Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Yehowa Odasefoi

Ga

Ani Yehowa Odasefoi Fiteɔ Wekui Aloo Amɛtswaa Wekui Amɛmaa Shi?

Ani Yehowa Odasefoi Fiteɔ Wekui Aloo Amɛtswaa Wekui Amɛmaa Shi?

Ákɛ Yehowa Odasefoi lɛ, wɔfeɔ nibii ni baatswa wɔwekui kɛ wɔkutsoŋbii anɔ hu ama shi. Wɔbuɔ Nyɔŋmɔ akɛ Bɔlɔ ni to weku gbɛjianɔtoo lɛ shishi. (1 Mose 2:21-24; Efesobii 3:14, 15) Yɛ Biblia lɛ mli lɛ, Nyɔŋmɔ tsɔɔ wɔ shishitoo mlai; mlai nɛɛ eye ebua mɛi babaoo yɛ je lɛŋ fɛɛ, ni ewaje amɛgbãla lɛ, ni miishɛɛ hu eba mli.

Nibii ni Yehowa Odasefoi Feɔ Kɛtswaa Wekui Amɛmaa Shi

Wɔbɔɔ mɔdɛŋ koni wɔkɛ Biblia mli gbɛtsɔɔmɔi atsu nii, ejaakɛ no yeɔ ebuaa wɔ ni wɔtsɔmɔɔ wumɛi, ŋamɛi, kɛ fɔlɔi kpakpai. (Abɛi 31:10-31; Efesobii 5:22–6:4; 1 Timoteo 5:8) Gbɛtsɔɔmɔi ni yɔɔ Biblia lɛ mli lɛ wajeɔ wekui po ni emli bii lɛ yɔɔ jamɔi srɔtoi amli lɛ. (1 Petro 3:1, 2) Susumɔ saji ni mɛi ni jeee Yehowa Odasefoi, shi amɛgbalashihilɛ mli hefatalɔi batsɔmɔ Yehowa Odasefoi lɛ wie lɛ ekomɛi ahe okwɛ:

  • “Be ni wɔbote gbalashihilɛ mli lɛ, klɛŋklɛŋ afii ekpaa lɛ mli yi obɔ̃ kɛ bei kɛ mlifu sɔŋŋ. Shi, kɛjɛ be ni miŋa Ivete batsɔ Yehowa Odasefonyo nɛɛ, ejieɔ suɔmɔ kɛ tsuishitoo kpo waa fe tsutsu lɛ. Tsakemɔi ni efee lɛ baa wɔgbãla lɛ yi.”—Clauir, ejɛ Brazil.

  • “Be ni miwu Chansa hã Yehowa Odasefoi kɛ lɛ bɔi Biblia lɛ kasemɔ lɛ, mikpɛlɛɛɛ kwraa, ejaakɛ misusu akɛ amɛfiteɔ wekui. Kɛjɛ no nɔ kɛbaa nɛɛ, mibayɔse akɛ Biblia lɛ ewaje wɔgbalashihilɛ lɛ waa.”—Agness, ejɛ Zambia.

Yɛ wɔshiɛmɔ nitsumɔ lɛ mli lɛ, wɔyeɔ wɔbuaa mɛi ni amɛnaa akɛ, kɛ́ amɛkɛ gbɛtsɔɔmɔi ni yɔɔ Biblia lɛ mli lɛ tsu nii lɛ, ebaaye ebua amɛ ni

  • Amɛkɛ hiɛshikamɔ ahala mɔ ni amɛkɛbaabote gbãla mli

  • Amɛnyɛ amɛkpee amɛgbalashihilɛ mli klɛŋklɛŋ afi lɛ mli naagbai lɛ anaa

  • Amɛle bɔ ni amɛkɛ amɛshaayei kɛ shaahii mɛi baaye ahã

  • Amɛle shika kuramɔ

  • Amɛkpa naataamɔ

  • Amɛkase bɔ ni akɛ tɔ̃mɔi keɔ

  • Amɛle bɔ ni atsɔseɔ bii

Kɛ́ mɔ ko kɛ ehe yadɔmɔ jamɔ kroko lɛ, ani ekɛ bei baa gbãla lɛ mli?

Anɔkwa sane ji akɛ, bei komɛi lɛ ekɛ bei baa. Ákɛ nɔkwɛmɔnɔ lɛ, yɛ afi 1998 lɛ, niiamlitaomɔ nitsumɔhe ko (Sofres) bɔ amaniɛ akɛ, yɛ gbalashihilɛ 20 fɛɛ 20 mli 1 mli lɛ, kɛ́ hefatalɔ 1 batsɔ Yehowa Odasefonyo lɛ, naagbai ni yɔɔ hiɛdɔɔ waa baa nakai gbãla lɛ mli.

Yesu gba efɔ̃ shi akɛ, mɛi ni hiɔ shi yɛ etsɔɔmɔi lɛ anaa lɛ kɛ naagbai baakpe yɛ amɛwekui lɛ amli bei komɛi. (Mateo 10:32-36) Yinɔsaneŋmalɔ Will Durant wie akɛ, yɛ Roma Nɔyeli lɛ shishi lɛ, “Afolɔ Kristo Sɛɛnyiɛlɔi lɛ anaa akɛ amɛfiteɔ wekui,” * ni ŋmɛnɛ lɛ Yehowa Odasefoi komɛi kɛ naafolɔmɔi tamɔ nɛkɛ nɔŋŋ miikpe. Shi, ani enɛ tsɔɔ akɛ Yehowa Odasefoi kɛ mligbalamɔ baa wekui amli?

Yuropabii Asaneyelihe ni Yeɔ Hegbɛi ni Adesai Yɔɔ lɛ Ahe Saji

Be ni Yuropabii Asaneyelihe ni Yeɔ Hegbɛi ni Adesai Yɔɔ lɛ Ahe Saji lɛ buaa sane ko ni afolɔ Yehowa Odasefoi anaa yɛ mli akɛ amɛkɛ mligbalamɔ baa wekui amli lɛ, saneyelihe lɛ wie akɛ bei pii lɛ yɛ wekui amli lɛ, weku mli bii ni jeee Yehowa Odasefoi ji mɛi ni kɛ bei lɛ baa, ejaakɛ “amɛsumɔɔɔ ni amɛkpɛlɛɔ nɔ akɛ amɛwekunyo lɛ yɛ hegbɛ akɛ ekɛ ehe dɔmɔɔ jamɔ ni esumɔɔ lɛ, ni amɛsumɔɔɔ ni amɛbuɔ amɛwekunyo lɛ jamɔŋ nifeemɔi lɛ.” Saneyelihe lɛ kɛfata he akɛ: “Jeee Yehowa Odasefoi pɛ kɛ shihilɛ nɛɛ kpeɔ, eyaa nɔ yɛ gbalashihilɛi fɛɛ ni hefatalɔi lɛ bɛ jamɔ kome mli lɛ amli.” * Kɛ́ Yehowa Odasefoi kɛ jamɔ he naagbai kpe yɛ amɛgbalashihilɛ mli po lɛ, amɛbɔɔ mɔdɛŋ amɛkɛ Biblia mli ŋaawoo nɛɛ tsuɔ nii, ekɛɛ: “Nyɛkaŋɔa efɔŋ nyɛtoa mɔ ko mɔ ko efɔŋ najiaŋ. . . . Kɛ́ aaahi lɛ, nyɛgbɛfaŋ lɛ, nyɛfea bɔ fɛɛ bɔ ni nyɛaanyɛ koni toiŋjɔlɛ ahi nyɛ kɛ mɛi fɛɛ ateŋ.”Romabii 12:17, 18.

Nɔ hewɔ ni Yehowa Odasefoi heɔ yeɔ akɛ esa akɛ amɛkɛ amɛjamɔŋbii pɛ abote gbalashihilɛ mli lɛ

Odasefoi hiɔ shi yɛ Biblia famɔ akɛ, ‘abote gbãla mli yɛ Nuŋtsɔ lɛ mli pɛ’ lɛ naa, ni no tsɔɔ akɛ esa akɛ amɛkɛ mɔ ko ni yɔɔ amɛjamɔ lɛ mli lɛ nɔŋŋ ahi shi. (1 Korintobii 7:39) Famɔ nɛɛ damɔ Biblia lɛ nɔ, ni sɛɛnamɔ hu yɛ he. Ákɛ nɔkwɛmɔnɔ lɛ, yɛ afi 2010 lɛ, sane ko ni je kpo yɛ wolo ko (Journal of Marriage and Family) mli lɛ tsɔɔ akɛ, “kɛ́ gbalashihilɛ mli hefatalɔi hiɛ jamɔŋ hemɔkɛyeli kome, ni amɛfeɔ nɔ kome lɛ, ehãa amɛgbãla lɛ sɔɔ waa. *

Kɛ̃lɛ, Odasefoi wooo amɛjamɔŋbii lɛ hewalɛ akɛ amɛshi amɛhefatalɔi ni jeee Odasefoi lɛ. Biblia lɛ kɛɔ akɛ: “Shi mɛi ni eshwɛ lɛ, mi, hɛɛ, mi, jeee Nuŋtsɔ lɛ, miikɛɛ amɛ akɛ: Kɛ́ nyɛmi nuu ko yɛ ŋa ni heee yeee, ni yoo lɛ ekpɛlɛ akɛ ekɛ lɛ baahi shi lɛ, ekashi lɛ; ni kɛ́ yoo ko hu yɛ wu ni heee yeee, ni nuu lɛ ekpɛlɛ akɛ ekɛ lɛ baahi shi lɛ, yoo lɛ akashi ewu lɛ.” (1 Korintobii 7:12, 13.) Yehowa Odasefoi hiɔ shi yɛ famɔ nɛɛ naa.

^ kk. 17 Kwɛmɔ wolo ni ji Caesar and Christ, baafa 647.

^ kk. 18 Kwɛmɔ bɔ ni abua sane ni ji Jehovah’s Witnesses of Moscow and Others v. Russia, baafa 26-27, kuku 111 lɛ ahã.

^ kk. 20 Kwɛmɔ wolo ni ji Journal of Marriage and Family, Volume 72, Number 4, (August 2010), baafa 963.

Ekrokomɛi Hu Nɛ

SANEKPAKPA NI JƐ NYƆŊMƆ ŊƆƆ!

Te Oweku lɛ Aaafee Tɛŋŋ Aná Miishɛɛ?

Yehowa, ni ji miishɛɛ Nyɔŋmɔ lɛ miisumɔ ni wekui fɛɛ aná miishɛɛ. Kanemɔ koni ona bɔ ni Biblia lɛ eye ebua wumɛi, ŋamɛi, fɔlɔi, kɛ bii.