-la té bwè san a Jézi poudèbon, i pa té’é di « san an mwen [...] kay koulé », sa ki ka montré kè i poto’o sakrifyé vi a-y (Matyé 26:28).

•   Jézi sakrifyé vi a-y « onbonfwa » (Ébré 9:25, 26). Men, si pen-la é diven-la té ka touné an chè a-y é an san a-y pannan Rèpa a Ségnè-la, sa té’é vlé di kè sé moun-la ki ka manjé pen-la é ka bwè diven-la té’é ka woufè sakrifis-lasa a chakfwa.

•   Jézi di : « Kontinyé fè sa pou zòt sonjé-mwen ». I pa di : « Kontinyé fè sa pou zòt fè sakrifis-la ankò » (1 Korentyen 11:24).

 Moun ki ka kwè kè pen-la é diven-la ka touné an chè é an san a Jézi ka bazé-yo asi jan yo tradui sèwten vèwsé an Bib-la. Pa ègzanp, adan onlo tradiksyon a Labib, mi konsa yo ka mèt sa Jézi di anrapò èvè diven-la : « Sa sé san an mwen » (Matyé 26:28). Men yo ka tradui pawòl a Jézi ondòt jan : « Sa ka rèprézanté san an mwen e ». Adan ka-lasa, Jézi sèvi èvè on métòd pou anségné yo ka kriyé métafò, kon i té ni labitid fè (Matyé 13:34, 35).

Kimoun ka manjé pen-la é ka bwè diven-la ?

 Lè Témwen a Jéova ka sélébré Rèpa a Ségnè la, pa ni onlo adan yo ki ka pran pen-la é diven-la. Poukwa ?

 San-la Jézi vèsé la validé on « nouvo alyans » ki ranplasé alyans-la Jéova té fè la èvè Izrayèl an tan lontan (Ébré 8:10-13). Moun ki ka fè pati a nouvo alyans-lasa ka manjé pen-la é ka bwè diven-la. A pa tout sé krétyen-la ki ka fè sa, men sé enki « séla Bondyé kriyé la » on mannyè èspésyal (Ébré 9:15 ; Lik 22:20). Sé moun-lasa ké gouvèné èvè Kris an syèl-la, é Labib ka di kè sé 144 000 moun tousèl ki ké rèsèvwa privilèj-lasa (Lik 22:28-30 ; Révélasyon 5:9, 10 ; 14:1, 3).

 Moun Bondyé kriyé pou gouvèné èvè Kris, sé on « ti twoupo ». Pawkont, lamajorité adan nou ni lèspérans dè fè pati a on « gran-foulmoun » ki ké viv pou touttan asi latè (Lik 12:32 ; Révélasyon 7:9, 10). Menmsi séla ki ni lèspérans dè viv asi latè pa ka pran pen-la é diven-la, yo ka sélébré Mémoryal-la pou montré rèkonésans a yo pou sakrifis-la Jézi fè la an favè a tout limanité (1 Jan 2:2).