Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

Mɛni Obaanyɛ Ofee Koni Ohiɛ Amɛ Osafo Hee Lɛ?

Mɛni Obaanyɛ Ofee Koni Ohiɛ Amɛ Osafo Hee Lɛ?

NYƐMI NUU ko ni atsɛɔ lɛ Allen * lɛ wie akɛ: “No mli lɛ, ewa kɛhã mi akɛ mafã kɛba biɛ. Mileee kɛji abaahere mi kɛ miishɛɛ ni maná nanemɛi hei.” Allen efã kɛtee asafo ko ni kɛ he ni tsutsu ko lɛ eyɔɔ lɛ teŋ jekɛmɔ fe kilomitai 1,400.

Kɛ́ ofã kɛtee asafo kroko mli lɛ, ekolɛ bo hu obaanu he nakai nɔŋŋ. Mɛni baaye abua bo ni ohiɛ amɛ osafo hee lɛ? Kɛ́ onáaa osafo hee lɛ mli hilɛ mlɛo lɛ, mɛni obaanyɛ ofee? Ni kɛ́ mɔ ko efã kɛba osafo lɛ mli ehee lɛ, mɛni obaanyɛ ofee kɛye obua lɛ?

MƐNI OBAANYƐ OFEE KONI OHIƐ AMƐ OSAFO HEE LƐ NI OHE AWA YƐ ANƆKWALE LƐ MLI?

Susumɔ nɔkwɛmɔnɔ nɛɛ he okwɛ: Kɛ́ afã tso ko kɛjɛ he ni eyɔɔ lɛ ni ayadu yɛ he kroko lɛ, bei pii lɛ egbaa tso lɛ naa, ejaakɛ kɛ́ aafã lɛ, afolɔɔ eshishifã lɛ eko koni anyɛ akɛya he ni ayaadu yɛ lɛ. Kɛ́ ayadu tso lɛ yɛ he kroko lɛ, esa akɛ etsɛ̃ shishifãi hei oya nɔŋŋ. Yɛ gbɛ ni tamɔ nakai nɔŋŋ nɔ lɛ, kɛ́ ofã kɛtee asafo kroko mli lɛ, ekolɛ okɛ naagbai komɛi baakpe. Yɛ otsutsu asafo lɛ mli lɛ, kɛ́ wɔɔwie lɛ, oshishifãi emɔ shi, ejaakɛ oyɛ nanemɛi pii ni oshwɛɛɛ amɛhe kwraa, ni oto gbɛjianɔ pɔtɛɛ ko ni otsɔɔ nɔ ojáa Yehowa. Shi agbɛnɛ lɛ, esa akɛ oná shishifãi hei, koni asafo hee lɛ mli hilɛ aŋɔɔ onaa. Mɛni baaye abua bo ni onyɛ ofee nakai? Esa akɛ okɛ Biblia mli shishitoo mlai atsu nii. Hã wɔsusu shishitoo mlai nɛɛ ekomɛi ahe wɔkwɛ.

Mɔ ni kaneɔ Nyɔŋmɔ Wiemɔ lɛ daa lɛ, “etamɔ tso ni atɛo yɛ fai atoi, ni woɔ eyibii yɛ ebe lɛ mli, ni eyibai kpooŋ, ni nɔ fɛɛ nɔ ni efeɔ lɛ shwereɔ.”​Lala 1:1-3.

Bɔ ni nu he hiaa tso koni eya nɔ eda lɛ, nakai nɔŋŋ esa akɛ Kristofonyo hu akane Nyɔŋmɔ Wiemɔ lɛ daa koni wekukpaa ni yɔɔ ekɛ Yehowa teŋ lɛ mli awa. No hewɔ lɛ, yaa nɔ okane Biblia lɛ daa, ni oya asafoŋ kpeei be fɛɛ be. Yaa nɔ ofee weku jamɔ kɛ aŋkro nikasemɔ daa. Nɔ fɛɛ nɔ ni ofee koni wekukpaa ni yɔɔ okɛ Yehowa teŋ lɛ mli awa lɛ, feemɔ nakai nɔŋŋ yɛ asafo hee lɛ mli.

“Mɔ ni hãa mɛi tɔrɔɔ lɛ, lɛ hu eeetɔ.”Abɛi 11:25.

Kɛ́ okɛ ekãa tsu shiɛmɔ nitsumɔ lɛ, ebaawo bo hewalɛ, ni etsɛŋ ni ohiɛ baamɛ. Asafoŋ onukpa ko ni atsɛɔ lɛ Kevin lɛ wie akɛ: “Nɔ ni ye ebua mi kɛ miŋa titri ji, be ni wɔtee asafo hee lɛ mli etsɛɛɛ lɛ, wɔkɛ wɔhe wo gbɛgbalɔi awamɔ nitsumɔ lɛ mli.” Ekɛfata he akɛ: “Etsɛɛɛ ni wɔbale nyɛmimɛi lɛ, gbɛgbalɔi lɛ, kɛ shikpɔŋkuku lɛ.” Nyɛmi nuu ko ni atsɛɔ lɛ Roger ni fã kɛtee he ko ni kɛ he ni eyɔɔ tsutsu lɛ jekɛmɔ fe kilomitai 1,600 lɛ wie akɛ: “Nɔ ni fe fɛɛ ni obaanyɛ ofee koni osafo hee lɛ mli hilɛ aŋɔɔ onaa ji, ni obaafɔ shiɛmɔyaa. Agbɛnɛ hu, hã asafoŋ onukpai lɛ ale akɛ obaasumɔ ni oye obua yɛ gbɛ fɛɛ gbɛ ni he baahia nɔ, tamɔ Maŋtsɛyeli Asa lɛ nɔ saamɔ nɛkɛ. Aloo kɛ́ mɔ ko nyɛɛɛ ebatsu enifeemɔ he nii yɛ asafoŋ kpeei ashishi lɛ, obaasumɔ ni okɛ ohe ahã. Kɛ́ oyɛ tsɔne lɛ, obaanyɛ oyawo mɔ ko kɛba asafoŋ kpeei. Kɛ́ nyɛmimɛi lɛ na akɛ oosumɔ ni okɛ ohe ashã afɔle lɛ, amɛbaaná ohe miishɛɛ.”

“Nyɛgbelea nyɛtsuii anaa gbanyaa.”2 Kor. 6:13.

Jiemɔ nyɛmimɛi asuɔmɔ kpo otsɔɔ mɛi srɔtoi fɛɛ. Be ni nyɛmi yoo ko ni atsɛɔ lɛ Melissa lɛ kɛ eweku lɛ fã kɛtee asafo kroko mli lɛ, amɛbɔ mɔdɛŋ akɛ amɛbaaná nanemɛi hei. Ewie akɛ: “Wɔkɛ nyɛmimɛi  lɛ gbaa sane yɛ Maŋtsɛyeli Asa lɛ nɔ dani ajeɔ kpeei ashishi kɛ be ni akpa fɛɛ. Enɛ hãa wɔnáa be ni wɔkɛ amɛ gbaa sane moŋ fe ni wɔbaaŋa amɛ pɛ kɛkɛ.” Nakai ni amɛfee lɛ ye ebua amɛ ni amɛle nyɛmimɛi lɛ agbɛ́i oya. Kɛfata he lɛ, amɛfee nyɛmimɛi lɛ gbɔ, ni no hã amɛná nanemɛi hei. Melissa kɛfata he akɛ: “Wɔhe nyɛmimɛi lɛ afon nɔmbɛs, ni amɛ hu amɛhe wɔnɔ, ni enɛ hã efee mlɛo akɛ amɛbaatswa wɔ ni amɛkɛ wɔ afee ekome kɛsɔmɔ Yehowa loo kɛfee nibii krokomɛi.”

Kɛ́ ewa kɛhã bo akɛ okɛ mɛi ni oleee amɛ lɛ baagba sane lɛ, nibii bibii komɛi yɛ ni obaanyɛ ofee. Akɛ nɔkwɛmɔnɔ lɛ, feemɔ ohiɛ ŋmɔlɔŋmɔlɔ be fɛɛ be, kɛ́ onuuu he akɛ ofee nakai po. Kɛ́ oŋmɔ otsɔɔ mɛi lɛ, amɛbaabɛŋkɛ bo. Biblia lɛ kɛɛ, kɛ́ ‘wɔtse wɔhiɛ wɔhã mɛi lɛ, wɔtsui mii shɛɔ ehe.’ (Abɛi 15:30) Nyɛmi yoo ko ni atsɛɔ lɛ Rachel, ni fã kɛjɛ he ni eda yɛ ni eyahi he ko shɔŋŋ lɛ hu wie akɛ: “Mihiɛ gboɔ. Bei komɛi lɛ, ja mimia mihiɛ dani minyɛɔ mikɛ nyɛmimɛi ni yɔɔ misafo hee lɛ mli lɛ gbaa sane. Mikwɛɔ akɛ mana mɔ ko yɛ Maŋtsɛyeli Asa lɛ nɔ ni ta shi ekome too ni ekɛ mɔ ko egbaaa sane. Ekolɛ mɔ lɛ hu hiɛ gboɔ tamɔ mi.” Mɛni hewɔ okɛfeee oti ni ma ohiɛ akɛ, be fɛɛ be ni obaaya asafoŋ kpeei lɛ, okɛ mɔ hee ko baagba sane dani aje shishi loo be ni akpa?

Ekolɛ osumɔɔ ni okɛ mɛi hei agba sane. Shi be ni be shwieɔ mli lɛ, ekolɛ onaŋ mɛi nɛɛ akɛ mɛi hei dɔŋŋ. No hewɔ lɛ, ehe baahia ni obɔ mɔdɛŋ waa ni oya nɔ okɛ mɛi krokomɛi abɔ naanyo.

Kɛ́ afã tso ko kɛjɛ he ni eyɔɔ lɛ ni ayadu yɛ he kroko lɛ, egbaa tso lɛ naa, shi be ni be shwieɔ mli lɛ, enáa shishifãi hei

EKOLƐ EBAAHE BE

Tsei komɛi yɛ ni kɛ́ ayadu yɛ he kroko lɛ, eheɔ be dani amɛshishifãi mɔɔ shi. Nakai nɔŋŋ esoro mɔ fɛɛ mɔ kɛ be ni eheɔ lɛ dani ehiɛ mɛɔ esafo hee lɛ. Ekolɛ kɛjɛ be ni ofã kɛtee osafo hee lɛ mli lɛ, be saŋŋ eshwie mli, shi loloolo lɛ, onáaa nibii mlɛo. Kɛ́ nakai eji lɛ, Biblia mli shishitoo mlai ni nyiɛ sɛɛ nɛɛ baanyɛ aye abua bo:

“Nyɛkahãa ekpakpafeemɔ miitɔa wɔ, ejaakɛ kɛ́ efeemɔ etɔɔɔ wɔ lɛ, wɔbaakpa eyibii yɛ be ni sa mli.”​Gal. 6:9.

Hã ehi ojwɛŋmɔ mli akɛ, ekolɛ ebaahe be kplaŋŋ fe bɔ ni okpaa gbɛ po dani ohiɛ baamɛ osafo hee lɛ. Akɛ nɔkwɛmɔnɔ lɛ, maŋsɛɛ sɔɔlɔi ni etee Gilead skul lɛ ateŋ mɛi pii hiɔ he ni ahã amɛsɔmɔɔ yɛ lɛ afii babaoo dani amɛkuɔ amɛsɛɛ amɛyasaraa amɛwekumɛi kɛ nanemɛi yɛ amɛmaŋ. Enɛ hãa amɛleɔ nyɛmimɛi ni yɔɔ he ni amɛsɔmɔɔ yɛ lɛ kɛ bɔ ni afeɔ nibii ahãa yɛ jɛmɛ lɛ jogbaŋŋ.

Akɛni ebaahe be dani osafo hee lɛ mli hilɛ baaŋɔɔ onaa hewɔ lɛ, esa akɛ oto otsui shi. Nyɛmi nuu ko ni atsɛɔ lɛ Alejandro, ni efã kɛtee hei srɔtoi lɛ le enɛ jogbaŋŋ. Ewie akɛ: “Be ni wɔfã kɛba asafo ni wɔyɔɔ mli amrɔ nɛɛ mli lɛ, miŋa wie akɛ, ‘Mibɛ naanyo yɛ asafo nɛɛ mli!’” Alejandro kai lɛ akɛ, nakai nɔŋŋ ewie yɛ asafo ni amɛjɛ mli amɛba lɛ he afii enyɔ ni eho nɛ be ni amɛtee jɛmɛ ehee lɛ. Shi akɛni ená nyɛmimɛi lɛ ahe miishɛɛ hewɔ lɛ, be ni amɛshiɔ lɛ, ená nanemɛi ni bɛŋkɛ lɛ kpaakpa yɛ jɛmɛ.

“Kaakɛɛ akɛ: Mɛɛba ni tsutsu gbii lɛ hi fe enɛɛmɛi nɛɛ? ejaakɛ jeee nilee okɛbiɔ enɛ nɛɛ.”Jaj. 7:10.

Okɛ osafo hee lɛ akato osafo momo lɛ he. Akɛ nɔkwɛmɔnɔ lɛ, ekolɛ obaayɔse akɛ nyɛmimɛi ni yɔɔ osafo hee lɛ mli lɛ sumɔɔɔ wiemɔ pii loo etamɔ nɔ ni amɛwieɔ kpookpoo. Yɛ nɔ najiaŋ ni okɛ ojwɛŋmɔ baama enɛɛmɛi anɔ lɛ, okɛ ojwɛŋmɔ ama amɛsui kpakpai lɛ anɔ, tamɔ bɔ ni oosumɔ ni amɛfee  amɛhã bo lɛ nɔŋŋ. Bei pii lɛ, wɔkɛɔ akɛ wɔsumɔɔ “nyɛmimɛi asafo muu lɛ fɛɛ.” Shi kɛ́ wɔfã kɛtee asafo kroko mli lɛ, wɔnáa hegbɛ kɛtsɔɔ kɛji wɔsumɔɔ amɛ fɛɛ lɛɛlɛŋ.​—1 Pet. 2:17.

“Nyɛyaa nɔ nyɛbia, ni abaahã nyɛ.”​Luka 11:9.

Yaa nɔ osɔle ni Yehowa aye abua bo. Asafoŋ onukpa ko ni atsɛɔ lɛ David lɛ wie akɛ: “Okɛ hiɛwaa akatse. Nibii pii yɛ ni kɛ́ Yehowa yeee ebuaaa wɔ lɛ, wɔnyɛŋ wɔfee. No hewɔ lɛ, sɔlemɔ yɛ he!” Rachel, ni wɔtsĩ etã kɛtsɔ hiɛ lɛ wie nɔ ko ni tamɔ nakai. Ekɛɛ: “Kɛ́ mi kɛ miwu lɛ nu he akɛ etamɔ nɔ ni wɔtse wɔhe yɛ nyɛmimɛi lɛ ahe lɛ, wɔsɔleɔ wɔhãa Yehowa yɛ he ni wɔkɛɔ lɛ akɛ, ‘Ofainɛ kɛ́ wɔmiifee nɔ ko ni hãaa nyɛmimɛi lɛ anyɛ abɛŋkɛ wɔ lɛ, hã wɔle.’ No sɛɛ lɛ, wɔbɔɔ mɔdɛŋ akɛ wɔkɛ nyɛmimɛi lɛ baabɔ waa fe tsutsu lɛ.”

Fɔlɔi, kɛ́ ewa kɛhã nyɛbii lɛ akɛ amɛkɛ nyɛmimɛi ni yɔɔ nyɛsafo hee lɛ mli lɛ baabɔ naanyo lɛ, nyɛkɛ amɛ afea ekome kɛsɔlea yɛ he, ni nyɛfea nibii ni baahã amɛná hegbɛ amɛkɛ nyɛmimɛi lɛ abɔ.

YE OBUA MƐI NI EBA EHEE LƐ NI AMƐHIƐ AMƐ

Mɛni obaanyɛ ofee kɛye obua mɛi hei ni efã kɛba osafo lɛ mli lɛ? Kɛ́ amɛba nɔŋŋ lɛ, okɛ amɛ abɔ naanyo. Bi ohe akɛ, ‘Eji mi mifã kɛtee asafo kroko mli kulɛ, mɛni masumɔ ni nyɛmimɛi lɛ afee amɛhã mi?’ Enɛ baaye abua bo ni ona nɔ ni obaanyɛ ofee kɛwa amɛ. (Mat. 7:12) Ani obaanyɛ ohã amɛbafata oweku lɛ he kɛfee weku jamɔ loo koni nyɛkwɛ JW Broadcasting daa nyɔɔŋ nifeemɔi lɛ eko? Ani obaanyɛ ohã amɛfata ohe kɛya shiɛmɔ? Ani obaanyɛ ofɔ̃ amɛ nine kɛba oshĩa lɛ kɛhã niyeli? Kɛ́ ofee nakai lɛ, amɛhiɛ kpaŋ nɔ kɔkɔɔkɔ. Mɛni ekoŋŋ obaanyɛ ofee ohã mɛi hee lɛ?

Nyɛmi nuu ko ni atsɛɔ lɛ Carlos lɛ wie akɛ: “Be ni wɔfã kɛba wɔsafo hee lɛ mli lɛ, nyɛmi yoo ko tsɔɔ wɔ shwapoi ni wɔbaanyɛ wɔná nibii ofoo yɛ wɔhe. Enɛ ye ebua wɔ waa.” Kɛ́ hulu tsoɔ waa, fɛ̃i yeɔ, loo nugbɔ fɔɔ nɛmɔ yɛ he ni nyɛyɔɔ lɛ, shi ebɛ lɛ nakai yɛ he ni mɛi hee lɛ jɛ lɛ, obaanyɛ otsɔɔ amɛ atadei ni sa ni amɛbaanyɛ amɛwo. Amɛhiɛ baasɔ enɛ waa. Obaanyɛ ogba amɛ nyɛkutso lɛ he sane loo otsɔɔ amɛ nibii ni akutsoŋbii lɛ heɔ amɛyeɔ koni no aye abua amɛ yɛ shiɛmɔ nitsumɔ lɛ mli.

OMƆDƐŊBƆI LƐ BAAWO YIBII KPAKPAI

Allen, ni wɔtsĩ etã yɛ sane nɛɛ shishijee lɛ ehi esafo hee lɛ mli fe afi. Ewie akɛ: “Shishijee mli lɛ, mináaa lɛ mlɛo kwraa akɛ mikɛ nyɛmimɛi lɛ baabɔ naanyo. Shi amrɔ nɛɛ, minaa amɛ tamɔ miwekumɛi, ni mimii eshɛ mihe.” Allen na akɛ fã ni efã lɛ hãaa enanemɛi aŋmɛɛ lɛ. Moŋ lɛ, ehã ená nanemɛi hei, ni ŋwanejee ko bɛ he akɛ, ekɛ amɛteŋ naanyobɔɔ lɛ baahi shi ewala gbii fɛɛ.

^ kk. 2 Atsake gbɛ́i lɛ ekomɛi.